Skip to Content

Thursday, December 2nd, 2021

شانۆگەرى (حەسارو سەگەكانى باوكم)……

Be First!
by September 6, 2008 گشتی

   
 ئا: سۆران عەزیز

 
 شانۆگەرى (حەسارو سەگەكانى باوكم) لە نووسنى (شێرزاد حەسەن) و دەرهێنانى (رزگار ئەمین)، ئەم شانۆگەرییە بەرهەمێكى نوێى هونەرمەند (رزگار ئەمین)بوو ماوەى چەند ساڵە دەرهێنەر كارى تێدا دەكات، ئەمساڵ بەهاوكارى وەزارەتى رۆشنبیرى و بەڕێوەبەرایەتى هونەرى شانۆ، لە هۆڵى سەنتەرى رۆشنبیرى ئاڵا ئەمكارە بەرهەمهات و نمایشكرا. كە بە بڕواى زۆرێك لە ئامادەبووانى ئەو شانۆگەرییە، كارەكە یەكێك بوو لە شانۆگەرییە باشەكانى چەند ساڵى رابردوو لەكوردستاندا. لەم شانۆگەرییەدا ئەوەى جێگەى سەرنجى بینەران بوو ئەوە بوو كە كۆمەڵێك ئەكتەرى گەنج رۆڵیان تێدا دەگێڕا كە تائێستا بەشدارى هیچ شانۆیەكیان نەكردووە، بۆیە بە بڕواى شانۆكاران ئەمە ئەزموونێكى تازەیە لە كوردستان و دەبێتە هۆى هێنانى چەندین بەهرەمەندى بەتوانا بۆ ناو شانۆ. لەم شانۆگەرییەدا هونەرمەندان "ئیبراهیم تەنیایى لە رۆڵى (باول) و بەهمەن حاجى لە رۆڵى (كوڕى گەورە)و سایە قەرەداغى لە رۆڵى (سەحەر)و نارین محەمەدى لە رۆڵى  (كچى گەورە)و رۆژین لە رۆڵى (كچى بچوك)و بەرزان سنجاوى لە رۆڵى (پشیلە)و رزگار محمود لە رۆڵى (زێوان) ئەزوەر لە رۆڵى (پاسەوان)و بێریڤان  لە رۆڵى(خەجىَ)كارەكتەر بوون". لەمەڕ دوا كەوتنى ئەم شانۆگەرییە و ئەو قسانەى لەماوەى رابردوودا لەسەرئەمكارە كراون، دەرهێنەرى شانۆیەكە (رزگار ئەمین) لە سەرەتاى گوتەكانیدا گوتى" ئەم شانۆگەرییە لە ئامادەكردنییەوە تا ئێستا كە نمایشكراوە كۆمەڵێك ماندوبوونى بۆ من و زۆر كەسى تر دروست كرد، ئەمكارە ساڵى 1994 ئامادەمكرد لە هۆڵى سلێمانى پاڵاس، ئەوكات لە هەوڵى ئەوەدا بووین لەوىَ نمایشى بكەین، هەر لە راستیشدا بۆ فەزاى ئەوىَ نووسراو و ئامادەكرابوو، بۆیە پێویستى بە فەزایەكى كراوە هەیەو پێویستى بە بەكارهێنانى بنمیچ هەیە. دواتر یەكێك لەو گرفتانەى كە رووبەڕوومان دەبووەوە، ئەوە بوو شوێنى شیاومان بۆ ئەم شانۆگەرییە نە ئەدۆزییەوە، بۆیە ئەو كات ئێمە لە سلێمانى خەریكى پرۆڤە بووین بارودۆخى شەڕى ناوخۆ گەیشتبووە ئاستى توندووتیژى، ناچار كارەكان وەستان. هەروەها ساڵى 2005 وەزارەتى رۆشنبیرى  ئیدارەى سلێمانى موافەقەى بۆ دەرچوو، تا لەوىَ كارى