Skip to Content

77 Views

جاكۆمۆ كازانۆڤایه‌كی لنگه‌وقووچ … ئیسماعیل حه‌مه‌ئه‌مین

جاكۆمۆ كازانۆڤایه‌كی لنگه‌وقووچ … ئیسماعیل حه‌مه‌ئه‌مین

Be First!
by February 9, 2018 General, Literature
image_print

مرۆڤ ئازاده‌، به‌ڵام ئازاد نابێت گه‌ر هاتوو بڕوای به‌ ئازادبوونی خۆی نه‌بێت…

(جاكۆمۆ كازانۆڤا – چیرۆكی ژیانم – 1787 )*

من نازانم چه‌نده‌ ڕۆژه‌ له‌م خانه‌ یه‌ك ژووره‌مدا خۆم قوشمه‌ڵه‌ كردووه‌، خۆم له ‌دونیا خیش كردووه‌، ده‌هری و بێزار بووم له‌م گیرخواردنه‌م له‌م وڵاته‌ تاریك و سارد و پڕ مافیا و جه‌رده‌ و نه‌خۆشی سفلس و گۆناریایه‌، كه‌ناوی سۆڤیه‌ته‌ ‌ و ئێستاش جگه‌ له‌ مرۆڤی سه‌رخۆش و دز و ژنی هه‌رزان نه‌بێت هیچی له‌دووی خۆی جێنه‌هیشتووه‌. ته‌نانه‌ت ناچمه‌ بالكۆنه‌كه‌ش، فیشی ته‌لفۆنه‌كه‌شم ده‌رهێناوه‌‌. هه‌موو هه‌فته‌كه‌م ‌ به‌جگه‌ره‌كێشان و ڤۆدكا خواردنه‌وه‌ و گوێگرتن له‌و كاسێتانه‌ به‌سه‌ر بردووه‌ كه‌ من و یولیا یان چاكتر بڵێم یولیچكه‌‌ وه‌ك چۆن نازدارم ده‌كرده‌وه‌، گوێمان لێده‌گرت. باشتر وایه‌ بڵێم من زیاتر حه‌زم لێیه‌تی، ئه‌ویش گۆرانبیژێكی بلوی ڕووسیه‌ كه‌ چه‌ند ساڵێك له‌مه‌وبه‌ر كه‌ هێشتا سۆڤیه‌ت مابوو، قه‌ده‌غه‌ بوو.
گه‌ر ئه‌م كاسێتانه‌ی (میخائیل شێفێتێنسكی)‌ له‌كاتی سۆڤێتدا به‌هه‌ر كه‌سێك بگیرایه‌ ده‌یانارده‌ (ئه‌رخه‌بیله‌كانی گولاك) یان به‌ندیخانه‌ تاریكه‌كانی هه‌واڵگیری سۆڤیه‌ت. چونكه‌ سۆڤیه‌ت ڕای وه‌هابوو؛ گۆرانی ده‌بێت هه‌ر بۆ شۆڕش و لینین و ستالین و سۆڤیه‌ت و كرێكاران بێت، گۆرانی دیكه‌ ده‌چنه‌ خانه‌ی چێژی كاپیتالیستی و دژه‌ كرێكاری و كۆمۆنیستیه‌وه‌‌. به‌ڵام له‌دوای ئه‌وه‌ی دوو ساڵ له‌مه‌وبه‌ر كۆی سۆڤیه‌ت ڕووخا، ئێستا خه‌ڵكی هه‌ناسه‌ ده‌ده‌ن، به‌ڵام به‌خراپی، زۆر به‌خراپی، خراپتر له‌به‌ندیخانه‌كه‌ی ستالین. خه‌ڵكی ده‌یانه‌وێت هه‌موو ئه‌و شتانه‌ بكه‌ن كه‌ له‌م به‌ندیخانه‌ و سه‌ربازگه‌ گه‌وره‌یه‌ لێیان قه‌ده‌غه‌ كراوه‌، هه‌ر له‌ ڤۆدكای بیانیه‌وه‌ تاوه‌كو ویسكی خواردنه‌وه‌ وجێنز له‌به‌ركردن و بنێشتی سه‌هم و ته‌نانه‌ت تاقیكردنه‌وه‌ی لێسانه‌وه‌ كۆندۆمی مۆز و شلیك و زۆریتر…به‌مشێوه‌یه‌ (میخائیل شێڤێتێنسكی ) به‌خۆی ڕیش و ده‌نگه‌ گڕه‌كه‌‌یه‌وه‌ له‌دوای هه‌ره‌سی سۆڤیه‌ت، له‌ ‌هه‌موو شوێنێك كاسێته‌كانی ده‌فرۆشرێت، به‌ڵام به‌نرخێك كه‌ خه‌ڵكی ئه‌م وڵاته‌ بۆیان ناكڕدرێت، ته‌نها مافیا و خولیگان یان بڵێین خوێڕی گه‌ڕه‌ك و پۆلیسی به‌رتیلخۆره‌كان نه‌بێت. ئه‌وانه‌ی كه هه‌ستی موزیكیان باڵایه‌ و ‌ حه‌زیان له‌ده‌نگی شێڤێتێنسكیه‌ ده‌چنه‌ ته‌نیشت كوێسكه‌كانی فرۆشتنی كاسێتی موزیك و گوێی لێ ده‌گرن. په‌رادخێكی پلاستیكی ڤۆدگای هه‌رزان به‌ده‌سته‌وه‌ ده‌گرن و له‌گه‌ڵ جگه‌ره‌ی ڕووسی به‌لالێویانه‌وه‌یه‌ كه‌ تامی پشقلی وشكه‌بوو ده‌دا، له‌وێ، گوێ له‌موزیكی دونیا ده‌گرن، وه‌ك چۆن خۆیان حه‌زده‌كه‌ن ئاوه‌های ناوی لێ بنێن؛ موزیكی دونیا…

من له‌وێ، له‌نێزیك یه‌كێك له‌و كوێسكانه‌ كه‌ ده‌كه‌وته‌ نێزیك میترۆی (زه‌لۆتی ڤارۆدا) به‌مانای ده‌رگا ئاڵتوونی، له‌وێ (یولیا)م بینی به‌هێمنی گوێیده‌گرت، لێره‌وه‌ من و یولیا یه‌كترمان ناسی و هه‌ر ئه‌و ئێواره‌یه‌ كاسێت و ڕیكۆرده‌ر و ڤۆدكا و كه‌ڵباز (باسترمه‌) و ماسی وشكه‌بوومان كڕی و پاشان چووین بۆ خانه‌كه‌ی خۆم و تا گه‌یشتینه‌ خانه‌كه‌مان نیو بوتڵ ڤۆدگامان خوارده‌وه‌ و هه‌ر چووینه‌ ژووره‌وه‌ خێرا یه‌كه‌مین ئه‌كتی سێكسمان له‌موبه‌قه‌كه‌دا‌ كرد. ئه‌و ڕووی له‌ په‌نجه‌ره‌كه‌ بوو كه ‌ده‌كه‌وته‌ سه‌ر ترامه‌كه‌ و به‌پێوه‌ نمریه‌كی خێرامان ڕاكێشا، هاواری من و ناڵه‌ی یولیا زوو زوو تێكه‌ڵی خڕوهوڕی ترامه‌ سۆڤیه‌تیه‌كه‌ بوو كه‌ له‌زمه‌نی ستالینه‌وه‌ ته‌قه‌ته‌قێتی. تا ئێستاش وه‌ك حه‌زیایه‌كی پیریی نوزه‌ لێبڕاو به‌سه‌ر هێڵه‌ ژه‌نگاویه‌كه‌ خۆی ڕاده‌كێشێت، جارجاره‌ش له‌كار ده‌كه‌وێت، زۆر جاریش سه‌رخۆشێك ده‌كات به‌دوو له‌ته‌وه‌، كه‌ له‌سه‌ر هێڵه‌كان له‌تاریكیدا خه‌وی لێ كه‌وتووه‌، چونكه‌ زۆربه‌ی كات گڵۆپی پێشه‌وه‌ی ئه‌م ترامه‌ مۆدێل سۆڤێتیه‌ له‌پڕ له‌كار ده‌كه‌وێت و هه‌فته‌یه‌كی ده‌وێت تاوه‌كو گڵۆپی تازه‌ی بۆ داده‌نێن. ده‌نگی لێخشاندنی ناوگه‌ڵی هه‌ردووكمان تێكه‌ڵی ده‌نگی لێخشاندنی تایه‌ ئاسنینه‌ ژه‌نگاویه‌كان ده‌بوو له‌سه‌ر هێڵه‌ ژه‌نگاوییه‌كه‌، هاواری چێژیمان له‌گه‌ڵ جیڕوهوڕی وه‌ستانی ترامه‌ پیره‌كه‌ به‌رزتر ده‌بۆوه‌ و له‌گه‌ڵ وه‌ستانیدا تێبینیمكرد نه‌فه‌ره‌كان داده‌به‌زین و له‌و چركه‌ ساته‌دا، هه‌ردووكمان ئاومان هاته‌وه‌.

ئه‌م ماوه‌یه‌ به‌رده‌وام گوێ له‌ شێڤێتنسكی ده‌گرم، به‌تایبه‌ت ئه‌وه‌ ماوه‌یه‌كه‌ له‌گه‌ڵ یولیادا نێوانمان تێكچووه‌، چیتر به‌لامه‌وه‌ گرنگ نییه‌ بۆچی زیز بووه‌ لێم. ته‌نها ئه‌وه‌ نه‌بێت، هه‌فته‌یه‌ك له‌مه‌وبه‌ر له‌گه‌ڵ دایكیدا هات، هه‌ستمكرد له‌دوای ئه‌وه‌ نێوانمان به‌ره‌و شتێكی دیكه‌ ده‌ڕۆیشت، كه‌ نه‌مده‌توانی ناوی ئه‌شقی لێ بنێم. ئاوهاتنه‌وه‌م وه‌ك ئه‌وه‌ وه‌ها بوو ژه‌هرێك بڕێژم، نه‌ك خه‌ونێك ببینم. من هه‌موو جارێك كه له‌گه‌ڵ ژنێكدا ده‌خه‌وم وه‌ها هه‌ستده‌كه‌م خه‌ونێك ده‌بینم، كه‌ ده‌بینم ڕه‌حه‌تده‌بێت و چاوه‌كانی پڕ چێژ ده‌بن و هه‌ڵده‌گه‌ڕێنه‌وه‌، وه‌ها هه‌ستده‌كه‌م جوانترین چركه‌ساتن‌ ‌ كه‌ دووباره‌ نابنه‌وه‌. هه‌ر بۆیه‌ ژن بۆته‌ خولیام كاتێك ده‌گه‌نه‌ ترۆپكه‌ چێژ، له‌ڕاستیدا من دووجار ده‌گه‌مه‌ ترۆپكه‌ چێژ، یه‌كه‌میان له‌گه‌ڵ مێینه‌ و دوایش وه‌ك نێرینه‌یه‌ك كه‌خۆم هاوار بۆ ئه‌ستێره‌كان ده‌كه‌م.

له‌وه‌ته‌ی هاتوومه‌ته‌ ناو ئه‌م په‌رستگا ‌ دیۆنیسۆسیه‌وه، ئه‌م وێرانه‌ سۆڤتیه‌وه‌، ئه‌م په‌رستگا سلاڤیه‌ سه‌یره‌وه‌، وه‌ها هه‌ستده‌كه‌م سه‌مایه‌ك ده‌كه‌م هیچ نێرینیه‌ك نایكات و توانای كردنی نییه‌، چونكه‌ زۆربه‌ی پیاوه‌كانی هاوڕێم وه‌ها هه‌ستده‌كه‌ن چه‌نده‌ سێكس بكه‌ن ئه‌وه‌نده‌ چێژیان له‌ژیان وه‌رگرتووه‌، له‌ڕاستیدا ئه‌وان وه‌ك ئه‌وه‌ وه‌هایه‌ ته‌نها خۆیان بگێن، چونكه‌ ته‌نها خۆیان له‌گه‌ڵ خۆیاندا ڕه‌حه‌تده‌بن و جه‌سته‌ی ئه‌ویتری مێینه‌ ته‌نها لكاندنێكی دیكه‌ی نێرینه‌یه‌ بۆ چێژێكی چه‌ند چركه‌یی. وه‌ك ئه‌وه‌ وه‌هایه‌ له‌گه‌ڵ به‌شێكی دیكه‌ی خۆیاندا سێكس بكه‌ن، وه‌ك ئه‌و ئاژه‌ڵه‌ وه‌هان كه‌ له‌گریكی كۆندا ناوی (ئاندرۆجین)ه‌ گوایه‌ مرۆڤ سه‌ره‌تا هه‌ردوو ڕه‌گه‌زه‌ بووه‌ و دوایی خواوه‌نده‌كان سزایانداوه‌ و كردوویانه‌ به‌دووله‌ته‌وه‌، له‌و ڕۆژه‌وه گریكه‌ پیره‌كان له‌و بڕوایه‌دان كه ‌ئه‌م دووله‌ته‌ به‌دووی یه‌كتردا ده‌گه‌ڕێن. به‌ڵام زۆربه‌ی پیاوه‌كانی هاوڕێم هاونیشتمانه‌ قالۆنچه‌كانم، ته‌نانه‌ت وه‌ك ئه‌ندرۆجینێك نا، به‌ڵكو وه‌ك هۆمۆجینێك له‌یه‌ك جه‌سته‌دا له‌گه‌ڵ خۆیاندا ڕه‌حه‌ت ده‌بن، چونكه‌ ئه‌ویتری مێینه‌ لای ئه‌وان بوونی نییه‌، چێژیان یه‌ك لایه‌نه‌یه به‌بێ خه‌ونبینین،‌ ته‌نها چێژی نێرینه‌یه‌ كه‌له‌گه‌ڵ خۆیدا ده‌ستپه‌ڕ ده‌كات،‌ ‌ وه‌ك ئه‌وه‌ وه‌هایه‌ خۆ ڕه‌حه‌تكردنێك بێت له‌گه‌ڵ پارچه‌یه‌ك جه‌سته‌ی خۆتدا كه‌دوایی هیچ به‌جێ ناهێڵێت، وه‌ك بونه‌رێكی هۆمۆجین له‌گه‌ڵ خۆیاندا ده‌خه‌ون، چونكه‌ له‌كۆمه‌ڵگه‌یه‌كی (هۆمۆ) ه‌وه‌ هاتوون. هه‌میشه‌ ژن و پیاو جیاكراونه‌ته‌وه‌ و هۆمۆن به‌مانای وشه‌، هه‌میشه‌ پیاوه‌كان به‌تۆپه‌ڵ له‌گه‌ڵ یه‌كتریدان و ژنه‌كانیش هه‌روان، ئاوه‌ها ژنه‌كان له‌ئه‌كتی سێكسوالیدا به‌شێكن له‌پیاو و ده‌بنه‌ حه‌زی پیاو و خۆیان نین، ئاوه‌ها هۆمۆیه‌كن بۆئه‌به‌د.

من خۆم واهه‌ستده‌كه‌م كه‌ په‌یوه‌ندی من له‌گه‌ڵ خانماندا جیاوازه‌، به‌شێكه‌ له‌ دۆزینه‌وه‌ی مێینه‌یی خۆم له‌جه‌سته‌ی ئه‌واندا، به‌شێكه‌ له‌دۆزینه‌وه‌ی دوورگه‌ هێمنه‌كانی مێیینه‌ كه‌ پیاو پێویستی به‌ زینده‌گیبوونێكی باڵایه‌ له‌ڕۆحیدا بۆئه‌وه‌ی پێی بگات. ئه‌مه‌ش ئه‌و ڕژێنه‌یه‌ كه ‌مێینه‌ ئاشقه‌كان له‌ ژێرپێستی منه‌وه‌ بۆنی ده‌كه‌ن، بۆنی ئه‌و حه‌زه‌ ده‌كه‌ن كه‌ مێینه‌یی ئه‌وان ده‌گه‌شێنێته‌وه‌، هه‌ر بۆیه‌ یه‌كسه‌ر ئه‌م كیماگه‌رییه‌ سه‌یره‌ له‌گه‌ڵ ئه‌و ژنانه‌دا وه‌ك شه‌پۆلی ڕادوێیی له‌سه‌یركردن و هه‌ڵسوكه‌تی نه‌ستیانه‌ی هه‌ردووكماندا ده‌رده‌كه‌وێت…هه‌ربۆیه‌ دایكی یولیا بێئه‌وه‌ی به‌خۆی بزانێت زوو زوو هه‌ناسه‌ی قووڵی هه‌ڵده‌كێشا و له‌گه‌ڵ به‌رزبوونه‌وه‌ی سنگه‌ پانه‌كه‌ی كه‌ له‌سنگی كۆنتێسه‌یه‌كی سه‌ده‌ی حه‌ڤده‌ی كۆشكه‌كانی قه‌یسه‌ر ڤلادیمه‌ر ده‌چوو. ئاوه‌ها درزی مه‌مكه‌كانی كه‌پێده‌چوو ماوه‌یه‌كی زۆره‌ ده‌ستیان بۆ نه‌برابێت به‌رزده‌بوونه‌وه‌ و نزم ده‌بۆوه‌ و له‌گه‌ڵیشیدا دڵی‌ من زیاتر لێی ده‌دا و لێوه‌كانمی ده‌خسته‌ له‌رزینه‌وه‌، زوو زوو ده‌یگووت ؛ ئۆ بۆژه‌ مۆی….ئۆی خوایه‌ …ئۆ بۆژه‌ مۆی …له‌گه‌ڵ هه‌موو ڕسته‌یه‌كیشیدا وشه‌ی (بۆژه‌ مۆی) عه‌یارییه‌ك بوو منی شێت كردبوو چونكه‌ (بۆگ -خوا) و به‌ پیتی (گ) دانیپێدا ده‌نرا، به‌ڵام ئه‌و عه‌یارانه‌ به‌ره‌و (ژ) ده‌یبرد وه‌ك ڕسته‌یه‌كی موزیكی كه ‌هه‌زاره‌ها قه‌وزه‌ی هه‌راشی له له‌شمدا شێت ده‌كرد و به‌سیه‌كانمدا هه‌ڵده‌گه‌ڕان. من خۆم تێبینی گۆڕانی هه‌ڵسوكه‌وتی خۆمم نه‌كردبوو، به‌ڵام پێده‌چێت یولیا وورد و درشتی ئه‌م بیركردنه‌وانه‌می زانیبێت، ده‌نا به‌ڕسته‌یه‌كی كورت به‌جێینده‌هێشتم.

