Skip to Content

Tuesday, December 7th, 2021

دەلیل میرساز گۆرانی بۆ قەندیل دەڵێت….هەڤپەیڤین / توانا لێزان

Be First!
by January 18, 2009 گشتی

 چاوپێكەوتن
 
 دەلیل میرساز گۆرانی بۆ قەندیل دەڵێت
 هەڤپەیڤین / توانا لێزان

     كۆمەڵەى هونەرى دیجلە لەرێكەوتی (2004/7/7) لەلایەن كۆمەڵى هونەرمەندى بەتوانا و خۆبەخش لەشارى بەغدا دامەزراوە، بەڵام بەهۆى بارودۆخی نالەبارى شارى بەغدا، كۆمەڵەكەیان گواستەوە بۆ شارى كەركوك، لە شارى كەركوك گوڕیان بەتێكۆشانى هونەریدا، كۆمەڵەى هونەرى دیجلە تائێستا چەندین چالاكی هونەرى جۆراو جۆریان لەشارەكانى كوردستان و ئێراق ئەنجام داوە و بەشداریان لەچەندین ڤیستیڤاڵی هونەرى كردووە، وە بەردەوام و بەبێ بەرامبەر خزمەتى لاوانیان كردووە، هەروەها توانیویانە تائاستێكى باش هونەر و كولتورى كوردى بپارێزن.
   بەپێویستم بینى سەبارەت بەهونەرى ئەمڕۆى كوردى و كاریگەریەكانى لەسەر كۆمەڵگا و چەندین پرسی تر دیمانەیەك لەگەڵ ئەندامى كۆمەڵەى هونەرى دیجلە هوزانڤان دەلیل میرساز ساز بكەم، بفەرموون ئەمەش دەقەكەیەتى.
 پرسیار: چەند بەرهەمتان هەیە و ئەگەر بكرێ ئاماژەیان پێبدەی؟
 میرساز: سەرەتا بەخێرهاتنتان دەكەم بۆ ئەم هەڤدیتنە. من ئێستا ئەندامم لە كۆمەڵەى هونەرى دیجلە و لێرە خەریكی كارى مۆسیقا و گۆرانیم، بێگومان بەرهەممان هەیە یەكەم بەرهەممان لە كلیپێكی هەمەرەِنگی پێكهاتوو بەهەموو زمان و زاراوەكانى ئێراق بەناوى (اتیاف عراقیە) لەبەغدا و كوردستان وێنەكەى گیراوە چەند هونەرمەندێكی كورد و عەرەب لەگەڵماندا بەشداریان كرووە.
     منیش بەرهەمم زۆرە، بەڵام ئەوانەى بڵاوبوونەتەوە كەمن، تائێستا یەك (سی دی)یم بڵاوبووەتەوە بەناوى (ئاوازێن وەندایى) و هەشت كلیپم هەیە، یەكێكیان بەناوى (تیرو كەڤانە)، بەڵام كارى مونتاژى هێشتا ماوە، وەهەروەها ئێستاش خەریكی گۆرانییەكى تازەم بەناوى (ویژدان) لەسەر ئەو بۆردومانەیە كەدەوڵەتى داگیركەرى توركیا كردیە سەر گوندەكانی بناری قەندیل. هەروەها وەكو كارى وێژەیى دوو پەرتووكى شیعرم هەیە، بەناوەكانى (كەسكەسور و دومانێ مرنىَ) پەرتوكێكی تر بەناوى (ژئاڤا فورات دڵۆپەك) لەئەستەنبوڵ چاپكراوە ئەویش ڕۆمانە، ئێستاش خەریكی نوسینی بەرهەمێكم بۆ كتێب كە ئەویش گۆرانیەكی فۆلكلۆریە بەزاراوەى كرمانجی سەرو گوتراوە گۆرانییەكە سێ كاتژمێرە، داستانێكی عەشق و ناكۆكییە لەنێوان عەشایەرە كوردەكان لە شارى باتمانى باكوورى كوردستان، ئەویش لەئایندەیەكى نزیكدا دەكەوێتە بەر دەستی خوێنەران و هیوادارم ببێتە هۆى بەرەو دەوڵەمەندكردنى پەرتووكخانەى كوردى.
