Skip to Content

Friday, March 29th, 2024
بوختان … مستەفا رابەر

بوختان … مستەفا رابەر

Closed
by June 2, 2013 چیرۆک

 

 

 

   هەمزە پیاوێکی هێمن و گران و سەرو ڕیش ماش و برنج ،  چالاک و شارەزا لە کارو پیشەی خزمەتگوزاری ، بێ ئاگا لە داوی ئەو چاوچنۆکەی ڕۆژێک لەڕۆژان چەرمەسەرانەی پێدەکات! .

 سالانێک بوو چایخانەکەی وەکو سعات دەگێڕا! میوانەکانی تێکەلەیەک بون لەخەلکی ڕۆشنبیر و خانەنشین و بێکار و دانیشتوانی گەڕەکە نزیکەکان  .  جگەلە قەندو چای بەیانیان نان و ماست و نۆک و لۆبیاو هێلکەی کولاوی دەفرۆشت .

 هەفتە نەبوو دارو دیواری چایخانەکەی پاک نەشوات ، هەمیشە چای تازەی بەهێل و دارچینی لەدێما بوو ، چوار پێنج سەماوەر و قوری دانسقەو دێڕین و حەوجۆشی لە سەر تاقی قاوەجاغەکەی ڕێز کردبوو ، جام و پیالەو ژێرپیالەکانی پاک و خاوێن بون.

  لە سەرەوەی دەرگا ناڵێکی کۆنی داکوتابو دەزگای تاولەو و دۆمینەی لەپشت سەری دانابون ، لە چارچیوە یەکی کۆندا بڕوانەمەی شەشی سەرەتایی خۆی هەروەها وێنەی کۆمەلێک ئاژەلی کێوی و هەندێک کۆنە تابلۆی رەنگ تۆخ و قاوەیی و دوو سعاتی بەندۆلی بەدیوار هەلواسی بوون ، نەیدەهێشت کەس لەسەر تەختەکان پاڵداتەوە هەر دوو سال جارێک حەسیری سەر تەختەکانی دەگۆڕین ، کەیفی بە میوانی پیس و پۆخل و جگەرەکێش نەدەهات ، ڕێگەی سوالکەری نەئەدا پێ بنێنە ژورەوە  خۆی ئەگەر دلی پێ یان بسوتایە یەک دوو عانەی ئەدانی !! 

 چایخانەکەی وەک شوێنێکی ئارامی بێ قڕەو بڕە لەناو خەلک دەنگی دابۆوە زۆر کەس هۆگری شوێنەکە بون. پیاو هەبو ئەگەر هەفتەی یەک دوو جار سەردانیان نەکردایە وایان دەزانی شتێکیان بزر کردووە .

 هەمزە چەند  شاگردێکی هەبوو ئامۆژگاری دەکردن ڕێزی خەلک بگرن ،دەست و پڵیان پاکو خاوین ڕاگرن خاوو خلیچک نەبن پیاوی دەستو پێ سپیی پەسند نەدەکرد .

ئەگەر یەکیان نەخۆش کەوتبایە یان توشی هەلامەت بوایە دەیناردە مالەوە. 

  پێی دەگۆتن  ئەوەی بتوانی چایخانەیەک بە ڕێک و پێکی بەڕێوە بەری دەتوانی شارێک بەڕێوە ببات !

 زۆر کەس بەناونیشانی وی نامەی بۆ دەهات هەر جارەی پۆستەچی نامەی خەلکی بهینایە ڕێزی لێ ئەگیراو چایەکی بەخۆڕایی نۆش دەکرد! سنوقێکی قەوانی دانابوو ، ناوە ناوە ئامێرەکەی قورمیش دەکرد و قەوانەکانی عەزیزاغا و مریەم و خانی  لێ ئەدەدا ،  ستەم دیدە و بەشمەینەتەکان بەو دەنگە بە سۆزانە قوڕگیان پڕ دەبو لە گریان  .

