Skip to Content

Monday, November 29th, 2021

بۆ زانا روستایى ….محەمەدى مشیر

Be First!
by November 12, 2008 گشتی

 بۆ زانا روستایى
 لە نێوان پەسندکردنى فرەژنى و فەتوادان دا
 کوجا مەرحەبا
 
 محەمەدى مشیر
 
 زانا روستایى لە وەڵامى بابەتێکى (جەمال حسێن) دا، کە لەژمارە(4713)ى (کوردستانى نوێ) دا بڵاوکراوەتەوە،سەبارەت بە دیاردەى  فرەژنى لە سایەى ئەو ئازادییەى بەرى رەنجى ساڵەهاى ساڵى خوێنى عەلمانییەکان و خەڵکى تێکۆشەرى کوردستانە، ئازادانە راى خۆى دەردەبڕێ و رایدەگەیەنێ کە فرەژنى نیعمەتێکى خودابەخشە و پێچەوانەکەشى لە نێو کۆمەڵگەدا لەشفرۆشى و بەدرەوشتى و کێشەى کۆمەڵایەتى لێدەکەوێتەوە. ئەمە بەشێکى وەڵامەکانى کاک (زانا) یە و نایشارێتەوە کە ئەو زۆر راشکاوانە دژى تاک ژنییە، ئەمەش مافێکى رەواى خۆیەتى کە بەمشێوەیە گوزارە لە بیرو بۆچوونەکانى بکات، گەر وانەکات چى بکات؟!
 ورووژاندنى بابەتێکى گرنگى وەک فرەژنى لە سەر رووپەڕى رۆژنامەکان، بەدەر لە هەموو شتێک، لەم هەلومەرجە هەستیارەى کۆمەڵگەى کوردستاندا ئاراستە و تێڕوانینى جیاواز بەخۆوە هەڵدەگرێ و پێشوەختیش هەندێ لەو ئاراستە و تێڕوانینانە لە رۆژ رۆشنتر و لە شەویش تاریکترن.
 ئەوەى گرنگە لێرەدا باسکردنى خودى دیاردەکە نییە بەقەدەر ئەوەى لەچ سۆنگەیەکەوە دەمانەوێ چارەسەرى ئەم دیاردەیە بکەین و بۆچى؟
 بەیاسا قەدەغەکردنى یا مەرجدارکردنى دیاردەى فرەژنى بەتەنها ناتوانێت ئەم دیاردەیە لە کۆمەڵگەیەکدا چارەسەر بکات  کە هێشتا بەهاى خێڵ و دیوەخان و پەیوەندییە هۆزەکییەکان زۆر بوارى ژیانى بەڕێوەدەبەن و وەک ئاشیش بەهاى تازە و پەیوەست بە کۆمەڵگەیەکى مەدەنى هاوچەرخ دەهاڕن و ئەنجن ئەنجنى دەکەن. نەبادا کاک (زانا) بە هەڵە لە قسەکانم بگات، مەبەستم لە بەهاى تازە و پەیوەست بە کۆمەڵگەى مەدەنى ئەو لەشفرۆشى و بەدرەوشتییە نییە کە کاک (زانا) فرەژنى بە ئەڵتەرناتیڤیان دەزانێ،ئەگەرچى وەک خودى کاک (زانا) دەڵێ: (گۆزە چى تیا بێت هەر ئەوەى لێ دەڕژێت)، بەڵکو دەربازکردنى مرۆڤە لەو هەوەسە خۆرسکە ئاژەڵییەى بەرامبەر رەگەزى بەرامبەر ( تەواوکەر) هەیەتى و ناتوانێ بە بێ هوشیارى بە شێوەیەکى ژیرانەکۆنتڕۆڵ و رێکی بخات. هەزاران دەق و رێسا و رێنمایى یاسایى و ناتوانن مرۆڤ لەم ئاکار و خەسڵەتە ئاژەڵییە خۆرسکە دەربازبکەن ئەگەر پێشوەختە زەمینە ئابوورى و کۆمەڵایەتییەکان نەیانتوانیبێت ئاستى هوشیارى و رەوشتەکى ئەو مرۆڤە هەوەس بازە بەرەو بەمرۆڤکردنى مرۆڤ ئاراستەبکەن و شێوازى پەیوەندییە کۆمەڵایەتی و یاسایى و رۆشنبیرى و سیاسى و…. تاد، بەناوەڕۆک و رووخسارێکى مرۆڤانەتر داڕێژنەوە.
