Skip to Content

62 Views

میرێكی  سویدی له‌ بیست ساڵی ته‌مه‌نیدا …  شاعیری سۆدانی حاته‌م ئه‌لئنساری

میرێكی سویدی له‌ بیست ساڵی ته‌مه‌نیدا … شاعیری سۆدانی حاته‌م ئه‌لئنساری

Be First!
by November 6, 2017 General, Poems
image_print


شاعیری سۆدانی حاته‌م ئه‌لئنساری
و: نه‌ژاد عزیز سورمێ‌
…..

كه‌س له‌ میرێكی سویدی بیست ساڵان به‌خته‌وه‌رتر نییه‌
ئه‌و له‌ هه‌موو به‌رپرسیاریه‌تێك به‌ دووره‌
ئه‌وه‌ی له‌سه‌ریه‌تی بیكا ، ئه‌وه‌یه‌ به‌خته‌وه‌ر بێ‌ .

كه‌ زه‌رده‌مسكه‌ ده‌بێته‌وه‌ ،
دونیا زه‌رده‌مسكه‌ ده‌بێته‌وه‌ ..
كه‌ پێده‌كه‌نێ‌ ،
دونیا پێده‌كه‌نێ‌ ..
كه‌ سه‌ما ده‌كا ،
دونیا گۆرانی ده‌ڵێ‌ ..
كه‌ ژنیش دێنێ‌
دونیا وێنه‌ی ئاهه‌نگی زه‌ماوه‌نده‌كه‌ی
له‌ ڕیخۆڵه‌ی ته‌له‌فۆنه‌ زیره‌كه‌كه‌یدا دا ده‌كا ..

قۆزه‌ به‌ گوێره‌ی ڕه‌گه‌زی سپییه‌وه‌
دوو چاوی شین .. قژ زه‌رد ..
باڵا به‌رز
شووش ..
ڕووخۆش و ڕۆحساز
به‌ ئه‌ده‌ب ، یان ئاوه‌ها ده‌رده‌كه‌وێ‌ !
ڕێكپۆش ته‌نانه‌ت ئه‌گه‌ر تیشێرتی
یانه‌ی (مالمۆ ئێف ئێف) یش بپۆشێ‌
مه‌له‌وانی و تێنس ده‌زانێ‌
ئه‌سپسواری و لامبۆرگینی سواریش ده‌زانێ‌
هه‌روه‌ها چاوشین و پرچ زه‌رد سواریش ..
به‌ڵام وه‌ك دووپشكه‌ ڕه‌شه‌ بچووكه‌كان .

به‌شی له‌ ته‌رخانكراوی بنه‌ماڵه‌ی پادشایی
له‌ خه‌می هه‌ژاری و
شه‌ونخوونی سامان ده‌یپارێزێ‌ .

ئه‌گه‌ر له‌ یه‌كئه‌نوایی ئاوازی به‌فردا هه‌ستی به‌ دڵته‌نگی كرد
ده‌توانێ‌ سواری یه‌كه‌مین فڕۆكه‌ی به‌رده‌ستی بێ‌ و
یه‌كسه‌ر بچێته‌ پۆیرتریكۆ
له‌وێ‌ خۆلیا سلیڤا ژه‌نیاری ماریمبا و
خوان ئه‌نتۆنیۆی فرۆشیاری ماریوانا و
پابلۆ خۆسێی فرۆشیاری هه‌یكه‌له‌ برۆنزییه‌كان و
ماریا لۆپیری فرۆشیاری بیره‌وه‌رییه‌ گه‌رمه‌كان
له‌ پێشوازیدا ده‌بن ..
وڵاته‌كه‌ی له‌ خۆشیدایه‌
خۆشه‌ویست و میهره‌بانه‌ ..
نیازی نییه‌ گۆی زه‌وی هه‌ڵلووشێ‌
په‌یوه‌ندی له‌گه‌ڵ زۆربه‌ی ده‌وڵه‌تاندا باشه‌
تا ڕاده‌یه‌ك
به‌ سنگێكی فراوانه‌وه‌
پێشوازی له‌ بڕوادار و
بێ‌ بڕوایان ده‌كا
هه‌روه‌ها ئه‌و ژنانه‌ی
له‌ نزماییان نائومێد بوون ..

كه‌واته‌ پێویست ناكات نیگه‌ران بین بۆی
هه‌میشه‌ باشه‌
به‌ كوێرایی چاوی
ئه‌ستێره‌ی نیبیرۆ ..
كه‌س له‌ میرێكی سویدی بیست ساڵان
به‌ختیارتر نییه‌
هه‌موو ده‌یانه‌وێ‌ به‌ شادی بیبینن
له‌ پێش هه‌مووانه‌وه‌ خوا .

سه‌رچاوه‌ : http://www.kikahmagazine.com/?p=5933

Previous
Next

Leave a Reply