Skip to Content

Friday, June 18th, 2021

بۆنی سێوه‌ … كوردۆشوانی

Be First!
by March 16, 2012 ئەدەب

 

له‌ سپێده‌ی وه‌رزی گوڵدا                                                            
له‌زه‌مه‌نی
هه‌ڵوه‌رینی ڕوحی بێ گه‌ر
هه‌شتاو هه‌شتی په‌ڵه‌ی ڕه‌شی
 سه‌ر ته‌وێڵی
ئه‌م هه‌ساره‌ كه‌ ڕو لاڵه‌
بۆنی سێو هات !
له‌ ده‌ڤه‌ری كانی ئاشقان
منداڵه‌كان له‌نێو باخی هه‌ناره‌وه‌
ڕوویان كرده‌ مه‌نزڵگای خۆر
چاوه‌ڕوانی خوداوه‌ندی میهره‌بان بون
له‌و وه‌رزه‌دا
بارانی سێو ببارێنێ
دوای چه‌ند ساتێكی شه‌رمه‌زار
زه‌مه‌ن گۆڕا…
سیۆ نه‌باری و بۆنی باری؟!!
له‌ پێشوازی ئه‌و بۆنه‌دا
تێكرا منداڵانی ده‌ڤه‌ر
ڕوحی پاكیزه‌و بێ گه‌ردیان
كرد به‌دیاری ،
له‌خه‌وێكی زه‌ردو سوری سێو ئامێزدا
پێڵۆی چاوه‌گه‌شه‌كانییان نایه‌ سه‌ر یه‌ك
كۆی په‌پوله‌كان پێكه‌وه‌
بڕیاریاندا دوای مه‌رگی گوڵ
ته‌مه‌ن بسپێرن به‌ خه‌زان ،
 تاوان ئاسمانی ڕه‌شكردو
خوێن به‌هاری سه‌وزی سوركرد،
 له‌دامێنی
چیای بڵندی شنروێ
تابلۆیه‌كیان به‌مه‌رگ نه‌خشان ،
پیره‌مێردێ
سه‌ری ده‌رهێنا له‌ گۆڕێ ،
كه‌ڤاڵی گرته‌ ئامێزو
چه‌ند دڵۆپێ ئه‌شكی ڕژان !
له‌پاش كه‌مێ له‌ڕه‌نگی فریشته‌یه‌كدا
به‌رز بۆوه‌ به‌ره‌و ئاسمان ،
به‌رده‌كان هاتنه‌ گۆو وتیان
ئه‌وه‌ حه‌زره‌تی نالی بو
كه‌ڤاڵی برد هه‌ڵی واسێ
له‌نێو باره‌گاكه‌ی یه‌زدان ؟!
له‌به‌رئه‌وه‌ جێ یه‌ك نییه‌
ئه‌م تابلۆیه‌ بگرێته‌ خۆی
له‌گشت جیهان!!!؟

Previous
Next

Leave a Reply