دایكی یولیا شه‌نگه‌ ژنێكی جوانه‌، ناوی (لودمیلا) یه‌، قاچه‌كانی وه‌ك یولیای كچی تورت و سنگی پان بوو، تورتی یولیا هی گه‌نجیه‌تیه‌تی، به‌ڵام تورتی و ڕانه‌ پته‌وه‌كانی لودمیلای دایكی هی جوانی و عه‌یارییه‌ پڕ ئه‌شقیه‌كه‌یه‌تی. له‌ڕاستیدا من حه‌زم له‌م ژنه‌ كامڵه‌ تورتانه‌یه‌، چونكه‌ ده‌زانم چه‌نده‌ به‌خشنده‌ن له‌ئه‌شقدا، به‌بێ چاوه‌ڕوانی هیچ شتێك به‌دووی چێژێكدا ده‌گه‌ڕێن كه‌ له‌هه‌موو پیاوێكدا نایدۆزنه‌وه‌. بۆنی ئه‌و پیاوانه‌ ده‌كه‌ن كه‌ پڕن له‌ئه‌شق و گه‌ڕیده‌ی جه‌سته‌ی چێژن، جۆرێكن له‌و ژنانه‌ كه ‌هه‌رگیز پیر نابن، گه‌ر جه‌سته‌شیان پیر بێت ، چێژ له‌ژێیه‌كانیاندا، له‌ دانپێدانانی وشه‌كانیاندا، له‌سه‌یركردنه‌كانیاندا بۆ ئه‌و پیاوانه‌ی هه‌ڵیانده‌بژێرن، ئه‌م چێژه‌ له‌ناو ده‌نگیاندا سه‌مای خۆی ده‌كات…
لودمیلا ته‌مه‌نی چل ساڵ ده‌بوو، به‌پانزه‌ ساڵی سكی پڕبووه‌ له‌ هاوڕێیه‌كی ئه‌ندازیاری كه‌ له‌ڕووداوی چێرنۆبلدا وه‌ك تیم بۆ پاكردنه‌وه‌ی ناوچه‌كه‌ چوو بوون بۆ شاری ( چێرنۆفسكایه‌ ) و تووشی تیشكدانه‌وه‌ی یۆرانیۆم بوو بوو، چونكه‌ جلو به‌رگه‌ سۆڤێتیه‌كانیان له‌ چله‌كانه‌وه‌ به‌هه‌مان كوالێتی خراپه‌وه‌ له‌ مه‌خزنه‌كاندا فڕێداربوون و كه‌س كۆنترۆڵی توندتۆڵی و كوالێتی نه‌كردبوو، به‌مانای له‌وكاته‌وه‌ نه‌گۆڕدرا بوو‌. پێده‌چێت ئه‌و ڕۆژه به‌په‌له‌ له‌به‌ریانكردووه‌ و به‌ره‌و ناو كارگه‌ی چرنۆبل چوو بوون، كۆی تیمه‌كه‌ تووشی تیشكدانه‌وه‌ بوون و ‌ دوای ساڵێك هه‌موویان یه‌ك له‌دوای یه‌ك به‌نه‌خۆشی له‌خه‌سته‌خانه‌ی كێیڤ مرد بوون. له‌و ساته‌وه‌ پێده‌چێت ته‌نها پیاوی هه‌ڵبژارده‌ و ڕۆمانسی به‌ جێگه‌ی لودمیلا دا تێپه‌ڕبووبێت. ئه‌مه‌ش منی زیاتر ده‌هارووژاند… ئاوه‌ها وه‌ك گورگێكی برسی، هه‌ناسه‌كانی كه‌زوو زوو عه‌یارانه‌، پێده‌چوو بۆ هارووژاندنی من هه‌ڵیده‌كێشا، ده‌مژماردن و مه‌ستیكردبووم؛ زوو زوو كه‌تابلۆیه‌كی كلاسیكی ده‌بینی ده‌یگووت؛ ئۆ بۆژه‌مۆی…

ئه‌و به‌یانییه‌ كه‌ هه‌ردووكیان یولیا و لودمیلای دایكی، هاتن بۆ لام، پاش كه‌مه‌ك دانیشتن له‌گه‌ڵ هه‌ردووكیاندا چووم بۆ مۆزه‌خانه‌یه‌ك كه‌ ناوه‌كه‌یم بیرنه‌ماوه‌، به‌ڵام پێده‌چێت مۆزه‌خانه‌ی نیشتمانی بێت، پاشان چووین بۆ كاتدراله‌كانی (سانت میخائیل) دوایش كه‌ به‌مۆمه‌وه‌ چووینه‌ ژێر زه‌مینی كاتدرالیه‌كه‌وه‌ ده‌مێك بوو یولیا له‌پێشمانه‌وه‌ چوو بووه‌ ژێر زه‌مینه‌كه‌ی كه ‌پڕی بوو له‌ قه‌شه‌ ئۆرتۆدۆكسیه‌ مۆمیاكراوه‌كان…قادرمه‌كان تاریك بوون، هه‌ر بۆیه‌ خێرا ده‌ستی لودمیلام گرت و ئه‌ویش به‌نازه‌وه‌ ده‌ستی دامێ و بزه‌یه‌كی كرد و هه‌ناسه‌یه‌كی قووڵی هه‌ڵكێشا و گووتی؛ ئۆ بۆژه‌…ئۆی خوایه‌…من هه‌ر له‌و چركه‌ ساته‌دا له‌شوێنی خۆم وه‌ستام و چاوه‌كانم نووقاند و هه‌ناسه‌دانه‌وه‌یه‌كیم هه‌ڵمژی، به‌جۆرێك كه‌سییه‌كانم پڕ بوون له‌بۆنی هه‌ناسه‌ و بۆنی سنگی لودمیلا…پێكه‌نی و گووتی؛ ئاگات له‌خۆت بێت نه‌كه‌ویت، قادرمه‌كان تاریك و سه‌ختن ….
له‌ ڕیستۆرانه‌كه‌ هه‌رسێكمان دانیشتین، بێگومان به‌به‌راوورد به‌پاره‌ی ئه‌وان ئه‌و شوێنه‌ گران بوو، به‌ڵام به‌هه‌مووی دوو دۆلاری نه‌ده‌كه‌وت له‌سه‌رم. له‌گه‌ڵ خۆمدا دایكی یولیام ناو نابوو (كۆنتێسه‌ لودمیلا) و سه‌رنجی لێو و سنگ و به‌رزبوونه‌وه‌ی درزی مه‌مكیم ده‌دا له‌كاتی هه‌ناسه‌داندا. خوماربووم به‌بۆنی لودمیلا، ئه‌و پڵنگه‌ مێینیه‌یه‌ی بۆنی ده‌كردم و بۆنم ده‌كرد، ئه‌ویش عه‌یارانه‌ باسی سۆڤیه‌تی ده‌كرد بۆمان…ئاوه‌ها كه‌دوایی ماڵئاوایی لێكردین، من غه‌مبار بووم، هه‌ستمكرد پارچه‌یه‌ك له‌دڵم ده‌بێته‌وه‌ و بۆ شوێنێكی تر كۆچده‌كات…
شه‌وه‌كه‌ی له‌ژێر كاریگه‌ری ئه‌شق و ڤۆدكا، بێئه‌وه‌ی به‌خۆم بزانم زیاتر پرسیاری لودمیلای دایكیم له‌ یولیا ده‌كرد؛ جۆری ژیانی، ئه‌شیقه‌كانی و گوێ له‌چ موزیكێك ده‌گرێت؟ چی ده‌خوێنێته‌وه‌؟ بوریس باسترناك یان گۆرگی یان پوشكین؟ چی له‌به‌رده‌كات له‌ماڵه‌وه‌؛ ڕه‌نگه‌كانی و زۆریتر؟…به‌جۆرێك به‌ره‌به‌یان دوایی ئه‌كتی سێكس یولیا م بینی له‌بالكۆنه‌كه‌ جگه‌ره‌ ده‌كێشێت و به‌تانییه‌كی له‌خۆوه‌ پێچاوه‌، كه به‌نیمچه‌ خوماری ‌لێمپرسی؛ چییه‌تی گووتی؛ هیچ…به‌ڵام به‌یانیه‌كه‌ی پێشئه‌وه‌ی بڕوات بۆ په‌یمانگاكه‌ی، منی ڕاته‌كاند و گووتی؛ تۆ به‌دفه‌ڕێكی تری وه‌ك (جاكۆمۆ كازانۆڤا) هه‌ر ژنێكی تر ده‌بینی ئه‌وه‌ی خۆتت بیرده‌چێته‌وه‌…ئه‌وه‌ی گووت و زانیم باسی لودمیلای دایكی ده‌كات، خۆم خسته‌وه‌ ژێر به‌تانیه‌كه‌ و هیچم نه‌گووت …
به‌ڵام له‌ژێر به‌تانیه‌كه‌وه پێشئه‌وه‌ی سه‌ره‌ قورسه‌كه‌م به‌ ڤۆدكا و بۆنی جه‌سته‌ی (یولچكه‌) یان وه‌ك چۆن وه‌هام بانگده‌كرد، له‌ناو ته‌متومانی خه‌ودا ونبكه‌مه‌وه‌، شه‌پۆلی وورده‌ بیر ده‌یهێنام و ده‌یبردم؛ ‌‌ یولیا ئێستا وه‌ك جاكۆمۆ كازانۆڤا ڕقی لێمده‌بێته‌وه‌، كازانۆڤایه‌ك له‌چاره‌كی یه‌كه‌می سه‌ده‌ی هه‌ژده‌ ژیاوه‌ و له‌كۆتایی هه‌مان سه‌ده‌‌دا مردووه‌. سه‌ده‌ی هه‌ژده‌ سه‌ده‌ی ڕوسۆ، ڤۆلتێر و ڕۆشنگه‌ری و شه‌ڕكردن بوو له‌گه‌ڵ خوا و نوێنه‌ره‌كانی له‌سه‌ر زه‌وی…به‌ڵام كازانۆڤا ده‌ربه‌ستی ڕۆشنكردنه‌وه‌ی كه‌س نه‌بوو، ده‌ربه‌ستی شۆڕش نه‌بوو به‌سه‌ر كه‌سدا، ته‌نها ده‌یویست وه‌ك خه‌وبینه‌رێك له‌ناو باخچه‌ی ئه‌شقدا بمێنێته‌وه‌…له‌وه‌دا یولیا ڕاستده‌كات، من له‌وه‌ته‌ی هاتوومه‌ ئه‌م سۆڤێته‌ ڕووخاوه، ئه‌م كه‌لاوه‌ ستالینیه‌، هیچیم له‌لا گرنگ نییه‌، چی له‌و وڵات و جیهان ڕووده‌دات، چی له‌و خه‌ڵكه‌ خوێڕیانه‌ ڕووده‌ده‌ن كه ‌لێوه‌ی هاتووم با گوو و جه‌نگ و خوێن بیانبات. گه‌یشتبوومه‌ ئه‌و ڕاستیه‌ی كه‌ ئه‌م خه‌ڵكه‌ گێلانه‌ كه‌وه‌ك مێگه‌ل ده‌ژین جگه‌ له‌م ئاخوڕه‌ نه‌بێت كه‌ سه‌رۆكه‌ ناشرینه‌كان و كوڕه‌كانیان به‌بنه‌چه‌ ده‌بنه‌ خاوه‌نی، له‌هیچ شوێنێكی دیكه‌دا ئۆقره‌ ناگرن. خۆ لێره‌، له‌م وڵاته‌دا، هیچ كێشه‌یه‌كیان نییه‌، كه‌چی سه‌ره‌ڕای ئه‌وه‌ی قاچاخچی پاره‌ی خواردوون و سه‌رگه‌ردانی كردوون، ده‌بن به‌ پیاویان و وه‌ك سه‌گی خوێڕله‌ دوایانده‌كه‌ون و شه‌ڕه‌ چه‌قۆیان بۆ ده‌كه‌ن. هه‌ر بۆیه‌ له‌و وڵاته‌ی لێوه‌ی هاتووم، ئه‌م مێگه‌له‌ حۆل و گێژانه‌م به‌جێهشت و جڕتم بۆ شۆڕش له‌پێناویاندا لێدا و ئاوڕم نه‌دایه‌وه‌، ئه‌مانه‌ نه‌شایه‌نی شۆڕشن و و نه‌شایه‌نی ئاوده‌ستێكن هی خۆیان بێت، چجای سه‌ربه‌خۆ بن! هه‌ر بۆیه‌ بڕیارمداوه‌ كه‌ وه‌ك كرم و زبڵ سه‌یریان بكه‌م، نه‌ك وه‌ك مرۆڤێكی سه‌ربه‌خۆ…من ئێستا جگه‌ له‌ ڤۆدكا و ژن و خۆهه‌ڵواسین نه‌بێت ته‌نافی ژیانێكی دیۆنیسۆسیه‌وه، بیر له‌هیچیتر ناكه‌مه‌وه‌‌، من ئێستا هونه‌رمه‌ندی ژیانم. ته‌نها بیر له‌وه‌ ده‌كه‌مه‌وه‌ چۆن له‌م په‌رستگایه‌ی دیۆنیسۆسه‌ سه‌مابكه‌م، له‌ودا پێده‌چێت به‌دووی جێگه‌ پێیه‌ ئاوریشمینه‌كانی كازانۆڤادا بڕۆم و پشت بكه‌مه‌ جڕته‌كانی ڕۆشنگه‌ری…به‌ڵام ئه‌وه‌ی داگیری كردبووم ئه‌وه‌یه‌؛ بۆیه هه‌موو ژنێك ‌ ڕقی له‌كازانۆڤایه‌ چونكه‌ نه‌یتوانیووه‌، ببێت به‌خاوه‌نی كازانۆڤا و له‌جێگه‌كه‌ی خۆیدا بیهێڵێته‌وه‌، پێده‌چێت ئه‌مه‌ تاكه‌ ڕاڤه‌ی ئه‌و ڕقه‌ له‌پڕه‌ی یولیا بێت كه‌ئه‌م به‌یانییه‌ ته‌قیه‌وه به‌مندا‌. یولیا ڕاستده‌كات، چونكه‌ جاكۆمۆ كازانۆڤا له‌پیریدا زیاتر له‌شه‌ش هه‌زار لاپه‌ڕه‌ی مێمواره‌كانی نوسی له‌ژێر ناوی (چیرۆكی ژیانم) و تێدا باسی له‌ زیاتر له‌سه‌د ژن كردووه‌ كه‌ له‌جێگه‌ی ئه‌ودا ئاشقبوون. باسی له‌وه‌ كردووه‌ كه‌هه‌ر ژنه‌ی ڕه‌نگێكه‌، بۆنێكه‌، دوورگه‌یه‌كی نه‌دۆزراوه‌ و جه‌سته‌یه‌كه‌ له ‌ئه‌ویتر ناچێت…باسی دڵشكان و فرمێسك و ناڵه‌ و ئاهاتی سه‌رجێگا و خه‌می گه‌ڵا بابردووه‌كانی دڵیانی نوسیووه‌ته‌وه‌…له‌وكاته‌دا بیرم له‌ كازانۆڤا ده‌كرده‌وه‌، بیرم له ‌وه‌سفی كازانۆڤا بۆ دایكی كازانۆڤا (گایتانۆ جۆزێفی) ده‌كرده‌وه‌ كه‌ ژنه‌ ئه‌كته‌رێكی سنگ پان و لاق تورت بوو و له‌سه‌ر شانۆی ڤینیسیا. له‌و كاته‌دا وێنه‌ی دوێنێ ( لودمیلا) و سنگ و هه‌ناسه‌كانی و (ئۆی خوایه‌ ) كه‌یم بیركه‌وته‌وه‌، جۆزێفێ ئۆكرایینه‌كه‌م بیركه‌وته‌وه‌، خێرا به‌تانیه‌كه‌م لابرد و ده‌ستپه‌ڕمكرد، له‌گه‌ڵ یه‌كه‌م پڕژه‌ی سپێرمدا هاوارمكرد ؛ ئۆه لودمیلا، ئۆه لودمیلا، ئۆ جۆزێفی…. پاشان خه‌وتمه‌وه‌.
ئێواره‌ كه‌ له‌خه‌و هه‌ستام چووم بۆ موبه‌قه‌كه‌ چاوه‌ڕێی ئه‌وه‌م ده‌كرد یولیا هاتبێته‌وه‌ و له‌موبه‌قه‌كه‌ خواردن ئاماده‌ بكات، به‌ڵام پێده‌چێت زیزبوونه‌كه‌ی و مۆرلێدانه‌كه‌ی له‌ناوچاوانم وه‌ك جاكۆمۆ كازانۆڤایه‌كی كردبێت به‌ڕاست. ئیدی له‌و ڕۆژه‌وه‌ جگه‌ له‌ده‌ستپه‌ڕ و ڤۆدگا خواردنه‌وه‌ و گوێگرتن له‌ شێفێتێنسكی هیچیتر ناكه‌م. خۆ به‌شی ئه‌وه‌نده‌ش ڤۆدگا و گۆشت و خواردنیش له‌ به‌فرگره‌كه‌دایه‌ كه‌پێویستم به‌چوونه‌ ده‌ره‌وه‌ نه‌بێت.