  خزم و ناسیاو کەلکیان لەهەمزە وەردەگرت لەبەر نزیکی لە سەرا و فەرمانگەکانی میری زۆرجار بۆ شایەتیان دەبرد ، دەیانکردە کەفیل لەگەل خەلک گونجا بوو خۆی کردبوە خەمکی خەمان .  

  ئێوارانیش بەدەستی بەتاڵ نەدەچۆوە ماڵ لەگەل منالەکانی قسەی خۆش بوو بەلام لەکاتی پێویستدا هەندێک خۆی تووند دەنواند ! هەمزە شوێنی کارەکەی لا خۆشتر بوو هەتا ناو مال و منالی ، لەهەردوو شوێنیشدا لەدەستان نە چوبوو ، رقی لە ژنەکەی نەدەبۆوە زوریش بۆی نەسوتابوو! هەر بۆیەش خیزانەکەی هەموو ساڵی بەنهێنی لای شێخ و مشایخ نوشتوی دەکرد بۆ ئەوەی لەبەر دلی حاجی شیرین بیت خوا لێی تێکنەدات بیکاتە سەر بەهەوێ!  حاجیش خوا هەلناگری بەردەوام بێ دلی نەدەکرد ، بەیانیان سەرتوێژی ئەو ماستەی بۆ چایخانەکەی دەیکڕی دەیناردەوە ماڵ . هەمو مەلا بانگدانی ڕۆژانی هەینینش بۆ وسل دەرکردن دەچوە حەمامی دەرەوە. 

 شەوان لە ناو جێگا  بۆ ئەوەی شتی لەبیر نەچیت بە زنجیرە ووردە کاری ڕۆژی ڕابردوی  دەهێناوە بەرچاو ! چی گۆتوە  ، چی کردووە ، کێ هات و کێ ڕۆیی. هەندێجار خەوی لێ دەزڕا ، چاوی نەدەچووە خەو ، بیری دەکردەوە ئەگەر خوا لێی تێک نەدا لەئیشەکەیدا سەرکەوتوە ڕۆژانە چایخانەکەی جمەی دێت دەبی لەئایندەیەکی نزیکدا نوژەنی بکاتەوە فرەوانتری بکات ، ناوە ناوەش ئەگەرو مەگەرێک لە مێشکی ئەدا دەیگۆت خەلکانێک هەن چاویان بە شتی باش هەلنایەت دەترسا بەغیلی پێ ببەن . وا لە مێشکی چەقیبو ڕاستگۆیی و جوامێری لەناو خەلکدا کز بووە ، مرۆڤی باش لە کورتی داوە ئەگەر هەشبن بێدەستەلاتن  خراپەکان خراپتر بونە ، فرە خەلک بەرەو خراپی خلیسکاوە .

   عەلی خەوخۆش گەنجێکی ڕەشتالەی خوین گەرمی دەروون پاك و بێشەرم هێشتا بەرژەوەندی تایبەتی لغاوی نەکردبوو ، هەمیشە بەر لە هاوڕێکانی دەگەیشت و یەکسەر بەرەو قوژبنی لای بنەبانی چایخانەکە هەلدەکشا ، هەر دانیشتبا  سیغارێکی دا دەگیرساند مردووی چای گەرم بوو هەرچەند ئامۆژگاریش کرابو کەچای گەرم و جگەرە قورگ دەسوتێنیت و توشی شێرپەنجەی دەکات ، هاوڕێکانی دەهاتن لای ئەو سەری خۆیان پێکەوە دەنا هەر خۆیان دەیانزانی باسی چی دەکەن ! ناوە ناوە گلەیی لە بەختی خۆی دەکرد  دەیگۆت دڵم توندە ، پێشبینی ڕوداوێکی مەزن دەکەم !

