Skip to Content

Thursday, March 28th, 2024
گرمەی مەرگ!…. دارا ئەحمەد

گرمەی مەرگ!…. دارا ئەحمەد

Closed
by June 12, 2012 هۆنراوە

 

 
هێشتا لە پشتی بابیشم نەمەییبووم
زڕەی زنجیری نەریتم هاتە بەر گێ
                کە دەستی داکم پساندی!*
   *    *    *
گرمە و شریقەی ئاسمانان..
گرمەگرمی زەمین لەرزە..
دەنگ و گرمەی داڕووخان و بەریەککەتن..
گرمەی تۆپان
کە لە پەنات زرمەیان دێ و داتدەبێژن…
گشت گرمەکانم بیستبوو
وەلی هیچ یەک
وە قەد گرمەی مەرگی دایۆم نەیهەژاندم!
   *    *    *
مەرگی هاوڕێ و هاودەمانم
       مەرگی خزم و ناسیارانم
             مەرگی هەرچی مرۆڤ هەیە
             پڕ لە سفتوسۆنە لەکنە من
وەلی هیچیان..
هیچیان هێندەی مەرگی دایۆم بە سۆ نەبوون!
   *    *    *
هەر لەو گۆڕەی بە تاراوگە ناوی نابەن؛
تێکڕای رێکان – رێ و بزنەڕێ –
     وە دڕکەزیی زەرد و کەسک
        وە گوڵی زەقنەبووت تەنرابوون!
دوا پەنای من
ئاسۆی ئاسمانی بەرین بوو
       رۆشناییەکانی دایۆمی لێ ببینم..
وەلی لەوێش
لە جێی کوڵمە توند و تورت و سۆرەکانی
               تەنێ تارمایی و تەمتومان..
لە جێی چەخماخە و ئاورینگی ژێر پایانی
        دیسان هەر تەنێ تارمایی و تەمم
                                     دیتن!
   *    *    *
هێشتا لە پشتی بابیشم نەمەییبووم
زڕەی زنجیری نەریتم هاتە بەر گێ
                کە دەستی داکم پساندی!
تکایە یاران لێممەگرن؛
      جەرگ و دڵم هەڵپڕووکان
               کە مەرگی داکم گرماندی!
__________________________________
* چەند بەختەوەرم ئەمن کە کوڕی (خوچێ میرزا)م؛ ئەو ژنە بوێرەی لە پەنجاکانی سەدەی رابردیی بە دەستبەردان لە هاوسەرە نابەدڵەکەی و هەڵبژاردنی بابم.. کۆنەپەرستیی دینیی لە بن پێی خۆی نا و دابونەریتە پیاوسالارییە دڕندانەکەی ئەو سەردەمی تێکوپێک شکاند! بە دەیان جار بە چاوانی خۆم دیتیتم کە داکم لەتەک بابم – کە هەردەم قاچاغ بوو لە دەسەڵاتداران – دەچوونە هەر جێیەک دەمانچەکی لە بن بەرباغەڵی کراسە شۆڕە کوردەوارییەکەی لە کەلەکەی خۆی دەبەست و بە چەندین جێی پڕ مەترسییداری وەک بازگەکانی رژێمی گۆڕبەگۆڕی گۆرینێ تێدەپەڕین. سڵاو لەو ژنانەی کە دەتوانن لە پێناو ماف و ئازادییەکانی خۆیان وەک داکم ئازا و جەربەزە بن.
 
٧\٦\٢٠١٢ – لەندەن
daraehmed@yahoo.com

Previous
Next
This site is registered on wpml.org as a development site.