من له‌ قاتی شه‌شه‌می (یوژنا به‌رشیكۆڤكا) به‌مانای شه‌قامی به‌رشیكۆڤكا ده‌ژیم، له‌ خانه‌یه‌كی یه‌ك ژووری پاك و خاوێن. ماوه‌ی دوو ساڵه‌ له‌ نێوان ئۆكرانیا و ڕووسیا و بێله‌ڕووسیادا دێم و ده‌چم، به‌جۆرێك هیچ پاره‌یه‌كه‌م پێ نه‌ما بۆ ژیان. هه‌موو جارێكیش كه‌خۆم له‌م سنوورانه‌ی سۆڤیه‌تی كه‌ون داوه‌، دوای هه‌فته‌یه‌ك به‌ندكردن له‌ سه‌ربازگه‌كان، منیان سواری شه‌مه‌نده‌فه‌رفێك كردووه‌ بۆ مۆسكۆ یان بۆ كێیڤ یان بۆ مینسك. ئه‌وه‌نده‌ به‌ندكرابووم هه‌موو ئه‌فسه‌ری سنووره‌كان ده‌یانناسیمه‌وه‌، ته‌نانه‌ت سه‌ربازه‌كانیش بوو بوون به‌هاوڕێم، ده‌یانزانی كۆنه‌ ماركسی لینینیه‌كی دێرینی دونیای سێهه‌مم، ئه‌وان نه‌وه‌ی نوێی دوای سۆڤێتن، به‌ڵام بۆ ڕابواردن هه‌میشه‌ به‌ (ته‌ڤاریشی) به‌مانای هاوڕێ، بانگیانده‌كردم. به‌ڵام ئه‌فسه‌ره‌ پیر و كامڵه‌كان به‌ڕێزه‌وه‌ مامه‌ڵه‌یان له‌گه‌ڵدا ده‌كردم، چونكه‌ منیان له‌فه‌سیله‌ی حه‌یوانی خۆیان هه‌ژمارده‌كرد، كه‌به‌ره‌و له‌ناچوون ده‌ڕوات. ئه‌مه‌ش بۆ من سوودی هه‌بووه‌ چونكه‌ ده‌متوانی له‌داهاتوودا به‌رتیلیان بده‌مێ و بژێوی خۆمی پێ په‌یدا بكه‌م. به‌ڵام ده‌بێت ئه‌وه‌ش بڵێم كه‌ هه‌رگیز نه‌مهێشتووه‌ یه‌ك قاچاخچی كورد و عه‌ره‌ب و ئه‌فغانی سوودیان لێ ببینن یان بیانناسن، چونكه‌ ئه‌فسه‌ره‌كان له‌ ترسی ئاشكرابوونیان ته‌نها متمانه‌یان به‌من هه‌بوو‌، ئه‌مه‌ش سوودی هه‌ردوولامانی تێدا بوو. ئه‌مه‌ جگه‌ له‌وه‌ی دوای ئه‌م ماوه‌ درێژه‌، ئێستا كه‌ی بمه‌وێت ده‌توانم ئه‌م وڵاته‌ به‌جێبهێڵم، چونكه‌ پاسپۆرتێكی (گرووزی) به‌تاڵیان بۆ پڕكردوومه‌ته‌وه‌ و كه‌ی بمه‌وێت به‌یارمه‌تی هاوڕێ ئه‌فسه‌ره‌كانم له‌سه‌ر سنوور ده‌مكه‌ن به‌ئه‌ودیوودا، چونكه‌ پاسپۆرتی گرووزی بۆ پۆڵۆنیا فیزه‌ی ناوێت. من جارجاره‌ش سه‌ردانیان ده‌كه‌م و دیاریان بۆ ده‌به‌م و هه‌ندێك شه‌ویش له‌لایان ده‌مێنمه‌وه‌.‌ هه‌ر كاتێك قاچاخچیه‌ك نه‌فه‌ره‌كانی ده‌چنه‌ زیندانه‌وه‌، له‌سنووری پۆلۆنیا یان سلۆڤاكیا، من به‌پاره‌ ئازادیان ده‌كه‌م. ته‌نانه‌ت له‌فڕۆكه‌خانه‌كانیش ئه‌م ئه‌فسه‌رانه‌ یه‌كتری ده‌ناسن، هه‌موویان كاگابی (KGB) كۆنن و هاوڕێی شۆڕشی پڕۆلیتارین و ئێستاش وه‌ك چۆن له‌م بلۆكه‌ سۆسیالستیه‌ باوی بووه،‌هاوڕێی به‌رتیلخۆرین. هه‌ردوو سه‌رده‌مه‌كه‌ بۆ ئه‌وان وه‌ك یه‌كه‌، به‌ڵام ده‌بێت ئه‌وه‌ش بڵێم مرۆڤی جوانن و ڕێز له‌یه‌كتری ده‌گرین و حه‌سره‌ت بۆ خۆری ئاوای سۆڤیه‌ت هه‌ڵده‌كێشین و كه‌سه‌رخۆشیش ده‌بین سروودی ئه‌نته‌رناسیونال ده‌ڵینه‌وه‌ و دوایش ده‌ڕشێینه‌وه‌.

من هه‌رگیز قاچاخچێتی ناكه‌م، نه‌ك له‌به‌ر ئه‌وه‌ی خاوه‌ن پڕنسیبم، نه‌خێر، چونكه‌ له‌و بڕوایه‌دام ئه‌م قالۆنچانه چۆن شایه‌نی ئه‌وه‌ نین شۆڕشیان بۆ بكه‌ی، ئاوه‌هاش ‌ شایه‌نی ئه‌وه‌نین بچنه‌ ئه‌وروپا، بچن بۆ وڵاتی كانت و هێگڵ و مۆتزارت و هایدن و شیله‌ر و گۆته‌ و هاینریخ هاینه‌…ئه‌وانه‌ قالۆنچه‌یه‌كن ته‌نها بۆ دژایه‌تی یه‌كتری و یه‌كتر كوشتن و شه‌ڕی ناوخۆ باشن، ئه‌وانه‌ ته‌ره‌كانه‌ن، ته‌ره‌كانه‌ له‌ڕووسیدا مانای قالۆنچه‌ ده‌گه‌یه‌نێت. خه‌ڵكانی ئه‌و وڵاتانه‌ ته‌ره‌كانه‌ی ئاوده‌ستی ژیانن هه‌ر بۆئه‌وه‌ باشن له‌ بۆگه‌نا‌وی زیندان و شه‌ڕی ناوخۆ و مقه‌راتی حیزبیدا بۆگه‌ن بن. له‌به‌ر ئه‌وه‌ كه‌ به‌جه‌ڵه‌ب ده‌بوون به‌داوه‌وه‌، من دوو هه‌فته‌ تا سێ هه‌فته‌ خنه‌خنم ده‌كرد له‌گه‌ڵ قاچاخچیه‌كه‌دا تاوه‌كو ئازادم ده‌كردن.‌ من ئه‌وه‌نده‌م له‌سه‌ر بوو‌ بچم بۆ لای ئه‌فسه‌ره‌كانی هاوڕێم و ئه‌وان ته‌لفۆن بۆ زیندانه‌كان بكه‌ن و دوایی خۆیان پاره‌كه‌یان‌ به‌شده‌كرد له‌نێو خۆیاندا، بێئه‌وه‌ی له‌به‌رتیلیشدا مافی یه‌كتری بخۆن. منیش به‌شی خۆم هه‌میشه‌ به‌شی شه‌ش مانگ تاوه‌كو ساڵێكی ده‌كردم له‌م وڵاته‌ پێی بژیم…ئیدی ئاوا كه‌س كه‌س نابینێت و قالۆنچه‌كانیش ئازاد ده‌كران!

ئاوه‌ها له‌و كاتانه‌دا كه‌ده‌چووم بۆ سه‌ر سنووره‌كان بۆ كاری ئاوه‌ها، له‌كاتی چاوه‌ڕوانیه‌دا ده‌چووم بۆ ئۆپێرا و لۆجی تایبه‌تم ده‌گرت بۆ خۆم كه ‌بۆ من هه‌رزانترین بلیته‌ و بۆ خه‌ڵكی وڵاته‌كه‌ ته‌نها فه‌رمانبه‌رانی باڵا و مافیا تازه‌كان ده‌توانن له‌و لۆجانه‌دا بن. من ده‌چم له ‌لۆجی ده‌وڵه‌مه‌نده‌كاندا داده‌نیشم و به‌جله‌ ئه‌وروپیه‌كانمه‌وه‌ كه‌وه‌ك (ماگنێتی قوز) وه‌هایه‌، وه‌ك خۆم چۆن ئاوه‌ها ناوم لێناوه‌، كچێك، شه‌نگه‌ ژنێك، ژنێكی مێردار به‌زمانه‌ لوسه ڕووسیه‌‌كه‌م ڕاوده‌كه‌م، چونكه‌ ژنان له‌گه‌ڵ وشه‌دا ده‌ژین ئه‌وه‌نده‌ی له‌گه‌ڵ دونیای ڕیاڵدا، به‌وشه‌یه‌ك دونیایه‌ك خه‌یاڵ له‌سه‌ریاندا ده‌هارووژێت، به‌مه‌ش ده‌چنه‌وه‌ سه‌ر سروشته‌ شیعرییه‌كه‌ی خۆیان كه‌ خه‌وبینه‌رن، به‌ڵێ كێ خه‌ونیان پێشكه‌ش بكات ده‌چنه‌ باوه‌شیه‌وه‌، به‌ڵام ده‌بێت ئه‌وه‌ش بڵێین؛ كێ خه‌ون ببه‌خشێت هه‌ر ده‌بێت خۆیشی خه‌وبینه‌ر بێت. ئا له‌وه‌دا پێده‌چێت من نهێنی (جاكۆمۆ كازانۆڤا) بزانم كه‌پیاوێكی خه‌وبینه‌ر بوو تامردن…منیش له‌ماوه‌ی ئه‌و هه‌فته‌ پڕ خه‌یاڵ و خه‌ونه‌دا له‌گه‌ڵ چه‌نده‌ها جۆری ژن ده‌خه‌وتم، بۆ نمونه‌ گه‌ر ژنه‌كان‌ ‌ پیاویان نه‌بووایه‌ و كاریان بكردایه‌ به‌ڕۆژ، ئه‌وا شه‌وه‌كان ده‌هاتنه‌ لام و چه‌ند كاژێرێك ده‌مانه‌وه‌. گه‌ر ژنی مێردار بوونایه‌ و به‌دووی ئه‌شقی كاتیدا بگه‌ڕێن، ئه‌وا له‌كاتی كاری مێرده‌كه‌یاندا، له‌به‌یانیه‌وه‌ تا ئێواره‌ ده‌هاتن و ئه‌شقمان ده‌كرد و خه‌ونمان ده‌بینی… من بۆیه‌ ئه‌وه‌م ده‌كرد، ته‌نها ئاوه‌ها بۆئه‌وه‌ی ئه‌و گوناهه‌یه‌ له‌بیربكه‌م‌، به‌وه‌ی‌ قالۆنچه‌ ڕۆژهه‌ڵاتیه‌كانم له‌ زیندان ڕزگاركردووه‌ بۆئه‌وه‌ی جارێكیتر هووروژم به‌رنه‌وه‌ بۆ ئه‌وه‌ی كیشوه‌ری ئه‌وروپا پڕبكه‌ن له‌گه‌ندو گووه‌كانیان. بۆئه‌وه‌ی ئه‌و هه‌ڵه‌یه‌ له‌بیربكه‌م، خۆم له‌ناو باخچه‌ی خانماندا ونده‌كرد…به‌ڵام ئه‌وه‌ بۆ هه‌فته‌یه‌ك ده‌بێت خه‌ریكه‌ له‌ناو ڤۆدكا و جگه‌ره‌ و موزیك و بێ ژنیدا وشكده‌بمه‌وه‌ و فیشه‌ی ته‌لفۆنه‌كه‌شم ده‌رهێناوه‌ و به‌ هیوا بووم له‌هاتنه‌وه‌ی یولیاكه‌م كه‌ تائێستا نازانم له‌كوێ ده‌ژی و له‌ كامه‌ ساڵی خوێندنی په‌یمانگای موزیكی ده‌خوێنێت…به‌ڵام ئه‌ی لودمیلا، ئه‌ی گیتانۆ جۆزێفینه‌كه‌م…كامیان بدۆزمه‌وه‌.

له‌بالكۆنه‌كه‌ بووم كه‌به‌توندی له‌ده‌رگا درا، به‌یه‌ك قه‌ڵه‌مباز بازم هه‌ڵدایه‌ ناو ڕاڕه‌وه‌كه‌ و به‌خته‌وه‌ربووم كه‌ یولیاكه‌م هاتۆته‌وه‌ و ئێستا نایه‌وێت كلیلكه‌كه‌ به‌كار بهێنێت و له‌وانه‌یه‌ به‌ناوی ئه‌وه‌ی كلیله‌كه‌م بۆ دێنێته‌وه له‌ده‌رگا ده‌دات و ئیدی ده‌زانم چۆن ڕازیده‌كه‌م…ئاوا خومار به‌ گه‌ڕانه‌وه‌ی یولیا و سێبه‌ره‌كانی لودمیلای دایكی ، بێ بیركردنه‌وه‌ ده‌رگاكه‌م كرده‌وه‌، كه‌چی ئه‌وه‌ی له‌ناو ده‌رگاكه‌ ڕاوه‌ستابوو تووشی شۆكی كردم، هه‌ر خێرا به‌ده‌موچاوه‌ ترشاو و كڵاوه‌ ڕووسیی و زمانه‌ سۆرۆكورمانجیه‌كه‌یه‌وه‌ كه‌وته‌ بۆڵه‌ بۆڵ و تا موبه‌قه‌كه‌ نه‌وه‌ستا…ئه‌وه‌ (جونێت) بوو یان به ‌ڕووسی به‌ (ژوونێت) بانگده‌كرا، له‌ڕاستیدا كوردێكی خه‌ڵكی قامیشلو بوو، له‌كاتی سۆڤیه‌ت له‌ڕێگه‌ی حزبه‌كه كۆمۆنیسته‌كه‌ی ‌سوریاوه‌ كه‌ (خالید به‌گداش) سكرتێری بوو ڕه‌وانه‌ی سۆڤیه‌ت كرابوو و بۆ خوێندن و له‌كاتی ڕووخانی سۆڤیه‌تدا باشترین كاری ده‌ستی داوه‌تێ، ئه‌ویش قاچاخاچێتی نه‌فه‌ر و ئاودیووكردنی جگه‌ره‌ی (مارلبۆرۆ) و (كێنت)‌ كه ‌له ‌توركیا قوك جگره‌ی ساخته‌ دروستده‌كران بۆ پۆلۆنیا و چیك و ته‌نانه‌ت بۆ ئه‌وروپا ڕه‌وانه‌ ده‌كران. هه‌موو لۆریه‌ پڕ جگه‌ره‌كان سه‌ره‌تا له‌ڕێگه‌ی ده‌ریای ڕه‌شه‌وه له‌توركیاوه‌ بارده‌كران، له‌وێوه‌ به‌ناوی ترانسێت مۆڵه‌تی ترانزێتیان بۆ وه‌رده‌گرت بۆئه‌وه‌ی گومرگ نه‌ده‌ن به‌حكومه‌تی ئۆكراینی، هه‌ر بۆیه‌ ته‌نها گومرگی تێپه‌ڕ بوون به‌خاكی (ئۆكرایینا) یان ده‌دا، چونكه‌ وه‌ك له‌وه‌ره‌قه‌كاندا نوسراوه‌ ئامانجی باره‌كان‌ وارشۆیه. پاشان لۆرییه‌كان له‌به‌نده‌ری شاری (ئۆدێسا) ی ئۆكراییناوه‌ وه‌به‌ره‌و كێیڤ به‌ڕێده‌كه‌وتن و شه‌وانه‌ له‌نێزیك یاریگه‌ سۆڤێتیه‌كه‌ ده‌وه‌ستان كه‌ناوی ستادیۆنی كۆمارییه‌ (ڕیسپوپلیكانسكی ستادیۆن) و له‌نیوه‌شه‌ودا مافیای جۆرجی كه‌ كوردی جۆرجیا و ئه‌رمینیان، لۆرییه‌كانیان به‌تاڵده‌كرده‌وه‌ و ڕۆژی دوایی لۆرییه‌كان به‌به‌تاڵی به‌ره‌و سنووری پۆڵۆنیا ده‌چوون و مۆری ده‌رچوونیان به ‌به‌رتیلدان به‌ئه‌فسه‌رانی گومرگ بۆ لێده‌درا، به‌ڵام كه ‌ده‌چوونه‌ به‌رده‌م گومرگی پۆڵۆنی ئه‌وانیش ته‌نها پاره‌ی ترانزێتیان ده‌دا، چونكه‌ له‌وه‌ره‌قه‌ی دووهه‌مدا نوسراوه؛‌ كه‌ له‌وارشۆ بارده‌هێننه‌وه‌ بۆ توركیا. ئاوه‌ها مافیای ڕووسی ئه‌م سه‌رمایه‌ و تۆڕه‌ ئاڵۆزه‌ی له‌ به‌رتیلدان و گومرگی ترانزێت و سنووره‌كانی بۆ زامن ده‌كردن…به‌مشێوه‌یه‌ هه‌زاره‌ها دۆلار ده‌چووه‌ كاسه‌ی ڕه‌شی مافیا و پۆلیس و جونێته‌وه‌…
جونێت له‌م ساڵانه‌ی دوایی له‌پاڵ ئه‌مه‌دا له‌ ئاودیووكردنی قاچاخی جگه‌ره‌ی توركییه‌وه‌ چالاكییه‌كانی گواستبۆوه‌ بۆ ئا‌ودیووكردنی ئه‌فغانی و كورد و عه‌ره‌ب بۆ پۆڵۆنیا و چیكۆسلۆفاكیای كۆن و له‌وێوه‌ بۆ ئه‌ڵمانیا، نه‌فه‌ری چوار هه‌زار دۆلاری لێ ده‌ستاندن…دیاره‌ ئه‌و پێویستی به‌ من نه‌بوو، سه‌ره‌تا دووراو دوو منی ده‌ناسی، و دوای ئه‌وه‌ی جارێكیان پێكه‌وه‌ ڤۆدكامان خوارده‌وه‌ و زانی من له‌ شۆڕشكه‌ره‌ دێرینه‌كانم ، بۆیه‌ هه‌ر له‌خۆیه‌وه‌ منی خۆسویست، پێده‌چێت بۆ په‌كه‌كه‌ كاربكات و بۆیه‌ سومپاتی هه‌بوو بۆم…به‌ڵام من له‌ئه‌زموونه‌وه‌ ئه‌وه‌ ده‌زانم كه‌ مرۆڤ‌فێر بوو ببێت به‌قاچاخچی ئه‌خلاقی تێدا نامێنێت. ته‌نانه‌ت گۆره‌وویی دڕوایش بكات به‌ئه‌ودیووسنووردا، ئه‌وا تازه‌ بووه‌ به‌ بێ ئه‌خلاقێكی پله‌ یه‌ك له ‌لیستی ئه‌و هه‌موو بێ ئه‌خلاقانه‌ی دونیا پیسده‌كه‌ن…

جونێت به‌توڕه‌ییه‌وه‌ سه‌یری فیشه‌ی ته‌لفۆنه‌كه‌ی كرد و چاوێكی به‌ماڵه‌كه‌دا گێڕا كه‌بێگومان هه‌میشه‌ پاك و ته‌میزه‌، من شێتی پاك و ته‌میزیم، بۆیه‌ په‌ڕۆ و ده‌سڕی كاغه‌ز هاوڕێیه‌كی خۆشه‌ویستمن. ته‌نها مێزه‌كه‌ نه‌بێت ڤۆدكا و كاڵبازی ڕووسی له‌سه‌ر بوو. سه‌یرێكی مێزه‌كه‌ی كردوگووتی؛ باشه‌ بۆ فیشه‌ی ته‌لفۆنه‌كه‌ت ده‌رهێناوه‌ هه‌ڤاڵ؟ ئه‌و ڕیشه‌ نه‌تاشراوه‌ چییه‌؟! ئه‌زانی چی، باشتره‌ تۆ بڕۆیت بۆ ئه‌ڵمانیا ئه‌م ڕووسیایه‌ وڵاتی شێتانه‌ و وه‌ك هیرۆین پێی ئالووده‌ بوویت. یان وه‌ره‌ له‌گه‌ڵمدا به‌ڕێك و پێكی كار بكه‌…
منیش له‌موبه‌قه‌كه‌وه‌ هاوارم لێكرد؛ جونێت لێم مه‌به‌ به‌ خوتبه‌بێژی ئه‌خلاقی، لێت نایه‌ت، خۆت من ده‌ناسیت، چا ده‌خۆیته‌وه‌ یان قاوه‌ یان ڤۆدكا؟…جونێت پێكه‌نی و گووتی؛ په‌له‌مه ده‌ڕۆم‌، گوێبگره‌ هه‌ڤاڵ، كۆمه‌ڵێك نه‌فه‌رم هه‌یه‌ پێنج خێزانی كورد و ئه‌فغانی عه‌ره‌بن، تۆ ته‌نها تا مۆسكۆ له‌گه‌ڵیان به‌ و پاره‌كه‌شت له‌ من وه‌ربگره‌، تۆ سنووری ئۆكرایینا و ڕووسیام بۆ زامن بكه‌، سبه‌ی ته‌لفۆنم بۆ بكه‌ …

