Skip to Content

Friday, March 29th, 2024
به‌رگه‌ ناگرم … به‌ندی عه‌لی

به‌رگه‌ ناگرم … به‌ندی عه‌لی

Closed
by September 25, 2012 ئەدەب

 

 

 

به‌رگه‌ی هه‌موو ده‌ردێ ده‌گرم

ته‌نیا فیراقی تۆ نه‌بێ

ئاخر ژیان

چ حیکمه‌تێکی تیا ده‌بێ

ئه‌گه‌ر تۆ به‌قامکی میهر

سازی ڕازی دڵ نه‌ژه‌نی

ئاخر به‌یان

چ ڕه‌ونه‌قێکی وای ده‌بێ

که‌تۆ له‌گه‌ڵ

هه‌موو به‌یانی باشێکا

به‌کامی دڵ .. پێنه‌که‌نی 

به‌رگه‌ی هه‌موو خه‌مێ ده‌گرم

خه‌می لانه‌و .. خه‌می نان و

خه‌می شوناسی ئینسان و

خه‌می ماندوبوونی دڵ و

خه‌می هه‌ڵوه‌رینی گوڵ و

خه‌می دۆستی بێ په‌یمان و

خه‌می کۆستی نیشتمان و

خه‌می کۆچ و خه‌می دووری

خه‌می بێده‌نگیی مه‌جبووری

خه‌می سه‌خت و خه‌می سان و

خه‌می ده‌هری بێ ئامان و

هه‌موو جۆره‌ خه‌مێکی تر

ته‌نیا هه‌ر ئه‌و خه‌مه‌ نه‌بێ

گوڵم ، تۆ خه‌مێکت هه‌بێ

به‌رگه‌ی هه‌موو ژانێ ده‌گرم

ژانی زه‌مه‌ کوێره‌کانی

مرۆڤه‌ بێ مروه‌ته‌کان

ژانی غه‌دری هاوڕێی سه‌فه‌ر

له‌پاییزی متمانه‌یاو ژانی دیه‌م

به‌بینینی قه‌باحه‌ته‌کانی ژیان

ژانی دوپشکی نه‌داری

له‌جه‌نگه‌ڵی ئاژه‌ڵه‌ دڕنده‌کانا

ژانی به‌با چوونی هه‌موو

پووشی ڕه‌نجم

به‌هه‌ڵدانی پێکه‌ژه‌هری په‌شیمانی

وه‌ ژانی پێم

له‌ڕۆینما به‌سه‌ر دڕکی ناجاریا

له‌گه‌ڵ ژانی له‌ده‌ستدانی هه‌ردوو چاوم

به‌رگه‌ی هه‌موو ژانێ ده‌گرم

ته‌نیا هه‌ر ئه‌و ژانه‌ نه‌بێ

که‌ڕۆژێ بێ و

ئیتر تۆ .. نه‌هێنی ناوم

به‌رگه‌ی هه‌موو غه‌درێ ده‌گرم

غه‌دری به‌ختی هه‌رده‌م نه‌یار

غه‌دری ته‌ختی والیی زۆردار

غه‌دری ویژانه‌ مردووه‌کان

غه‌دری هزره‌ بابردووه‌کان

غه‌دری دڕکی دامه‌نی گوڵ

غه‌دری ماڵی کردنی ناخ

به‌عورفی سڵ

غه‌دری ئه‌و ڕه‌شه‌بایانه‌ی

په‌پوله‌ له‌خشته‌ ده‌به‌ن

غه‌دری ڕۆژگار .. غه‌دری ته‌مه‌ن

به‌رگه‌ی هه‌موو غه‌درێ ده‌گرم

ته‌نیا هه‌ر ئه‌و غه‌دره‌ نه‌بێ

تۆی لێ نه‌بی

ئه‌و ساته‌ وه‌خته‌ی که‌ده‌مرم

Previous
Next
This site is registered on wpml.org as a development site.