Skip to Content

Thursday, March 28th, 2024
ئه‌وه‌ منم !     ئه‌وه‌ تۆی! …. نیاز جه‌مال

ئه‌وه‌ منم ! ئه‌وه‌ تۆی! …. نیاز جه‌مال

Closed
by April 19, 2012 هۆنراوە

 

ئه‌وه‌ منم له‌ به‌رده‌م شكۆی خۆشه‌ویستیی تۆدا
له‌به‌رده‌م خه‌مه‌ نه‌وتراوه‌كانی تۆدا
له‌به‌رده‌م ئه‌وینی خۆحه‌شارداوی تۆدا
له‌به‌رده‌م سۆزی گریانی شه‌وانی تۆدا
له‌به‌رده‌م هه‌ناسه‌ی به‌سوێی گه‌شتی خه‌ونه‌كانی تۆدا
وه‌ك مه‌لێكی بێ سه‌برو قه‌رار به‌ ئاسمانی ره‌شی بێهوده‌ییدا دێم و ده‌چم
* * *
ئه‌وه‌ تۆی منت كردۆته‌ دیلی نیگا پڕ ئازاره‌كانت
ئه‌وه‌ تۆی منت كردۆته‌ نێو زیندانی خۆشه‌ویستییه‌وه‌
ئه‌وه‌ تۆی منت بێبه‌شكردووه‌ له‌ سۆزو میهره‌بانییه‌كانت
ئه‌وه‌ تۆی منت كردۆته‌ كه‌شكۆڵی خه‌مباریی
ته‌نها له‌به‌ر ئه‌وه‌ی بۆنی هه‌ناسه‌ی ئه‌رخه‌وانیی تۆ ده‌كه‌م
له‌به‌رئه‌وه‌ی ده‌مه‌وێت تێر بم له‌ چاوه‌كانت
ته‌نها له‌به‌ر ئه‌وه‌ی ده‌مه‌وێت ببمه‌ سێبه‌ری جه‌سته‌ت
* * *
ئه‌وه‌ منم نه‌وه‌ك نه‌زانیت له‌چاوی تۆدا نه‌كه‌مه‌ هیچ شتێك
ئه‌وه‌ منم وه‌ستاوم هه‌تا ئه‌به‌د له‌به‌ر ئه‌وینی تۆدا وه‌ك قه‌ڵا ناپسێم
ئه‌وه‌ منم هه‌رگیز له‌ ئه‌لبومی یادگارییه‌كانمدا ناتسڕمه‌وه‌
ئه‌وه‌ منم رۆژ به‌ رۆژ له‌ دیوانی دڵتدا ده‌بمه‌ میوانێكی سه‌لار
ئه‌وه‌ منم له‌ هه‌موو ساته‌كاندا تۆم له‌ بیره‌و خۆم لێ ونه‌
* * *
ئه‌وه‌ تۆی به‌ ئه‌سپایی ده‌ته‌وێت شتێكم پێ بڵێیت‌و نایڵێیت
ئه‌وه‌ تۆی له‌ ژێرلێوتا رسته‌یه‌كی نه‌وتراو هه‌یه‌و نایڵێیت
ئه‌وه‌ تۆی منت له‌دڵتا زیندانیی كردووه‌و به‌رم ناده‌یت
ئه‌وه‌ تۆی هه‌موو رۆژێك ده‌ته‌وێت فێرم بكه‌ی ئازاری خۆشه‌ویستیی چییه‌
ئه‌وه‌ تۆی منت فێری چه‌شتنی تاڵاوی مه‌رگ كرد
* * *
ئه‌وه‌ منم ئیتر به‌سه‌ بمخه‌ سه‌ر رێگه‌ی كاروانی خۆشه‌ویستیی
ئه‌وه‌ تۆی ئیتر به‌سه‌ واز له‌ ئازاره‌كانم بێنه‌و تیمارم بكه‌
ئه‌وه‌ تۆی ده‌ته‌وێت ته‌خت‌و تاراجی ته‌مه‌نم هه‌ڵته‌كێتنی
ئه‌وه‌ منم ده‌مه‌وێت ئاهێك بهێنمه‌وه‌ به‌ دڵتا
ئه‌وه‌ منم هه‌ر وه‌ستاوم، بێده‌نگ، تا ئه‌به‌د یادگارییه‌كانت ده‌په‌رستم
ئه‌وه‌ منم! ئه‌وه‌ تۆی!        

  26/3/2012

Previous
Next
This site is registered on wpml.org as a development site.