ڕۆژانی دوایی چووم بۆ وێستگه‌ی شه‌مه‌نده‌فه‌ری (كێیڤ) كه‌به‌ڕووسی پێده‌ڵێن (ڤاگزاڵ) له ‌ڤاگزاڵ ده‌مزانی به‌دووی كێدا ده‌گه‌ڕام، به‌دووی (ڕووناك) دا ده‌گه‌ڕام، من ناوه‌كه‌یم وه‌رگێڕابووه‌ سه‌ر كوردی و به‌ڕووناك بانگمده‌كرد، ڕووناك ئه‌و ژنه‌ی جارێكیان سه‌رپه‌رشتی كابینه‌یه‌كی شه‌مه‌نده‌فه‌ری ده‌كرد به‌ره‌و ‌(بێلاڕووسیا) بابڵێین ڕووسیای سپی. ساڵێك و نیوێك له‌مه‌وبه‌ر هه‌وڵێكمدا له‌سنووری (برێست) سێ گۆشه‌ی بێلاڕوسیا و پۆڵۆنیا و لیتوانیا به‌ره‌و لیتوانیا و له‌وێوه‌ بۆ سوید یان بۆ پۆڵۆنیا سنوور ببه‌زێنم‌…چیرۆكێكی درێژه‌ و دوای مانه‌وه‌ی سێ مانگ له‌ شاری (مینسك ) له‌گه‌ڕانه‌وه‌مدا له‌سه‌ر سنووری ئۆكراینا له‌ (گۆمل) ‌له‌به‌ره‌به‌یانێكدا به‌تۆمه‌تی قاچاخچێتی به‌ندكرام دوایی ڕۆحی (فلادیمر ئێلیانه‌ف لێنین) ئازادی كردم، به‌هه‌ر حاڵ ئه‌مه‌ چیرۆكێكی سه‌یره‌…به‌ڵام ئه‌وه‌ی له‌م گه‌شته‌مدا یارمه‌تیدام له‌ كێیڤه‌وه‌ بۆ مینسكی پایته‌ختی بێلاڕووسیا و سنووری نێوان ئه‌م دوو وڵاته‌ ببێم ڕووناك بوو، به‌ڵێ (سێڤێتلانه‌) كه‌به‌مانای ڕووناكی دێت…بیرمدێت پێشتر له‌گه‌ڵیدا قسه‌مكرد و دوایی پێدانی ‌پانزه‌ دۆلار قه‌ره‌وێڵه‌ی دووهه‌می ژووره‌كه‌ی خۆیدا له‌ واگۆنه‌كه‌دا دامێ، كه‌ده‌كاته‌ ژووری ئه‌فسه‌ری سه‌رپه‌رشتی له‌ واگۆنی نوستن. له‌زمه‌نه‌ی سۆڤێته‌وه‌ هه‌موو شوێنێك ئه‌فسه‌رێك، سیخوڕێك، چاودێرێكی بۆ دانراوه‌، به‌جلێكی ڕه‌سمی كه ‌هی ژنان ته‌نوره‌ی شین و چاكه‌تی شینه‌ كه‌خه‌تێكی سووری تێدایه‌ و كڵاوێكی سه‌ربازی نیشانه‌ی چه‌كوش و داسی له‌سه‌ره. له‌دوای سۆڤێت ته‌نها چه‌كوش و داسه‌كه‌یان لابردبوو كردبوویان به‌ ڕه‌مزی وڵاته‌ نوێیه‌ سه‌ربه‌خۆ‌كانی دوای سۆڤیه‌ت. ئه‌م ئه‌فسه‌رانه‌ له‌ناو بینا و ئاپارتمانه‌كاندا هێشتا به‌رده‌وامبوون له‌ئه‌ركه‌كانیان‌، به‌شێكن له‌پۆلیس و به‌شێكین له‌ كاگابی كۆن. له‌كاتی خۆیدا ئه‌م هه‌موو ده‌زگا سه‌یرانه‌ له‌ژێر ناونیشانی سه‌یر سه‌یردا، چاودێڕی و سیخوڕیكردنی خه‌ڵكیان پێ‌ سپێردرابوو…ئاوه‌ها ئه‌م سۆڤێته‌ و كۆی بلۆكی سۆسیالستی به‌ئه‌ڵمانیا ڕۆژهه‌ڵاتیشه‌وه‌، له‌شێوه‌ی به‌ندیخانیه‌كی پڕ چاودێر و پۆلیس و ئه‌فسه‌ر و ڕاپۆرلێده‌ر و ڕێنمایكار داڕێژرابوو. ئێستاش خه‌ڵكی ئه‌م وڵاتانه‌ ئه‌م په‌روه‌رده‌ سیخوڕییه‌ له‌ناو هه‌ڵسوكه‌تیاندا ڕه‌نگده‌داته‌وه‌، به‌تایبه‌ت پاپوشكه‌كان یاخود نه‌نكه‌كانی به‌رده‌م ئاپارتمانه‌كان گه‌ر نه‌تناسن خێرا ده‌چن ته‌لفۆن بۆ (میلیتسیا) بابڵێین بۆ پۆلیس ده‌كه‌ن و ئه‌وانیش دێن و بێزارتده‌كه‌ن و پاشان به‌دوو دۆلار ڕازیده‌بن و هه‌ر كاتێكیش گیرفانیان به‌تاڵ بێت سه‌ردانت ده‌كه‌نه‌وه‌، تاوه‌كو ده‌بێت خانه‌كه‌ت به‌جێبهێڵیت و بگوێزیته‌وه‌ بۆ ناوچه‌یه‌كی تر…

به‌مشێوه‌یه بوونم له‌ژووری سڤێتلانه‌ له‌ واگۆنه‌كه‌دا، مانای ئه‌وه‌ بوو كه‌س گومان له ‌من نه‌كات، ته‌نانه‌ت هیچ دۆكۆمێنتێكم پێ نه‌بوو. ‌ بیرمدێت به‌ره‌به‌یان ئه‌فسه‌ری سنوور هاته‌ سه‌ره‌وه‌ به‌ڵام ته‌نها سڵاوی لێكردم…كه‌ هاته‌وه‌ پێمگووت؛ چه‌ندی ترت پاره‌ داونه‌تێ من ده‌تده‌مه‌وه…گووتی؛ هیچ …ته‌نها بوتلێك ڤۆدكا و دوو كاڵباز، كه‌پرسیان پاسپۆرتی پێیه‌ پێمگووت؛ هیچی پێ نییه‌، ئه‌وه‌یه‌ له‌كێیڤ حه‌زم لێێكردووه‌ وكاری به‌ مینسك نییه‌، ئه‌م شه‌وڕۆژه له‌م كابینه‌یه‌دا له‌گه‌ڵما ده‌بێت و ده‌گه‌ڕێینه‌وه‌ بۆ كێیڤ، ئه‌شیقی منه‌…ئه‌مه‌ی گووت و چاوێكی داگرت… من دوای سێ مانگی دیكه‌ كه‌گه‌ڕامه‌وه‌ له‌سه‌ر سنووری ئۆكرایینا – بێلاڕۆسیا كه‌ ناوی (گۆمل)ه‌ وه‌ك داواكراوێكی ترسناك و مافیایه‌ك به‌رده‌ستكه‌وتم و دوایی ناوی لینین ڕزگاری كردم، به‌ڵام ئه‌وه‌ چیرۆكێكی تره‌…

دوای ئه‌وه‌ له‌كێیڤ جارێكیتر سڤێتلانه‌م له‌ ڤاگزاڵ دۆزیه‌وه‌، ئیدی ئه‌وه‌ كلیلی یه‌كترناسینی من و ڕووناك (سڤێتلانه‌) بوو، له‌دوایشدا كردمان به‌ڕاست، زۆرجار كه‌ حه‌زمان له‌یه‌كتر بكردایه‌، له‌شه‌مه‌نده‌فه‌ری شه‌واندا پێكه‌وه ‌ده‌بووین و ده‌چوومه‌ واگۆنه‌ سۆڤێتیه‌كه‌ی، هه‌ر جاره‌ و بۆ شوێنێكی دووری ئه‌م شاره‌ دوور له‌یه‌كانه‌ی ئه‌م ڕووسیا و ئۆكرایینا و ڕووسیا و بێلاڕوسیا به‌ربڵاوه‌. له‌ڕاستیدا به‌هۆی ڕووناك یان سڤێتلانه‌وه‌ پاره‌ی باشم ده‌ستكه‌وتووه‌ و هه‌روه‌ها ئه‌ویش، چونكه‌ هه‌موو ئه‌و قالۆنچه‌ قاچاخانه‌ی ده‌یانوویست بچن بۆ وڵاته‌ نوێیه‌كانی سۆڤیه‌تی كۆن كه‌ئێستا سنوور جودای كردوونه‌ته‌وه‌، قاچاخچیه‌كانیان ده‌هاتن بۆ لام و كۆی كابینه‌كه‌مان ده‌گرت و ڕووناك خۆی نا، به‌ڵام هاوكاره‌كانی له‌كار، پیاو یان ژن، له‌سنوور ته‌ره‌كانه‌ یان بابڵێین قالۆنچه‌كانیان قوتار ده‌كرد…

ئه‌م جۆره‌ كاره‌ بچوكانه‌ش بۆ من به‌رده‌وامیدان بوو له‌ژیان وه‌ك كازانۆڤایه‌ك، چونكه‌ كازانۆڤا هه‌موو كارێكی كردبوو له‌قه‌شایه‌تیه‌وه‌ تاوه‌كو قۆشمه‌ی ساڵۆنه‌كان و تاوه‌كو ده‌گاته‌ ڕاوێژكاری قه‌یسه‌ره‌كان، بۆ هیچ نا، ته‌نها بۆ ئه‌وه‌ی به‌رده‌وامی بدات به‌و ژیانه‌ پڕ خومار و خه‌ونه‌ی…منیش وه‌هام ده‌كرد، ئه‌مجاره‌ش بۆ ئه‌وه‌ی وه‌ك چۆن خۆم ده‌مه‌وێت بژیم ده‌بێت وه‌ها بكه‌م…

به‌یانییه‌كه‌ی چووم بۆ ڤاگزاڵی كێیڤ، ڕووناكم له‌ ئۆفیسی هێڵی شه‌مه‌نده‌فه‌ری ئۆكرایینی‌ نه‌دۆزیه‌وه‌، زانیم كه‌ ئه‌مڕۆ و سبه‌ی پشووی هه‌یه‌، هه‌ر بۆیه‌ بڕیارمدا بچم بۆ ماڵه‌وه‌ سه‌ردانی بكه‌م. ماڵی سڤێتلانه (ڕووناك)‌ له‌ ڕۆژئاوای شاری كێیڤ بوو، ده‌بوایه‌ دوو میترۆ بگۆڕم و ده‌ خوله‌ك ‌ به‌پێ بڕۆم ئه‌وسا ده‌كه‌وتمه‌ به‌ر بلۆكێك له‌ئاپارتمانی زه‌مه‌نی سۆڤێتی كه‌به‌ته‌نیشت یه‌كه‌وه‌ دروستكرابوون. وه‌ك هه‌موو ئاپارتمانه‌ بێ ڕۆح و ئارخیتێكتۆره‌كانی بلۆكی سۆسیالزم، وه‌ك به‌ندیخانیه‌كی دیوار زه‌به‌لاح و لێكجوو به‌ته‌نیشت یه‌كه‌وه‌ ڕیز كرابوون، به‌ڵام ئه‌مانه‌ به‌شێوه‌ی نیمچه‌ بازنه‌یی ڕیزبوو بوون…هه‌ر ئاپارتمانه‌ی زیاتر له‌ سه‌د‌ خانه‌ی تێدابوو، له‌یه‌ك ژوورییه‌وه‌ بیگره‌ تاوه‌كو چوار ژووری كه‌تایبه‌ت بوون به‌ ژه‌نراڵه‌كانی سۆڤێتی جاران و سیخوڕه‌كانی كاگابی و (میلیتسیا – پۆلیس) و كادێرانی حزبی كۆمه‌نیستی سۆڤێتی. یه‌كه‌م كه‌س ده‌رگاكه‌ی كرده‌وه‌ ( ژه‌نراڵ ئالكسێ ئالكساندرۆڤیچ كۆزمیچ) سه‌رخۆشی مێردی سڤێتلانه‌ بوو، كه‌ ژه‌نراڵێكی خرفی خانه‌شینی سۆڤێتی بوو، له‌گه‌ڵ ڕووخانی سۆڤیه‌تدا خانه‌نشینی نه‌مابوو، نه‌مده‌زانی چی ئه‌م دووانه‌ كۆده‌كاته‌وه‌؟ پێده‌چوو خانه‌ سێ ژوور و خاوه‌ن دوو بالكۆنه‌كه‌ بێت، كه‌ له‌دوای ڕووخانی سۆڤیه‌ت، له‌و بڕوایه‌دا بووم سڤێتلانه‌ ههر‌گیز خانه‌ی وه‌ها هه‌رگیز ده‌ست نه‌كه‌وێت و جگه‌ له‌جیاوازی گه‌وره‌ی ته‌مه‌ن له‌نێوانیاندا كه‌زیاتر له ‌بیست ساڵ ده‌بێت. ژه‌نراڵ كۆزمیچ وه‌ك چۆن زیاتر حه‌زی ده‌كرد له‌جیاتی (ئالكسێ) وه‌ها بانگی بكه‌ن، كه‌منی بینی گه‌شایه‌وه، به‌تایبه‌ت كه‌ دوو بوتڵه‌ ڤۆدكاكه‌ی بینی به‌ده‌ستمه‌وه‌ له‌گه‌ڵ كاڵباز (باسترمه‌) و خه‌یاری سوێر و خلێبی یان بڵێین سه‌موونی ڕه‌شی ڕووسی، خێرا بانگی كردمه‌ ژووره‌وه‌؛ زه‌خه‌دی پاژاڵستا، زه‌خه‌دی…فه‌رموو بۆ ژووره‌وه‌ ، فه‌رموو…‌‌. پاشان دوو په‌رداخی هێناو یه‌كی سه‌د گرام ڤۆدكامان هه‌ڵدا، وه‌ك هه‌میشه‌ یه‌كه‌م پێكمان بۆ سۆڤیه‌ت بوو ، هه‌میشه‌ ده‌مگووت؛ س – سه‌یۆسكی سه‌یوس…به‌مانای بۆ سۆڤێت…ژه‌نراڵ كۆزمیچیش خێرا وه‌ڵامیده‌دامه‌وه‌؛ س – ناشه‌ ستالینه‌..به‌مانای بۆ ستالینه‌كه‌مان… پاشان ئه‌و په‌رداخی دووهه‌می وه‌ها بوو من ده‌مگووت؛ س- ناشه‌ ڵێنینه‌…ئه‌ویش ده‌یگووت؛ س – ناشه‌ پڕۆلیتاریا…جارێكیان له‌جیاتی لینین گووتم؛ س – ناشه‌ ترۆتسكی…به‌مه‌ش توڕه‌بوو و گووتی؛ ناوی ئه‌و خائینه‌ مه‌هێنه‌…
من و ژه‌نراڵ كۆزمیج سێ په‌رداخمان هه‌ڵدا و دوایی ژه‌نراڵ كۆزمیچ ته‌لفۆنی بۆ سڤێتلانه‌ یان با بڵێین بۆ ڕووناك كرد كه‌ له‌قاتی ده‌هه‌م له‌لای درواسێیه‌كیان بوو! ڕووناك دوای چه‌ند خوله‌كێك هاته‌ خواره‌وه‌ و گووتی؛ ته‌نها پاره‌ و كار له‌گه‌ڵ خۆت دێنیت…خێرا ئالكسی به‌سه‌رخۆشی گووتی؛ ڤۆدكاش، بیرت نه‌چێت هه‌میشه‌ من و سۆڕسی كرێكارانی له‌یاده‌…
ئه‌و ئێواره‌یه‌ دوای چه‌ند ته‌لفۆنێك ‌ سڤێتلانه‌ كابینه‌ی ژماره‌ چواری پله‌ یه‌كی شه‌مه‌نده‌فه‌ری نێوان كییڤ و مۆسكۆی بۆ گرتم و ناوی ئه‌فسه‌ری كابینیه‌كه‌ی دامێ كه‌ خانمێك بوو به‌ناوی (ماریا ئیڤانۆڤنا). بێگومان ناوی باوك (ئیڤانه) له‌كاتێكدا ده‌چێته‌ سه‌ر ناوی كچ ده‌بێت (ئیڤانۆڤنا) . بۆیه‌ باسی ئه‌م ده‌كه‌م بیرمدێت كه‌ له‌ ئاوده‌سته‌كه‌ گه‌وره‌كه‌دا ده‌ژیام، بابڵێم به‌ندكرابووم، هه‌میشه‌ بۆ خوێندنه‌وه‌ی ڕۆمانه‌كانی تۆلستۆی و دیستۆێیڤسكی به‌ زمانی عه‌ره‌بی لیستێكم له‌ناوه‌كان دروستده‌كرد و ئه‌وه‌ی سه‌ری لێده‌شێواندم ئه‌وه‌بوو كه‌ ناوه‌كان هه‌میشه‌ ده‌گۆڕان. هه‌مان خوشك و برا بوون به‌ڵام ناوی باوك له‌گه‌ڵ كوڕدا وه‌ك خۆی بوو، كه‌چی له‌گه‌ڵ كچدا ده‌گۆڕا. من لێره‌ تێگه‌یشتم كه‌عه‌ره‌به‌كان ناوه‌كانیان به‌ته‌واوه‌تی بۆ وه‌رناگێردرێته‌ سه‌ر زمانه‌كه‌ی خۆیان، چونكه‌ هه‌ندێك پیت هه‌یه‌ نییانه، هه‌ر بۆیه‌ ناوه‌كان به‌هه‌ڵه‌ له‌مێشكمی ئێمه‌دا چه‌سپیبوو، لێره‌ له‌و نه‌خۆشیه‌ی ئاوده‌سته‌كه‌ش ڕزگارم بوو، ئێستا ناوه‌كان وه‌ك خۆیان ده‌ناسم‌…