لێبكەم هەر لەوێش ستافێكمان دۆزیەوە و چەند رۆژێك لە كتێبخانەى گشتى پرۆڤەمانكرد، بەڵام لە هەولێرەوە بانگێشت كرام بۆ كاركردن لە تەلەفزیۆنى هەرێمى ئەو كات، بۆیە منیش لە بەر بێكارى ئەو داوایەم قبوڵكرد، هەرئەوەش وایكرد كارەكە لە سلێمانى بەجێبهێڵم و بگەڕێمەوە بۆ هەولێر. ساڵى 2006 بە هۆى كاركردنم لە تەلەفزیۆنى هەرێم ژیانم جێگیر بوو، برادەرانیش زۆر هاوكارییان كردم تا كارەكە تەواو بكەم ،چونكە دەمێك بوو دەیانزانى من خەونێكى وام هەیە، لەو كاتەیش هونەرمەند(ئەرسەلان دەروێش) بەڕێوەبەرى شانۆ بوو، كارەكەمان پێشكەشكردو موافەقەى هاتەوەو هەر لەوكاتەیش ئێمە وەك كارمەندانى تەلەفزیۆنى هەرێم كۆمەڵَێك گیروگرفتمان بۆ هاتە پێش كە ئەوەش هۆكارى ئەساسى بوو بۆ دواكەوتنى شانۆكە، ئەو كات سىَ ملیۆنمان راكێشابوو بۆ ئەوەى دەست بكەین بەكارەكە، لەو پارەیەش هەندێكى بۆ ئەو هونەرمەندانە بوو كە گرێبەستمان لەگەڵیاندا كردبوو، بەشێكیشى بۆ تەختەو پێداویستییەكانیترى شانۆكە بوو، بەشەكەیتریش بەهۆى دابڕانم لە تەلەفزیۆنى هەرێم و تێكچوونى بارى ژیانم و گەڕانەوەم بۆ سلێمانى هەر لاى خۆم بوو. دواتر جارێكیتر پێیان راگەیاندمەوە كەچى لەو كارە دەكەم، منیش گوتم" ئەوە خەونى منەو هەر جێبەجێَى دەكەم". پاشان (ئەرسەلان دەروێش)لە بەڕێوەبەرى شانۆ گۆڕاو هونەرمەند (سەباح عەبدولڕەحمان) بووە بەڕێوەبەرى شانۆ، بەبێ ئەوەى من ئاگام لەو كارە بێت یان ئاگادارم بكەنەوە، لە پڕ لە رۆژنامە بینیم گوایە من پارەم وەرگرتووەو هەڵهاتووم و دەمەوێت بیخۆم، ئەو كاتیش من لە سلێمانى خەریكى كەرنەڤاڵى نەورۆز بووم و دواتر گەڕامەوە بە بەڕێوەبەرى ئەوكاتى شانۆم گوت ئیشدەكەم هەرچەند بەڵێنیاندا، بەڵام هەستم بەكەمتەرخەمى زۆر دەكرد، بۆیە ئەوەشم بەدى دەكرد كە دەیانەوێت ئیحراجییەك بۆمن دروست بكەن، چونكە پارەكە راكێشرابوو و هەندێكیشى سەرفكرابوو. لێرەوە من سوپاسى هونەرمەند و بەڕێوەبەرى شانۆ (هیوا سوعاد) دەكەم، چونكە لەگەڵ ئەوەى بووە بەڕێوەبەر پەیوەندیم پێوەكردو پێمگوت كە بەهیوام كارەكە تەواو بكەم، بڕیاریداو زۆر هاوكاریكردم كە جێگەى سوپاسە. ئیدى ئەگەر سەیرى گرێبەستەكە بكەین دەبینین كاتەكەى مانگێكە كە چى بەسێ مانگ تەواومانكرد، ئەوەش لەبەر ئەوەى كە شانۆگەرییەكە پێویستى بەكچ بوو، بەڵام من كچم دەست نەكەوت، ئەوە لە