ئەو لەبێ ئیشیان خەریکی شیعر نوسین بوو ، بە قسەی خۆی هەول ئەدا بە هونراوەو هەلبەست  ویژدانی مرۆڤە سپلەکانی کۆمەلگا ڕاهەژێنیت و مشتو ماڵیان بکاتەوە ، قوچەکان بۆ سنووری چلێسایەتی خەلکی بێویژدان دابنێت !!  ڕۆژانە چەند کاتژمێرێکی لە کاتی بێبایەخی خۆی لە چایخانەی مام هەمزە دەکوشت . 

 عەلی  سەبارەت بەوەی بۆرە خزمایەتیەکی (کەرو مشکی دان)ی لەگەل هەمزە هەبوو جارو بار خۆی لە قسەکان هەل دەقورتاند ئەگەر گوێی لە پستە پستێک بوایە  لاوو نیو پرسیاری دەکرد ،گوێی لێ بوو کەسێک بە دەنگێکی نزم لەگەل حاجی وەناو قسان کەوتوە ، کەپیاوەکە  بۆ لای دەرەوە پێی خوارکردەوە عەلی لە هەمزەی پرسی ئەرێ لەگەل ئەو ڕیشدارەی بەسەر پێوە چای فڕ دەکرد باسی چیتان دەکرد ؟ 

هەر لێی گەڕێ ئەوە دەروێش بەکر بوو  ژانە دلی خۆی باس دەکرد دەیگۆت لە بەیانیەوە بەرامبەر قشلە هەلتروشکاوم هەر چاوێکم کردووتە دوو چاو ، هەندێ ڕۆژ  چوار پێنج ڕاوکەر بە سواری ئاسپ و بارگین و تاژی و تولەوە  بەبەر دەم  قشلەی گەورە دا ڕەت دەبن بارگینە کانیان رێو ڕی تەرس دەکەن ، وولاخی ماخۆمرد چاولێک دەکەن یەکێک بتەرسی ئەوانی تریش دەیکەن. دەلێ دەترسێم جەنابی موتەسەڕیف کە دێتە دەرەوە چاوی پێی بکەوێ بۆیە دەبی خێرا بانگی گسکدەرەکان بکەم مشوری پاک کردنەوەی جادەکە بخۆن .

 دەروێش چاودێری گسک لێدەرەکانی شارەوانی بوو پیاوێکی بالا بەرزی پاک و خاوین بوو مەندیلێکی سپی لەچەک دەکرد دوو بسکی ژنانە و ڕیشێکی درێژو جوانی بەردابۆوە  هەندێ ڕۆژ چاوی بەکل دەڕشت ڕوخسارێکی خواپەرستانەی هەبوو بەئاسانی دەیتوانی خەلک لە خشتە ببات ! .

    عەلی خەوخۆش مژێکی لەجگەرەکەیدا گۆتی لە جیاتی تۆ بام دەمکوتم دەکرد ڕێگەم نەئەدا ناوی کەس لەگەل تەرس و مەرس تێکەل و پێکەل بکات ،  ئەگەر تەنزنوس بومایە قسەو رێخ و تەرسەکانم لێک ئەداو لاپەڕەی ڕۆژنامەیەکم پێ پڕدەکردەوە ! .

  من بەدەست خۆم نیە بەزەییم بەو کەسانە دێتەوە لە گەمژەیی خۆیان یان بە ئەنقەست دیوی دەرەوەیان بە هێماکانی ئایین دەڕازێنەوە ، ئەوانە هەرگیز فریشتەو مەڕی خوا نین بەلکو شوێن کەوتوی نەریت و کلتوری کۆمەلگایەکی سەقەتو دووا کەوتون .

 هەمزە گۆتی  ئەمەیان مەڕی خوا نیە بەشیخۆی سەگە پێرار کە لە زیارەتی مالێ خوا هاتمەوە  بوختانێکی بەدەمی حاجی حەمەدی هاوسەفەرم هەلبەستبو  گوایە لەوێ لەبەر خۆمەوە ناوە ناوە هوڕێنەم کردووە  گۆتومە بەخێر بین خوا بەزیادی کات  دوعام بۆ بە هەڕمێنی چایخانەکەم کردووە !  وایان تیگەیاند بوو ئەو مرۆڤەی بچێتە ماڵی خوا دەبی لەوێندەر عەردو عاسمان بگۆڕیت ! 