ئاوه‌ها (ماریا ئیڤانۆڤنا) ئه‌مجاره‌ ده‌بووه‌ ڕێبه‌ری ئه‌م سه‌فه‌ره‌م…به‌ڵام سڤێتلانه‌ هه‌ر وا به‌ئاسانی وازی نه‌هێنا، ئه‌و ئێواره‌یه‌ نه‌یهێشت بڕۆمه‌وه‌. ژه‌نراڵی چه‌نه‌بازی سۆڤیه‌تی، ژه‌نراڵ كۆزمیچ، ‌ له‌سه‌رخۆشیدا كه‌وتبووه‌ خوتبه‌دان دژی كاپیتالیزم و دوایش وه‌ك هه‌موو جارێك ده‌چووه‌ ژووره‌كه‌ی تر و جله‌ ژه‌نراڵه‌ سه‌د قۆپچه‌ییه‌ و پڕ چه‌كوش وداس و مه‌دالیای ستالین و لینین و خرۆشۆفی له‌به‌رده‌كرد. هه‌موو جارێك پێشئه‌وه‌ی به‌ته‌واوه‌تی له‌سه‌رخۆشیدا له‌په‌لوپۆ بكه‌وێت هه‌ردووكمانی هه‌ڵده‌ستاند و هه‌رسێكمان پێكمان به‌رزده‌كرده‌وه‌ و سروودی ئه‌نته‌رناسیونالیمان به‌ده‌نگی به‌رزده‌گووته‌وه‌…ئیدی ده‌مانزانی كه‌ ده‌چێته‌ ئه‌ودیوو خۆی بگۆڕێت، له‌گه‌ڵ داكه‌ندنی پانتۆڵه‌كه‌ی به‌چاكه‌ته‌‌ ژه‌نراڵییه‌ سۆڤێتییه‌كه‌یه‌وه‌ و و مه‌دالیاكانیه‌وه‌ خه‌وی لێده‌كه‌وت…جاران نه‌مده‌وێرا له‌گه‌ڵ سڤێتلانه‌دا سێكس بكه‌م، چونكه‌ وه‌هامده‌زانی كه‌ ژه‌نراڵ كۆزمیج وه‌ئاگا دێته‌وه‌. جارێكیان من و سڤێتلانه‌ سه‌رخۆش بووین، سڤێتلانه‌ بۆ دڵنیایی من چووه‌ ژووره‌كه‌ی كۆزمیچ، ژه‌نراڵ ‌له‌سه‌ر پێخه‌فه‌كه‌ به‌ ده‌رپێ كورت و چاكه‌ته‌ ژه‌نراڵیه‌ پڕ چه‌كوش و داس و مه‌دالیای لینین و ستالینیه‌كه‌یه‌وه‌ خه‌وی لێ كه‌وتبوو، لێی نێزیك بووه‌ و ده‌رپێی كورته‌كه‌ی ڕاكێشا و كه‌وته‌ مژینی كێره‌ پیر و سۆنده‌ییه‌ سۆڤیه‌تیه‌كی، به‌ڵام ژه‌نراڵ نه‌ك وه‌ئاگا نه‌هاته‌وه‌، به‌ڵكو پڕخه‌كانی زیاتر ده‌بوون. كه سڤێتلانه‌ ‌له‌ژووره‌كه‌ هاته‌ ده‌ره‌وه‌ گووتی؛ بینیت، وه‌ك سۆڤیه‌ت وه‌هایه‌، بۆ ئه‌به‌د مردووه‌ و وه‌ئاگا نایه‌ته‌وه‌…
ئه‌و شه‌وه‌ش هه‌مان چیرۆك بوو، زانیمان ژه‌نراڵ كۆزمیچ ته‌نها ده‌توانێت پانتۆڵه‌ سه‌ربازییه‌كه‌ی داكه‌نێت و دوایی له‌سه‌ر چه‌رپاكه‌ی ته‌خت ده‌بێت و نایه‌ته‌وه‌ بۆ ژووری دانیشتنه‌كه‌. به‌مشێوه‌یه‌ ئێمه‌ش به‌رده‌وام ‌بووین له‌ سه‌ما و خواردنه‌وه‌. ئه‌مجاره‌ش وه‌هامان كرد..به‌ڵام هه‌ورێك له‌سه‌رمدا بوو، من به‌رده‌وام بیرم له‌ لودمیلای دایكی یولیا ده‌كرده‌وه‌، بیرم له‌وه‌ده‌كرده‌وه‌ كه‌ ‌یولیا ‌جێیهێشتووم، هه‌ر بۆیه‌ هه‌ر له‌موبه‌قه‌كه‌ تاوێك له‌سه‌ر مێزی موبه‌قه‌كه‌ و تاوێك له‌ژووری دانیشتنه‌كه‌ سێكسمان كرد و تێرنه‌ده‌بووم…

ماریا ئیڤانۆڤنا ژنێكی گه‌نج بوو، به‌پێچه‌وانه‌ی ئه‌وه‌ی وه‌هام مه‌زنده‌ ده‌كرد له‌ناوه‌ڕاستی چله‌كاندا بێت، ئه‌م سه‌ر به‌و نه‌وه‌ نوێیه‌كه‌یه بوو،‌‌ له‌دوای پێرۆسترۆیكا و گلاسنۆست یان بابڵێن دوای هه‌ره‌سی سۆڤیه‌ت له‌ هێڵی شه‌مه‌نده‌فه‌ری ئۆكرایینی دامه‌زراوه‌. جیاوازییه‌كی دیكه‌ هه‌بوو له‌و ژنانه‌ی كه ‌من ده‌مناسین كه ‌وه‌ك خۆم له‌ تایپه‌ كلاسیكیه‌كه‌ سۆڤیتیه‌ بوون، به‌ڵام نه‌مده‌زانی چیه‌؟ زیاتر له‌ یولیا ده‌چوو له‌هه‌ڵسوكه‌تدا وه‌ك له‌ لودمیلای دایكی، بێگومان ڕووناكیش یان بابڵێین سڤێتلانه‌ سه‌ر به‌نه‌وه‌ی لودیملای سۆڤێتی بوو. به‌ڵام ماریا ئه‌قڵانی بوو، هیچ كرانه‌وه‌یه‌كی نه‌ریت ڕووسیانه‌ یان سلاڤیانه‌م لێ نه‌بینی، دوایی بۆم ده‌ركه‌ت ‌له‌یه‌كێك له‌ په‌یمانگا ئه‌مریكیه‌كان بۆ ماوه‌ی ساڵێك له‌سلۆڤاكیا خوێندوویه‌تی…
ئیدی دوای ئه‌وه‌ی خێزانه‌ كورد و ئه‌فغانی و عه‌ره‌به ئێراقیه‌كانمان خسته‌ كابینه‌كانی خۆیانه‌وه‌، ماریا داوایكرد كه‌ منداڵه‌كان و پیاوه‌كان نه‌چن بۆ واگۆنه‌كانی دیكه‌ و هه‌ر له‌م واگۆنه‌دا بمێننه‌وه‌ و تاده‌توانن هێمن بن تاوه‌كو سنوور ده‌بڕین. دوایی ‌وه‌ك سڤێتلانه‌ قه‌ره‌وێڵه‌كه‌ی به‌رامبه‌ری دامێ، له‌گه‌ڵ یه‌كه‌مین پێكی ڤۆدگا خه‌و داگیری كردم، ماریا هه‌رئه‌وه‌نده‌ی گووت؛ پێده‌چێت هێشتا خوماری دوێنی شه‌و بووبیت…منیش گووتم؛ له‌م په‌رستگا دیۆنیسۆسیه‌دا هه‌ر ئه‌م سه‌مایه‌ ده‌زانم…ئیدی نازانم چۆن خه‌وم لێكه‌وت.

كه ‌وه‌ ئاگا هاتمه‌وه‌ هه‌شت كاژێر زیاتر بوو خه‌وتبووم، ماریا ڕۆیشتبوو و پێده‌چوو له‌ واگۆنه‌كانی دیكه‌ بوو بێت، سه‌یرم لێهات واگۆنه‌كه‌ ئاوه‌ها به‌جێده‌هێڵت، به‌ڵام كه‌هاته‌وه‌ زانیم كه‌ ده‌مێكه‌ سنوورمان به‌جێهێشتووه‌، گووتی؛ هه‌موو شتێك بێ كێشه‌ تێپه‌ڕبوو، چونكه‌ نه‌مهێشت ئه‌فسه‌ره‌كه‌ سه‌ربكه‌وێت، ته‌نها تا ژووره‌كه‌ی‌ من هات و بیست دۆلار و دوو كیسه‌ ڤۆدكا و كاڵباز و سه‌مونی ڕه‌شه‌كانی وه‌رگرت و ڕۆیشت…سه‌رسام بووم به‌و هێمنیه‌ی سه‌یرێكم كرد و پێكه‌نیم و دووباره‌ خه‌وتمه‌وه‌…

‌گه‌یشتینه‌ ڤاگزاڵی مۆسكۆ، پێش هه‌مووان چوومه‌ ده‌ره‌وه‌ و چوار تاكسیم ڕاگرت و به ‌ته‌ره‌كانه‌كانم گووت: به‌په‌له‌ دوام كه‌ون …ته‌ره‌كان‌ له‌ڕووسیدا مانای قالۆنچه‌ده‌گه‌یه‌نێت، زیاتر ئه‌و قالۆنچه‌ سووره‌ هه‌راشانه‌‌ن به‌سه‌ده‌ها له‌پڕ له‌بن ته‌خته‌دار و سووچه‌كانی ماڵدان كه ‌گڵۆپ ده‌كوژێته‌وه‌ به‌سه‌ده‌ها بڵاوده‌بنه‌وه‌، زۆرجار هه‌ستپێده‌كه‌یت كه‌به‌سه‌ر لووت و ده‌موچاوتدا هه‌ڵده‌گه‌ڕێن، كه‌ گڵۆپه‌كه‌ هه‌ڵده‌كه‌یت خێرا به‌خێرایی هه‌روه‌ بروسكه‌ ونده‌بن. ‌سه‌یر له‌وه‌دایه كه‌ گه‌را ده‌كه‌ن به‌ماوه‌یه‌كی كه‌م ده‌تروكێنن. هه‌ر ماڵێك له‌م كیشوه‌ره‌ سه‌هۆڵیه‌دا تووشی ته‌ره‌كانه‌ی له‌مجۆره‌‌ بێت، له‌دۆڵابدا یان جله‌كانی، ئیدی هیچ چارێكی دیكه‌ی نییه‌ جگه‌ له‌باركردن نه‌بێت. نه‌ك هه‌ر ئه‌وه،‌ ده‌بێت هه‌رچی قه‌نه‌فه‌ و جل و به‌رگی هه‌یانه‌ له‌گه‌ڵ خۆیاندا نه‌یبه‌‌ن و بیانسوتێنن، ته‌نانه‌ت ده‌رمانی كوشنده‌ش كاریان تێناكات چونكه‌ گه‌راكانیان له‌ناو سه‌رماو هه‌موو شوێنێكدا ده‌ترووكێنن. ده‌بێت ئه‌و كه‌سه‌ و خێزانه‌ هه‌موو شتێك به‌جێبهێڵێن، ته‌نانه‌ت جله‌كانیشیان. بۆیه‌كه‌مجار كه‌ ئه‌م كه‌ئه‌م قالۆنچانه‌م ناسی و شكاتم كرد له‌ده‌ستیان له‌شاری مینسك پایته‌ختی ڕووسیای سپی بوو، خاوه‌ن ماڵه‌كه‌ گووتی؛ ئۆ و ته‌ره‌كانه‌…ئه‌م پیرێژنه‌ كچی (یوری گاگارین) بوو ئه‌وه‌ی بۆ یه‌كه‌مین جار چووه‌ سه‌رمانگ. خانه‌ دووژووریه‌كه‌ی (یوری گاگارین) یه‌كه‌مین ساڵۆنی یه‌كترناسینی من و ته‌ره‌كانه‌ ڕووسیه‌كان بوو…سه‌یر له‌وه‌دایه‌ ئه‌م جۆره‌ قالۆنچانه‌دا بیده‌ن له‌هه‌ر شوێنێك بۆگه‌نیده‌كه‌ن و له‌ناونابرێن، چاریش نییه‌ یان ده‌بێت له‌گه‌ڵ بۆگه‌نیاندا بژیت، یان ده‌بێت به‌ته‌واوه‌تی به‌جێیانبهێڵیت و پشتیان تێبكه‌یت. هه‌ر بۆیه‌ من (هاونیشتمانه‌كانم) ببورن (هاوئاوده‌سته‌كانی) جارانم، به‌ (ته‌ره‌كانه‌‌) ناوده‌به‌م. بچنه‌ هه‌ر شوێنێك وه‌ك ته‌ره‌كانه‌‌ نه‌خۆشی ده‌كه‌ن به‌ هه‌موو نه‌خۆشیه‌ ناشرینه‌كانی ئه‌م دونیایه‌.

‌ ئیدی من ده‌ڕۆیشتم و خێزانه‌كان وه‌ك ته‌ره‌كانه‌ی ترساو به‌دوومدا هاتن و له‌ناو ئاپۆڕه‌ی ڤاگزاڵدا تاكه‌ شوێن سه‌یریان ده‌كرد پێده‌چوو پشتی من بێت، چونكه‌ ده‌زانم ئه‌وانه‌ فێرن هه‌ر سه‌یری پشت و سه‌ری ئه‌وانه‌ بكه‌ن كه ‌لێیان ده‌خوڕن، حه‌زیان له‌وه‌یه‌ لێیان بخوڕن، هه‌ر بۆیه‌ زۆر زوو له‌نێزیك تاكسیه‌كاندا خۆیان دۆزیه‌وه‌، پێمگووتن تاكسیه‌كان له‌ گۆڕه‌پانی (پوشكین) داتانده‌به‌زێنن و له‌وێ په‌یكه‌رێكی گه‌وره‌ی لێیه‌ و پڕه‌ له‌كۆتر و فواره‌یه‌كی گه‌وره‌، له‌و ناوه‌ بمێننه‌وه‌ و كاژێرێكی تر یه‌كێك دێت به‌دووتاندا!…كه‌ئه‌وه‌م گووت بۆڵه‌ بۆڵێكی شه‌رمنانه‌یان له‌نێو خۆیاندا ده‌ستپێكرد، ئاخر ته‌ره‌كانه‌كان جگه‌ له‌بۆڵه‌ بۆڵ زیاتر هیچیتریان پێ ناكرێت، كه‌یه‌كێكیان ده‌پلشێته‌وه‌ لای ئه‌وان هیچ هه‌ژانێك، ترسێك دروستناكات…هه‌ربۆیه‌ كه‌پرسیم چییه‌ گووتیان؛ ئه‌ی چۆن خۆمان به‌ته‌نیا له‌وێ چاوه‌ڕێ بكه‌ین…منیش به‌ڕسته‌یه‌كی كورت گووتم؛ خۆشم له‌گه‌ڵتاندا ده‌بم له‌دووره‌وه‌ چاودێریتان ده‌كه‌م تادێن به‌دووتاندا، گه‌ر نه‌هاتن ئه‌وا بچن بۆ كه‌مپی چیخه‌فسكایا، ئه‌وه‌ په‌یوه‌ندی به‌منه‌وه‌ نییه‌…

تاكسیه‌كان ڕۆیشتن، منیش گه‌ڕامه‌وه‌ بۆ ڤاگزاڵ، له‌وێ ماریا ئیڤانۆڤنا چاوه‌ڕێی ده‌كردم، ده‌بوایه‌ بچوایه‌ بۆ خانووه‌كانی سه‌ر به‌ هێڵی ئاسنینی كۆماری ڕووسی و له‌وێ دوو ڕۆژ ده‌مێنێته‌وه‌، چونكه‌ دوو ڕۆژی دیكه‌ واگۆنه‌كی دیكه‌ وه‌رده‌گرێت بۆ كێیڤ. منیش ده‌بێت دوو ڕۆژی دیكه‌ به‌هه‌مان واگۆن له‌گه‌ڵ ماریا ئیڤانۆڤا بگه‌ڕێمه‌وه‌‌. من و ماریا ئیڤانۆڤا به‌ره‌و پۆشكینسكایه‌ سواری تاكسی بووین. مۆسكۆ به‌پێچه‌وانه‌ی كێیڤ په‌له‌ی بوو به‌رگی سۆڤێتی داكه‌نێت و زیاتر سیمای ڕۆژئاوایی وه‌ه‌رگرتبوو، چونكه‌ له‌به‌رده‌م ڤاگزاڵ تاكسی تایبه‌ت په‌یدا بوو بوون، به‌ڵام له‌ ئۆكرایینا هێشتا تاكسی شتێكی نامۆ بوو، ‌ مه‌به‌ستم ئۆتۆمبێلێك بوو به‌ نیشانه‌ی ته‌كسیه‌وه‌، له‌وێ ده‌ست ڕابگره‌ هه‌ر ئۆتۆمبێلێك ڕاوه‌ستێت هات ده‌توانی مامه‌ڵه‌ی له‌گه‌ڵدا بكه‌یت. ته‌نانه‌ت شه‌وان دره‌نگ ده‌ستمان له‌ ئامبۆلانسه‌كانیش ڕاده‌گرت، ئێستاش له‌مۆسكۆش هه‌ر هه‌مان به‌زم هه‌یه ، به‌ڵام ئه‌م تاكسیانه‌ش په‌یدابوون‌.

زۆرجار، به‌تایبه‌ت شه‌وانێك كه‌ هه‌ناسه‌ش له‌سه‌رما و زووقمدا ده‌یبه‌ست، ئامبۆلانسه‌كانم كردووه‌ به‌تاكسی. له‌ڕاستیدا ئه‌م ئامبۆلانسانه له‌زه‌مه‌نی سۆڤێته‌وه‌ شه‌وانه‌ به‌گه‌ڕه‌ك و شه‌قامه‌ گشتیه‌كاندا ده‌سوڕانه‌وه‌ بۆ كۆكردنه‌وه‌ی سه‌رخۆشه‌ بێشوماره‌كانی ڤۆدگا. ‌ هه‌ر له‌گه‌ڵ خه‌ولێكه‌وتنیان له‌ژێر كاریگه‌ری ڤۆدكادا، هه‌ندێكیان دوای كاژێرێك، ده‌توانم بڵێم‌ كه‌متر له‌ كاژێرێك له‌ سه‌رمادا ڕه‌ق ده‌بوونه‌وه‌. ته‌نات مووی لووت له‌چركه‌یه‌كدا ده‌یبه‌ستێت و كه‌هه‌ناسه‌ ده‌دیته‌وه‌ ده‌یكاته‌وه‌ ده‌بێته‌وه‌ به‌ ئاو و به‌لووتدا دێته‌ خوارێ، بۆیه‌ هه‌میشه‌ ئاوی لوتت، ئاوی به‌ستن و توانه‌وه‌ی چركه‌ساتیه. له‌زه‌مه‌نی سۆڤێته‌وه كۆنتریش له‌زه‌مه‌نی قه‌یسه‌ری ڕووسیه‌وه‌، سوڕانه‌وه‌ی عه‌ره‌بانه‌ی پۆلیس تاوه‌كو به‌یانی به‌كۆڵانه‌كاندا یه‌كێك بووه‌ له‌ئه‌ركه‌كانی حكومه‌ت بۆئه‌وه‌ی سه‌رخۆشی ڤۆدكا، كه‌وڵاته‌كه‌ هه‌مووی به‌بێ ڤۆدكا تووشی هیستیریا ده‌بن، كۆبكه‌نه‌وه‌. له‌زه‌مه‌نی سۆڤیه‌تدا حكومه‌تی سۆڤێتی و شوورای كرێكاری وه‌ك خزمه‌ته‌كی گه‌وره‌ به‌ پڕۆلیتاریا، بڕیاڕی ته‌رخانكردنی ئامبۆلانس ده‌ده‌ن بۆ كۆكردنه‌وه‌ی ئه‌و میلله‌ته‌ی له‌گه‌ڵ به‌شه‌خۆراكی هه‌فتانه‌ دونیایه‌ك ڤۆدكایان پێ ده‌به‌خشین. ئه‌وانه‌ به‌گشتی ئه‌ركیان كۆكردنه‌وه‌ و به‌ئاگاهێنانه‌وه‌ی خوماربووان بوو به ‌سۆڤێت بۆئه‌وه‌ی له‌سه‌رماندا ڕه‌قنه‌بنه‌وه و به‌یانی بچنه‌وه‌ سه‌ركار‌. له‌دوای ڕووخانی سۆڤیه‌ت ئه‌م سوستێمه‌ش تووشی گه‌نده‌ڵی بوو، جار هه‌بووه‌ هه‌م شۆفێر و هه‌م هاوكاره‌كه‌ی له‌سووچێكدا ڕایانگرتووه‌ و هه‌ردووك سه‌رخۆش بوون، منیان گه‌یاندۆته‌ ئه‌وپه‌ڕی شار. كه‌لێمپرسیوون ئه‌ی سه‌رخۆشه‌كان ڕه‌قنابنه‌وه‌، جارێكیان هه‌مان پرسیارم كرد كه‌چی شۆفێره‌كه‌ پێكه‌نی و گووتی‌؛ ده‌مێكه‌ ڕۆحمان له‌م سۆڤێته‌ ڕه‌قبۆته‌وه‌ هاوڕێ گیان، له‌زه‌مه‌نی ستالینه‌وه‌ تاوه‌كو ئه‌مڕۆی حوكمی مافیا، با تۆزێك سه‌هۆڵی ڕۆحمان بتوێته‌وه‌…بودتی نازادرۆڤیا..باش بیت. گوێمه‌ده‌رێ!