كاتێكدا هەندێك برادەر پێى سەیرە دەڵێم كچ دەست ناكەوێت، چونكە لە تایبەتمەندى دەقەكە تێنەدەگەیشتن، تایبەتمەندى ئەو شانۆیە كچێكی ئەوێت پێش ئەوەى ئەكتەر بێت ئازابێت، پێش ئەوەى هەمى نواندنى هەبێت هەمى ئازادییەكان و ژیانى تایبەتى خۆی هەبێت، بۆیە بەراستى لەناو ناوەندى ئەكتەرى كچەكانى ئێرەدا لەو جۆرەم بەدى نەدەكرد، دەشىَ ئەو ئەكتەرانە كاریانكردبێت و ئازابن، بەڵام كاتێك لەدەقێكى وادا باس لە ئازادى تاك و كێشەكانى چەپاندنى سێكسى  بكەیت، یەكسەر ئەكشێتەوە. بۆیە لە جیاتى مانگێگ سىَ مانگ لێرە كچ ئەهات و باش نەبوو و دەڕۆشت، تادواجار كۆمەڵێك كچ هاتن كە پێش ئەوەى بزانم ئەكتەرن گفتوگۆى دەقەكەم لەگەڵ كردن، ئەوانە كەسانێك بوون خوێندنەوەى خۆیان بۆ دەقەكە هەبوو، دنیا بینى خۆیان هەبوو لە هەمبەر ئازادى ژنان و كێشەكانى ژنداو خاوەنى قسەى خۆیانن، ئیدى بۆمن زەحمەتى لەوەوە دەستى پێكرد كە لەگەڵ ئەوانەدا كاربكەم، كە تائێستا كارى نمایشیان نەكردووە و هیچ لەشانۆ نازانن، ئەوانە هەمووى لەرووى ماددیەوە گورزى زۆرى دا لەمن، كە بودجەكە بۆ مانگێك نووسراوە كە چى ئێمە سىَ مانگ كارمانكرد بە هاوكارى زۆرى سەنتەرى ئاڵا كە هاوكاریكردنى ئەوان بەبێ هیچ بەرامبەرێك جێگەى رێزە". هەروەها هونەرمەند و دەرهێنەر (رزگار ئەمین) لەمەڕ دەقەكە گوتى" ئەم دەقە ئەوەى نووسەر (شێرزاد حەسەن) بناسێت ئەزانێت كە دەقەكانى (شێرزاد) دەقێكى كراوەیە بەرووى كۆمەڵگەیەكى باوك سالارەوە، لە حەساردا چڕكردنەوەى تەواوى ئەو بیرو رایانە هەیە كە(شێرزاد) ئەیەوێت كۆتەكانى باوك سالارى بشكێنێت و ئەیەوێت غەمەكانى تاك باس بكات، بەتایبەت لەرووى سێكسى، خەفە بوونى سێكس، كە باوكێك هەموو شتێك بۆ خۆى بەرەوا دەبینێت، بەڵام منداڵەكانى دەبێت بێبەش بن لێى. من هاتم لەو دەقەدا ئاوا كارم كرد كە تەسەورى باوكێكم كرد ئەگەر ئاوا بێت چى رودەدات لەناو ئەو ماڵەكەدا، هەروەها باسى ئەوەمانكرد كە دواى كوشتنى باوكەكە بەڕەڵاییەك دروست بە شێوەیەك كە ئەندامانى ماڵ پەرتەوازە دەبن، بۆیە كوشتن تۆڵە سەندنەوەیە، كوشتن شۆڕشێك نییە كە بە رێكى شتەكان بخاتەوە جێگەى خۆى، لە دەقەكەى (شێرزاد)دا  كوشتنى باوك، ئاوارەیى و پەرتەوازەیى منداڵەكانى لێدەكەوێتەوە.  