       وەکو گۆتم زمانی شڕە  جارێک بەو گوێی یانەی خۆم گوێم  لێ بوو خراپەی کەسایەتیەکی ئەم شارەی دەگۆت : چاوی تێر نابیت هەر خەریکی پارە بۆڵ پەیدا کردنە  بەو تەمەنەی کە عومری پیرە مەڕیکی ماوە باخ و بێستانێکی دامەزراندوە ، گوێزی ساغی دە قورتاندا هاویشتووە هەتا شین بن ، ئەگەر بە قاشۆ و شتلیش بیناشت بایە هەر نەیسەن ، گوێز ڕواندن لایکەم بیست سالێکی دەوێ هەتا بەر دەگریت ، واتە ئەوێ رۆژێ ئەو تێر مردن بووە کاتێ گوێزەکانی خڕەیان دێت .

عەلی سەری باداو  گۆتی دەوەرە تێکەو فڕکە بڵێ گۆفەک! تۆ چێت لە ناماقولی وا داوە حەقت بەسەر خەلکەوە چی یە خۆزیا هەر دزە و یەک درەختی دەچاند ئێستا وولات دەبوو بە دارستانێکی چڕ ! 

 من پێم وایە ئەوەی بەئاشکرا قسەی وا هەلەق و مەلەق بکات  یان نەخۆشە یان پشتی بە دەزگایەک ئەستورە دەیەوێ قسەمان لێ دەر بینیت ، مام هەمزە گۆتی خۆ زمانی خەلک کونە دیوار نیە تۆپە قوڕیکی لێدەیت ، دەبی ئاگامان لە دەمی خۆمان بیت ئەگەر زانیت کەسێکی دەمشڕ ئاوا پاشملە قسان بکات  بوختان بۆخەلک هەلبەستی  دەبی خۆتی لێ بپارێزی من یەک لەباری خۆم پیاوی چەقاوە سوو پەسند ناکەم .

  وازی لێ بێنە  خۆلی بەقسمەت بیت ! دەلێم عەلی گیان زەحمەت نەبیت  ئەگەر ئەم ڕۆژنامەت خوێندەوە فڕێی مەدە پێویستیم پێ یەتی جارو بار تەلپە چاو توێکلە هێلکەی تێ لول ئەدەم ، 

 عەلی: چون دڵم دێت لەم ژمارەیەدا پارچە هونراوەیەکم بلاو کراوەتەوە  ”ئەمڕۆ چاوم بە ڕێگەی دەورو بەری مالی خۆمان داخشاند بە گلێنەی چاو دارو دیواری کۆلانم وێنا کرد هەستم کرد نەبەندم و  نە ئازاد بلێسەی ئاگردانێکم لێ دیارە  ، هەندێ شت لەدلمایە جارێ باسیان ناکەم هەندێکیشیان بڤەیە دەریان نابڕم ، من قارەمانی داستانی ژیانی خۆمم ، هەر گرفتەکانم نین دۆستەکانیشم  سەر وەشێنیان کردوم ، کێ دەلێ ڕابردوی سەقەت بەتۆبە کردن ڕاست دەبیتەوە  کێ دەزانی لەپێچی داهاتوودا چ ڕوئەدات ؟ من بە کۆلێک خەمو خەفەت ئاووسم هەتا کەی هەلیانگرم !

 مام هەمزە: هیچی لێ تینەگەیشتم وەکو گوێزم بۆ بژمێری وابوو!

 عەلی: مەبەستت ئەوەیە بڵێی بۆ بلاوکردنەوە ناشێ  !

