Skip to Content

Sunday, October 17th, 2021

ڕه‌نگاڵه‌كانی‌ دره‌ختی‌خه‌یاڵ‌

Comment
by February 5, 2011 ئەدەب

(1)             
به‌په‌یژه‌ی‌ ئه‌ندێشه‌دا كه‌سه‌ر ده‌كه‌وم     
ڕامان مشتێ‌ ته‌یره‌, له‌ڕێگه‌وبانه‌كانی‌ دره‌خت,     
ڕامان له‌وه‌ڕگه‌ی‌ مانگه‌ له‌چیمه‌نی‌ ئاسمان,
ڕامان حه‌وانه‌وه‌یه‌كی‌ زمانه‌وانییه‌,
ته‌سلیم بوون به‌باران,
ئیكمال بوون به‌چه‌تر
چه‌ند شكانه‌ په‌یژه‌ی‌ ئه‌ندێشه‌م

(2)
چ هه‌رایه‌كه‌ قه‌فه‌س؟!
له‌فڵچه‌ی‌ ئه‌م ده‌ستانه‌وه‌ غه‌ریزه‌دڕان
مه‌له‌كان نۆته‌ی‌ كلكیان ده‌فرۆشن
تابگه‌نه‌ ڕاكردنی‌ گیا… له‌مه‌رقه‌دی‌ په‌رداخێك ئاو
تاڕاكردنی‌ ڕووناكی‌… له‌ ئێواره‌یه‌كی‌ كوژرا‌و
تاتیرۆركردنی‌ ژنێك له‌سه‌رپشتی‌ (با)‌و
ده‌نگدانه‌وه‌ی‌ پێڵاوه‌كانی‌ له‌تۆفانی‌ ڕۆح,
تاپیربوونی‌ ڕه‌نگێك له‌په‌ناو په‌سێوی‌ هێشووه‌به‌رد
چه‌ند فولكه‌یه‌كی‌ زیره‌كه‌ قه‌فه‌س…!!   

(3)
كچێك له‌بێستانه‌كانی‌ خۆزگه‌یا
شه‌مامه‌كانی‌ شه‌ڕده‌كه‌ن له‌گه‌ڵ‌ گه‌ڵای‌ قژیا
كه‌پشوویه‌كی‌ په‌مه‌یش سه‌ری‌ لێئه‌دا
وه‌سوه‌سه‌ی‌ ڕاهیبه‌یه‌ك ده‌ڕژێ‌
تاحه‌شر نه‌عله‌كانی‌ نه‌زۆك
تا ئاوسانی‌ شه‌ڕ راِبێعه‌ی‌ عه‌ده‌وی‌…!!

(4)
هێڵێكی‌ دووكه‌ڵ‌ ده‌مباته‌وه‌ بۆ
به‌هه‌شتێك له‌ئاگرو
به‌نێرگزییه‌تی‌ پیاوێكدا موڕاجه‌عه‌ ده‌كه‌م
غیره‌تی‌ ده‌پێچێ‌ له‌سوچی‌ سیگارێك‌و
دووكه‌ڵێك دروست ده‌كا له‌به‌ژنی‌ ژن…!!

(5)
چ واتایه‌كی‌ هه‌یه‌ مردن
هێشتا له‌زیكرێك نه‌گه‌ڕابوومه‌وه‌,
كاتژمێرێك سروتی‌ ئه‌و گه‌لایانه‌ی‌ ده‌خوێند,
بولبول ده‌چوویه‌وه‌ سه‌ر سوتوی‌ چه‌هچه‌هه‌
چ  ئیعتیرافێكه‌ مردن
ڕه‌شه‌باله‌ په‌پوله‌كێشانی‌ هه‌ر نه‌فه‌سێكییا,
چاوه‌ڕوانه‌ بۆ ژووانه‌ نه‌رمه‌كانی‌ چرا..!!

(6)
مناڵیم تابلۆیه‌كه‌ سوریالی‌
له‌ناو ئاوێنه‌كانی‌ ئاسماندا دانیشتووم‌و
مه‌سیح به‌مه‌عریفه‌ی‌ خاچه‌وه‌ نووچ ئه‌دا…
له‌سه‌ر فه‌رشی‌ هه‌ورا, ئایه‌تێكی‌ كریستاڵیم‌و
له‌بیره‌وه‌ری‌ بووكه‌ شوشه‌كانیشه‌وه‌,
نزیك به‌مه‌له‌ كوته‌كانی‌ خوا
كه‌ به‌قه‌ده‌ری‌ گه‌وره‌بونیشا ده‌ڕۆم
گوزه‌رێك ده‌كه‌م به‌كوچه‌ شه‌یتانییه‌كانی‌,
خه‌تاو خیانه‌ت‌و خه‌مۆكی‌,
له‌نه‌سته‌ شه‌قامه‌كانی‌, سمێڵی‌ سلڤادۆر دالی‌….!!