 گلەییم لە کاک (زانا) نییە بەزانینەوە و پڕ بە باوەڕى خۆى پشتیوانى لە فرە ژنى دەکات،چونکە ئەمە شتێکى چاوەڕوانکراوە، بەڵام ناتوانم ئەو رایە رەهایە پڕقینەى بەرامبەر بە عەلمانییەکان قەبوڵ بکەم کاتێ دەڵێ:" من هەموو نووسەرە عەلمانیەکانى کورد باسم بکەن بە خراپە و تۆمەتم بۆ هەڵبەستم  باکم نیە پێى چونکە لە بنەرەتدا چاوەروانى قسەى خێریان لێ ناکەم و ئەوەندە نا زانستى و بێ ویژدانن لە ئاست راستیەکان چاو دەنوقێنن وهەرگیز جێگاى ئێمە نابێتەوە لە دونیا تاریک و تەسکەکەیان دا". سەبارەت بەو رەهاییە لە قسە پڕبوغزو کینەکانت،پێم باشە پێتى رابگەیەنم کە هەموو نووسەرە عەلمانییەکانى کورد هێندە بێکات و کەم خەم نین تا تەنها خەمیان هەر ئەوە بێت باس لە تۆ بکەن،چونکە ئەرکی عەلمانییەکان لەم قۆناغەى کۆمەڵگەى کوردستاندا گەلێ لە ئەرکەکانى ئێوەى ناعەلمانى قورسترە و خۆشت ئەم راستییە باش دەزانى!!
 ئەگەر باسیشت لەسەر تۆمەت هەڵبەستان و خراپەکارى بێت، باشتر وابوو هەرچۆنێکى بێت لە وەڵامەکەدا بۆ کاک ( جەمال) خۆشت لەو رەفتار و ئاکارانە بەدووربگریت و بە (ناقس) ناوى بەرامبەرەکەت نەهێنى،بە هەڵە لێم تێمەگە کاک جەمال ناناسم و هیچ پەیوەندییەکیشم لە دوور و نزیکەوە لەگەڵیدا نییە، بەڵام  دڵنیام کە خۆشت باش دەزانى (ناقس) یانى تۆمەت و سووکایەتى پێکردن و بەخراپە باسکردنى ئەوى بەرامبەرى جیاواز، بە تایبەتیش کاتێک خۆت لە بڕگەکانى سەرەتاى وەڵامەکەتدا دەڵێیت:" بە بەڵگەى مەنتیقى و عەقلى وەڵامتان دەدەمەوە و رێزى تەواویش لە راى جیاواز دەگرم  "، رێزگرتن لەراى جیاواز ئاکارێکە لە هەموو کەسێکدا بەدی ناکرێت و ئەرکێکى فرە قورسە،بە تایبەتیش بۆ تۆ کە لە دونیاى رووناک و فراوانى ئێمەى عەلمانیدا جگە لە تاریکى هیچیتر نابینیت، ئەگەر نا بەوە رازى نەدەبوویت رێگا بە خۆت بدەیت، وەک لە گۆڕەپانى جەنگدا شمشێر بەدەست بیت، بە عەلمانییەکان بڵێیت:" خۆ ئەگەر ئازابن و پێتان شەرم نەبێت راستى بیروباوەڕەکەتان بۆ من و خەڵکى کوردستان دەربخەن ئەوا رێگاکە زۆر کورت دەبێتەوە"،کامە رێگا کورت دەبێتەوە، ئەو رێگایەى کە هەڵگرى بیروباوەڕى لە چەشنى کاک (زانا) کۆسپى بۆ دروست دەکەن، یان ئەو رێگایەى بە ورووژاندنى سۆزى خەڵکى سادە مەبەستەکانت زووتر دێنێتەدى، بەڵگەى مەنتیقى و عەقڵى و ئازایەتى کوجا مەرحەبا، ئازایەتى لەوەدانییە لە رێگەى نووسینەوە پەنجە لە خەڵک راوەشێنیت و چاو لە سەرجەم ئەو کەسانەى لە گەڵ بۆچوونەکانتدا کۆک نین سوورکەیتەوە ، بەڵکو لەوەدایە دوور لە هەڵچوون و ناوزڕاندن بپڕژێیتە سەر ئەسڵى بابەتەکەت. عەلمانییەکان پێویستیان بە تۆ نییە تا بوێرن و پێیان شەرم نەبێت راستى بیروباوەڕەکانیان بۆ تۆ و خەڵکى کوردستان دەربخەن، ئەوان راستى بیروباوەڕیان بۆ تۆ هێندە رۆشنە کە ناتوانى چاو لە بەرامبەریدا هەڵێنى، خەڵکى کوردستانیش ، نەک ئەمڕۆ بەڵکو لەگەڵ چەخماخەى یەکەمین هەنگاوى تێکۆشانەوە،گەواهى گەلێ هەڵوێستى مرۆڤدۆستانەى عەلمانییەکانن.
