Skip to Content

Thursday, March 28th, 2024
به‌راتی مردن…. عومه‌ری حاجی ده‌ربه‌ندی

به‌راتی مردن…. عومه‌ری حاجی ده‌ربه‌ندی

Closed
by March 2, 2008 ئەدەب

                      ده‌رگا ئاوریشمیه‌کانی چاوت بخه‌ سه‌ر پشت
                                   خونچه‌ی لێوت بکه‌ره‌وه‌
                                       شه‌تڵه‌ نیگایه‌کم
                             تامم له‌ تامی برژانگه‌کانت خۆشتره‌
                                  شاباڵه‌کانی بینینم لێ که‌وتووه‌
                               ده‌سته‌کانم به‌ مناره‌ی هه‌ورێکه‌وه‌
                                  له‌ دوای دوعا به‌جێ ماوه‌
                                          هاتووم….
                                 له‌سه‌ر شا چڵی ناسکیت
                            هێلانه‌یه‌ك له‌ په‌ڕی ماچ چێ بکه‌م
                                به‌ مردوویش قبوڵــــــم که‌
                               با له‌ تابووتی ته‌نهایتدا ڕاکشێم
                           ته‌نها ده‌سکێك له‌ سێپه‌ڕه‌ی عه‌شق و
                                ته‌ڵانێك ته‌مه‌نم مـــــــــاوه‌
                         به‌ڵك و پایز له‌ وه‌رزه‌کانی دڵی تۆدا
                        له‌ودیوه‌وه‌ په‌یڤه‌کانی هه‌ڵوه‌رین بخوێنێته‌وه‌و
                                   ئه‌م فرمێسکه‌ ته‌ڕانه‌م
                        له‌سه‌ر ته‌له‌زمه‌ به‌رده‌کانی پێکه‌نین هه‌ڵخات
                                          هاتووم….
                       سێوی گوناهه‌کانت له‌ چه‌می لێوما بشۆمه‌وه‌و
                                   پاڵتۆی حه‌سه‌ناته‌کانم
                             هه‌ڵکێشمه‌  باڵێ بێ ده‌ست نوێژت
                                     تا به‌ پێی خۆت و
                                به‌ گۆچانی باڵاڵوکی شیعره‌وه‌
                                  بڕۆیته‌ به‌هه‌شتی عه‌شق
                         ئه‌ی پیرۆزترین کڵێسای میهرو سه‌عاده‌ت
                             گواره‌ی زه‌نگه‌کانت بکه‌ره‌ گوێم
                                     با وه‌ك قه‌له‌نده‌رێك   
                             سه‌ر بکه‌م به‌ دوا ماڵێ خه‌ونه‌کانما
                                 به‌ڵك و له‌ سوچێکی ڕۆحتا
                              مۆمێکی نیوه‌گیانم به‌ پێوه‌ بوه‌ستن و
                               کونه‌ تاریکه‌کانی شمشاڵی به‌ختم
                            پڕبنه‌وه‌ له‌ نوور و ئاوازی گوڵچنین
                              به‌ڵك وله‌ نێو دڕکه‌زێی تۆڕه‌یتدا
                            کارژی ژانه‌ ئه‌ستوره‌کانم فڕێ ده‌م
                                          ئیتر ئه‌مه‌
                                   دوا لیمۆی ترسی ته‌نهایمه‌
                            ئه‌مه‌ بنبۆڵێ ترێی ئێوارانی غوربه‌تیمه‌
                       ئه‌مه‌ دوا مه‌ڵۆی قاچ بڕاوی ده‌می داسی زه‌مه‌نه‌
                               ئه‌مه‌ دوا چرکه‌ی ئاوابوونی خۆره‌
                                  له‌ گوڵۆبه‌ڕۆژه‌کانی هیوام
                                    یان له‌ وه‌ردی ته‌مه‌نتدا
                              بمکه‌ باخێکی چڕ له‌ خۆشه‌ویستی و
                            له‌ شوڵی ده‌ستی عه‌زابه‌کانی ته‌نهایی
                                      په‌رژینێکم بۆ بکه‌
                                               یان
                                 له‌ ده‌فته‌ری یادگاری دڵتا
                                          وه‌ك په‌پووله‌
                         به‌سه‌ر لاشه‌ی ئه‌م به‌رواره‌دا پانم که‌ره‌وه
                                     با له‌م به‌راتی مردنا
                                      رۆحمت بده‌مێ و
                                 له‌ ته‌نیشت ئازاره‌کانته‌وه‌
                                        حه‌شــرکرێم
                                 
                      
                      
                   عومه‌ری حاجی ده‌ربه‌ندی
                     ئه‌ڵمانیا/نۆیس…10.1.2008     

Previous
Next
This site is registered on wpml.org as a development site.