Skip to Content

Thursday, March 28th, 2024
نامه‌کانی عیشق ….. سه‌ردار جاف

نامه‌کانی عیشق ….. سه‌ردار جاف

Closed
by February 19, 2011 ئەدەب

        
 تووله‌ رێی دڕکاوی
جارێکی دی سڵاو
    ئازیزم ………
         شه‌قاوه‌ خێراکانم  له‌ میحرابی برژۆڵی چاوه‌کانته‌وه‌ فێری هه‌وه‌س گرتن بوو ، هه‌ر له‌وێشه‌وه‌ رێی حه‌ج و زیاره‌تت ئاشنا بوو ، سه‌فه‌رێکی سه‌خته‌نم گرت و نازانم چه‌ندی دیکه‌ به‌ رێگه‌یه‌وه‌ده‌بم و به‌ ئافاتییه‌وه‌ ده‌تلێمه‌وه‌ ، مه‌حاڵه‌ بتوانم له‌ نیوه‌ رێی سه‌فه‌رم ده‌ست به‌ردار بم ، خه‌راباته‌ …ئه‌و ده‌مانه‌م به‌ هزردا دێته‌وه‌ له‌ تووله‌ رێ دڕکاوییه‌کانه‌وه‌ بۆ سه‌ر کانیاوی به‌له‌کاوی گوژم ده‌به‌م ، گه‌یشتنه‌ به‌ر قاپی میحرابت چه‌شنی شه‌وانێکی تووش و پڕ کڕێوه‌یه‌ و ئه‌زیش له‌و شه‌وه‌دا به‌ته‌نێ و له‌ کۆسارێکا بێ ره‌ژوویه‌ک له‌ بن دار به‌ڕوویه‌کدا کرژۆڵه‌م کردبێ و گه‌یشتنه‌ کازێوه‌و گزنگ و سپێده‌ی به‌ر هه‌تاوم ئه‌سته‌م و دژوار بێ .
       تۆ هه‌ر له‌ من بێ ئاگای ؟ یان هه‌ر خۆتم لێ دوور ده‌گری ؟ نازانی گری چاوه‌کانم چه‌ند به‌ سوێن ؟ چه‌نده‌ وه‌ک ژیله‌مۆی ئاگردانی ماڵه‌ رووت و ره‌جاڵێکی گوندێکی دوور ده‌ست ده‌پوکێمه‌وه‌ ، که‌سێک نییه‌ سه‌ر له‌ نوێ گڕ له‌ جه‌سته‌ی پوکاوه‌بووم به‌ربا و گه‌ش گه‌ش ببمه‌وه‌ ، سوور سوور به‌ وێنه‌ی ده‌نووکی که‌وه‌ که‌وییه‌کانی زه‌نوێرستانی نیشتیمانم پاک پاک بێمه‌وه‌ به‌ر دیده‌ پڕ له‌ سیحراوییه‌کانت ، ئه‌و چاوانه‌ی منی له‌ گێژاوێکنا له‌ بری ئه‌وه‌ی دڕکه‌کانی چوقوڕئاوا به‌ بن پێیه‌کانم که‌ون ، لێ….. هه‌نگی له‌وێ ئاوایه‌ ئاوا ،نهۆ ئه‌و دڕکه‌زییانه‌ به‌ جار