 کاک(زانا) لە بنەڕەتدا چاوەڕوانى قسەى خێر لە زارى عەلمانییەکان ناکات کەچى قسەکانى پڕن لە بێخێرى و رق و زڕەى شمشێر،ئەو ئێمەى عەلمانى بەترسنۆک و خۆشى بە ئازا ئەژمار دەکات،لەوەشدا راست دەکا، چونکە ئازایەتى لە روانگەى خۆیەوە بریتییە لە سەرکوتکردن و داپڵۆسینى راى جیاوازى بەرامبەر،خۆى بە پیاوى زانست و عەلمانییەکانیش بە نەزان ونازاستى لە قەڵەم دەدا، عەلمانییەکان بێویژدانن و خۆشى سەرقافڵەى ویژداندارەکانە، ئێمەى عەلمانى وشترمەلین و بۆ نەبینینى راستییەکان مل لە ژێر لم دەنێین، خۆیشى شاخێکى گەردن کەشە و بە موو لە راستى لانادات، سەرجەم ئەو ئاکار و خەسڵەتە ناشرینانە لە رێگەى وەڵامدانەوەى کاک (جەمال) ەوە دەخاتە پاڵ عەلمانییەکان و بانگەشەى ریزگرتنى راى جیاوازیش دەکات.ناهەقت ناگرم نەک هەر نازانى رێزگرتن لە راى جیاواز  یانى چى، بەڵکو وەک لە نووسینەکەتدا دەیسەلمێنى هەرگیز باوەڕت بەراى جیاواز نییە و دەتەوێ هەموومان وەک خۆت بیربکەینەوە و بە دوعایە پڕ قینەکانت بڵێن ئامین. من نازانم کاک (زانا) بۆ هێندە بە راى جیاواز سەخڵەت و دڵتەنگ دەبێ و لەو دونیا تەنگ و تاریکەى بە دونیاى ئێمەى عەلمانى دەزانێ تاریکتر و دڵ تەسکترە.