هەروەها ئەگەر لەوكاتەدا دایبنێیت باوكەكە ماوە، ناو ماڵەكە چیلێدێت. دواتر ئەو هەموو جنسە ناشەرعیەى لەكۆمەڵگەى ئێمەدا هەیە، ئەو هەموو هەوڵانەى بۆ تێركردنى خەریزەى سێكسى بە شێوەیەكى زۆر نامرۆڤانە و ناتەندروست دەكرێت. ئیتر كە باوكێك هەموو دەرگاكان دادەخات، تۆى مرۆڤ دواجار چ دەكەیت؟ یان بۆ تا ئێستا لە كۆمەڵگەى ئێمەدا لە هەندێك شوێن مومارەسەى سێكسى ماوە لەگەڵ حەیواندا، بۆیە زۆر بەى ئەو حاڵەتانەم لەناو شانۆكەدا جێكردۆتەوەو مومارەسەى كچ و كچ، كوڕ و كوڕ خیانەتكردن، هەموویم لەناو ئەو شانۆیەدا جێكردۆتەوە بەجورئەتى برینداركەریش نا، بەڵكو بەجورئەتى ئەوەى ئەو بینەرەى ئەو شانۆیە دەبینێت هەست كات بەشێك لە كێشەكانى ئەو  بەیان دەكات، نهێنییەكانى ئەو پیشان دەدات، چونكە ئەو لە ژیانى واقیعیدا تواناى ئاشكراكردنى نهێنییەكانى نییە و لە ژیانێكى زۆر خراپى سڕكراودا ژیان دەكات، هەروەها یەكێك لەو هەڵانەى هەمانە ئەوەیە كە ئێمە دان بەهەڵەكانى خۆماندا نانێین، كە ئەوەش مرۆڤى خراپ بەرهەم دێنێت". 

 رزگار ئەمین:
 ئەو هۆڵانەیتر كە لەهەولێر هەن هۆڵى زۆر تەقلیدى و داخراون بەكەڵكى كارەكەى ئێمە نەداهاتن
rezgarAmin_789717552.jpg

 

دواتر لەمەڕ شوێنى كارەكەش، دەرهێنەر باسى لەوەشكرد كە من لە هۆلًَێكى داخراودا كارمكردووە، ئەوەش لەبەر ئەوەى كە شوێنەكە ببێتە حەسارێك بۆ ئەوەى هیچ بینەرێك و ئەكتەرێك نەتوانێت هاتوچۆ بكات و بچێتە دەرەوە، وەك باسیش دەكەن لەمكارەدا سەركەوتووبووین، ئەوەش لە بەرئەوەى بینەر ناچار بكەیت لەوكاتەدا بە بەردەوام بەدواى رووداوەكانەوە بێت. جۆرى كارەكەش وامان كردبوو كە بتوانین بینەر و ئەكتەرەكان تێكەڵ بكەین، ئەوەش بۆ ئەوەى بینەر لەوكاتدا خۆى بە بەشێك لەكارەكە بزانێت، ئەوەش ئەزموونێكە كە من لە ساڵى 1990 دەستم پێكرد لە شانۆگەرى (شیرین و فەرهاد) دا". لە بابەت كێشەى رووناكى ناو هۆڵەكە، هونەرمەند ئاماژەى بەوەدا" ئەو رووناكییەى ئێمە لەم شانۆگەرییەدا بەكارمان هێناوە، رووناكى ساڵەكانى هەشتاكانەو هەموو سویچەكان عادین، ئەوەش پەیوەندى بەوەوە هەبوو كە ئێمە ئیمكانییەتى ئەوەمان نەبوو شتى نوێى بۆ بكڕین. بۆیە لەدوو شوێنیش داوامانكرد هیچیان ئامادە نەبوون بماندەنێ، هەموو ئەمانە وایانكرد كە لەو كاتەدا چركە چركى پلاكەكان و ئینارەى عادى شڵەژان دروست بكات". ئایا كاركردن و خۆماندووكردن لەدەقێكى وادا كە باس لە كرانەوەى كۆمەڵایەتى دەكات لە كۆمەڵگەیەكى داخراودا، پێویست نەبوو لە هۆڵێكى گەورەتر نمایش بكرێت؟ لە وەڵامدا دەرهێنەر باسى لەوەكرد كە لە شارى هەولێردا هیچ شوێنێكى واى نەدۆزیوەتەوە لە هۆڵى سەنتەرى ئاڵا باشتربێت و ئەو هۆَڵە تایبەتمەندى خۆى هەیە بۆ دەقەكە، گوتیشى" ئێمە پێویستمان بەوە هەبوو كە جەماوەر یان بینەر تێكەڵى ئەكتەر بكەین، ئەوەش بۆ هۆڵیتر نەدەگونجا، بەڵام لێرە ئەوەمان بۆ دەكرا، چونكە ئێرە شوێنێكە بە رسترە لە ئەكتەر، بۆیە ناچار بووین لێرە نمایشى بیكەین، ئەو هۆڵانەیتریش كە لە هەولێر هەن هۆڵى زۆر تەقلیدى و داخراون و بەكەڵكى كارەكەى ئێمە نەداهاتن. بەڵام كێشەى جەمار ئەوەندە هەبوو كە نەم وێرا رایبگەیەنم ئەوەشى هاتبوو كۆمەڵێك كەسى نوخبەبوون بە تەلەفون ئاگاداركرابوونەوە، بەڵام بیرى لێدەكەمەوە لەداهاتوودا ئەگەر رازیبن بەڕێوەبەرایەتى شانۆ، لە شارەكانى دهۆك و هەولێر نمایشى بكەم". دواتر لەمەڕ ئەو شانۆیانەى لە كۆمەڵگەى كوردیدا و كە باس لە كرانەوەى كۆمەڵایەتى دەكەن سوودەكانیان چ دەبێت؟ (رزگار ئەمین) ئاماژەى بەوەدا، كە من وەك بینەرى شانۆگەرییەك ئەگەر شانۆگەرییەكە ناوەوەم را نەچڵەكێنێت، هیچ سوودێكى لێوەرناگرم، بۆیە من لەم شانۆگەرییەدا ویستومە یادەوەرى بینەر هەمووى بێنمە دەرەوە، چونكە هەر مەشهەدێك كە كراوە بەشێكە لە سایكۆلۆژیەتى خۆم، بۆیە لێرەشەوە تۆ بینەر دەخەیتە بەر محاسەبەكردنى ئەو ترسەى كە لەخۆى هەیەو ئەو شاردنەوە زۆرەى هەڵەكانى رۆژانەمان، ئەو كارەش بەشێكى پەیامەكەى ئەوەیە چۆن ئیعتراف بكەین كە هەڵەمان كردووە بۆ ئەوەى هەڵەكانمان نەشارینەوە، بەڵكو باسیان بكەین تا جارێكى تر هەڵە نەكەین". هەروەها لە نەبوونى شانۆیى لەو جۆرەى باس لە كەپتى سێكسى كێشەى تاك بكات، هونەرمەند پێیوایە كە ئێمە كێشەى بیركردنەوەمان هەیە، ئەگینا خۆ لەم وڵاتەى ئێمەدا ئەوەندە كێشەى دەست لێنەدراومان هەیە، كە دەتوانین سوودیان لێوەربگرین بۆ دەقى شانۆیى، بەڵام باهەموو دنیا تێكست بێت، كە ئێمەى شانۆكار بیرمان نەكردەوە چۆن تێكستەكان بكەینە شانۆ، ئەوە نەبوونى تێكست نییە، بەڵكو نەبوونى شانۆكارى بیركەرەوەیە. كە ئێمە شانۆیەكمان نییە مرۆڤەكان ئەوانەى بەدیار شانۆوە دادەنیشن رایان بچڵەكێنێت، دەكرێت شانۆكار كار لەسەر ئازادى كۆمەڵایەتى و سیاسى بكات و دەتوانێت باس لە ئازارەكانى كەسانى مەنفا بكات، كە ئێستا