Skip to Content

Sunday, November 28th, 2021

چاوه‌کانی ( ره‌خنه‌ی چاودێر )*….!…..سابیر سدیق

Be First!
by December 2, 2008 ئەدەب

 چاوه‌کانی ( ره‌خنه‌ی چاودێر )*….!
 
 
 له‌م به‌یانیه‌ ته‌ماوییه‌دا.. گه‌ر چی که‌مێک دره‌نگه‌
 به‌ر له‌ هه‌موو شت ، ده‌خوازم به‌ با یه‌کی عه‌تراویدا
 پشکوتن و پیرۆزبایی ( دوانزه‌هه‌مین ڤێستیڤاڵی گه‌ڵاوێژ ) بنێرم…
 
                                        ……………………..
 به‌ڕێز….
 من هه‌میشه‌ به‌ ئۆمێده‌وه‌ له‌ بێده‌نگی خۆما دێم و ده‌چم ، مه‌گه‌ر  جار جار به‌زه‌حمه‌ت
  شه‌راب بتوانێ بمهێنێته‌ قسان .
 له‌ بواری نوسینیشدا..تا ئه‌م عومره
 به‌ هه‌موو هاڕه‌کردنی چاوه‌ڕونیه‌کانمه‌وه‌‌
 به‌ هه‌موو کوژاندنه‌وه‌ و . ، داگیرسانه‌وه‌کانمه‌وه‌
 به‌ گژ گرژی و ساده‌ییه‌کانمه‌وه‌ …
 ‌ له‌ چه‌ند نامه‌یه‌کی سپی و ڕوون به‌ولاوه‌ ، بۆ چه‌ند هاوڕێیه‌کی ‌هه‌ڵبژارده‌ ، هه‌رگیز قه‌ڵه‌مم وه‌سه‌ر کاغه‌ز نه‌ناوه‌ . به‌ مه‌به‌ستی جۆرێک له‌ جۆره‌کانی نوسین…جگه‌ له‌ ته‌رجومه‌ کردنی ؛
            ره‌نگه‌ ئاڵۆزه‌کانی ته‌نیایی
            هه‌ناسه‌ حه‌رامه‌کان و
            خورپه‌کانی غوربه‌ت وو
 گشت حاڵه‌ته‌ جوانه‌کانی ئینسان نه‌بێت .! که‌ ئه‌ویش (شیعره‌ )..!
                         ****
 شیعر وایکرد.. له‌ گۆڕه‌پانی شه‌ڕی گومانه‌کاندا ،
 له‌ دڵی خۆمدا..بنه‌مای ئه‌و یاسایانه‌ خه‌تمکه‌م ، که‌ ره‌وتی دیارده‌کانیان له‌ ئه‌ستۆدایه‌
  وایکرد.. که‌ که‌ناره‌کانی خه‌یاڵ و ، به‌رزاییه‌کانی مه‌حاڵ ، بخه‌مه‌ژێر پرسیاره‌کانی خۆمه‌وه‌و
  بێ گرفت .. جوڵه‌و سه‌ما عه‌شقاوییه‌کان ، بکه‌مه‌ سترانی سه‌ر زاری هه‌موان ..                      
 دیسان
 ره‌نگه‌ …ئه‌م نوسینه‌ش ببێته‌ نامه‌یه‌کی دی . بۆ که‌سێک هێمن و رووناک و وریا..که‌سێک ..، کاتێک سه‌رقاڵ له‌ گه‌ڵ چه‌مکه‌که‌نی بێهوده‌ییدا ، ساکار به‌لای قه‌فه‌سی ته‌یره‌کاندا تێده‌په‌ڕێت حه‌زی له‌  وه‌سفکردنی شیعره‌..
 ئه‌و که‌سه‌ (سامی هادی ) ه‌ …..
 سه‌رپه‌رشتیاری ( ره‌خنه‌ی چاودێر..)
 که‌ هه‌میشه‌ سڵاوێکی دۆستانه‌ له‌ نێوانماندا ئاماده‌یه‌ .
 وه‌لێ قه‌ت رێنه‌که‌وتووه‌ ؛ پێکه‌وه‌ قومێ شه‌رابی سێو وه‌خۆین و
 شاعیرانه‌ گوێ له‌ دنیایه‌ک حه‌یران و هێندێ سۆزی که‌مان بگرین ..
 به‌داخه‌وه‌..
 پێده‌چێت ئه‌م دۆسته‌ سه‌ر قاڵه‌ . چاوه‌کانی روو له‌ کزی بن ، ده‌نا چۆن ( وێنه‌ی من و ..سیمای برای چیرۆک نووس ( سابیر ره‌شید ) لێک جیا ناکاته‌وه‌ ) *‌
 وێنه‌ی من ؛
  که‌ له‌ گزنگێکی بریندار ده‌چێ ، له‌ سه‌ر یه‌که‌مین به‌ردی بناغه‌ی بنکه‌ی گه‌لاوێژ… وێنه‌ی من ؛  له‌ یه‌که‌مین تا پێنجه‌مین ڤێستیڤاڵ ،
            وێنه‌یه‌کی شیعری ئه‌رخه‌وانی ماندوو بو
            به‌ده‌ست وێنه‌ ناشیعریه‌کانی وشکه‌ساڵی و مه‌وسمی شه‌ڕه‌کانه‌وه‌ .
              ***
 به‌داخه‌وه‌..
 ده‌ترسێم ..چاوه‌کانت شه‌ونخونی به‌ دیار ره‌خنه‌ی چاودێره‌وه‌ کزی کردبن
 ده‌نا …
        بۆچی !!؟
             ***
 
 له‌ کۆتا دا ،
 هیوادارم وه‌ها نه‌بێت ، چاوه‌کانت دوور له‌ کزی . هه‌میشه‌ گه‌ش و جوان بن . ره‌نگه‌ ئه‌و (هه‌ڵه‌یه‌) ش له‌ کاتی سه‌رقاڵی کارمه‌نده‌کانا ، به‌ کاره‌ هه‌مه‌ جۆره‌کانی ڤێستیڤاڵه‌وه‌ رووی دابێت..
 به‌ڵام….
  نه‌ده‌بوو به‌ سه‌ر ئێوه‌دا که‌وشه‌ن بکات که‌ ئێوه‌ سه‌رپه‌رشتیارن ، وه‌ک وه‌هاش بوو ../ عورف و عاده‌ت و یاسا و رێسای رۆژنامه‌گه‌ری وه‌هایه‌…ده‌بوو له‌ ژماره‌ی پاشتر هه‌م پۆزش بهینرایه‌ته‌وه‌، هه‌م داوای لێبووردن له‌ گۆشه‌یه‌ک له‌ گۆشه‌کاندا له‌ ئێمه‌ و له‌ خوێنه‌ران بکرابایه‌..
 ئاخر عه‌زیز م..
 رۆحی وه‌رزشی و ئسۆڵی رۆژنامه‌گه‌ری وایه‌……..
 
  سابیر سدیق
  سوید
 1دیسه‌مبه‌ر2008
 
      
 *بڕوانه‌ ره‌خنه‌ی چاودێر ژماره‌ 141ل5 وێنه‌ی من له‌بری سابیرره‌شید دانراوه‌
 *( چاوه‌کانی ره‌خنه‌ی چاودێر )…نامه‌یه‌کی ئاساییه‌ بۆ سه‌رپه‌رشتیار و هه‌فته‌نامه‌ی ره‌خنه‌ی چاودێر..
 

Previous
Next

Leave a Reply