 کێ قەدرى ژنى لایە؟ ئەمە ناونیشانى بابەتەکەى کاک (زانا) یە، کە بەپرسیار دەستپێدەکات و هەر خۆیشى وەک عەللامەیەکى ریش چەرموو وەڵامەکەمان دەداتەوە و لەو باوەڕەدایە،  بەدەر لە بۆچوونەکانى خۆى، ژن بە هەموو شتێک دەچێت تەنها بە مرۆڤ نەبێت. دەپرسم ئاخۆ پیاوێک باوەڕى بە هێنانى (چوار) ژن هەبێت  حورمەتى ژنى لایە، یان ئەو پیاوەى تا مردن ژنێک دەکاتە هاوسەر و مافى سێ  ژنى دیکە و زێتر بۆ ئارەزووى سێکسی خۆى پێشێل ناکات؟ راستە لە هەندێ سەردەم و هەلومەرجى نائاساییدا مرۆڤایەتى فرەژنى بە شێوەیەکى کاتى پەسندکردووە، بەڵام لەکام بیروبۆچووندا ژن هەموو شتێکە تەنها مرۆڤ نەبێت، لەوەى عەلمانییەکان داواى یەکسانیان دەکەن لە گەڵ پیاواندا یان لەوەى کاک (زانا) کە دووانیانى بە شاهیدێک قەبوڵە و لە میراتیشدا بە هەر عیللەتێک بێت رازى نییە ئافرەتیش وەک پیاو میراتگر بێت؟ ئایا گەوهەرى بەمرۆڤ زانینى ژن تەنها لەوەدایە قەبوڵى بێت لە ژێر پەردەیەکى شەرعیدا دوو یا سێ هەوێى هەبێت، یان لەوەدایە هاوکارى بکرێت تا بە هوشیارییەوە پێگەى راستەقینەى خۆى لە نێو خێزان و کۆمەڵگە و گۆڕەپانەکانى دیکەى ژیاندا پتەوبکات؟
 کاک (زانا) ئێمەى عەلمانى بە فەریکە خوێندەوار و خۆیشى بە عەرەبى زانێکى رەوان دەزانێ بۆیە راشکاوانە رایدەگەیەنێ  "ئەو فەریکە خوێندەوارانە نازانن عەرەبى بخوێننەوە و یەک ئایەتى قورئانیش ناتوانن بێ هەڵە بخوێننەوە چ جاى ئەوەى تێى بگەن".لاى هێروە  فەریکە خوێندەوار هێشتا ئاسۆیەکى فراوانى لە پێشەو دەتوانێ ببێتە خوێندەوارێکى باش ئەگەر ئێوە رێگەى لێنەگرن، لاى ئەولا پیرە خوێندەوارى وەک ئێوە ناتوانێ بە پێى پێداویستییەکانى سەردەم شتەکان بخوێنێتەوە، خۆشت دەزانى وەک کورد گوتەنى "پیرى و سەد عەیب"، ئەو خوێندنەوەى فەریکە خوێندەوارەکان بۆ شتەکانى دەکەن هەرگیز لە گەڵ مگێز و دیتنى خوێندەوارى ناعەلمانى وەک ئێوە نایەتەوە، گەوهەرى کێشەکانیش هەر لێرەدایە، بۆیە زۆر ئاسایى مافێکى خودایى بە خۆت دەدەیت هەموو ئەو فەریکە خوێندەوارانەى تۆ مەبەستتە فێرە ئەو جۆرە خوێندنەوەیە بکەیت کەخۆت بەراستى دەزانیت،بەمەش پێشێلى سادەترین بنەماى ئەو دیموکراسییە دەکەیت کە لە سایەیدا ئازادانە و لە سەر سەکۆى پەرلەمان گوزارە لە بۆچوونەکانت دەکەیت.
 کاک (زانا) رایدەگەیەنێ کە لە هەرێمى کوردستان دا" دیاردەکانى توندوتیژى دژ بە ئافرەتان وەکو سووتان و لێدان و کوشتن و تەڵاقدان 99%ى لە ناو ئەو خێزانانە روو دەدات کە پابەند نین بە دین وەکو پێویست ، زۆربەشیان ئەندام و لایەنگر و بەرپرسەکانى ئەو لایەنانەن کە ئیسلامیى نین ،  1% ى  ئەو رووداوانەش لە ناو ئیسلامیەکان و خەڵکى پابەند بە دین روو نادات"، کاک (زانا) هەموو قسەیەکت بکردایە، بەڵام بەقەولى خۆتان شوێنى (ئینەیەکت) بهێشتبایەوە باشتربوو، چونکە لە ئاست ئەو بڕگەیەى سەرەوەى قسەکانت دەبوایە لە جیاتى جارێک هەزار جار هەڵوەستە بکەیت، دەپرسى بۆ؟