من دەمەوێت بەجددى بیرلەو كێشەیە بكەمەوە، چونكە ئێمە كەسانێكى زۆرمان هەن لەوىَ كە تووشى گرفت بوون، ئێستاش لەگەڵ برادەرێك سەرقاڵى كارێكى مۆنتاژم كە باس لەوە دەكات ئەو گەنجانەى ئەوروپا چەندین كێشەیان هەیە و ئێمەى هونەرمەند ئاگامان لێیان نییە. بۆیە بە بڕواى من كێشە ئەوەندە زۆرە كە دەتوانرێت بكرێتە كارى شانۆگەرى لەكوردستاندا، بەڵام پرسیارەكە ئەوەیە ئایا بەراست كێ ئەوانە بكات؟ ئایا ئێمە كەسى ئەوەندە بیركەرەوەمان هەیە تابتوانین كۆى ئەو كێشانە بكەینە شانۆ، ئەوە نەك هەر لە هونەردا و بەتایبەتیش لەناو شانۆكاراندا، ئەو هەستى بەرپرسیارێتییە نەماوە، بەڵكو لە كۆى ئاستەكانیترى كۆمەڵگەى ئێمەدا  بە تایبەتیش لە سیاسیەكانیشدا نەماوە. بۆیە من پێموایە ئەوەى هەر ئێستا لە كوردستان لەرووى سیاسى و عەسكەرییەوە خەریكە هێزى عێراقى دێت و داگیرمان دەكاتەوە، هەر ئەوە پێویستى بە كۆمەڵىَ شانۆگەریى هەیە، یان نەمانى ئەو هەستى بەرپرسیاریەتییەى كە ئێستا لە وڵاتى ئێمە بەشێوەیەكى گشتى نەماوە، هەموو ئەوانە پێویستیان بە كارى شانۆیى گرنگ هەیە لەئێستادا، كە چى بە بێدەنگ بەسەرماندا تێدەپەڕن و هیچیشیان بۆناكەین".

 شێرزاد حەسەن :
 سەرسام بووم بەجورئەتى كچەكان و بەتێكەڵبوونیان لەگەڵ كوڕەكان

 دواتر خاوەنى دەقەكە نووسەر و رۆشنبیر (شێرزاد حەسەن)لەمەڕ (حەسارو سەگەكانى باوكم) گوتى" ئەڵبەت بینینى یەكجارى شانۆگەرییەك زۆر زەحمەتە بە وردى بتوانیت هەموو لایەنە هونەرییەكانى ئەو شانۆگەرییە ببینیت، هەروەها گواستنەوەى ئەو نۆڤلێتە بۆ سەر شانۆ، هەستمكرد ستافى گشتى شانۆگەرییەكە لە هەموو روویەكەوە ماندوبوونێكى بێ ئەندازەیان پێوە دیار بوو، بۆیە پێشتریش چەندین جار بیر لەوە كراوەتەوە كە ئەو كارە بگوازرێتەوە بۆ سەر شانۆ یان بۆسەر شاشە، بەڵام ئەم گواستنەوەیە كارێكى وەها ئاسان نییە، ئەوەش لەبەر ئەوەى كە ئەو دەقە پڕە لەحەرام. هەروەها زۆر گومان لەو روحە پاتریالیستییە باوك سالارى و نێرسالارییەى كە لاى ئێمە پێرۆزە دەكات، بەڵام لە رێگەى چەندین تابلۆوە من توانیومە ئەو كارە بكەم، ئەتوانم بڵێم بیركردنەوەى منە دەربارەى كۆمەڵگەى خۆمان كە بێ ئەندازە لە سەربەستى ئازادى دەترسێت، من ئەوەش بەدرۆیەكى گەورە دەزانم كە گوایە ئێمە ماوەى هەڤدە ساڵە ئازادین، بۆیە من گومانم هەیە لەسەر ئاستى چ سیاسى