Skip to Content

Friday, March 29th, 2024
ما.. چ ده‌بوو!؟ ….  دارا ئه‌حمه‌د

ما.. چ ده‌بوو!؟ …. دارا ئه‌حمه‌د

Closed
by February 21, 2012 ئەدەب

   

دڵۆپ.. دڵۆپ
 جوانیی و ته‌ڕیێتیی لێ ده‌تکا
 زه‌نگوڵ.. زه‌نگوڵ
 وه‌سه‌ر جه‌سته‌ی خۆم داده‌ڕژام،
 نێوانمان
 له‌ په‌ڕه‌ ته‌نک و رۆشنه‌کانی ئه‌وین ته‌ڕتر و
 له‌ داوی حه‌ز و ئاره‌زووه‌ کپه‌کان باریکتر بوو،
 به‌ هه‌ردووکمان
 پیته‌کانی ئه‌و رازه‌ په‌نهانانه‌ بووین
                       که‌ هه‌رگیز نادرکێن..
 به‌ هه‌ردووکمان
 هێڵه‌کانی ئه‌و تابلۆ‌ ته‌ڕاوزانه‌ بووین*
                      که‌ هه‌رگیز ناکێشرێن..
 به‌ هه‌ردووکمان
 به‌رگی ئه‌و په‌رتووکه‌ نایابانه‌‌ بووین
                     که‌ هه‌رگیز نانووسرێن.
 ما..** چ ده‌بوو
 ده‌رفه‌تم با و
 وه‌ چه‌ند مژه‌ک فرچکم گرتبا..
 له‌ قه‌دپاڵی
 مه‌مکه‌ خڕ و توند و تورت و قوته‌کانی
          نیشتیمانه‌کی چووکه‌له‌م چێکردبا!؟
 ما.. چ ده‌بوو!؟
 ئه‌وپه‌ڕه‌که‌ی له‌و ده‌ڤه‌ره
          – له‌ بوون تا چوون –
         که‌س له‌ مه‌مان نه‌ده‌کراوه‌..
                 هیچ له‌ لێوان نه‌ده‌شراوه!
 ما.. چ ده‌بوو!؟
 ئه‌وپه‌ڕه‌که‌ی هێڵی سۆر و سنووره‌کان
                 له‌ بن پێیان ده‌سڕانه‌وه‌!
 _____________________________
 * ته‌ڕاوز: به‌و ده‌غله‌ ده‌گۆترێ که‌ له‌ کاته‌کی دره‌نگی وه‌رزی چاندن تۆ ده‌کرێ‌ و له‌ ده‌می خه‌رمانانیش هێشتا هه‌ر ته‌ڕه‌ و ده‌می دورینه‌وه‌ی دانایێ‌.
 ** ما: (ما) یان (چما) له‌ هێنده‌ک ناوچه‌ له‌ جێی (لۆ، بۆ) به‌کاردێن.

daraehmed@yahoo.com

Previous
Next
This site is registered on wpml.org as a development site.