 بەپێى بابەتێک بە ناونیشانى (زۆرینەى ئافرەتانى سعودییە پەیوەندى ناشەرعییان هەیە) کە لە نووسینى ئیبراهیم عەلائەدین- ە، و لە ماڵپەڕى (الحوار المتمدن) بڵاوکراوەتەوە، سەرەتا دەمەوێ ئەو زانیارییانەى لەم بابەتەدا هاتوون وەک بەڵگەیەک بۆ نادروستى بۆچوونەکانى کاک (زانا) بهێنمەوە، دواتریش بزانین ئایا هۆکارەکانى تەشەنەکردنى دیارەکانى سووتان و لێدان و کوشتن و تەنانەت لەشفرۆشى و بەدرەوشتیش پەیوەندییان بەوەیە کە خێزانەکان عەلمانین یان ئیسلامین یان ئیسلامین و وەکو پێویست پابەندنین بەدین، یا پەیوەندیان بە هۆکارى دیکەوە هەیە کە دەستنیشانى ئاستى هۆشیارى ئەو خێزانانە دەکەن و پەیوەندییەکانى نێوان ژن و پیاو لە هەموو بوارەکاندا بە شێوەیەکى مرۆڤانەرێکدەخەن؟؟
 بەپێى ئەو بابەتەى لە سەروە ئاماژەم بۆ کرد ئەحمەد شەقیرى داعیەى موسڵمانى وڵاتى عەرەبستانى سعودى ئاشکریدەکات کە" زۆرینەى ئافرەتانى سعودییە پەیوەندى ناشەرعییان هەیە و لادانى سێکسى لە وڵاتدا بڵاوبوەتەوە، ئەمەش دووپاتیدەکاتەوە کە گرفتێک هەیە و رێژەکەشى بەرزدەبێتەوە و من مەبەستم زۆرینەی ئافرەتانە نەک کەمینە"، ئەحمەد شەقیرى کە پێشکەشکارى بەرنامەى (خەواتر)ە لە کەناڵى (MBC) ى ئەو وڵاتەدا لە لێدوانێکى دیکەیدا پاش زنجیرەیەک رەخنە لەو زانیارییانەى ئاشکراى کردوون روونیدەکاتەوە کە رەنگە" رێژەکە لەسەدا (51 و رەنگە 60 یان 70 یان تەنانەت (90)یش بێت خوا دەزانێت". ئەم زانیارییانەى شەقیرى کە ئیسلامییە نەک عەلمانى روونیدەکەنەوە کە تەشەنەسەندنى ئەو دیاردانەى کاک (زانا) دەیانخاتە پاڵ خێزانە عەلمانییەکان یان ئەوانەى وەکو پێویست پابەند بەدین نین ، دروست نییە ئەگەرچى دیاردەى فرەژنى لە سعودیادا رێگە پێدراوە و لە جیاتى جۆرێک زەواج سەد جۆر زەواج لەوێدا هەیە، بۆچى دیاردەى فرەژنى نەیتوانى رێگە لە لادانى سێکسی ئەو رێژە زۆرەى ئافرەتانى سعودیا بگرێت؟
 لە بڕگەیەکى دیکەى هەمان بابەتدا ئاماژە بە راپۆرتێکى رۆژنامەى (الحیاە) دەکات کە لەمانگى تەمموزى ئەمساڵدا بڵاوکراوەتەوە و ئاشکراى دەکات کە لە شارەکانى سعودیا لەماوەى" ساڵى 2007 دا ، (280) حاڵەتى منداڵى فڕێدراو لە لایەن دامەزراوە رەسمییەکان تۆمارکراوە"، رۆژنامەکە روونیشى کردۆتەوە کە ئامارەکان لە لایەن دەزگاى ئاسایشى گشتییەوە تۆمارکراون و ئاشکراى دەکەن کە" شارى مەککە پێش ناوچەکانى دیکەى سعودیا کەوتووە و (95) حاڵەتى لەو جۆرەى تێدا تۆمارکراوە، کە دەکاتە رێژەى (33.4%) کۆى حاڵەتە تۆمارکراوەکانى هەموو وڵات".
 سەرەتا دەمەوێ بە کاک( زانا) ى رابگەیەنم کە ئەو زانیارى و داتایانە هى دەزگاگەلێکى فەرمى و کەسانێکن کە لە نێو سعودیادا دەژین و هى عەلمانییەکان نین تا بوختان و هەڵبەستراو بن!!