 پرسیار: چۆن پێناسەی هونەر دەكەیت؟
 میرساز: ئەگەر مرۆڤ بییەوێ شتێك بناسێ، پێویستە بگەڕێتەوە بۆ سەرەتاكانى دروستبوونى ئەو شتە بۆ ئەوەى لەڕەگ و ڕیشەوە ئەو شتە بناسێ، ئەگەرنا ناتوانێ بڵێ ئەو شتە ئاوایە یاخود دەبێ وابێ. بێگومان كەهونەریش هاتووەتە دی،  خزمەتى مرۆڤ و كۆمەڵگاى كردووە لەبەر ئەوەش هونەر شتێك بووە كە لەڕۆژانى هەر مرۆڤێكدا ڕۆڵی گرنگى هەبووە و كاریگەریەكى زۆرى كردووە بۆ پێشخستنى ئەو كۆمەڵگایە.
 لەقۆناخەكانى سەرەتاى مرۆڤدا، یاخود ئەتوانین بڵێن لەقۆناخی بەردینى نوێدا (نیولیتیك) كەئیتر مرۆڤ گەیشتوبووە ئەو قۆناخەی كەخۆی ناسی و بەئەقڵی خۆی لەگەڵ ڕۆژانی ژیاندا هەڵسوكەوتی كردووە. لەو قۆناخەدا هونەر ڕۆڵێكی گەورەو گرنگى بینیوە، چ لەدروستكردنى ئامێرەكانى ڕاو بێت كە كۆمەڵگا پەناى بۆ دەبرد و چ لەخۆماڵی كردن و بەخێوكردنی هەندێك لەئاژەڵەكان بێت و چ دۆزینەوەى ئاگر و كشتوكاڵی كەوشەى (چاند) واتە كولتوریش لەوىَ هاتووە. هەروەها بەكارهێنانى دەنگەكان و ڕیتم بۆ تقوساتى ئاینی هەتا دەگاتە ئاستێك كە قۆچی ئاژەڵ بەكاردەهێنن وورد وورد پرچی كلكى ئەسپ و كولەكە و هەتا دەبێت بەقامیش و بوق و تەمبور و هارپ و … هتد. هونەر لەوكاتەدا تێكەڵی رۆحی مرۆڤ بوو، بووە پێداویستیەكی ڕۆژانە بۆ هەر مرۆڤێك.
 پرسیار: ڕۆڵی مۆسیقاو گۆرانى لەناو كۆمەڵًگاى كوردیدا چییە؟
 میرساز: كۆمەڵگاى كوردى كۆمەڵگایەكە لەسروشت دوورنەكەوتووەتەوە و بەدرێژایی مێژوو خەڵكی ئەم ناوچەیە بەگشتى و كورد بەتایبەتى كە لەناوچەى میزۆپۆتامیا (دۆلی دووئاوان) ژیاون كەڕاستى دایكی دونیاو لانكەى شارستانیەتە، مۆسیقا و گۆرانى تێكەڵی ڕۆحی ئەوان بووەو وەكو ئاو و نان ئەگەر لێیان دابڕێت كۆتایی بەژیانیان دێت، هەروەها ئەوەمان لەبیر نەچێت كەمۆسیقا و گۆرانى لەدایكبووى ئەم ناوچەیەن و لەم ناوچەیە گەشەیان كردووەو تەواوى دونیا سوودى لێ وەرگرتووە، نموونە خەڵكی میسر زۆر ڕستەیەكیان بەكاردەهێنا ئەوەش ئەوەیە كە دەڵێن (میسر دایكی دونیایە) لەگەل ئەوەى  سوریش ئەزانن كەشارستانی میزۆپۆتامیا پێشی شارستانیەتى نیلە، كەواتا ئەگەر ئێمە بڵێین میزۆپۆتامیا دایكی دونیایە ناهەقی لەكەس ناكەین و مافی كەسیش ناخۆین.