(7)
من گرێ‌ی‌ پرسیارێكم كرانه‌وه‌م مه‌حاڵ‌
چوون چنینی‌ سێوێكی‌ سوور,
له‌ده‌ماری‌ (با)
جوتبونی‌ گوڵێك له‌ڕۆشنبیری‌ مه‌رگا
چوون ڕاخستنی‌ دره‌ختی‌ خه‌یاڵ‌
له‌حه‌وشه‌ی‌ بیابانا

(8)
په‌نجه‌ره‌ یانی‌ بینین
له‌ناو هه‌ناوی‌ هه‌موو هاوینێكدا
جووتێك جزمه‌ی‌ زستان
له‌ناو له‌پی‌ هه‌ر ستیانێكدا
دووپرته‌قاڵی‌ مناڵ‌…
له‌ناو گه‌نجی‌ چه‌مێكیشا
پایزێك به‌خه‌به‌ردێ‌
گۆچان چرۆده‌كا له‌ده‌سیا…!!

(9)
كه‌ كوێر بوون پێده‌گا,
ڕیشۆڵه‌یه‌ك له‌بازگه‌كانی‌ گه‌رمادا ده‌چه‌قێ‌‌و
شاعیرانه‌ له‌خه‌وی‌ به‌فرا
موویه‌ك ماڵ‌ چێ‌ ناكا
په‌لكه‌ گیایه‌ك له‌مه‌غریبدا سێبه‌ر ده‌باته‌وه‌ سه‌ر چرپاو
عاریفانه‌ گوێ‌ له‌فێنكایی‌ به‌یانیه‌كی‌ هاوین ناگرێ‌
ڕه‌شه‌بایه‌ك پیرێتی‌ تاچاوه‌كانی‌ چووه‌‌و
حه‌كیمانه‌ به‌گه‌ڵایه‌كی‌ پایز ناڵێ‌ سڵاو…!!

(10)
كه‌عیشق نابووت ده‌بێ‌
ده‌ریا دوا سه‌فه‌ر ئه‌كاو
خۆرنشین دواجگه‌ره‌یه‌كی‌ پیره‌ ده‌یكێشێ‌
ته‌وار مه‌مكه‌كانی‌ شاخ جێدێڵێ‌‌و
ئازارێكی‌ قه‌دباریكیش
ئێلاخی‌ خه‌یاڵه‌كانی‌ ڕاو ده‌كا‌و
سه‌ڵای‌ باڵه‌كانی‌ سندم….!!

(11)
سۆفیستێك تێكه‌ڵاوه‌ به‌ڕۆحی‌ خواو
كاسێك شه‌راب له‌مه‌كته‌به‌ی‌ په‌نجه‌كانیا ده‌له‌رزێ‌
ئه‌وه‌ چه‌كه‌ره‌ی‌ فڕینه‌ عیرفان
له‌ڕه‌زی‌ باڵێكدا ده‌بزوێ‌‌و
ناچێته‌وه‌ سه‌ر ده‌نكۆڵه‌كانی‌ ترێ‌…!!

(12)
بێ‌ دۆستی‌ ڕه‌هابوونم به‌ر ئه‌داته‌وه‌
نه‌گه‌مه‌ تۆ ئه‌ی‌ حكومه‌تی‌ عیشقم
سۆمای‌ ده‌نگم سوا,
سه‌تڵێك ته‌ماشام خه‌رج كردو
مامه‌ڵه‌م كرد سه‌به‌ته‌یه‌ك وڕێنه‌…
ئه‌ی‌ حوكمه‌تی‌ عیشقم له‌كوێوه‌ بگه‌مه‌
كڕینی‌ شه‌ره‌فی‌ هه‌نار,
له‌حكومه‌تی‌ باخچه‌…

(13)
حه‌بیبه‌ شیعرێكم پڕم له‌قافیه‌ی‌ چاڵ‌‌وچۆڵ‌
بی‌ نالییه‌ زه‌مه‌نم
وه‌زنم ناچێته‌وه‌ سه‌ركێشی‌
كه‌شم‌ونه‌شم‌و
په‌رجۆی‌ په‌ندو
فواره‌ی‌ فه‌لسه‌فه‌و
مه‌كۆی‌ میناتۆر…!!

(14)
له‌ئاوا بوونێكدا هه‌رچه‌ند ده‌كه‌م هه‌ڵنایه‌م
وه‌ك بیره‌وه‌ری‌ گه‌ڵایه‌ك
كه‌ هزری‌ ناچیزه‌ی‌ ناچێته‌وه‌ سه‌ر
نوكته‌ مێخۆشه‌كانی‌ باخچه‌
وه‌ك رۆژێكی‌ پیره‌ زستان
پێڵاوه‌كانی‌ لێ‌ی‌ ده‌چۆڕێ‌
وورده‌ عه‌سرو قوڵپی‌ ئێواره‌…!!

(15)
هه‌میشه‌ له‌سبه‌ینێ‌ ده‌ترسم
خه‌یاڵ‌ ده‌یكێشێ‌
كه‌ده‌چێته‌ پاڵتۆ هه‌رزه‌كانی‌ زه‌مه‌ن‌و
ده‌ستی‌ ده‌خاته‌ سه‌رشانی‌ ده‌قیقه‌‌و
جانتاكه‌ی‌ پڕده‌كا له‌قوڵایی‌ عاتیفه‌
ئه‌وه‌ گه‌له‌رێكی‌ حوزنه‌,
ڕوومه‌تی‌ پێكه‌نین به‌دوای‌ خۆیا ڕائه‌كێشێ‌

…!!

كه‌شم‌ونه‌شم: له‌نجه‌ولار         

 

ڕۆژ هه‌ڵه‌بجه‌یی

rozhhalabjay@yahoo.com                      

Previous
Next

Leave a Reply