 هەمزە: نا ئەوە نیە شیاندویانە ، مەگەر لەم شێرو ڕیویەتدا بەتەمابیت  سەریخۆت هەلگریت ، تکات لێدەکەم بەرلەوەی ئۆغر بکەیت پارەی بیست چاو دە نان و هیلکەمان قەرزاری ،خۆت باش دەزانی بە کاسبی حەلال پارە پەیدا کردن چەند سەختە !

 عەلی هەندێک بەخۆی داشکاوە گۆتی ” مەترسە قەرز کۆن دەبیت بەلام نافەوتێ  ”

چۆن نافەوتێ وەرە دەفتەری قەرزە کۆنەکانم بخوێنەوە ناوی دەیان کەسێ وەکو تۆی تیایە لەو کێوانە سەری تیا چووە هەندێکیان لە زیندان دەناڵێنن بەهەر حال من لای خۆمەوە ئەوەی نەهاتوتەو ئەوەی ناگەڕێتەوە گەردنی خۆش و ئازاد دەکەم !”

 بەردێکی لەسەر دانێ ئەوە دەروێش بەکرە هاتەوە!  

 دەروێش خۆی کرد بەژورا ، وورتە وورتەکی  لەدەم دەرپەری ، هەمزەش بەگاڵتەوە پرسیاری کرد .. ئەرێ دەروێش بەکر، بەزم و ڕەزمی زیکرو حایو حووی تەکیەت دەنگی داوەتەوە ، دەلێم کە زەرگ و مەرگ  دەوەشێنی هۆشت لای خۆتە ؟

  نەخێر!! تەواو وەکو سەرخۆش وام  بەتایبەتی ئەو کاتانەی خەلیفە بەدەستی موبارەکی خۆی  دەف بژەنیت ، چونکە خۆت دەزانی رێشی پان و حایوحوی ئێمە ڕێبازێکە بۆ سەلماندنی هەبونی خۆمان ، ئەگەر بابایەکی وەکو من شتێکی لەم بابەتانەی نەبیت نەخەلک حیسابی پیاوچاکی بۆ دەکات نەکەسیش گوێی لێدەگریت . 

جگەلەوەش  خەلک بەلای خراپی گۆڕاوە لە کوێ کەوچکە شۆربایەکت بەخۆڕایی ئەدەنێ ئەگەر کارێکی چاک یان خراپیان بۆ نەکەیت!

 دەروێش ویستی بابەتەکە بگۆڕی بە تەوسەوە گۆتی حاجی بەیارمەتیت با منیش پرسیارێکت لێ بکەم بێگومان تەمەنێکی درێژە وەکو پەیکەر گوونت بەسەر ئەم کورسیەدا شۆڕ کردوتەوە. ! ئایا لەدەلێ خۆتا ڕۆژێک لە ڕۆژان بیرت کردۆتەوە پیشەکەت بگۆڕی یان واز لێ بینیت ؟  پیاو ئەگەر خۆی کرد بە قیڕو بنێشت ڕەزای گران دەبیت ڕەنگە گەلەکۆمەکی لێبکەن و تەقلەی پێ لێبدەن .  

 ئەم قسە درشتەی دەروێش هەمزەی لە ناخەوە هەژاند تەواو شپرزەی کرد بەسوکایەتیەکەی گەورەی زانی ، یەکسەر تێک گیران و دەستی بۆ  قوتە گۆپاڵە دار کنێرەکەی پشت سەری خۆی برد و گۆتی جارێکی تر ناماقولی وا بکەیت ئەوەی خراپە پێت دەکەم بڕۆ  لێرە نەمینێی بەرچاووم بەردا تەماشایکەن چ شەیتانێك دەیەوێ بەسۆرە سۆر لە بەهەشت وەدەرم نێت ! 

 دەروێش واقیوڕ ما  ! دەتگۆت دارێکیان لە لموزیداوە یەکسەر پاشەوپاش گەڕاوە  گۆتی باشە  لەسەرت ناچیت  بەلام باجاری لەناو دوو نای گەرم دابیت.