  دواتر  ئەم زانیارییانەى سەرەوە بە کاک (زانا) ى رادەگەیەنن کە فرەژنى نەک نەیتوانى لە کۆمەڵگەیەکى موسڵمانى وەک (سعودیا) دا چارەسەرى سەرجەم ئەو دیاردە دزێوانە بکات، کە لەوێدا هێشتا جەڵد و دەستبڕین و کۆمەڵێک سزاى توندى دیکە پێڕەودەکرێن، بەڵکو دیاردەى منداڵ فڕێدانیشى هاتە سەر، کە ئەمەش کارەساتێکى مرۆڤایەتى مەزنە و ئاستى هۆشیارى کۆمەڵایەتى ئەو کۆمەڵگەیە نیشان دەدات کە لە سایەى رێساو یاساگەلێکى هەڵەى پەیوەست بە مافەکانى مرۆڤ و بەتایبەتیش  ژنان، دێنە ئاراوە. تا ئەمساڵانەى دواییش ئافرەتان لە عەرەبستانى سعودیدا تەنانەت مافى دەنگدان و دەرهێنانى مۆڵەتى شۆفێرى و سەیرکردنى تەلەفزیۆن و زۆر شتى دیکەیان نەبوو، کە ئەمانەش هەموو هۆکارن بۆ ئەوەى ئافرەتان لە نێو بوارەکانى کۆمەڵگەى سعودیدا هیچ پێگەیەکى ئابوورى، کۆمەڵایەتى و سیاسى و مافەکیان نەبێت و وەک کاڵایەک بۆ تێرکردنى حەزەکانى پیاو مامەڵەیان لە گەڵدا بکرێت. ئەتۆ بڵێى کاک (زانا) ئەوانیشى پێ عەلمانى بێت یان پێی وابێ کۆمەڵگەى سعودیاش وەکو پێویست بەدین پابەند نین؟!
 ئەو دیاردانەى کاک (زانا) دەیەوێ بە رەهایى بیانداتە پاڵ خێزان و کەسە عەلمانییەکان و وەک خۆى دەڵێ 1% یش لە نێو خێزانەئیسلامییەکان روونادەن، قسەیەکى دوورە لە پێوەرە زانستییەکان و سەرجەم مەسەلەگەلێکى رێژەیین، ئەگەر نا بە گوێرەى ئەو بۆچوونەى کاک(زانا) بوایە هەرگیز نەدبوایە لە سعودیا و زۆر کۆمەڵگەى ئیسلامى دیکە، بۆ نموونە: (ئێران) و ( سوریا) و (تورکیا) و…تاد، ئەو دیاردانە لە ئاردابوونایە، کەواتە مەسەلەکان پەیوەستن بە ئاستى هوشیارى ئەو کۆمەڵگانە و ئەو هەلومەرجە ئابوورى و کۆمەڵایەتییەى مرۆڤەکان چ موسڵمان، چ عەلمانى، چ کریستیان و هیتر،بەرەو ئەو ئاقارە دزێوانە پەلکێش دەکەن، چارەسەرى هەموو ئەو دیاردانەش لە رێگەى باشترکردنى ئاستى گوزەران و بەرزکردنەوەى ئاستى هوشیارى و رۆشنبیرى سێکسى و گۆڕینى شێوازى پەیوەندییە کۆمەڵایەتى و مافەکیی و سیاسییەکان دێتەدى، نەک بە شێوەیەکى رەها ئەو تۆمەتە ناڕەوایە بدەیتە پاڵ عەلمانییەکان، بە تۆمەتى ناڕەوا و نازانستى ناتوانیت سەرجەم ئەو دیاردانە لە نێو کۆمەڵگە ئیسلامییەکانیش پەردەپۆش بکەیت. هەبوونى دیاردەى لەشفرۆشى و بەکەمزانینى ئافرەت و بەکاڵاکردن و بە کۆیلەکردنى لە قۆناغەکانى پێشترى کۆمەڵگەى مرۆڤایەتیشدا هەر هەبوون و ناوچە و وڵات و خێزانە ئیسلامییەکانیش لەم دیاردانە بەدەرنەبوون، بەڵکو رەنگە لە زۆر شوێنى دیکە خراپتروو دواکەوتووتر بوون،ئەگەر ئێستاش سەیرکەین سەرجەم ئەو دیاردانە بە شێوەیەکى ئاشکرا لە وڵاتە کراوەکاندا بوونیان هەیە، کەچى لە وڵاتە داخراوەکاندا بە شێوەى نهێنى و نیمچە ئاشکرا بوونیان هەیەو بە یاسا قەدەغەکردنیشیان نەیتوانیوە پێش بەم دیاردانە بگرێ، چونکە سەرجەم ئەو هۆکارانەى کەپێشتر ئاماژەم بۆکردن لە پشتەوەى سەرهەڵدانى ئەو دیاردانەن.