چ كۆمەڵایەتى یان ئابوورى، ئێمە هیچ جۆرێك نزیك بوونەوەیەكیشمان هەبێت لەئازادییەوە. ئەوە ماناى ئەوە نییە من وەك نووسەر بەدواى ئازادییەكى رەهادا دەگەڕێم، بەڵام ئازادى وەهاش ئاسان نییە لە بەرئەوەى ئەو سەرچاوانەى كە ئێمەیان تووشى كۆیلەیەتى و ئازارێكى زۆركرد، ئەو سەرچاوانە چ وەك قوتابخانە چ وەك دەزگاكانى پەروەردە چ وەك دەزگاكانى حزب كە خەڵك پەروەردە دەكات، چ دەزگا ئاینییەكان چ دەزگا سیاسیەكان، هەموو ئەو دەزگا كۆمەڵایەتیانەى بەناو مەدەنین  چ وەك خێزان، بە بڕواى من هەمووى كاردەكات لەسەر كوشتنى ئازادى لەروحى ئێمەدا، هەموو ئەوانە پێمان دەڵێن زۆر زەحمەتە ئەمانە بە رستەو بەتابلۆ، بەڵام ئەوە كە دەیگوازیتەوە سەر شانۆو هێنانى ئەو هەموو تابلۆ و وێنانە زۆر زەحمەتە وەكو خۆى بەرجەستە بێت. لەبەر ئەوەش نۆڤلێتیشە، بۆیە پانتاییەكى هێجگار زۆر داگیردەكات هەرچەند ئەوان نزیكى دوو سەعات لەسەر شانۆ ئەو گەمە شانۆییەیان بەڕێوە دەبرد بۆ نمونە لە موعانات و ئازارى خوشكەكاندا هەوڵ درابوو زۆر بەرجەستە بكرێت، كە بەراستیش ئەوە بەمن گەیشت و زۆر سەرسام بووم بەجورئەتى كچەكان و بەجورئەتى ئەكتەرەكان و  بە تێكەڵبوونیان لەگەڵ كوڕەكان، بۆمن یەكەمجار بوو كەتا ئەو شوێنە جورئەت و ئازایەتى ببینم بەتایبەت لەكچەكان، لە كوڕەكان كە دەیانویست تا ئەو ئاستە نزیك ببنەوە لە حەرام كراوە كۆمەڵایەتییەكانى ئێمە، بەراستى ئەوانە بۆ من زۆر زۆر مایەى دڵخۆشی بوون.  دواتر ئەوەى من زۆر خۆشحاڵتر دەكات ئەوەیە، كە پێمخۆشە لە هەولێر جورئەتێكى واببینم، ئەوەش ماناى ئەوە نییە لە سلێمانى جورئەتێكى وا هەبوو ، بەڵكو من دەڵێم ئەوە یەكەمجارە ئەوە ببینم، بۆیە دەتوانم بڵێم ئەوەش لە شارێكى وەك سلێمانیدا دەگمەنە". دواتر نووسەر گوتى" كە باوك سالارى لە دەقەكەدا بەشێكى زۆرى گەیشت، بەڵام هێشتا بۆمن دەقەكە ئاسانترە، ئەوەش پەیوەندى بەوەوە هەیە كە ئایا دەكرێت دەقێك بۆ شانۆ نەنووسرابێت، چیرۆكێك یان رۆمانێك، بۆیە ئەمانە ئاسان نین و ناشتوانین لەوە زیاتر داوا لەو دەرهێنەرە بكەین، هەروەها من چەند جارێك لێرە و لەوىَ (حەسارم) بینیوە كە كراوە بەشانۆگەرى، بەڵام یەكەمجارە بەو تۆكمەییە دەیبینم. ئەوەى من بینیم یەك ئیقاع  و هاڕمۆنییەكى جوان كە بەیەك هەناسەو بەیەك روح كاریان دەكرد.
 

Previous
Next

Leave a Reply