Skip to Content

Thursday, March 28th, 2024
نغرۆ له‌عیشقا …… به‌ندی عه‌لی

نغرۆ له‌عیشقا …… به‌ندی عه‌لی

Closed
by September 10, 2010 هۆنراوە

 

 

ده‌ستم ناگا به‌پوشێکی سه‌رئاو که‌وتووی ره‌حمه‌تی خوا
گوناهی ده‌ست کورتی خۆمه‌ یا گوناهی بێ ره‌حمیی ئه‌و

نیگام نغرۆی چه‌می زاره‌و دڵم خوناوی لێ ئه‌تکێ
ڕه‌نگی به‌ختی تۆیه‌ ئه‌ی ناخ یاخو سیمای قه‌ترانیی شه‌و

دڵم بورکانێکی ماته‌ له‌ژێر کێوی به‌فر پۆشا
له‌نێویا گڕ سه‌ماکاره‌و سه‌ری له‌کۆشی ته‌مدایه‌

له‌پاییزیا ڕاز ئه‌بارێ ، به‌هاریشی خه‌م ئه‌پشکوێ
موچڕکه‌ی ، نه‌عره‌ته‌ی عیشقه‌و ماته‌می ، شینی زه‌ریایه‌

توخنی گه‌ڵای زه‌ردی عومری وه‌ریوم مه‌که‌وه‌ ئه‌ی با
من دره‌ختێکی بێ عارم ، هه‌موو عومرم گوڵێ ئه‌گرم

نه‌که‌ی کوڵمی بڕوشێنی  به‌سروه‌یه‌ک ، به‌چرپه‌یه‌ک
گه‌ر له‌فیرده‌وسه‌وه‌ هه‌ڵکه‌ی ، ڕه‌گو ڕیشه‌ت له‌بن ده‌بڕم

به‌هه‌ندی وه‌رگره ئه‌ی با ، گه‌مه‌ی جه‌نگت له‌گه‌ڵ ناکه‌م
دڵم بورکانێکی ماته‌و  نه‌سلی چقڵ و دڕک و خارم

تائه‌توانی دوورکه‌وه‌ لێم ، گه‌ر به‌لاما گوزه‌رت کرد
نه‌ک به‌ڕێکه‌وت لێم بکه‌وی ، من دره‌ختێکی بێ عارم
 

 2010

Previous
Next
This site is registered on wpml.org as a development site.