    من بۆ ئەوە ویستم ئاماژە بەم خاڵە بكەم، لەبەر  ئەوەى  كە ئێمەى كورد لەمێژووى راستەقینەى خۆمان دابڕاوین و بەسەدان شتی چەواشەكارى بۆ مێژووى ئێمە دروستكراوە وەكو كەدەیان ووت كورد لەوڵاتانى (ئیسكەندنافیا) هاتووە ویستیان بەو قسانە پێمان بڵێن كەكورد خەڵكی ڕەسەنی ئەم ناوچەیە نییە و بۆی نییە داواى هیچ مافێك بكات لەبەر  ئەوەى هیچ مافێكی لێرە نییە. بێگومان چاند واتا كولتور دەگۆڕێت و كاریگەر دەبێت و كاریگەرى لێ دەكرێت، نموونە لەم ناوچەیەدا هەندێك لەو گۆڕانكارییانە ئەمەن: لەباشوورى كوردستان تەریقەتی نەقشبەندی هەیە، وەكو ئایین عەرەبیە بەڵام زمانى كوردى جل و بەرگ و دەفی كوردى تێكەڵی بووە. كەواتا لێرەدا چاندی كوردى گۆڕاوەو بووە بەشتێكی تر.
 هەروەها شیعە دیسان وەكو ئایین عەرەبیە، بەڵام لەئێران تێكەڵی زمان و چاند و فەرهەنگی فارسی بووە و گۆڕانكارى بەسەردا هێناوە، فەرهەنگ هەیە قبوڵ دەكرێتن بەڵام لە كوردستان خۆی فەرزكردووە، بەداخەوە لەوڵاتى ئێمەدا لەبەر ئەوەى هەمیشە لەژێردەستى داگیركەران بووینە،  نەمانتوانیوە لەم كاریگەریانە خۆمان قوتاربكەین.
 دیسان دەگەڕێمەوە سەر پرسیارەكەو ئەوە دەڵێم: لەڕۆژگارى ئەمڕۆماندا مۆسیقا و گۆرانى لەناو ڕۆحی خەڵكدایە، بەڵام شتێكی تر تێكەڵی بووە كەوەكو جاران ووزە نادات بەخەڵك بەڵكو بەپێچەوانەوە زۆرجار خەڵك بێ هێز دەكات و لەوزەى كەم دەكاتەوە.
 پرسیار: ئەو شتە چییە كەتێكەڵی مۆسیقا و گۆرانى بووە بێ هێزى كردووە؟
 میرساز: دەڵێن هونەر بۆ خزمەتى كۆمەڵگا و جوانكارى و بەرەو پێشەوەبردنی مرۆڤە، ئەمە شتێكى ڕاستە، بەڵام لەڕۆژگارى ئەمڕۆماندا وانییە هونەر خزمەتى كۆمەڵگا ناكات، بەڵكو زۆرجار ڕۆڵی چەواشەكارى دەبینێت.
 نموونەى ئەمەش ئەوەیە كەچەندەها فیلمی سینەمایی هەیە، كەدەبینرێت چەواشەكارییەكى مەزن دروست دەكات،  لەلاى بینەر وەكو جیاوازى نێوان خێرو شەڕ و زۆردارو مەزڵوم و داگیركەرو داگیركراو و هەژارو دەوڵەمەند هەق و ناهەق و … هتد.
 پێش  ئەوەى كەئەمریكا موداخەلەى ئێراق بكات زیاتر لەبیست ساڵ لەهۆلیۆد كەدەزگایەكى بەرهەمهێنانى فیلمە لەڕێگەى فیلمی رامبۆ و ڤاندام و ئارنۆلد…هتد كارى بۆی كرد بۆ ئەوەى خەڵكی ڕۆژهەڵاتى ناوەڕاست بەگشتى و ئێراق بەتایبەتى هەر لەسەربازێكی ئەمریكی وەكو ڤاندام و ئارنۆلد و ڕامبۆ تەماشا بكەن، بەڵام ڕاستى وادەرنەچوو. لەكارى مۆسیقا و گۆرانیدا ئەمڕۆ چەواشەكارییەكى زۆر هەیە كەبەداخەوە هونەرمەندانی ئێمە وەكو خۆیانى لێ شاردووەتەوە و گەنجانى ئێمەى سەرگەردان كردووە.
