Skip to Content

Friday, March 29th, 2024
چ شێخێكى پیر بوویى سەرسەكۆكانى ئازارین …؟!!…  ئاسۆ قادر

چ شێخێكى پیر بوویى سەرسەكۆكانى ئازارین …؟!!… ئاسۆ قادر

Closed
by February 8, 2008 ئەدەب

 لە پارشێودا بەخەبەرهاتین
 بەیانیشیان پىَ ناشتین و
 ماڵئاوایمان لە ئێوارە پىَ نەكرا
 دەرگای نیشتیمانە ساردوسڕەكەیان
 پىَ داخستین و
 كلیلەكانیان بوَ هەتا هەتا وونكرد
 هێشتا دەستێكم لە نوسینەوەى
 ئەوەڵین لیقا نەبۆتەوە
 پایز هەرچى گەڵاى عومرى دەستەكەى ترمە
 هەڵیوەراند
 هێشتا چۆڕاوى گوێسەبانەى ئەم
 ناحاڵى بوونە
 دەفرى حەقیقەتێكى پڕ نەكرد
 بومەلەرزەیەك بەڕەهێڵێك
 پەشۆكاوییەوە
 خەرمانێك ترسى بەخشى و
 تۆفانێك خەمى داینىَ
 پەپولەیەكین بەروارى لەدایكبونمان
 لەنێوان دوێنێیەكى بەتەمەن و
 ئەمڕۆیەكى ناحاڵى یە
 ئێمە ڕوَمانێكى خوسێنراوین
 چیدى لەنێو ڕوحمان  جێگەیەكى ووشك شك نابەین
 تاسەرەداوى چیرۆكێك بگێڕینەوە
 باخەلًَمان پڕە لەسەرگوزشتەى دۆڕان
 لەپى دەستمان پڕەلەتەفسیركردنى ئێوارەكانى مایەپوچى
 وەلىَ كەزیندەگى جێى هێشتین بووینە
 گابەردێك و
 لەبەرزترین لوتكەى عەسرێكى جێماوا
 تل بوینەوە
 ئاى…چەندە بابردەڵەین
 هەرچەند ئەكەین
 بەرگەى كزەى ئەم هەموو كۆستەى سەرشۆستەكانى شار
 ناگرین
 لۆمە مەكەن
 خەون زاكیرەمانى كردە پەیكەرێكى بىَ ڕوح
 هەرچەندمان كرد
 كەشفى ئەو ڕۆژگارەمان پىَ نەكرا
 كەسەرێكى لاى سپێدەكانى كۆستە و
 ئەوى تریانى لاى ئیوارەكانى خەجاڵەتى
 ئیدى هەرچى وشەى ناوزارى قەسیدەكانى نیشتیمان بوو
 لەتاوبۆن دەمى جۆگەلە وشك بوەكانى ئەسەفێكا
 یاخى بوون
 وەك ئەوكۆترشینكانەى زەمەنێك بوو
 لەسنگ وبەرۆكى منارەكانى دڵنەوایى نەدەبونەوە
 ئیدى لێرەوە بەفانۆزى دڵشكاوى
 كەلاوەكانى تەنهایى تەیئەكەین
 بەئەدرەسێك پەشۆكاویەوە بۆ
 كۆڵانەكانى مناڵى ئەگەڕێین
 كەچى ڕێگرەكانى گەورەیى مۆڵەت نادەن
 هەرچى بوكەشوشەیە هەبوو
 لێیانسەندین و
 مەدالیایەكى قەتران لە نائومێدیان پێبەخشین
 ئێرەیەك قاتى لەسڵاو
 قاتى لەوقومە ئاوانەى تینوێتى ئەشكێنن
 بەم مەرەكەبە جەحێڵەوە
 حەرفە بریندارەكانى ئەسەفێك
 ئەنوسین
 چ سەیرە لەمەدرەسەكانىئەم ئاواییە فێرى نوسینى
 كێلى گۆرو شكاندنى ئینجانەكان بوویین
 هەمووڕۆژىَ مامۆستاكەم لەتیانوسى ئەم دوو وانەدا دەینوسى :
 بژى ڕۆڵە بەئومێدى شكانى سەدان ئینجانەى گوڵ ونوسینى سەدان كێلى گۆڕ
 هەنوكە
 لەسفرترین كاتژمێرەكانى عومراین
 لەئەوەڵین لەحزەى جەنگداین
 جەنگێك بەسڵاوى گوڵ و
 بەبەردە فڕكەى مەراق دەستى پىَ كرد
 لەسەروبەرى دونیا ناگەین
 زەمەن بە زمانىَ ئەدوىَ و