نا جارێکی مه‌مله‌که‌تی زوویر بوونتا له‌ ناخی دڵما ئۆخه‌ی ده‌که‌ن …. آه ،،، ئازیزم ده‌ستم به‌ بنچکه ‌عیشقێکیش راناگا ، له‌م زریان و لافاو  وگه‌رده‌لووله‌ قوورتارم بکا ، له‌ نێو قامه‌ت و هزری تۆدا نه‌وره‌سێکم ئۆخه‌ی بوونی مه‌رگت له‌ ده‌فته‌ری یاداشته‌کانی ته‌مه‌نما سڕیوه‌ته‌وه‌ ، که‌چی هه‌موو کاتێ حه‌سره‌ته‌کانم بۆنی مه‌رگ ده‌که‌ن ، ئه‌رێ ده‌زانی به‌م تلانه‌وانه‌م ئاشنای مه‌رگم ده‌که‌یت و رۆحم ده‌فڕێنی به‌ره‌و ساباتێکی نامۆ بوونی مه‌رگ .؟
    بۆ نازانی من تۆم له‌ نێوشیلاوی  په‌ڕه‌ گوڵا ده‌رهێناوه‌ و بۆ ساتێ چییه‌ ئه‌و له‌زه‌ته‌ شیرینه‌ی خۆتت نه‌دامێ به‌ ته‌حریمی ده‌زانی ؟  ده‌زانی لای من چ ته‌حریم بوو ؟ شه‌ری برا کوژی …!که‌چی هه‌ر ده‌مانکرد ، که‌نگێ تۆیش  وه‌ک ئه‌و گوناهانه‌ی ئه‌و سه‌رده‌مه‌ ده‌ڵێی گوناهێک و هه‌زار تۆبه‌ ….! که‌نگێ له‌ نێو له‌ره‌ی ده‌نگه‌کانه‌وه‌ ئه‌و گوناهانه‌ تێک ده‌شکێنی و له‌ ئامێزی شێتگرتووما به‌ به‌له‌زه‌وه‌ به‌ سه‌ما وه‌نه‌وشه‌ییه‌کانی ته‌مه‌نته‌وه‌ له‌ ئامێزما تێر تێر ده‌نوویت و
بۆنی هه‌ناسه‌ و گڕی ناخت که‌ف و کوڵم گڕ تێبه‌رده‌دا ، و به‌ جه‌سته‌یه‌کی پڕ له‌ شیله‌ی هه‌نگوینییه‌ه‌و باوه‌شم پڕ له‌ مێخه‌ک ده‌که‌ی ، به‌ کووڵ تێكده‌ئاڵێین ئیدی شتێک نامێنێ ناوی گوناه بێ ، که‌ژاوه‌ی ژووانمان پڕ ده‌بێ له‌ بۆنی غه‌یبووبه‌کانی کپبوونی غه‌ریزه‌ ، ئاودامانی دۆراندۆرمان سابات و سه‌کۆی ئاوێته‌ بوون هێنده‌ سوورسوور سوور،  زۆرجاران به‌و ره‌نگه‌ سووره‌ دبێژم سيووری نتک نتک ، سووری قه‌ترانی ، که‌چی زاڵم تۆ هێنده‌ ته‌لی دڕکاویت له‌ بن  پێیه‌کانم چه‌قاندووه‌ له‌ بری سوور بوونی شه‌وه‌کانمان رێگای گه‌یشتنم به‌ تۆ سوور بووه‌ ، سوورێکی پر له‌ خوێن وا نه‌زانی له‌ که‌ناره‌کانی ئه‌و مۆڵگه‌ خۆ به‌ ده‌سته‌وه‌ بده‌م ، ده‌زانی چۆن سه‌رم له‌ ته‌نیشت سه‌رته‌وه‌ هاوجووت ده‌بێ ، ده‌ترسم ئه‌و ساتانه‌ تۆ له‌ من شێتتر و گڕگرتووتر بی .
    ئازیزم ….
   ئای له‌و چرکه‌ سوورانه‌ی له‌ ئامێزما خه‌وی وه‌نه‌وشه‌یی ده‌تباته‌وه‌ جه‌سته‌ت خاو خاو ، شه‌که‌تی ماندووبووی ئه‌و رێگا دوور و سه‌فه‌ره‌ خوێناوییه‌ی منی پێ بکه‌وێ ، دڕکتترین و سه‌ختترین و تووشتترین و کڕێوه‌ترین رێگا ببرێ ، ته‌نها ئێستا ماندووم ده‌که‌ی و ئه‌زییه‌تێکی زۆرم ده‌ده‌ی و هه‌ر خۆت ده‌حه‌وێیه‌وه‌و هیچی تر …………………….

         به‌لژیک
                                                                   Antwerpen 
                                                        Serdar.jaff@yahoo.com

Previous
Next
This site is registered on wpml.org as a development site.