ئاوه‌ها منێك، بۆ سه‌ركێشیه‌ جاكۆمۆ كازانۆڤاییه‌كه‌م ‌زۆر شه‌و بوومه‌ته‌ هۆی ڕه‌قبوونه‌وه‌ی چه‌نده‌ها سه‌رخۆشی ئه‌مشاره‌، چونكه‌ ئامبۆلانسه‌كانم وه‌ك ته‌كسی ڕاگرتووه‌ و تا ئه‌وسه‌ری شار نه‌وه‌ستاوون و پێده‌چێت تاوه‌كو گه‌ڕانه‌وه‌یان چه‌ند سه‌رخۆش له‌و شه‌قام و باخچه‌ی سه‌ر جادانه‌ كه‌وتبن و كۆنه‌كرابێتنه‌وه‌…زۆرجار ته‌نها بۆ ژووانێك سێ دۆلارم ده‌دا به‌ئامبۆلانسه‌كه‌ كه‌پاره‌یه‌كی زۆری ده‌كرد كه‌ له‌ ماوه‌ی كاژێرێكدا ده‌ستیانبكه‌وێت، ئیدی ئامبولانسه‌ سۆڤیه‌تییه‌كه‌ ده‌بوو به‌ لیمۆزینی تایبه‌ت به‌خۆم. هه‌ندێك جار داوام لێده‌كردن به‌و نیوه‌شه‌وه‌ پڕ زوقمه‌ گوڵم بۆ په‌یدا بكه‌ن، یان ڤۆدكا…ئاوه‌ها وه‌ك كازانۆڤایه‌كی نیوه‌ شه‌و، ئامبۆلانسه‌كه‌ و شۆفێر و كارمه‌ندی ته‌ندروستیه‌ سۆڤێتیه‌كه‌ به‌دووی حه‌زه‌كانی منه‌وه‌ بوون. ئامبۆلانه‌سه‌كه‌ پڕده‌بوو له‌چه‌پكه‌ گوڵ و كۆندۆمی میوه‌ و كاڵباز و خه‌یاری سوێر و چۆڕنی خلێب كه‌مانای سه‌موونی ڕه‌ش ده‌گه‌یه‌نێ… هه‌ندێك جاریش گه‌ر شۆفێره‌كه‌ ژنبووایه‌ یان هاوكاره‌كه‌ی ته‌لفۆنه‌كه‌ی خۆیان ده‌دامێ، به‌مه‌ش هه‌میشه‌ ته‌كسیه‌كه‌م هه‌بوو كه‌زۆر جار بۆ نه‌فه‌ری قاچاخ تا شوێنێكی مه‌به‌ست به‌كار ده‌هێنا…

تاكسیكه‌ منی له‌پۆشكینسكایه‌ دابه‌زاند و ماریا ئیڤانۆڤنای و به‌ره‌و ئه‌درێسه‌كه‌ی خۆی برد، به‌ڵێنم پێدا ئێواره‌ ته‌لفۆن بۆ ژووره‌كه‌ی بكه‌م و سبه‌ی پێكه‌وه‌ به‌ناو مۆسكۆدا بگه‌ڕێین. پێشئه‌وه‌‌ی دابه‌زم به‌مه‌كرێكه‌وه‌ گووتی؛ من له‌بیر نه‌كه‌یت…منیش خێرا گووتم؛ له‌وه‌ ده‌چێت من تۆ له‌بیربكه‌م؟ …به‌بزه‌وه‌‌ گووتی؛ به‌ڵێ زیاتریش …كازانۆڤا! هێشتا گازه‌كانی سڤێتلانه‌ به ‌لاملته‌وه‌یه‌، ژنان شت بۆیه‌كتری ده‌گێڕنه‌وه‌!

پوشكینسكایه‌ ئه‌و گۆڕه‌پانه‌یه‌ كه‌ ده‌كه‌وێته‌ سه‌ر هێڵی ژماره‌ حه‌وتی میترۆی مۆسكۆ، به‌په‌یكه‌ره‌ گه‌وره‌كه‌ی شاعیری ڕوسی پوشكین ناسراوه‌، به‌ڵام له‌م ساڵانه‌ی دوای ڕووخانی سۆڤیه‌ت پڕبووه‌ له‌قاچاخچی و كچی گه‌نجی بێ لانه‌ كه‌ له‌پێناو مانه‌وه‌ی شه‌وێك و جه‌مه‌ نانێك و ماگدۆناڵدێك به‌ته‌نووره‌یه‌كی كورته‌وه‌ له‌و گۆڕه‌پانه‌ په‌یوه‌ندیان له‌گه‌ڵ بێگانه‌كاندا ده‌به‌ست. له‌زه‌مه‌نێكدا كه‌ ئه‌م وڵاته‌ سۆڤیه‌تی مه‌زن بوو، ئه‌وانه‌ی كه‌ ده‌هاتنه‌ سۆڤیه‌ت و ئه‌م گۆڕه‌پانه،‌ له‌لایه‌ن پارته‌ كۆمۆنیسته‌كانه‌وه‌ پشتگیری ده‌كران، ئه‌وسا ده‌هاتن بۆ سۆڤیه‌تی مه‌زن. هه‌ر له‌ ئه‌ڵمان و ئینگلیزه‌ وه‌ بیگره‌ تاوه‌كو كۆمه‌نیسته‌ چینیه‌كان و عه‌ره‌ب و فارس و شۆرشگێڕێكانی ئه‌مریكای لاتین و شۆرشگێڕانی كورد و عه‌ره‌بی دونیای سێهه‌م. مامۆستا (گۆران) ی شاعیر له‌م گۆڕه‌پانه‌دا ڕاوه‌ستاوه و شیعری بۆ كیژه‌كانی ئێره‌ نوسیووه‌‌، به‌ڵام دوا نه‌وه‌ی شاعیری كوردایه‌تی كه ‌له‌م گۆڕه‌پانه‌ وه‌ستاوه‌ و له‌زه‌مه‌نی سۆڤێته‌وه‌ لێره‌یه‌، په‌شێو بووه به‌خۆی ڕسته‌ به‌ناوبانگه‌كه‌ی؛ مۆسكۆی چاوشین‌…سه‌یر له‌وه‌دایه‌ كه‌ هه‌موو جارێك دێم بۆ ئێره‌ و یه‌كه‌م ڕۆژیش پێمخسته‌ سه‌ر زه‌وی ئه‌م سۆڤێته‌ دێرینه‌، یه‌كه‌م دێڕ به‌خه‌یاڵمدا گوزه‌ری كرد (مۆسكۆی چاوشین) ی په‌شێو بوو، كاتێك دیوانی (شه‌و نییه‌ خه‌وتان پێوه‌ نه‌بینیم) بڵاوكرده‌وه‌. دیاره‌ من نه‌ك خه‌ون نابینیم پێوه‌یان به‌ڵكو ناشمه‌وێت بزانم كه ‌ڕۆژێك له‌ڕۆژان منیش له‌و ئاوده‌سته‌دا قالۆنچه‌یه‌ك بووم و وه‌ك ئه‌وان ده‌ژیام…به‌ڵام هه‌موو جارێك كه‌ دێم بۆ مۆسكۆ و بۆ پوشكینسكایه‌، من به‌دووی وێنه‌ی په‌شێودا ده‌گه‌ڕێم. ئه‌وه‌نده‌ش ‌ ده‌زانم كه‌ (په‌شێو) ده‌مێكه‌ له‌ده‌ره‌وه‌ی مۆسكۆ له‌لادێیه‌كی بچوكدا ده‌ژی…ئه‌ویش ده‌زانێت ئه‌مانه‌ قالۆنچه‌ن و ته‌ره‌كانه‌ن و له‌ئاوده‌ستدا نه‌بێت ناژین، به‌ڵام ناسیونالیزمه‌ جوانه‌ شیعرییه‌كه‌ی ڕێگره‌ له‌وه‌ی ئه‌و وێنه‌یه‌ بێته‌ شیعرییه‌وه‌، ده‌نا ئه‌ویش وه‌ك من تێكه‌ڵی هاونیشتمانانی خۆی نابێت. جیاوازی ئه‌و و من دوو شتن ئه‌و شاعیره‌ و منیش هیچ نیم، جگه‌ له‌تێكشكاوێكی شۆڕش نه‌بێت. په‌شێو وه‌ك من تێكه‌ڵی هاونیشتمانیه‌كان ناكات به‌ڵام شیعریان بۆ ده‌نوسێت، من نه‌شیعریان بۆ ده‌نوسم و نه‌لام گرنگه‌ چیان به‌سه‌ر دێت. چونكه‌ په‌شێو وه‌ك من ئه‌مانه‌ی نه‌بینی له ‌هه‌شتاكاندا كه‌ له ‌سه‌دا هه‌شتا بوون به‌جاشی به‌عس و ڕاپۆڕتلێده‌ر له‌خوشك و براكانیان. ته‌نانه‌ت پێش سوپا كه‌وتن و ده‌ستیان گرتن بۆ ئه‌و دۆڵ و نشێویانه‌ی ژن و منداڵانی گه‌رمیان له‌ترسی قه‌ڵاچۆكردن خۆیان تێدا شاردبۆوه‌ و هه‌موویان دوایی ده‌ستدرێژیان كرایه‌ سه‌ر و له‌‌ ئه‌نفالدا بێ سه‌روشوێنكران. په‌شێو له‌وه‌دا نه‌ژیا كه‌ چۆن دوای چه‌نده‌ها ساڵیش كه‌سه‌دام نه‌ما، چیرۆكی خیانه‌ت كه‌سی نه‌هه‌ژاند، وه‌ك قالۆنچه‌ وه‌هابوون ته‌نها ده‌ژیان هه‌ژاندن لای ئه‌وانه‌ مانای نه‌بوو. قالۆنچه‌كان دوای ڕاپه‌ڕین له‌هه‌موو تاوانباره‌ گه‌وره‌كان خۆش بوون و هه‌موو شتێك له‌بیركرا. ئه‌مانه‌ نازانن تراژیدیا چییه‌، وه‌ك قالۆنچه‌ وه‌هان پلیشانه‌وه‌ی قالۆنچه‌كه‌ی تر كاریان ته‌ناكات. په‌شێو نازانێت ئه‌مانه‌ جگه‌ له‌ ته‌ره‌كانه‌ی سه‌ركرده‌كان نه‌بێت هیچیتر نین و شیعر بۆ ئه‌مانه‌ خه‌ساره‌. سه‌ره‌ڕای ئه‌م هه‌موو تراژیدیه‌ ئه‌مانه‌ به‌بێ قاچاخچی ناژین، به‌بێ لێخوڕ سه‌ریان لێده‌شێوێت، به‌بێ بت ده‌مرن و بۆگه‌نتر ده‌بن له‌وه‌ی كه‌ هه‌ن.

ئه‌م قالۆنچانه‌ له‌م ساڵانه‌ی دوایی كه‌هاتن بۆ ئێره‌ بۆ ئه‌وه‌ی به‌ڕێگه‌ی قاچاخدا بڕۆن بۆ ئه‌وروپا، خێرا ئه‌م گۆڕه‌پانه‌ جوانه‌ی پۆشكینسكایه‌یان به‌گووی كۆیله‌بوونیان بۆگه‌نكرد. له‌مێژووی سۆڤێت و ڕووسیای گه‌وره‌دا شتی وه‌ها ڕووینه‌داوه‌ له‌گۆڕه‌پانی گه‌وره‌ی شاعیری گه‌وره‌ی وه‌ك (پوشكین) ‌ زیاتر له‌حه‌فتا پیاو به‌چه‌قۆ و دار و بوتڵ بكه‌ونه‌ یه‌كتری، به‌جۆرێك كه‌چوار هه‌زار كۆماندۆ نه‌وێرێت ناوبژییان بكات، به‌جۆرێك كه‌ به‌قومبه‌له‌ی غاز و له‌دواجاردا ته‌قه‌كردن به‌ئاسماندا هه‌ریه‌كه‌ی به‌ره‌و لایه‌ك ڕایكردووه‌. بۆ هیچ نا، ته‌نها له‌پێناو به‌رگریكردن نه‌بێت له‌و مرۆڤه‌ی قۆڵی بڕی بوون. ئه‌م ته‌ره‌كانه‌ پیسانه‌ له‌وڵاتی خۆیان به‌پاره‌ی خۆیان هاتبوون بوو بوون به‌ پیاوی قاچاخچیه‌ عه‌ره‌ب و كورد و توركمانه‌كان. ته‌نها نه‌فه‌ره‌ كورده‌كانی قاچاخچیه‌ كورده‌كان ئاوه‌ها كۆڵه‌وار و قالۆنچه‌ ئاسا ڕه‌فتاریان ده‌كرد، میلله‌تانی تر قاچاخچیه‌كه‌یان ‌ ده‌كوشت گه‌ر پاره‌یان بخوات یان بیه‌وێت ڕابكات. ئه‌م ته‌ره‌كانه‌ سه‌یرانه‌،‌ سه‌ره‌ڕای ئه‌وه‌ی زیاتر له‌ چوار هه‌زار و هه‌ندێكیان پانزه‌ هه‌زار دۆلاریان خستبوونه‌ ده‌ستی قاچاخچیه‌كانه‌وه‌، پاره‌یه‌ك كه‌ خانووی خۆیان له‌و گه‌مارۆ سه‌خته‌ ئابووریه‌دا بۆ فرۆشتبوو‌، به‌ئاسانی كردبوویانه‌‌ ده‌ستی قاچاخچیه‌كانه‌وه‌، كه‌ چی له‌جیاتی ئه‌وه‌ی ملی قاچاخچیه‌كانی خۆیان بگرن كه‌پاره‌یان لێ وه‌رگرتوون و ده‌ستی ده‌ستیان پێ ده‌كه‌ن و ئه‌مڕۆ و سبه‌ینان پێده‌كه‌ن. ده‌چوون وه‌ك كۆیله‌ ده‌بوونه‌ پیاوی قاچاخچیه‌كه‌یان و به‌گژ نه‌فه‌ره‌كانی هاونیشتمان و هاوشار و هاوزمانه‌كانی خۆیان ده‌بوونه‌وه‌، كه‌ نه‌فه‌ری قاچاچاخچیه‌كی تری كورد بوون ئه‌مانه‌ بیریان ‌چوو بوو كه ‌چه‌نده‌یان خستۆته‌ ده‌ستی قاچاخچیه‌كانیانه‌وه‌…ئه‌مانه‌ مێژوویه‌كیان له‌م گۆڕه‌پانه‌ تۆماركرد كه‌ جگه‌ له‌مێژووی قالۆنچه‌ی ئاوه‌ده‌ست نه‌بێت هیچیتر نییه‌. حه‌فتا پیاو به‌چه‌قۆ كه‌وتنه‌ یه‌كتری و یه‌كتریان كه‌له‌پارچه‌ كرد له‌به‌رده‌می پۆلیس و كۆماندۆی ڕووسی و كامیرای ڕۆژنامه‌نوساندا، حه‌فتا كه‌س ده‌ستیان شكا و لووتیان پڕخوێن بوو و چاویان ده‌رپۆقی بۆ قاچاخچی خوێڕی. حه‌فتا كه‌س ڕۆژانی دوایش له‌كۆڵانه‌كانی دیكه‌ی مۆسكۆ هه‌ر به‌رده‌وامبوون یه‌كتریان به‌ر چه‌قۆ ده‌دا، له‌كه‌مپه‌كانی چیخه‌فسكا و زیلاگرادسكایه‌ش هه‌ر هه‌مان به‌زمیان هه‌بوو. ژنه‌كان ده‌ستیان د‌ه‌دایه‌ قژی یه‌كتره‌وه‌ و منداڵه‌كان یه‌كتریان به‌ر شه‌قده‌دا و كورسی و قابله‌مه‌ و چه‌قۆ و دار و تێڵا له‌ناو ئه‌و كه‌مپه‌دا ئه‌وه‌نده‌ باڵه‌فڕكه‌یان بوو، به‌جۆرێك كۆماندۆ نه‌یده‌وێرا بچێته‌ ژووره‌وه‌ تاوه‌كو ته‌ره‌كانه‌كان له‌شه‌ڕی ناو ئاوده‌سته‌كانیا تێرده‌بن…هه‌ربۆیه‌ من له‌و ڕۆژه‌وه‌ مۆسكۆم به‌جێهێشت. ئه‌و زه‌مه‌نه‌ ته‌ره‌كانه‌كان نه‌ده‌هاتن بۆ كێیڤ، من له‌ گۆڕه‌پانی یادی په‌نجا ساڵه‌ی ئۆكتۆبه‌ر خانه‌یه‌كم گرتبوو كه ‌كه‌س پێی نه‌ده‌زانی، ته‌نانه‌ت ئێستاش جگه‌ له ‌جونێت نه‌بێت كه‌س نازانێت من له‌كوێ ده‌ژیم .