 ئێمەش بەزمانىَ شین ئەكەین
 ئەو لەكامڵبونى بێزارە
 ئێمەیش لەهەرزەیى عومراین
 بوینەتە حاكمى بەردەم ئاوێنەكان
 ببورە….. زەمەن
 بەدواى دەرەفەتێكا وێڵین
 بمان باتەوە
 قەراغى ئەوەڵین ئەونیگایانەى
 كەبەوتەوێڵى سەحرایەكا
 جێمان هێشتبوون
 چەندە سەیرە ئەى زەمەن
 دەمانبەیتەوە بەردەم ئەو دووڕیانەى
 غەم گەورەترەلەئاسودەگى
 دڵشكان عەزیزترە لەوەفا
 ماڵئاوایى سەخترەلە دیدەنى
 ئاوەدانى بێدەنگترەلە تەنهایى
 ئەى زەمەن
 كوا گوناهى ئێمە یەكسانە بەگوناهى
 عەوبوسەكانى مێژوو
 كەلەنێو گەوڕێكى ڕۆژگارا
 واژوَیى فەوتانێكى ئەبەدى ئەكەن
 بەزمانەڵاڵەكەى
 دەكەوێتەخوێندنەوەى ئەودێڕەى
 كەپەپولەبەگوڵ ئەڵىَ :
 "ببورە لەزومى چاوت وون ئەبین هەرچى بىَ ماناییە لەخۆمانى هەڵئەوەرێنین
 تكائەكەین بەئامانەت تەواوى حورمەتمان لێرە دەشارینەوە"
 ئاى خودایە
 كۆڵانە نەما
 نیشتیمانە بردیان
 مێژووە جێگەى ئەرشیف كردنى ئازارەكانى نەما
 ئیدى بەچ دیقەتێك بكەوینە ئەزبەركردنى
 یاداشتەكان
 كەلەنێوان زەردەخەنەیەكى پەشۆكاووگریانێكى تولانى دا
 بۆنى مردنمان لىَ دىَ
 مردنێك كە لەدواهەمین فرسەخدا دەبێتە خەڵوەتگایەك و
 هیچى دى
 ئیدى چۆن بتوانین ئەى زەمەن
 بمانەوىَ بەئیملایەكى سەقەتەوە
 ئەدرەسىَ لەڕووناكى وەرگرین
 تا تولەڕێكانى مەحاڵ بدۆزینەوە
 تۆیەك بەدواى ئەو كاتژمێرەدا وێڵى
 كە چەندوەرزێكە
 بۆ مشتىَ ئۆقرەیى ئەگەڕىَ
 ئێمەیەك
 سەدان ئێوارەیە
 لە چاوەڕوانى بەختى خۆمان ئەگەڕێین
 تۆ ئەى زەمەن دەڕۆیت و
 ئەو ناگەڕێتەوە
 چ كەسیرەبونێكە
 شكڵمان لەو قاموسە پیرەئەچىَ
 كەبەشى سەفەرێكى پىَ نىیەبۆ ڕێنمونى
 چیدى ناتوانین
 لەباوەشى ڕوحا موحیبەت گەورە كەین
 بۆ ئەوەى ژیان
 لەپیاڵەى ئاسودەیى بخۆینەوە
 ئەى زەمەن
 زیندەگى بە چىیەوە خەریك بكەین
 كەلەسەردەمەكانى جەنگا
 زمانمان پژا
 بوینە پاڵەوانى نێو سەنگەرەكان و
 تەنها سیرەى مەرگ ئەگێڕینەوە
 هەرچى جوعبە هەبوو
 پڕبوون لەستویى نوشستى
 هەمووڕۆژىَ
 سەربەباخچەكانى وەهما ئەكەین
 جگەلەوەرینى گەڵاكان
 هیچ شتێك دڵمان خۆش ناكەن
 ئاى …پەشیمانى
 هێند لەتونێلەكانى تۆوە
 ڕوانیمانە مەشهەدەكانى گوناه
 ڕایەخى خانەقاكانى سكونەتیش
 بۆنى تاوانباریان لىَ دىَ
 ببورە …زەمەن
 بڕیار بوو وەك پەپولەبدوێین
 بۆ ئەوەى جوانى گوڵ نەشێوىَ
 بەڵین بوو
 زمانى مناڵى وون نەكەین
 بۆ ئەوەى قۆقزانە پیر نەبین
 كەچى بەم هەموو سوێندەوە
 كەوتینە چاڵى گومانەوە
 نەمان توانى
 ئەى زەمەن ..ئەى زەمەن
 
 
                   
Asoqadr85@yahoo.com
 

Previous
Next
This site is registered on wpml.org as a development site.