Skip to Content

Friday, March 29th, 2024
برووسکه‌یه‌ك له‌ که‌رکووکه‌وه‌ بۆ شێرکۆ بێکه‌س

برووسکه‌یه‌ك له‌ که‌رکووکه‌وه‌ بۆ شێرکۆ بێکه‌س

Closed
by December 12, 2008 ئەدەب

 
 
 برووسکه‌یه‌ك له‌ که‌رکووکه‌وه‌ بۆ شێرکۆ بێکه‌س
  
 به‌ بۆنه‌ی ته‌قینه‌وه‌که‌ی ئه‌مڕۆی چێشتخانه‌ی عه‌بدوڵاوه له‌ که‌رکووك  دووباره‌ ئه‌م شیعره‌ بڵاوده‌که‌مه‌وه‌و ده‌یخه‌مه‌وه‌ به‌ر چاوی کاربه‌ده‌ستان و جه‌ماوه‌ری  گه‌لی کوردمان. ‌
 
 
 ئه‌م برووسکه‌یه‌ وه‌ڵامێکه‌ بۆ شیعرێکی له‌ دڵه‌وه‌ بۆ دڵی هاوڕێی شاعیرم کاك شێرکۆ بێکه‌س به‌ ناونیشانی ( حه‌وت په‌ڕه‌سێلکه‌ی ئێواره‌یه‌کی که‌رکووك ) که‌ له‌ ژماره‌ – 270-ی رۆژنامه‌ی – هه‌واڵ – دا بڵاوکراوه‌ته‌وه‌ . ئه‌و دێڕانه‌ی که‌ خراونه‌ته‌ نێوان دوو که‌وانه‌وه‌ شیعری کاك شێرکۆ خۆیه‌تی .
 
 
 سه‌لام محه‌مه‌د
 
 
 سوپاس برام
 ( هه‌رسێکتان بوون
 هه‌ولێر و سلێمانی و دهۆك
 به‌ پاسێکی زه‌رد و سه‌وزی فیدرالیه‌وه‌ )
 هاتنه‌ سه‌ردانی و دیده‌نیم
 سوپاس هه‌موو دیاریه‌کانتان گه‌یشتنه‌ لام
 
 ( دهۆك دوو زه‌میله‌ په‌یڤی
 ره‌نگاوڕه‌نگی فۆلکلۆری بۆ هێنابووم
 هه‌ولێر تابلۆی دڵی خۆی و
 دوو سێ گۆڕه‌پان به‌ڵێن و
 پڕ به‌  قه‌ڵایه‌ك حه‌یرانی بۆهێنابووم
 سله‌یمانیش له‌ گه‌ڵ خۆیدا:
 وێنه‌یه‌کی گه‌وره‌ی قودس و
 تازه‌ترین نوکته‌ی ته‌ڕی شاخی گۆیژه‌و
 دوو ده‌رزه‌نیش فشه‌فشی موعه‌له‌بی بۆهێنابووم )
 
  سوپاس برام،
 دیاریه‌کانتان گه‌یشتنه‌ لام
 به‌ڵام وه‌ك خۆتیش ئه‌زانی
 ئه‌و رۆژانه‌ نه‌خۆش بووم و
 ( له‌ شه‌ڕێکی قه‌راغ شاردا
 له‌ گه‌ڵ خێڵی ئوسامه‌دا
 ئه‌وسا ده‌ستێکم شکابوو
 تا ئه‌و ساته‌ی ئێوه‌ هاتن 
   له‌  گه‌چدا بوو )
 
 ئێستا نه‌ك ته‌نیا هه‌ر ده‌ستم،
 قاچی چه‌پیشیان شکاندووم
 هه‌موو له‌شم بۆته‌ برین
 نه‌ك ته‌نیایش خێڵی ئوسامه،‌
 بگره‌ هه‌موو خێڵه‌کانی
 ئه‌تاتورك و ئه‌تافورس و  ئه‌بوجه‌هل و
 تێکڕا هه‌موو چه‌ته‌کانی بیابانی دوڕگه‌ی عه‌ره‌ب
 چوار ده‌وریان ئابڵۆقه‌ داوم
 منیش ته‌واو حه‌په‌ساوم
 گه‌ر به‌ راستی برای ئێوه‌م
 گه‌ر به‌ راستی برابه‌شی نه‌وته‌که‌م و غه‌مه‌که‌من
 فه‌رموون وا به‌ رۆژی رووناك به‌ به‌ر چاوی خۆتانه‌وه‌
 هه‌تك ده‌کرێم….
 ئه‌وه‌تانێ…. له‌ نه‌جه‌ف و که‌ربه‌لاوه‌
 ته‌ڵاقنامه‌ی جیابوونه‌وه‌م له‌کوردستان بۆ نووسراوه‌
 من خۆم تاکو دوا هه‌ناسه‌م
 ئه‌و ده‌عوایه‌ ئیمزا ناکه‌م..
 وه‌کاله‌تیشم نه‌داوه‌
 به‌ هیچ کاك و مام و خاڵ و ئامۆزایه‌ك
 په‌نجه‌ وه‌رده‌نه‌ ئیمزاوه‌
 
 فریامکه‌ون براکانم ….. فریامکه‌ون
 ئه‌گه‌ر ئێمه‌ له‌م ته‌نگانه‌ و قه‌یرانه‌دا  برانه‌بین
 کوردایه‌تی و قودس و دڵ چین ؟
 به‌ڕێز کاکه‌ سلێمانی ، شاری هه‌ڵمه‌ت و قوربانی
 کاکه‌ هه‌ولێری پایته‌خت و شاره‌که‌ی قه‌ڵا و مناره‌‌
 دهۆك گیان شاری شه‌هیدان
 ده‌ وه‌رنه‌وه‌ بۆ سه‌ردانیم
 ئێستا له‌ چاو جارا‌نه‌وه‌ بێهێزتر و نه‌خۆشتر و ته‌نیاترم
 گه‌له‌ گورگ گه‌مارۆی داوم‌
 به‌ بێده‌نگیش له‌ ژێره‌وه‌ خه‌ریکن که‌ڵبه‌ تیژ ئه‌که‌ن
 په‌له‌که‌ن و فریامکه‌ون
 دیاری و یاریم لێتان ناوێ
 به‌ ته‌نیا هه‌ر خۆتان وه‌رن
 که‌ که‌وتنه‌ رێ
 ئه‌مجاره‌یان سواری پاسی زه‌رد- سه‌وزی فیدراڵی نه‌بن
 به‌ پێی خۆتان توند و تۆڵ وه‌ك ( یادی به‌ خێر )
 رۆژانی پێشمه‌رگایه‌تی ،  گورج گورج وه‌رن
 چه‌ندتان پێده‌چێت با بچێ …
 رێگای که‌رکووك ده‌شتاییه‌ و بێ ئه‌و پاسه‌یش ده‌گه‌نه‌ جێ..
 
                                   سوید –  10 / 09 / 2008
 
 
 
 
 ‌
 
 

Previous
Next
This site is registered on wpml.org as a development site.