 دووای ئەم کورتە شەڕە دەروێش بەلەسەبوو  دور بەدور چاودێری موشتەریەکانی هەمزەی دەکرد دەی ژماردن دەست نیشانی دەکردن هەولی ئەدا بزانی هەر سعاتەی چەند کەس دەچنە چایخانە چەندیش دێنەدەر ، بەمەزەندەی خۆی داهاتی ڕۆژانەی هەمزەی دەخەملاند .

   بیری لە پلانێک دەکردەوە پشتی هەمزەی پێ لە زەوی بدات!  وەکو بەسەرهاتی  دۆشاو فرۆشەکەی لێبکات ، گوایە لەمێژە پیاوێکی خاوەن ڕەز دوو مەشکە دۆشاوی ترێی دەباتە گۆندێک لەبن هەیوانی دیوەخانی ئاغا بەردو ترازو دەئەنێت دووای ئەوەی لەگەل نۆکەری ئاغا  ( دۆشاوەکەیان سەر کرد ) سەربەسەر بەگەنم و یەک بەدوو بەجۆ  بیگۆرتەوە ، حۆقە دۆشاوێکیش بەخۆڕایی بۆ مالی ئاغا بیت !

  دۆشاوەکەی پاک و خاوین بوو هەر لە حەواوە هەموی فرۆشرا پێرا نەگەیت حۆقە دۆشاوەکەی مالی ئاغا گل بداتەوە  ،  بەلام نۆکەرەکە بە خۆی نەوەستا ئەمەی بەپێشێل کردنی دابو نەریتی دیوەخان زانی  یەکسەر دوو سی مێرد منالێ ناردە ناو دێ و هاواریان کرد ئەو دۆشاوەی کڕیوتانە خێرا بەسەر کابرای دۆشاو فرۆشی دابدەنەوە گەنم و جۆی خۆتان وەرگرنەوە چونکە لە بنی مەشکەکان مشکێکی تۆپێومان دۆزی یەوە. 

لەو سەرو بەندەدا مشەخۆرێکی بەناوی کەریم کەشخە دەناسی پێاوێکی تەڕپیری سمیل زل بە زنجیرو سعاتی زێڕ و ئەموستیلە دەست و مەچەکی خۆی دەڕازاندەوە  چونکە بەگەورەیی فیری پلاو خورادن ببو بە بنێشت جوینەوە وەلامی تەلەفۆنی ئەدایەوە.

 دەروێش چەند جار سەردانی کرد بەدورو درێژی قازانج و داهاتی چایخانەکەی هەمزەی بۆ باس کرد ئەوەندە پێی هەلگۆت  ! قازانجەکەی کرد بەقازانجی بیرە نەوت ، وای لە پیاوەکە کرد لیکاوی تەماع و چاوچنۆکی بەدەمدا بێتەخوار بەتەواوی هێنایە سەر ئەو بیرو ڕایەی کە برابەش بن لە کردنەوەی چایخانەیەک  دەوروێش زۆری ڕست لەناو قسەکانیدا  وەکو ئامۆژگاری دەیگۆت خۆت لەمن باشتر دەزانی هەموو ڕۆژی دەرفەتی باش میوان نابیت مرۆڤیش یەکجار دەژیت ئەگەر بە تێرو تەسەلی نەژیت هەر نەژی باشترە.

  بەسەری تۆ نا بەسەریخۆم ئەگەر گوێی بدەینە بەندو بالۆرەی ڕەووشت و لۆمەی خەلک  دەستمان بەهیچ ناگات ، کوڕ ئەوەیە بۆ پارە چاوی خەلک دەر بینیت !

  کەریم کەشخە گۆتی: ڕاست دەکەیت دەبی بوژانەوەی خۆمان لە پوکانەوەی بەرامبەرەکەمان بدۆزینەوە ، یاری یەکی خۆشە بۆ قازانج  بەسەر شانی خەلک و بەسەر ڕەووشت بەسەر ویژدان  باز بازێن بکەین  !

