Skip to Content

84 Views

ئۆغر … سه‌ردار جاف

ئۆغر … سه‌ردار جاف

Be First!
by April 28, 2018 General, Poems
image_print

هۆ په‌رییه‌كه‌م …..
له‌ مناڵدانی ئیشقما
ته‌نها له‌وێ وێنه‌ی تۆیه‌
تۆیش گاسنی ئومێدمت تێكشكاند و
له‌ ده‌سرازه‌ی خه‌ونه‌كانم
باوڵێك خه‌می نارنجیت جێهێشتووه‌
له‌ ته‌ك پیاسه‌كانی ئه‌ستێره‌ی ژینم
هۆگر بوویت و دانابڕێی
چه‌ن سه‌فه‌ركه‌ی
دوور دوور بڕۆی
دڵمت له‌ گه‌ڵ تاشه‌به‌ردی شێلگیرانه‌تا بردووه‌
هۆ په‌رییه‌كه‌م ……
ئه‌وه‌ هه‌ر تۆی
له‌ گه‌ڵ زه‌رده‌ی تیشكی خۆرا
هه‌موو ده‌مێ له‌ ده‌رگای په‌نجه‌ره‌م ده‌ده‌ی
ئاشنای چاوه‌ پڕ له‌ فرمێسكه‌كانم به‌
ئه‌وه‌ ته‌نها و ته‌نها منم خولیام پێته‌وه‌ گرتووه‌
هێشتان له‌ هه‌ناسه‌ی منا
له‌ هه‌ڵكشانی هه‌ورازی دڵما خۆو مه‌ڵاس داوه‌ و
گڕی سۆزت په‌خش ده‌كه‌ی
چما چاوی به‌زه‌یی تۆ
رۆشنایی خوێنمی دیتووه‌
هۆ په‌رییه‌كه‌م
وڕ وڕ بووم و
دڵم له‌ جۆلانه‌ی سه‌فه‌ری ئۆسلۆ و سوید و ته‌كساس
له‌ نێو جوانی سلێمانی
شه‌قام به‌ شه‌قامی شارت
ئاخر خۆ من هێشتان نه‌چووم
هه‌ر له‌ كه‌لاوه‌ی ته‌مه‌نی رابردووما قوتار ده‌بم
ئه‌و خه‌یاڵه‌ بڵق نین و سه‌ر ئاو نابن
ئه‌وه‌ له‌ته‌ك جه‌سته‌ی مندایه‌ و گه‌نیووه‌
هۆ په‌رییه‌كه‌م …..
تۆ خڕۆكه‌ سووره‌ی خوێنمی
باوه‌ڕ ناكه‌م به‌ سانایی ماڵئاوایی له‌ من بكه‌ی
ده‌ست له‌ ملی گاف و رێ و یی و میما بنێ و بیرم بكه‌
ئه‌و یادانه‌ شیوه‌نێكن له‌ هه‌نسكما رۆنیشتووه‌
له‌ سه‌ر باڵی
چرپه‌كانی بای ئه‌ستێره‌
كڵافه‌یه‌ك شه‌ونم به‌ دیاری بهێنه‌
حه‌سره‌ته‌كان ناگه‌نه‌ گڵۆڵه‌ی لێژی
ئۆغرت كرد
گریانی خه‌ست ده‌ڵه‌مه‌یه‌ و وا پێ ده‌گا
له‌ دڵ و هزر چێ بووه‌
هۆ په‌رییه‌كه‌م ……….
خوا ئافاتم بۆ ده‌نێرێ
ئاهورامزدا خه‌رابات
فریشته‌ تاریكستان و
ئاونگیش شه‌سته‌بارانیی
گوناه باوه‌شم پیا ده‌كا
سزا په‌تم له‌مل ده‌نێ
روحم ئیدی رۆیشتووه‌
هه‌ش به‌ سه‌رم
تاڵه‌ مووه‌كانی قژم
ئیتر هه‌رگیز نابنه‌ نیگای ژنێكی تر
هه‌ڵده‌وه‌رێن
وه‌ك شێرپه‌نجه‌ لێ ده‌بنه‌وه‌
ئه‌و په‌ته‌ی تۆیش
قه‌ناره‌یه‌ و ملمی به‌ سه‌ر رۆنیشتووه‌

ئه‌ڵمانیا
27 / 4 / 2018

Previous
Next

Leave a Reply