Skip to Content

Thursday, March 28th, 2024
کوژه‌ری ئه‌به‌دی…..ئه‌حمه‌دی مه‌لا

کوژه‌ری ئه‌به‌دی…..ئه‌حمه‌دی مه‌لا

Closed

 کوژه‌ری ئه‌به‌دی
  ئه‌حمه‌دی مه‌لا
 27/12/2008
 
 من کوژه‌ری خه‌ونی تاڵی پێغه‌مبه‌رانم
 نوێتر له‌ دوێنێ
 له‌ تابووته‌که‌مه‌وه‌ هه‌ڵساومه‌ته‌وه‌.
 
 تابووته‌ شه‌خته‌ییه‌که‌ی من
 توێژی ساڵانی به‌جێماوی له‌ سه‌ر کۆبووه‌وه‌
 واته‌ خه‌ونه‌ زڕه‌کانی ئێنسان!
 
 من کوژه‌ری ئه‌جنده‌کانی پشت په‌نجه‌ره‌کانم و
 خۆم له‌ ژێر گه‌ڵاپانه‌کانی ویژدان ده‌شارمه‌وه‌.
 له‌ ژێر خوڵه‌ته‌پانییه‌کانی یاروه‌لی و
 له‌ به‌ر سێبه‌رکانی عه‌مدوون و
 په‌رچه‌مه‌کانی قزله‌ریش ده‌که‌مه‌ په‌رده‌ی عه‌وره‌تم
 و به‌ کۆڵانه‌کانی تۆمارا غار ده‌ده‌م
 رمێکم توند له‌ چنگ
 و به‌ دوای تارماییه‌کاندا عه‌وداڵم.
 
 من کوژه‌ری دراکولام
 
 له‌ به‌هه‌شته‌کانی له‌ززه‌ته‌وه‌ هاتووم
 به‌ په‌نجه‌ هه‌موو حه‌رفه‌کان تۆمار ده‌که‌م.
 خه‌ونه‌کان ده‌نووسمه‌وه‌ و
 په‌ڕه‌ په‌ڕه‌ی کراسه‌ دڕاوه‌که‌ی هه‌تاویش
 ده‌که‌مه‌ به‌ر.
 
 من کوژه‌ری جریوه‌ی ساوێلکه‌م
 ملوانکه‌ی ژنان ده‌پچرێنم
 تاجه‌که‌ی خودا
 داده‌ماڵم
 ده‌یخه‌مه‌ سه‌ر نووکی رمه‌کان.
 
 من له‌ جه‌نگه‌کان هاتوومه‌ته‌وه‌
 له‌ دوا جه‌نگی خاچپه‌رستان
 
 منی کوژه‌ری ئه‌به‌دی حه‌وانه‌وه‌ی نێو شێعره‌کان!!
 
 
 

Previous
Next
This site is registered on wpml.org as a development site.