دەروێش بە شاگەشکەیی گۆتی: تەواو ئێستا من و تۆ لێک حالی بوین ، پێچ و پەنای ناوێ بە ڕێگەی ئابڕو مەندانە زەحمەتە پارەی قەبە پەیدا بکرێت.

کەریم کەشخە: دەمخۆش لەبنی هەمبانەکەتدا: پێویستە لەسەر ڕێو شوێنی ئادەمی باپیرە گەورەمان بڕۆین بەقەپێک لە سێوەکە ڕازی نەبین !  چونکە  شەڕو نیوە شەڕ هەر یەکە.

دەروێش : هاوڕاتم دەبی سێوەکە قووت دەین. وا تێبگەم ئەو کارەی ئێمە گوناهێکی زل نیە وەکو دەلێن بەئاوی دەست نوێژ دەڕوات! 

 هەردوو لایان ڕیککەوتن لەسەر ئەوەی هەموو ڕێ و شوێنێک بگرنە بەر بۆ سەرکەوتنی نەخشەکەیان  پارە لە داوود کەلەگاو ڕاپەڕاندنی پلانیش لە دەروێش بەکر . 

  زۆری نەخایاند شوێنێکی فرەوانیان ئامادە کرد ، ڕازاندیانەوە ناوێکی خۆمالیان  هەلبژارد ، وەکو پێش بینی کرابو خەلک ڕوی تێکرد!

   لەو لاوەش چایخانەکەی هەمزە بەخێرایی بەرە و وێرانی دەچوو ، بەرە بەرە گەرم و گۆڕی نەما و موشتەری لێ ڕەویەوە .

  هەمزە هەولیدا چارەسەر بۆ ئەو ڕۆژە ڕەشە چاوەروان نەکراوە بدۆزیتەوە نرخی فرۆتەنیەکانی داشکاند خزمەت گوزاری باشتر کرد ، فایدەی نەبوو وای لێهات ڕۆژانەی یەک شاگردیشی پی دابین نەدەکرا ، سەری دونیای لێ وێکهاتەوە ، زۆر نیگەران  کەسێک نەهات پێی بلێ بۆچی موشتەریەکانی پشتیان تێی کرد.

   دالغەی لێئەدا خۆی دەخواردەوە هیچی لەخۆی شک نەدەبرد ، گوڕو تینی تیا نەما هیوای کز بوو کێشی لەدەستدا ڕەنگ و ڕوی گۆڕا ، نەیتوانی لەژێر باری خەمی دابڕان لەکارو کاسبی و دابڕان لە دۆست و ئاشناکانی خۆی ڕاگری !

نەخۆش کەوت سەردانی چەندین نوژداری کرد هیچ نەخۆشی یان لێ نەدۆزی یەوە پەنای بۆ شێخی گەورەش برد دوعای بۆ کرد نوشتەی بۆ نوسی ، خێرو قوربانیان بۆ کرد هیچیان کاری نەکرد هەستی بە نیشانەکانی مردنی خۆی کرد، بێ هیوا بوو ناوە ناوە دەیگۆت خۆزی بە خۆزیداران ئەگەر مردنیش هەیە مرۆڤی  بلح و سپلە نەبوایە ! حەیف و مخابن ئەو هەموو سەگمە حەساری یەی کردمان بە فیڕۆ دەڕوات .

   بیرەوەریەکانی خورد دەکردەوە قەتماغەی زامەکانی دەخوراند ، ڕابردوی بارێکی قورس بوون بەسەر هەست و نستیدا وای لێهاتبو بە دڵ حەزی دەکرد  باسی هەلەکانی بکات! بەلام جگەلە ژنەکەی خۆی کەس نەبوو گوێی لێی بگریت باس و خواسی تەمەندارەکانی وەبیر دەهاتنەوە ئەوانەی ڕۆژانە لەسەر کورسیەکانی نزیک خۆیەوە دائەنیشتن بەسەرهاتی خۆیان دەگێڕاوە ، هەمزە ئاخی بۆ ئەوان ڕۆژان هەلدەکێشا کە هاوڕێکانی دەورو خولیان ئەدا دەیگۆت حەیف هەموویانم وونکرد ، ناحەقی یە ئەگەر بەڕەوای بزانی وەفای کسۆکان لەگەل وەفایی هەندێ بنیادەم بەراورد بکەی    !