 پرسیار : زۆرجار لێرەو لەوىَ ئەو پرسیارە ڕووبەڕووى هونەرمەندان دەكرێتەوە كەئایا چ پەیوەندییەك لەنێوان هونەر و سیاسەت هەیە لەوەڵامدا هونەرمەندان دەڵین هیچ پەیوەندیەك نییە لەنێوان ئەو دوو چەمكە ئایا بەبۆچوونى تۆ هەیە یان نا؟
 ئەتوانم بڵێم، لەدونیایەكی ئازاددا هونەر و سیاسەت هیچ پەیوەندیەكیان بەیەكەوە نییە، بەڵام لەدونیایەكی پڕ لەڕاوە دەسەڵات و ستەمكارى و خوێنمژی بە تایبەتیش لەوڵاتی ئێمەدا كەپشیلە جوولە بكات مەبەستێكی سیاسی بەدواوەیە.
  ئالێرەدا بەڕاى من ئەگەر كەسێك بڵێ پەیوەندی هونەر بەسیاسەتەوە نییە لەقژی سەری هەتا ژێر پێی لەخەفڵەت دایە. ئەگەر بگەڕێینەوە بۆ ساڵانی رابردوو دەبینین كە لەساڵانی (1960 ــ1980) كاریگەرى هونەرى سۆسیالیزم خۆی زاڵكرد بەسەر زۆربەی وڵاتانی دونیادا لەئەنجامدا فەرهەنگێك دروستبوو، (من و تۆ) تێیدا نەبوو (ئێمە و ئێوە)ی تێیدا هەبوو، بۆ نموونە بەرهەمەكانى (ڕۆبسۆن و فەیروز و مارسیل خەلیفە و شڤان و پاپلۆبیرودا و پۆشكین و زۆربەى هونەرمەند و وێژەوانی ئەو سەردەمە مۆری خۆیان لەقۆناخەكەدا).
   بەڵام كە سەرمایەدارى ئەمەى بینی كەوتە خۆی و هەڵسا بەدروستكردنی ئەلتەرناتیف كەبریتی بوو لەهونەرى (پۆپ و گەشەپێدانى بوارى وەرزشیەوە بۆ ئەو مەبەستەى كەگەنجان بكەونە گێژاوەوە (كائیۆس) و واز لەچەمكى تەبایى بهێنن لەڕێگاى وەرزشەوە بتوانێ ووزەى لاوان  بەخۆرایی بەبادا، لێرەدا هونەرمەندانى راستەقینە فەرامۆش كران وایان لێ كرا كەدڵی كۆمەڵگا پیێ بسووتێ نەك ووزەیان لێی وەرگرێ. لەدواى رووخانی یەكێتى سۆفیەت ڕوون و ئاشكرا بوو كە نەسیستەمى سۆسیالیزم و نەش سیستەمى سەرمایدارى نەیان توانیوە جێگیرببن و ببن بەماڵی گەل، لەبەر ئەوەش دواى ساڵی (1990) هەڵسان بەدروستكردنى چەمكێكی تازە كەئەویش (پۆست مۆدێرنیزم). واتا لەدوو سیستەم بۆ بێ سیستەمى. لێرەدا هەركەس ئەتوانێ چ هونەرێك دروست بكات كەس هەقی بەسەردا نییە، واتا هونەرمەندانیش لەڕووخانی یەكێتی سۆفیەت بێ بڕوا بوون و كەوتنە نێو لیبڕالیزمی پۆپەوە.