ئه‌م قالۆنچانه‌ هه‌موو ئه‌و یاده‌وه‌ریه‌ جوانه‌یان سڕیه‌وه‌ كه‌ گۆران و شاعیره‌كانی دیكه‌ له‌م گۆڕه‌پانه‌ هه‌یانبووه‌، ئه‌وه‌ی كه‌ لێره‌ دێته‌وه‌ یاد ته‌نها شه‌ڕه‌ چه‌قۆ گه‌وره‌كه‌ی كورده‌كانی باشووره‌، كه‌ وه‌ك قالۆنچه‌ی سوور یه‌كتریان بۆ قاچاخچیه‌كانیان خوێناوی سه‌قه‌ت كردبوو، هه‌ندێكیشیان ئێستاش به‌یه‌ك چاویی و شوختی ده‌موچاوه‌وه‌ له‌كه‌مپه‌كانی زیلاگرادسكایه‌ و چیخه‌فای بۆگه‌ندا له‌ژووره‌ پیسه‌كاندا بوون به‌ ئالكهولی و هه‌ندێكیشیان ڕۆژانه‌ دێن لێره‌ شفته‌ ده‌فرۆشن یان ده‌یانه‌وێت نه‌فه‌ری نوێ به‌رن بۆ قاچاخچیه‌ نوێیه‌كان…
له‌دووره‌وه‌ ته‌ره‌كانه‌كانی خۆمم بینی، تۆپه‌ڵ تۆپه‌ڵ به‌ده‌وری فواره‌ و په‌یكه‌ره‌كه‌دا ده‌میان پانكردبۆه‌وه‌، خێرا ته‌لفۆنم بۆ ئه‌و ژماره‌یه‌ كرد كه‌ جونێت پیێدابووم، نیو كاژێری نه‌برد سێ كه‌سی چوارشانه‌ی ‌ڕووسی هاتن و پێكه‌وه‌ چووین بۆ لای ته‌ره‌كانه‌كان، كه‌تۆپه‌ڵ تۆپه‌ڵ به‌ده‌وری په‌یكه‌ره‌كه‌ی پوشكین دانیشتبوون و منداڵه‌كان ئه‌م كۆتر بۆئه‌ویتریان ده‌فڕاند…ئاوه‌ها هه‌موویان له‌خۆشی گه‌ڕانه‌وه‌ی هه‌ناسه‌ی قاچاخچی بۆ سییه‌ پیسه‌كانیان، له‌خۆشی بۆنی گووی ئاوده‌ستی قاچاخچی گه‌شانه‌وه‌، دوای سێ ڕووسه‌كان‌ كه‌وتن و منیش بێئه‌وه‌ی ماڵئاوایی یان هیچ ڕسته‌یه‌كیان له‌گه‌ڵدا بگۆڕمه‌وه‌ به‌جێمهێشتن…
من هێشتا بیرم له ‌لودمیلا له‌ (گیتانۆ جۆزه‌فینه‌كه‌م) ده‌كرده‌وه‌، سه‌رم پڕ بوو له‌هه‌وری دۆزینه‌وه‌ی لودمیلا، له‌گه‌ڕان به‌دووی یولیای كچیدا كه‌ ده‌مزانی له‌ كراسنی ئینستوته‌. سه‌رم پڕ بوو له‌سیناریۆی سه‌یر سه‌یر…به‌ڵام كه‌ئاوڕمدایه‌وه‌ ئه‌و بونه‌ره‌ سه‌یره‌م بینی كه‌ له‌سووچێكدا شفته‌ی ده‌فرۆشت و به‌چاوه‌ شین و ده‌موچاوه‌ لاواز و له‌شه‌ بچوك و سیس و ڕه‌قه‌ڵه‌كه‌یه‌وه‌ سه‌یری ده‌كردم …ئه‌و كه‌سه‌ (حه‌مه‌‌ شه‌كره) بوو، قالۆنچه‌یه‌ك كه‌وێنه‌ی نه‌بوو له‌هیچ ئاوده‌ستێكی ئه‌م جیهانه‌دا.

هه‌ر كه‌ حه‌مه‌ شه‌كره‌ منی بینی له‌شوێنی خۆی هه‌ڵبه‌زیه‌وه‌، وه‌ك ئه‌وه‌ی دووپشك پێوه‌ی دابێت، ئاوه‌ها مه‌نجه‌ڵه‌كه‌ی به‌جێهشت و به‌ره‌و ڕووی من ڕایكرد. پێده‌چوو منی له‌گه‌ڵ ڕووسه‌ چوارشانه‌كان بینیبێت كه‌ دێن و دوایی ده‌یانبه‌م بۆ لای خێزانه‌كان و له‌وێوه‌ ئه‌وانی بینبێت كه‌ ده‌چن بۆ ناو ئه‌و پاسه‌ بچوكه‌ی له ‌ته‌نیشت جاده‌كه‌ ڕاوه‌ستابوو…منیش ویستم به‌په‌له‌ له‌و ناوه‌ نه‌مێنم، به‌ڵام نازانم چۆن له‌به‌رامبه‌رم زیت بۆوه‌ و گووتی؛ چۆنی برا! منیش به‌ساردیه‌كه‌وه‌ وه‌ڵاممدایه‌وه‌، تۆزێك له‌منی ڕوانی و گووتی؛ من ناناسیته‌وه‌؟ من خۆم لێ گێلكردو گووتم؛ نه‌خێر؟ دوایی به‌چاوه‌ شین مله‌ ڕه‌قه‌ڵه‌كه‌یه‌وه‌ كه‌وه‌ك ڕه‌گی دره‌ختێكی پیر وابوو، گووتی؛ من حه‌مه‌ شه‌كره‌م، لێره‌ پێمده‌ڵێن حه‌مه‌ی تامارا…ئا چونكه‌ ژنه‌كه‌م ناوی ته‌مارایه‌…منیش به‌ناوی ته‌مارا ‌ڕاچڵه‌كیم، له‌دڵی خۆمدا ناوی تاماراشم له‌به‌رچاو كه‌وت، چونكه‌ ماوه‌یه‌ك له‌گه‌ڵ خانمێكی زۆر ناسكدا هاوڕه‌ی بووم كه‌ناوی تامارا بوو. به‌ڵام وه‌ها خۆم نیشاندا كه ‌نایناسم، هه‌ستمكرده‌كرد ئه‌م قالۆنچه‌یه‌ زه‌مه‌نێكم بیردێنته‌وه‌، كه ‌من له ‌ئاوده‌سته‌ گه‌وره‌كه‌دا ده‌ژیام، هه‌ربۆیه‌ ده‌ستمكرده‌وه‌ به‌ڕۆیشتن. كه‌چی دیسانه‌وه‌ هاته‌وه‌ به‌رده‌مم و گووتی؛ من تۆ ده‌ناسم، كوڕی حاجی ، بیرتدێت نه‌تهێشت بمكوژن. من خه‌فیفه‌ بووم، جاشی خه‌فیفه‌ به‌رده‌ستان كه‌وتم، بیرتدێت… وانییه‌! تۆ كوڕی حاجیت، كوڕی گه‌ڕه‌كی خۆمان بوویت، بیرت نایه‌ت. به‌ساقه‌ت بم ڕزگارم بكه‌، ڕێگه‌یه‌ك ده‌رچم لێره‌…سه‌یرێكم كرد و گووتم؛ سبه‌ی دێمه‌وه‌ بۆ لات، من جارێ لێره‌م له‌مۆسكۆم و ئێستا ده‌بێت بڕۆم…ئه‌و خێرا ئه‌درێس و ژماره‌ی ته‌لفۆنه‌كه‌ی خۆی دامێ كه ‌پێده‌چوو ژنه‌كه‌ی یان هاوڕێ ژنه‌كه‌ی بۆی نوسیبێت. لێم وه‌رگرت و به‌په‌له‌ پۆشكیسنكایه‌م به‌جێهێشت.


سواری تاكسیه‌كه‌ بووم و چوومه‌وه‌ بۆ ئه‌درێسه‌كه‌ی ماریا ئیڤانۆڤنا. ماریا له‌ژووره‌كه‌ی خۆی خه‌وتبوو، به‌ڵام من كلیلی ئه‌و خانه‌ تایبه‌ته‌ی ماریام له ‌واگۆنه‌كه‌وه‌ لێ وه‌رگرتبوو. له ‌خواره‌وه‌ش كه‌ ژنی سه‌رپه‌رشتیاری ئاپارتمانه‌كه‌ پرسیاری لێكردم بۆ كوێ ده‌چم گووتم؛ بۆ لای ماریا. هیچی نه‌گووت و بزه‌یه‌كی كرد. دوایی پێمگووت؛ شه‌مپانیایه‌كیش بۆ تۆ دێنم جارێكیتر…به‌نازه‌وه‌ گووتی؛ تازه‌ من پیر بووم بۆ شه‌مپانیا، ڤۆدكای ستۆڵچنایه‌ باشتره‌!… هه‌ر كه ‌چوومه‌ ژووره‌وه‌ خێرا له‌سه‌ر قه‌نه‌فه‌كه‌ ڕاكشام، زۆر شه‌كه‌ت بووم، پێده‌چێت قورسی بینینی دیمه‌نی حه‌مه‌شه‌كره‌ هیلاكی كردبووم….

كاتی خۆی كه‌ هه‌رزه‌كار بووم ئه‌م حه‌مه‌ شه‌كه‌ریه‌م ده‌ناسی. حه‌مه‌ شه‌كره‌ كرێكاری كانه‌ به‌رده‌كان بوو، به‌گشتی كرێكاری ده‌كرد و ئه‌وسا كرێكار ڕۆژی پێنج دیناری وه‌رده‌گرت كه‌پاره‌یه‌كی باش بوو له‌ ڕۆژێكدا. ئێراق به‌گشتی له‌كۆتایی حه‌فتاكاندا و سه‌ره‌تای هه‌شتاكان تاوه‌كو سه‌ره‌تای شه‌ڕی ئێران و ئێراق به‌بووژاندنه‌وه‌یه‌كی ده‌گمه‌نی ئابووریدا تێده‌په‌ڕی. ئه‌میش به‌یانیان له‌گه‌ڵ به‌ره‌بایندا ده‌چوو بۆ كانه‌ به‌رده‌كان و ئێواران دره‌نگ ده‌هاته‌وه‌. پێكهاته‌ی فیزیكی ڕه‌قه‌ڵه‌ و كورته‌بنه‌ بوو، ڕه‌گاوی بوو وه‌ك دره‌ختێكی پیر. هه‌میشه‌ سنگی ده‌كرده‌وه‌ و چه‌كوشێك و مه‌ترێك به‌لای قایشه‌كه‌ی بوو. ماوه‌ی ساڵێك بوو خانوویه‌كی له‌گه‌ڕه‌كی ئێمه‌ به‌كرێ گرتبوو، گه‌ڕه‌كی ئێمه‌ جگه‌ له ‌گێتۆی شه‌ڕه‌ سه‌گ و مانگا و كه‌ری به‌ره‌ڵا و كۆبوونه‌وه‌ی خێڵه‌كان نه‌بێت هیچیتر نه‌بوو. خانووه‌ كرێیه‌كه‌ی به‌ (خانووی پیرێژنه‌كه) ناسرابوو‌. خاوه‌ن خانووه‌كه‌ پیرژنێكی ڕه‌زیل و چرووك بوو كه‌ناوی پوره‌ ڕه‌عنا بوو، منداڵی نه‌بوو، وه‌ك پیرێژنه‌كه‌ی ڕۆمانی دێستۆێیڤسكی (ئالۆنا ئیڤانۆڤنا) وه‌هابوو، به‌ڵام هه‌رگیز (ڕاسكۆنیكۆڤ) ی كرێچیه‌ك نه‌بوو به‌ته‌ور بیكوژێت. پیرێژێنكی ده‌م هه‌راش و زمانلێده‌ر له ‌هه‌موو كه‌سێك له‌و گه‌ڕه‌كه‌. دوای مردنی مێرده‌كه‌ی ئه‌م دوو خانووه‌ی بۆ مابۆوه‌، هه‌ندێك ده‌یانگووت؛ مێرده‌كه‌ی له‌ برسا و خه‌فه‌تا مردووه‌. پوره‌ ڕه‌عناش سه‌ره‌ڕای ئه‌و هه‌موو كرێیه‌ی وه‌ریده‌گرت، جگه‌ له‌كرێیی زه‌وییه‌كانی مێرده‌كه‌ی له‌ده‌ره‌وه‌ی شار، سێ دوكانیان له‌ناو بازاڕدا هه‌بوو. سه‌ره‌ڕای ئه‌وه‌ ده‌چوو سواڵی ئێسقانی له‌قه‌سابه‌كان ده‌كرد و سه‌وزه‌ی فڕێدراوی له‌بازاڕ كۆده‌كرده‌وه‌ به‌و ناوی كه‌روێشكی هه‌یه‌ به‌خێوی ده‌كات له‌ماڵه‌وه‌. له‌ڕاستیشدا كه‌روێشكی ڕاگرتبوو، حه‌وشه‌كه‌ی پڕ بوو له‌كه‌روێشك، سه‌ره‌ڕای ئه‌وه‌ی زاووزێیان بێ شومار بوو، دڵی نه‌ده‌هات سه‌ریانببڕێت ده‌چوو ئێسقانی له‌قه‌سابه‌كان كۆده‌كرده‌وه‌ به‌ناوی ئه‌وه‌ی كوڕه‌كه‌ی له‌ده‌ره‌وه‌ی شاڕ شوانه‌ و گه‌ماڵی هه‌یه‌. ڕقی له‌ئێمه‌ی كوڕانی گه‌ڕه‌ك بوو، چونكه‌ ده‌یزانی كه ‌جارجاره‌ ئێمه‌ كه‌روێشكه‌كانی ده‌دزین و ده‌چین له بازاڕی ‌ژێر پرده‌كه ده‌مانفرۆشته‌وه‌ و پێده‌چووین بۆ سینه‌ما بۆ سه‌یركردنی فلیمی عه‌سابه‌ و كاوبۆیی یان فلیمی هیندی. ‌

خانووه كرێیه‌‌كه‌ی حه‌مه‌ شه‌كره‌ دوو ژوور و هه‌یوانێك و حه‌مام و ئاوده‌ستێك و مووبه‌قێكی بچوك بوو. خانووی پیرێژینش به‌ته‌نیشتیه‌وه‌ بوو، به‌ڵام ژوورێكی دابوو به‌ دوو قووتابی په‌یمانگای ده‌ره‌وه‌ی شار. ژنه‌كه‌ی ناوی مه‌حبوبه‌ بوو، سنگی به‌رز، دووچاوی هه‌میشه‌ به‌كل و ده‌نگێكی شه‌نگه‌ ژنانه‌ی هه‌بوو‌، ده‌نگێكی سێكسی كه ئێمه‌ی تازه‌باڵقی شێت ده‌كرد. كه ‌هه‌ناسه‌ی هه‌ڵده‌كێشا هه‌موو ئێمه‌ی مێرد منداڵ كه‌به‌ره‌و باڵقبوون هه‌ڵده‌كشاین، به‌رزبوونه‌وه‌ی سنگیمان له‌مێشكماندا كۆپی كردبوو، دوایش له‌ئاوده‌سته‌كاندا له‌ده‌ستپه‌ڕدا لێمناده‌دایه‌وه‌.‌ مه‌حبوبه‌ هه‌میشه‌ كراسێكی ته‌نكی كوردیانه‌ی سنگ داچه‌قیووی له‌به‌رده‌كرد، ‌ژێركراسه‌ ڕه‌شه‌كه‌ی دیاربوو، سنگی خاڵێكی له‌سه‌ر كوترابووی له‌سه‌ر نه‌خشابوو، بچوك بوو، به‌ڵام چاوه‌ تیژه‌كانی ئه‌م چواره‌مان ده‌یبینی، هه‌روه‌ها چه‌ناگه‌شی كوترابوو، جارجاره‌ش لوته‌وانه‌‌كه‌شی ده‌كرده‌ لووتی یان خڕخاڵێكی ده‌كرده‌ قاچه‌ تورته‌كانی و له‌هاویندا كه‌ئێمه‌ی كوڕوكاڵی گه‌ڕه‌ك له‌سه‌ر سووچه‌كه‌ ڕاده‌وه‌ستاین، ئه‌و به‌رده‌م ماڵه‌كه‌ی ده‌شت و هه‌مووانی به‌خڕخاڵ و سنگه‌ ڕووته‌كه‌ی شێت ده‌كرد.
چه‌ند جار شه‌وانی هاوین به‌تایبه‌ت له‌بن دیواری ماڵی ئه‌واندا كه‌ ده‌كه‌وته‌ سه‌ر خانوویه‌كی ناته‌واو، گوێمان له‌ شه‌ڕی حه‌مه‌شه‌كره‌ و مه‌حبوبه‌ بووه شه‌ڕیان بووه‌‌، به‌ڵام هه‌موو جارێك مه‌حبوبه‌ به‌ جه‌سته‌ زه‌به‌لاح و شه‌نگه‌ ژنییه‌ی له‌حه‌مه‌ی ده‌دا به‌نه‌عل و پێده‌چوو سێكس نه‌بێت له‌نێوانیاندا… زۆر شه‌و ده‌مانبینی حه‌مه‌ شه‌كره ‌ به‌توڕه‌یی دێته‌ ده‌ره‌وه‌ و ده‌ڕوات، به‌ڵام نه‌مانده‌زانی بۆ كوێ ده‌چێت و نه‌شمانده‌ویست ئه‌وه‌ بزانین. خێرا ده‌چووینه‌ سه‌ر سه‌ربانه‌كه‌ و سه‌یری لاقی ڕووت و ناوگه‌ڵ و مه‌مكه‌كانی مه‌حبوبه‌مان ده‌كرد كه‌ به‌ژێركراسێكه‌وه‌ له ‌هه‌یوانه‌كه‌ خه‌وتبوو‌، دوایی هه‌ر یه‌كێك له‌ ئێمه‌ ده‌چووه‌ ژوورێكی ئه‌و خانووه‌ چۆڵه‌ و ده‌ستپه‌ڕی لێده‌دا…زۆر جار ده‌نگی زه‌ڕینی كه‌رێك یان ده‌نگی شه‌ڕه‌ پشیله‌ یان وه‌ڕینی سه‌گه ‌به‌ڕه‌ڵڵاكان خه‌یاڵی ده‌ستپه‌ڕه‌كانمانی تێكده‌دا. به‌ڵام كه‌ وێنه‌ و ده‌نگی مه‌حبوبه‌مان ده‌هێنایه‌وه‌ سه‌ر سكرینی مێشكمان، ئه‌وا زۆر زوو زه‌ڕینی و وه‌ڕن كاریگه‌ر نه‌بوون و ده‌ستمان سپێرماوی ده‌بوو.