 باشە کاک(زانا)  با هەموو خەڵکى کوردستانیش گەواهى قسەکانم بن، ئەرێ کاکە گیان ئەوە عەلمانییەکانن بانگەشەى کوشتن و سووتاندن و لێدانى ژن بەناوى غەسلى عار دەکەن یا کەسانێکى وەک ئێوەن؟
 ئەگەر بە پێى ئەو رێژانە بێت کە لە نووسینەکەتدا ئاماژەیان بۆ دەکەیت دەبێ رێژەى عەلمانییەکان لە نێو کۆمەڵگەى کوردستاندا گەلێک لە رێژەى ئێوەى ناعەلمانى زۆرتر بێت، ئەمەش دروست نییە، ئەگەر ئەو قسەیەشت قەبوڵ نییە باپێچەوانەکەى بێت کە رێژەى ئێوە زیاتربێت لە عەلمانییەکان، ئەوکاتە بەدیاردەکەوێ کە ئەوە بە فەتواى کەسانێکى وەک ئێوەیە لە ژن دەدرێ و دەکوژرێ و دەسووتێنرێ و ئەگەر (عیلاج) یش نەما قیڕوسیا تەڵاق دەدرێ، خۆ نەچووە بچى چ زۆرە ژن زۆرە، ئەمەیە تێڕوانینى پەردەپۆشکراوى تۆ، دەزانى بۆ؟ چونکە هێشتا مافى سێ ژنى دیکەو زیاتریشت ماوە بیهێنیت،خۆ ئەوە خۆتانن ئەو مافە بەخۆتان رەوادەبینن نەک عەلمانییەکان، پێودانگى رەوشتەکى ئێوە ئاسا رێگەتان پێدەدات زیاتر لە ژنێک بهێنن، هەندێ لە عەلمانییە درۆزنەکانیش لەم پێودانگەدا لە گەڵ ئێوەدا کۆکن و هەرهیچ نەبێ لەم خاڵەو چەند خاڵێکى دیکەى هاوبەشدا یەکدەگرنەوە، بەڵام  عەلمانییە راستەقینەکان بەگشتى و لە بنەڕەتدا باوەڕیان بەم دیاردەیە نییە تا پاساوى رەوشتەکى و هیدیکەى بۆ بهێننەوە.
  کاک (زانا) رایدەگەیەنێ کە" بە تەحەدداوە دەڵێم بەختەوەرترین ژن ئەو ژنەیە کە لەباوەشى خێزانێکى پابەند بە دین یا ئیسلامیی ژیان دەباتەسەر " دواتر هەروەکو لە سەروەدا ئاماژەم بۆ کرد جەختى لێدەکاتەوە کە  لێدان و سووکایەتیکردن و کوشتن و تەڵاقدانى ژن لەنێو ئەو خێزانانە روودەدات کە وەکو پێویست بەدین پابەند نین. ئەم قسەیەى سەروە ئەوە دەگەیەنێت کە رێژەیەکى زۆرى خەڵکى کوردستان وەکو پێویست بەدین پابەند نین ، حەزم دەکرد کاک(زانا) ئەو (وەکو پێویست) ەى کە مەبەستیەتى راشکاوانە بۆ سەرجەم خەڵکى کوردستان روونبکردایەوە و ئاشکراشى بکردایە بۆچى دەیەوێ فرە هەوێیى قەبوڵکردنى ئافرەت بکاتە تاکە پێودانگێک بۆ بەدین بوونى ژن و خێزانى ژن ؟
 کاک (زانا) لە بڕگەیەکى دیکەى نووسینەکەیدا رایدەگەیەنێ  و دەڵێ " ئەو مۆدیلە عەلمانیەتەى لێرە باسى لێوە دەکرێت کە لە جیاتى بێلایەن بێت لە دین دژ بە دینە" .