هەندێکیان کە لای هەمزە دائەنیشتن باسی قەدەری خۆیان دەکرد باسی عیشق و دڵداریان دەکرد بەڕاشکاوی دەیانگۆت لەسەر دلداری دارکاری کراوین.

 یەکێکیان دەیگۆت خۆشەویستی بێ گیرو گرفت عیشق نیە ، کەئاوات  هاتە دی عەشق نامینێت! ، عاشق ئەوانەن خۆیان لەناو دەبەن یان شێت دەبن ! 

مەلا غەفوریش هەمیشە دەیگۆت وەللا دونیا جێ یەکی زۆر خۆشە بۆ ژیان ئەگەر مرۆڤ خۆی گیرو گرفت دروست نەکات!  ژیان خۆشە بەلام باسی مردن ناخۆشی دەکات . دونیا تەنیا لەوکەسانە تێک دەچیت کەدەمرن . 

   ئاخرۆ ئۆخری ڕۆژەکانی هەمزە  دژوار بون ، هوڕێنەی دەکرد ”تێر ژیان نەبوم  حەزو ئارە زووەکانم دوو پەلکە نەبون! کاتێکی زۆرم بەفیڕۆ چوو  تەمەنی کورتم مەلەیەک بوو لەگۆمێکی لێخندا هیچم نەدیت هیچم پێنەبڕا .

چی بلێم زیاتر لەوەی فەشەلم هێنا شتێکم نەکرد شانازی پێوە بکەم ئەوە نەبیت شەرمەزاریم بۆ مناڵەکانم بەمیرات بەجێ نەهێشت ڕۆژگارێکی سەختم گۆزەراند ؛ ژایانیش فێری کردم  لەکاتی خۆشیدا هەمو هاولاتیەک لە شارەکەی خۆیدا جێی نابیتەوە !”

 هەمزە قەت ئەوەندە بوێر نەبو قسەی وا بێسنوور بکات بەلام دەلێن مرۆڤ لە سەرە مەرگا لەساتە وەختی گیان سپاردنا تەنیا ئەو شتانە ئەدرکێنیت کە لەدلی دایە و ئەوەندەی بتوانی دەریان ئەبڕیت.

  زۆری نەبرد بوە مردوی سەرجێگا وای لێهات ئەگەر مردن بە پارە بوایە کەس و کاری بۆیان دابین دەکرد پاش ئەوەی ڕەزالەتێکی زۆری کێشا بە داخ و حەسرەتەوە لە باوەشی نائومێدیا سەری نایەوە.

   هەمزە مردو ، کێشە کەوتە نێوان دەروێش و کەریم کەشخە هەرچەند دەروێش لە جێبەجێ کردنی ئەرکی فریودانی خەلک کەمتەرخەم نەبوو ، ڕۆژانە یەخەی موشتریەکانی هەمزەی گرتبوو ، پێی گۆتبون بەداخەوە لەگەل کاری خوا هیچ ناکرێت لەڕاهی خودا پێویستە پێتان بلێم حاجی هەمزە تووشی نەخۆشیەکی درمی ترسناک بووە نزیکی مەکەون خۆتان بپارێزن چونکە هەر تەماشای دەم و چاوی بکەن نەخۆشیەکەی دەگرنەوە !.

بەلام کەشخە نەچوە ژێر باری بەلێنەکە و بەشەریکی ڕانەگرت و گەفیشی لێکرد ئەگەر دەمبکاتەوە بەئاشکرا کردنی بوختانەکەی ڕیسوای دەکات! .

 

 

Previous
Next
This site is registered on wpml.org as a development site.