    ئێستا ئەم چەمكە چەمكێكی دژ بەڕەوشی كوردە، ئەگەر هونەرمەندانی كوردستان هەڵگری ئەم چەمكە بن، دەبێ مۆسیقا بۆ كردەوەكانى نیرۆن بژەنن و گۆرانی بۆ هیتلەر بڵێن و پەیكەر بۆ ئەتاتورك دروست بكەن و دۆزی ڕەواى وڵاتەكەیان لەبیربچێ و وێنەى عومەرى خاوەر و گەلێی زیلان و سینەمای عامودێ و چوارچرا و دایە عایشە فەرامۆش بكەن. بەڕای من بڵاوكردنەوەى ئەم چەمكە لەكوردستان، خۆی لەخۆیدا سیاسەتێكی زۆر بۆگەنە و ناحەزانی گەلەكەمان زۆر بەجددی كاری لەسەردەكەن.
 پرسیار: ڕۆڵی ژن لەناو هونەر چۆن دەبینن؟
 میرساز: بڕواناكەم بەدەستنیشان كردنی ڕەوشی ئێستای هونەر بتوانین ڕۆڵی ژن لەنێو هونەردا دیارى بكەین، ئەڵێم دیسان پێویستمان بەگەڕانەوە بۆ قۆناخە سەرەتاییەكان دەبێت.
   لەسەرەوە باسی ئەوەمان كرد كەقۆناخێك پڕ لەهونەر هەبووە كەتێیدا كشتوكاڵی تێدا دۆزرایەوە و ئامێری كشتوكاڵی دروست كراوە و هەروەها زۆر خاڵی تر لەسەرەوە باس كرا. لێرەدا من ئەمەوێ ئەوە بڵێم كەئەو هەموو بەرهەمانە ئەنجامی ڕاستی بوونی ژنە، بێگومان لێرەدا پرسیارێك خۆی فرێ دەداتە پێشەوە بۆ ژن؟ یەكەمین هۆ ئەوەیە كەژن وەكو هەست و سۆز لەهونەرەوە زۆر زۆر نزیكە، خاڵی دووەم ئەوەیە كەشارستانیەت لەدواى نیشتەجێبوون دێت، واتا (الاستقرار) ئیستقراریش لەڕێگاى ژنەوە دروست دەبێت، ژن لەبەر ئەوەى كەكاتێك منداڵ بوو پێویستیان بەشوێنی گونجاو هەیە بۆ ئەوەى بحەوێنەوە، ئەم حاڵەتە وادەكات كەڕۆژ بەڕۆژ بۆ خۆی جێگە دروست بكات  و لێی نیشتەجێ بێت. لەدواى نیشتەجێ بوون ژن دەبینێت كەچاندن چۆن گەش دەكات و سیس دەبێ بەپێی وەرزەكانى ساڵ.
 هەروەها تایبەتمەندی ژن تایبەتمەندی هونەرە، وەكو عەدالەت و یەكسانی و هەست و سۆز ئەمانە هەموویان تایبەتمەندی هونەرن، لەكۆتاییدا تایبەتمەندی داهێنان و خوڵقكارین. لەڕۆژگارى ئەمڕۆماندا ژن لەمەیدانی هونەر زۆر دەبینرێن، بەڵام ژن كارى ڕەسەن ناكات، بەڵكو كارێك دەكات هی خۆی نییە، بەڵام جوانكارى ساختە لەپیاوى سیستەمی باوك سالارى دەبینرێت نەك ژن. بوونى ژن لەناو زۆربەى كارە هونەرییەكاندا خزمەت بەویژدانى سیستەمی باوك سالارى دەكات، لەبەر ئەوەى بوونى ژن لەوێ تەنها شێوەیە، ژن بۆخۆیشی ئەوەندە چەواشەكراوە وا ئەزانێ ئەگەر خۆی رووتكردەوە ئەوا ئازاد دەبێت، من پێموایە (مەریەم خان، ئایشەشان، گولبەهار، سوسیكاسۆ، زاویناشاكر، خانێ زازا، ئەسلیكا قادر) و زۆر ژنانی تر لەكوردستان كارى ڕەسەنیان كردووە، ئەگەر چاو لەوان بكرێت گۆڕانكارى باش دەبێ.