 دەمەوێ لێرەدا رۆشنتر بە کاک(زانا) بڵێم کە عەلمانییەت هەرگیز دژ بە دین نەبووە، بەڵکو داواى جیاکردنەوەى (دین) ى لە سیاسەت و دەوڵەت کردووە، خۆشت ئەم راستییە باش دەزانى، بەڵام بۆ دەتەوێ بەخەڵکى سادەى رابگەیەنى کە عەلمانییەکان دژ بەدینن، فەتواى دژ بەدین بوونى عەلمانییەکان بەچ مەبەست و مەرامێک دەدەیت؟! دەزانى بۆ؟ چونکە تۆ سیاسەت بەدین دەکەیت و دەشتەوێ عەلمانییەکان بێلایەن بن لە دین،عەلمانییەکان لەو باوەڕەدان  دین بەر لە هەر شتێک پەیوەندییەکى پاک و بێ ناوکۆیى نێوان خالق و بەندەیە و هەموو کەسێک دەزانێ دەرگاى مزگەوت لە کوێیە، ئەمەش ئەوپەڕى بێلایەنییە، بەڵام تۆ بۆ مەبەستى سیاسى و ئایدیۆلۆژى خۆت دەست لەم پەیوەندییە وەردەدەیت و خۆت دەکەیتە ئامر و ناهى، ئەمە لەلایەک، لەلایەکى دیکەدا باس لەوە دەکەیت کە ئەم مۆدیلە عەلمانیەتەى ئێرە " دەمێکە وەکو دەیناسۆر لە ناوچووە و تەنها لە تورکیاو تونس و کوردستان هەیە" هەڵبەتە مەبەستت لەم قسەیەدا پێداگرتنە لە سەر قسەكەى پێشترت، کە ئەویش  فەتواى دژ بە دین بوونى عەلمانییەکانە،ئەگەر نا مۆدیلى عەلمانییەت چ لێرە بێ و چ لەهەر شوێنێکى دیکەى جیهان لەبنەما سەرکییەکانیدا هەریەکە و تەنها ئەوە دەمێنێ کە ئێوەى ناعەلمانى هەتا پێتان بکرێ لەدژى هەموو (مۆدێلەکانى!!) دەوەستنەوە.
  کاک (زانا) باش دەزانێ مێژووى لە ناوچوونى دەیناسۆر ئەوەندەى لە گەڵ مێژووى سەرهەڵدانى  بۆچوون و تێڕوانییەکانى خۆى کۆکە ئەو هێندە لەگەڵ مێژووى سەرهەڵدانى عەلمانییەت کۆک نییە، چونکە مێژووى تێڕوانینەکانى خۆى گەلێ لە مێژووى تێڕوانینى عەلمانییەکان کۆنترە ،ئەو دەیەوێ بۆ مەرامى تایبەتى خۆى ئەوەمان پێڕابگەیەنێ کە لەگەڵ هەندێ لە مۆدێلاتەکانى عەلمانییەت کۆکە و لەم رێگەیەوە وەتەنیاتیش دەبەخشێتەوە و پێى وایە ئەو مۆدێلە عەلمانییەى ئێرە گەل و نیشتیمانیان خۆش ناوێت و ئایندەیان دەخەنە مەترسییەوە. ئەگەر عەلمانییەکان خەمخۆرى نیشتیمان نەبوونایە دەمێک بوو تۆ حاشات لە کورد بوونى خۆت دەکرد، ئەگەر  خەمخۆرى (گەل) یش نەبوونایە ئێستا تاکێکى ئیسلامى توندڕەوەى ئەم گەلە کە (تۆیت) ئاوا ئازادانە نەتدەتوانى قسەکانت بکەیت و بە نانت دەگوت (خبز)!! 
  کاک (زانا) ،لە کۆتاییدا هەر ئەوە ماوە بیڵێم کە حەزم نەدەکرد ئەو هێندە کاتەم بۆ وەڵامدانەوەى نووسینەکەت تەرخان بکەم ، بەڵام بەو قسە رەق  و پڕ قین و ناڕەوایانەت بەرامبەر بەو عەلمانییانەى ئەمڕۆى ئازادییان بۆ هێنایە ئارا، ناچارت کردم بەدەنگ بێم و بە قەولى خۆشتان پێتى بڵێم(( العین بالعین والسن بالسن والبادیو اڤلم)).
 

Previous
Next

Leave a Reply