به‌داخه‌وه‌ دووان له‌و دوو هاوڕیانه‌م له‌شۆڕشدا كوژران، شه‌ماڵی هاوڕێشم هه‌ر زوو وڵاتی به‌جێهێشت. پێشئه‌وه‌ی به‌رهو‌ ئێران بڕوات، كاتێك هاته‌ ماڵه‌وه‌ بۆئه‌وه‌ی نامه‌یه‌كی بۆ بنوسم بۆ یه‌كێك له‌و هاوڕێیانه‌م له‌ شاخ بۆ ئه‌وه‌ی كار ئاسانی بۆ بكات و بچێت بۆ ئێران، بۆ یه‌كمجار بوو ببیستم وشه‌ی (قالۆنچه‌) بۆوه‌ك سیفه‌ت به‌كاربهێنرێت. گووتی؛ كه‌ره‌ تۆ سبه‌ی توندت ده‌كه‌ن له‌زیندانی به‌عس و بوتڵ ده‌كه‌ن به‌قنگتا. بۆ ڕێكخستنی له‌دژی به‌عس پیاسه‌ی حه‌دیقه‌ی شه‌عبه‌ یان زه‌ورای به‌غدا. كه‌ گرتیانیت ده‌بێت مه‌رگ به‌ئاوات بخوازیت،‌ تۆ هه‌ر وا كه‌ر و خه‌وبینه‌ر بوویت، به‌ ئوتوو له‌شت وه‌ك كراس وه‌ك پانتۆڵی سێ خه‌ت ئوتو ده‌كه‌ن. بڕوا بكه‌ یه‌ك چاوت به‌زیندوویی ده‌رهێنن و پڕی ده‌كه‌ن له‌مشێك خوێ و دوایش چاوه‌كه‌ی ترت، به‌زیندوویی ده‌ستت ده‌خه‌نه‌ تێزابی ئه‌سیده‌وه‌، هه‌موو چركه‌یه‌ك ده‌تكوژن نه‌ك یه‌كجار، بۆ كێی ده‌كه‌یت وه‌ره‌ له‌گه‌ڵمدا با بڕۆین ئه‌م وڵاته‌ جێبهێڵین، كه‌ره‌ بۆ ئه‌م قالۆنچانه‌ی ده‌كه‌یت‌، بڕوابكه‌ دوایی ده‌بنه‌ جاش و پیاوی ئه‌م و ئه‌و؟ ئه‌مانه‌ قالۆنچه‌ن له ‌ئاوده‌ستدا نه‌بێت ناژین، وه‌ك ئه‌و حه‌مه‌ شه‌كره‌یه‌ قالۆنچه‌ن، بیرتدێت تووشی چ خه‌مۆكیه‌كی كردیت…

یه‌كه‌مین ژن كه‌ئه‌شقی بووم و ‌ تووشی ئازاری كردم و مه‌حبوبه‌ بوو. ئه‌وسا شانزه‌ ساڵان بووم و له‌ سه‌رسووچی كۆڵان چاوه‌ڕێی شه‌ماڵ بووم، كه‌ مه‌حبوبه‌ بانگیكردم بۆ ئه‌وه‌ی نامه‌یه‌كی بۆ بخوێنمه‌وه‌ كه ‌له‌ماڵی باوكیه‌وه‌ بۆی هاتووه‌، كه‌چوومه‌ ژووره‌وه‌ خێرا ده‌رگای حه‌وشه‌كه‌ی داخست، هاته‌ ته‌نیشتمه‌وه‌ و كه‌وته‌ گله‌یی له‌حاڵی خۆی. بۆ یه‌كمجار بووم ئه‌وه‌نده‌ له‌ ژنێك نێزیك بمه‌وه‌، هه‌ناسه‌كانی و به‌رزبوونه‌وه‌ی سنگی و ده‌ستی كه‌هێنای به‌ناوگه‌ڵمدا. ئیدی نازانم چۆن پێكه‌وه‌ سێكسمان كرد. ئه‌و كوڕێنی منی برد و كردمی به‌پیاو. بۆ یه‌كمجار بوو من ئاوه‌ها تامی ژن بكه‌م، ژنێك پانزه‌ ساڵ له‌خۆم گه‌وره‌تره‌…ئه‌مه‌ سه‌ره‌تای زنجیره‌ شه‌و و ڕۆژێكی سێكسكردن بوو له‌گه‌ڵ مه‌حبوبه‌، مه‌حبوبه‌یه‌ك كه‌منداڵی نابێت، هه‌ر بۆیه‌ بێخه‌م له‌گه‌ڵ ڕۆیشتنی شه‌كره‌ بۆ كار له‌به‌ره‌بایندا، من خۆم ده‌كرد به‌ماڵدا و سێكسمان ده‌كرد، ده‌یگووت؛ گانی كوڕی خوێنه‌وار و پاكو ته‌میز خۆشتره‌ له‌ پیاوێكی ناجسن و بۆگه‌ن… هه‌ر من بۆیه‌ بڕوام پێده‌كرد كه‌ ته‌نها له‌گه‌ڵ مندا ده‌خه‌وێت، چونكه‌ جگه‌ له‌من و شه‌ماڵ كه‌سیتر له‌م گه‌ڕه‌كه‌ هه‌ژارانه‌ی ئێمه‌دا نه‌یتوانیبوو بگاته‌ قۆناغی ئاماده‌یی…مه‌حبوبه‌ ده‌یگووت؛ ئه‌م پیاوه‌م ئاژه‌ڵێكی بۆگه‌نه‌ وه‌ك ئاژه‌ڵ سێكس ده‌كات، له‌شی هه‌موو بۆن ئاره‌قه‌یه‌‌، گۆره‌وویه‌كانی بۆگه‌نه‌ و هه‌ر به‌جلی كرێكارییه‌وه‌ ده‌خه‌وێت…
من دوایی بۆم ده‌ركه‌و‌ت كه‌ حه‌مه ‌شه‌كره‌ له‌ناو كرێكاره‌كانی هاوڕێیدا به‌وه‌ به‌ناوبانگه‌ كه‌ ماكه‌رگێیه‌. چه‌نده‌ها جار له‌ كانه‌به‌رده‌كان به‌سه‌ر ماكه‌ره‌وه‌ گرتوویانه، ته‌نانه‌ت له‌ ده‌شته‌كه‌ی سه‌ره‌وه‌ی گه‌ڕه‌كی خۆشمان خه‌ڵك بینیوویانه‌ و ڕاویان ناوه‌‌. مه‌حبوبه‌ ئه‌وه‌ی ده‌زانی هه‌ر بۆیه‌ كه ‌داوای سێكسی لێده‌كرد، هاواری ده‌كرد به‌سه‌ریدا و ئه‌ویش له‌ترساندا نه‌یده‌وێرا قسه‌بكات. چیتر سێكس نه‌مابوو له‌نێوانیاندا، به‌ڵام نه‌ حه‌مه‌شه‌كره‌ جیاده‌بۆه‌وه‌ و نه‌ مه‌حبوبه‌ش له‌هه‌ژاریدا داوای جیابوونه‌وه‌ی ده‌كرد. به‌ڵام زۆر جار به‌زۆر له‌گه‌ڵیدا ده‌خه‌وت، باڵێین ده‌ستدرێژی سێكسی ده‌كرده‌ ‌سه‌ری، به‌ڵام له‌گه‌ڵ هه‌ڕه‌شه‌ی ئه‌وه‌ی كه‌ده‌چێت ئه‌م نهێنیه‌ به‌خانه‌واده‌ی حه‌مه‌ شه‌كره‌ ده‌ڵێت دیسانه‌وه‌ ماوه‌یه‌كی زۆر تێده‌په‌ڕی و خامۆش ده‌بۆه‌وه‌…ئاوه‌ها ئه‌م گه‌مه‌یه‌ چه‌نده‌ها ساڵ‌ به‌رده‌وام بوو. منیش ئه‌و ماوه‌یه‌ بووم به‌ئه‌ندام له‌ڕێكخراوێكی نهێنی ماركسی لینینی و دوایی به‌رده‌وام ڕه‌خنه‌م له‌خۆم ده‌گرت، كه ‌نابێت هاوڕێیانی خه‌باتی كرێكاری له‌گه‌ڵ ژنی كرێكارێكدا ئه‌شق بكه‌ن، به‌ڵام هه‌ر ده‌چووم بۆ لای مه‌حبوبه و تا ئه‌و په‌ڕی خۆشمده‌ویست‌. ‌جاران پێش ئه‌وه‌ی بچمه‌ ڕێكخراوه‌وه‌ كه‌ حه‌مه‌م ده‌بینی حه‌زمده‌كرد شه‌ڕی و پێ بفرۆشم سێ چوار چه‌قۆی لێده‌م، ئه‌و زه‌مه‌نه‌ شه‌ڕه‌ چه‌قۆ و چه‌قۆ به‌ركه‌وتن و چه‌قۆ و بۆكس خه‌نجه‌ر هه‌ڵگرتن به‌شێك بوو له‌كاراكته‌ری گه‌نجایه‌تی و پۆزلێدان. كه‌چی دوایی ئه‌وه‌ی ئه‌ڵقه‌ی ڕۆشنبیرم له‌ڕێكخراوه‌كه‌دا ته‌واو كرد وه‌ك گه‌نجێكی ئایدۆلۆژیست كه‌ حه‌مه‌م ده‌بینی به‌جلی كرێكارییه‌وه‌ ده‌گه‌شامه‌وه‌ و خۆم وه‌ك خیانه‌تكارێك ده‌بینی نه‌ك ئاشقێك، خۆم وه‌ك لینین ده‌بینی و حه‌مه‌م وه‌ك ئاڵاهه‌ڵگرێكی سوور به‌چه‌كوش و داسه‌وه‌. مه‌حبوبه‌م وه‌ك ئه‌و ژنه‌ ده‌بینی (دێلاكروا) كه‌ له‌ كۆمۆنه‌ی پاریسدا به‌سنگی ڕووت و جه‌سته‌ی تورته‌وه‌ ئاڵای كرێكاران و ڕه‌نجده‌رانی هه‌ڵگرتووه‌…ئه‌وسا نه‌مده‌زانی كه ‌من جاكۆمۆ كازانۆڤایه‌كی ترم، وه‌ك چۆن یولیا وه‌های ناو ناوبووم. ئیدی مه‌حبوبه‌ و ئازاره‌كانیم فه‌رامۆشكرد بۆ سه‌رخستنی شۆرشی ڕه‌نجده‌ران له‌جیهاندا، جارجاره‌ش‌ له‌ده‌رفه‌تدا سێكسمان ده‌كرد…‌تاوه‌كو شه‌وێكیان له‌م شه‌ڕی سه‌ر جێگایه‌ی نێوان ئه‌م ژن و مێرده‌ حه‌مه‌ شه‌كره‌ چه‌كوشێكی كێشا به‌سه‌ری مه‌حبوبه‌دا و كوشتی…ئیدی خه‌مۆكی یه‌ك ساڵه‌یی من ده‌ستیپێكرد.

حه‌مه‌ ته‌نها سێ مانگ له‌ به‌ندیخانه‌ مایه‌وه‌، چونكه‌ له‌دادگا حه‌مه‌ به‌دادوه‌ری گوتبوو؛ كه‌ ژنه‌كه‌ی له‌گه‌ڵیدا نه‌خه‌وتووه‌ و سێ ساڵ ده‌بوو په‌نجه‌ی به‌رنه‌كه‌وتووه‌، شه‌ڕیان بووه‌ و له‌ده‌ستی ده‌رچووه‌…به‌ڵام له ‌ڕاپۆڕتی ئۆتۆبسی لاشه‌ی مه‌حبوبه‌دا ئه‌وه‌ ده‌رده‌كه‌وێت، كه‌چه‌ند ڕۆژێك له‌مه‌وبه‌ر سێكسی كردووه‌. هه‌ر بۆیه‌ دادوه‌ر ده‌گاته‌ ئه‌و بڕوایه‌ی كه‌ حه‌مه‌ شه‌كره‌ پیاوێكی باشه‌ و له‌ڕووی نایه‌ت بڵێت ژنه‌كه‌م له‌سه‌ر شه‌ره‌ف كوشتووه‌. به‌مشێوه‌یه‌ دادوه‌ر به‌ یاسای شه‌ره‌ف دوای سێ مانگ ئازادی ده‌كات…

من ئه‌و له‌و ڕۆژه‌وه‌ بۆم ده‌ركه‌وت كه‌ دادوه‌ره‌كانیش دیووی دووهه‌می ئه‌م حه‌مه ‌شه‌كره‌یه‌ن. یاخود حه‌مه‌ شه‌كره‌یه‌ك له‌ناخی هه‌ر پیاوێكی ئه‌م ئاوده‌سته‌ گه‌وره‌یه‌دا هه‌یه‌ و هه‌ڵسوكه‌وتی ده‌جوڵێنێت. بۆیه‌ وه‌ها ده‌ڵێم چونكه‌ سه‌یرترین یاری قه‌ده‌ر له‌وه‌دا بوو، دوای چه‌نده‌ها ساڵ كه ‌ڕامكرده‌ شاخ و بووم به‌كادێری ئه‌م حزبه‌ی ده‌یویست ڕه‌نجده‌رانی جیهان ڕزگار بكات و هه‌موو مقه‌ره‌كانی پربوون له‌ نامیلكه‌ی عه‌ره‌بی سۆڤێتی و كۆماری چینی كۆمه‌نیستی و پۆسته‌ری ماركس و لینین و جیڤارا. پێشمه‌رگه‌كان جاشێكیان هێنا بۆلام منیش یه‌كسه‌ر ئازادم كرد، به‌و حونجه‌ته‌ی ئه‌مه‌ كه‌رگێیه‌كی نه‌گبه‌ته‌، كرێكارێكی هه‌ژاره‌… سه‌یر له‌وه‌دایه‌ منیش ئه‌و ئه‌و كه‌سه‌ حه‌مه‌ شه‌كره‌بوو. ئێستاش، دوای ئه‌م هه‌موو ساڵه‌ له‌پۆشكینسكایه‌ ده‌یبنیمه‌وه‌، سه‌یر له‌وه‌دایه‌ ده‌یه‌وێت له‌ ڕووسیا ڕزگاری بكه‌م‌…
ئه‌م ته‌ره‌كانه‌یه‌‌ گه‌وره‌ترین برینی خسته‌ دڵمه‌وه‌، ساڵانێكی زۆر مه‌حبوبه‌ ده‌هاته‌ خه‌ونم و باوه‌شی پێدا ده‌كردم و خۆم ته‌ڕ ده‌كرد، ساڵانێك بیرم له‌هه‌ناسه‌كانی ده‌كرده‌وه‌ كه‌ پڕ بوون له‌ئاڵۆشی ژنانه‌ و جوانی، بیرم له‌چاوه‌كانی ده‌كرده‌وه‌ كه ‌هه‌ڵده‌گه‌ڕانه‌وه‌، له‌مه‌مكه‌كانی كه ‌بۆ من ده‌گه‌شانه‌وه‌ و پڕبوون له‌ژیان. له‌گه‌ڵ هه‌ر ژنێكدا ده‌خه‌وتم بۆنی جه‌سته‌یی و ده‌نگی خڕخاڵه‌كانی پێیه‌كانی كه ‌له‌كاتی سێكسدا ده‌نگیان ده‌هات، له‌ناو سه‌رمدا ده‌زرنگانه‌وه‌ و ده‌یهارووژاندم…

كه‌چاوم هه‌ڵهێنا زانیم ده‌مێكه‌ له‌ژووری دانیشتنه‌كه‌ له‌سه‌ر قه‌نه‌فه‌كه‌ خه‌وم لێكه‌وتووه‌، ماریا ئیڤانۆڤنا به‌پێكه‌نینه‌وه‌ گووتی؛ خه‌وی ناو واگۆنه‌كه‌ تێگه‌یشتم، ئه‌مه‌یان چی؟…گووتم؛ ده‌هری بوون له ‌قالۆنچه‌كان، تۆ ده‌زانیت تاكه‌ شت جاكۆمۆ كازانۆڤای بێزار ده‌كرد قالۆنچه‌ بوو…ماریا پێكه‌نی و منیش به‌رده‌وام بووم؛ به‌ڕاستمه ماریا ئیڤانۆڤنا، ‌ له‌سه‌ده‌ی هه‌ژده‌ ژووری نوستنه‌كان و سه‌رجێگاكان پڕ بوون له‌مێروو، به‌تایبه‌ت ئه‌م ته‌ره‌كانه‌ سوورانه‌ی كه‌له‌ژێر ته‌خته‌داری ژووره‌كاندا ده‌تروكێن و ئه‌وانه‌ی تر كه‌ لێره‌ پێیانده‌ڵێن كله‌پ. پێده‌چێت ئه‌و مێرووانه‌ سه‌رجێگه‌ی ئه‌شقیان لێ تێكدابێت، یان له‌ناوگه‌ڵی ژنه‌كانه‌وه‌ هێرشیان هێنابێت. پێده‌چێت له‌پڕ به‌ڕووتی خۆیان دابێت به‌سه‌ر جێگه‌كه‌دا و هه‌موو ته‌ره‌كانه‌ سووره‌كان له‌ژێر به‌تانی سه‌رینه‌كانه‌وه‌ ده‌رپه‌ڕیوونه‌ته‌ ده‌ره‌وه‌. من هه‌ستده‌كه‌م وه‌هایه‌…چونكه‌ هه‌میشه‌ ته‌ره‌كانه‌یه‌ك ده‌رده‌په‌ڕێت و ژیانت لێ تاڵ ده‌كات…ماریا سه‌ری باداو پێكه‌نی و چووه‌ موبه‌قه‌كه‌، لهڕاستیدا هیچ قالۆنچه‌یه‌ك له‌ژیانی كازانۆڤادا ئه‌شقی لێ تێكنه‌داوه‌، به‌ڵام بینی حه‌مه‌ شه‌كره‌ وه‌ك ته‌ره‌كانه‌یه‌ك هه‌موو هه‌وره‌ ڕۆمانسیه‌كانی ناوسه‌رمی ته‌ره‌كرد، منی گه‌ڕانه‌وه‌ بۆ دوور زۆر دوور…ته‌نانه‌ت بیركه‌وتنه‌وه‌ی باجی ڕه‌عنای به‌دفه‌ڕ، كه‌ وه‌ك (ئالۆنا ئیڤانۆڤنا) ی ڕۆمانی (تاوان و سزا) ی دێستۆێفسكی وه‌ها بوو، لێكچوونی ناوی باوكیان له‌گه‌ڵ ماریا، بێزاری ده‌كردم. سه‌یره‌ ئه‌م قالۆنچه‌ مرۆییانه‌ چه‌نده‌ خه‌یاڵ ناشرین ده‌كه‌ن …
له‌م بیركردنه‌وه‌دا بووم كه‌ ماریا ئیڤانۆڤنا هاته‌ ته‌نیشتمه‌وه‌، و گووتی؛ هێمن به‌ره‌وه‌ ئه‌زیزم …په‌رداخێك ڤۆدكای بۆ هێنام و پێكه‌وه‌ ڤۆدكامان خوارده‌وه‌، دوایی په‌رداخێكی دیكه‌ و وورده‌ وورده‌ مه‌ستده‌بووین، دوایی سه‌مامان كرد و كه‌ هیلاكبووین و به‌ڕووتی چووینه‌ سه‌ر جێگه‌.

له‌نده‌ن – 16.01.2017

• Giacomo Casanova, Geschichte meines Lebens, vollständige Ausgabe, 1993, S2.

Previous
Next

Leave a Reply