 پرسیار: ماوەیەك لەباشوورى كوردستان مۆسیقای ئارەبێسك زۆر گەشەى كردووە هۆی ئەمە چییە؟
 میرساز: ئارابێسك بەو شێوازە مۆزیكە دەوترێت كە لەدەوربەرى مۆزیكی عەرەبی دا بەكاردێت، بەڵام بەبۆچوونى من ناوەڕوەكەكەى ئەوەیە كەهەموو شێوازو بیرۆكەیەكى بێ بڕواو ڕووخاو ئارابێسكە. ئەم شێوازە دواى ساڵی (1980) كەتوركیا تووشی كودەتا (انقلاب)ى سەبازى دەبێت، دەوڵەت ئەم شێوازە پێشدەخات.
    چۆن سەرمایەدارى بەرامبەر بەهونەرى سۆسیالیزم (پۆپ) پێش دەخات و بێ بڕوایی بڵاودەكات، لەتوركیاش هەتا پێش ساڵی (1980) چەپگەرى زۆر بەكاریگەر بوو، بۆئەوى دواى كودەتاى عەسكەرى دەوڵەت كەسانی وەكو (ئیبراهیم تاتلیسەس، فەردى تەیفور، موسلم بابا، و بەدەیان كەسانی تر زۆر هاتن پشتگیری كردن و لەمیدیادا هاتنە پێش.
 ئەم شێوازە ڕۆژ لەدواى ڕۆژ بڵاوبوو و بەتایبەتیش ئاراستەى كوردستان كرا، هەتا كەواى لێهات كەگورانییە كوردییەكان لەڕێگاى گۆرانیبێژە كوردەكان بەشێوازى ئارابێسك و زمانى توركی تۆماركران و لەكوردستان بڵاوكرانەوە ئەم شێوازە ماوەیەكە لەباشوورى كوردستان هونەرمەندان پەنایان بۆ بردووە بەر ئەم شێوازە مۆسیقایەو خەریكە مۆسیقاى كوردى وەكو دەیناسۆر  لەناودەچێ.
     هونەرمەندان ئەم شێوازە مۆسیقایە بەتازەگەرى لەقەڵەم دەدەن و پێیان وایە كەمۆسیقاى كوردى زۆر كلاسیك بووە و كەڵكی گوێگرتنى نەماوە جگە لەمۆزەخانە بەكەڵكی هیچی تر نایەت. من لەگەڵ زۆر لەهونەرمەدان گفتوگۆم كردووە، هەمان شت دەڵێن و زۆربەى ئەو هونەرمەندانە هیچ زانیاریەكیان دەربارەى ئەو شێوازە نییە، تەنها ئەوە دەڵین شێوازێكی خۆش و تازەیە. بەداخەوە، ئەگەر خوالێخۆش بوو، (محەمەد عارف جزیری) تەنها بۆ یەك ڕۆژ بۆ میوانى بێتە دەڤەرى بادینان چیمان پێ دەڵێ؟
    من بۆ ئەوە نموونەى بادینان دێنمەوە، لەبەر ئەوەى كەلەزاراوەى كرمانجی سەروودا بەسەدان و هۆزانڤان گۆرانی بەو شێوازى لاوك و حەیران و لەوە هەیە كە لەمێژووى هیچ میللەتێكیدا شتى وا نایەتە دی، زۆربەى ئەو گۆرانیانە داستانن و هەموویان باسی بەسەرهات و رووداوەكانى قارەمانى تراژیدی گەلی كورد دەكەن، هەروەها هەریەكێك لەو گۆرانیانە لەدوو كاتژمێر زیاترە، نموونە(دەرویش عەبدی، ساڵحی ناسوَ، كولك، ئۆمك، عەزالا ڕەشید بەگێ، عەزیزی تك مستەفێ، یوسفێ شەڕ و …هتد.
     لەباشووردا دەبوایە زیاتر لەسەر ئەم مێژووە ڵێكۆڵین بكرێت و ئەم هونەرە بەنرخە زیندووبكرێ و كارى لەسەر بكرێت و ببێتە ماڵی گەل لەڕۆژی ئەمڕۆدا، بەڵام بەداخەوە زۆربەی گۆرانیبێژانى ئێستا نازانن (شاكرۆ، رەشیدی مام چۆچان، حەس نازی، عەگیدی جمۆ)  و بەسەدان ناوی تری وەكو ئەمانە كێن و كاریان چی بووە و دەڵێین مۆسیقاى ئارابێسك تازەگەریە لەناو مۆسیقای كوردیدا من ئەم خاڵە بەڕەوشێكی ترسناك دادەنێم بۆ مۆسیقاى كوردى و بانگەوازیم بۆ هونەرمەندان ئەوەیە كە لەسەر ئەم ڕەوشە بەشێوەیەكى زۆر جدی ڕاوەستن و بتوانین بەیەكەوە ئەم ڕەوشە بگۆڕین.
 پرسیار : ساڵی پار لەشەڕەكەى لوبنان و ئیسرائیل هونەرمەندە عەرەبەكان زۆر چوونە ناو مەوزوعەكە و پشتگیریی و گۆرانیان بۆ لوبنان ووت! بۆچی هێرشەكانى سەر بنارى قەندیل هونەرمەندانى كورد هیچ دەنگێكیان نەبوو و هەستیان نەجوڵا؟
 میرساز: بەڕاستى ئەم پرسیارە لەشوێنى خۆیدایە هێرشەكانى سەر بنارى قەندیل سەرەنجی هەموو دونیای راكێشا بۆ لاى خۆى و دیمەنەكانى كە لەمیدیاكاندا نیشاندران زۆر كاریگەر بوون چ تەرمەكەى دایكە عایشێ چ دیمەنى ئەو بەرخ و مەڕانەى كەمردبوون یان قاچیان بڕابووەوە، بەڕاستى وەكو دەڵێن گاور لەبەرامبەرى ئەو دیمەنانە موسڵمان دەبوون، من لەسەرەوە وتم ئەگەر هونەرمەندان بڵێن هونەرمەندین و پەیوەندیمان بەسیاسەتەوە نییە زۆر ئاساییە كەهونەرمەندان بیێ دەنگ بن و پەیوەندییان پێوەى نەبێت، بەڕاى من ئەو بێ دەنگیە ئەوە بوو كەپیلانى ئەو تاوانانەى دەوڵەتى توركیا كەدەیان ساڵە كارى بۆ دەكات و سەریان گرت و بەئەنجام بوون بەداخەوە ئەگەر هەموو چین و توێژیكمان بێ دەنگ بوونایە دەبوایە هونەرمەندان بێ دەنگ نەبن.
 پرسیار : ئێوە ئەندامن لەكۆمەڵەى هونەرى دیجلە هیچ هاوكارییەكتان دەكرێت لەلایەن حكومەتى هەرێمەوە؟
 میرساز: كەركوك بەشێوەیەكى گشتى فەرامۆش كراوە كەركوك وەكو مانگایەكى شیردار هەموو كەسێك دەیدۆشێت و شیرەكەى دەخوات بێ ئەوەى خزمەتى بكات كۆمەڵەى هونەرى دیجلەش لەكەركوكە سەرەڕاى ئەوەى كەبەڕاستی كۆمەڵەى هونەرى دیجلە خزمەتێكی باش بەلاوان دەكات بەڵام بەداخەوە هیچ پشتگیرییەكى ئەوتۆ ناكرێ لەلایەن حكومەتەوە.
 پرسیار : دوا وتەتان؟
 میرساز: لەكۆتاییدا زۆر سوپاستان دەكەم و هیوادارم لەهەفتەنامەكەتان بابەتى هونەرى زۆر بێ، هەر بژین بۆ دۆستایەتى هونەرو هونەرمەندان.
 
 

Previous
Next

Leave a Reply