Skip to Content

Thursday, March 28th, 2024
بێدەنگى بەفر… عومەر جەلال

بێدەنگى بەفر… عومەر جەلال

Closed
by February 22, 2008 ئەدەب

 زەوى بە ئەندازەى دایكێك بۆ منداڵەكەى
 باوەش بۆ ئاسمان دەكاتەوە
 لە چاوەڕوانى بارینى بەفردا
 رەنگى زەرد دەبێت
 بەفر گەڕانەوەیە  بۆ منداڵى
 بۆ ئەو ساتانەى بە تۆپەڵ وێنەى خۆمان  دەنەخشان
 دەتەزین لەناو پەرچووى قەشەنگى دا
 ئاسوودە بووین تا دەركەونتى رۆژ
 دەتواینەوە لەتەك نازى تۆپەڵە بەفردا
 رامان لەبەفر رامان بوو لە بەرگى سپى سرووشت
 ئەوانەى خۆیان دەشاردەوە و لەماڵ نەدەهاتنە دەر
 دژى ئەفسانەى بەفربوون
 ئەوانە رەنگى سروشتیان خۆش نەدەویست
 سەماى بەفر لە ساتى بارینیدا
 چوون گوێگرتن لە مۆزیك وایە
 رووتبوونەوە لەبەردەم بەفردا
 شوناسی عاشقە نەمرەكانە
 بۆنى یار لە بەفر دێت
 بەفر سیماى یار نیشان دەدات
 داپۆشینى شار بە بەفر
 داپۆشینى جەنگە بە ماچ
 كڕێوەى بەفر بەئەندازەى كڕێوەى ژیان
 ئاوێنەى لە ناخدا هەڵگرتووە
 بەفر دیارى ساڵى نوێیە بۆ زەوى
 بەفر تەژییە لە یادەوەرى عەشقى نێوان رۆژ و مانگ
 تەژییە لەسوتاندنى ئەستێرەكان لە دووى یەكدى
 بەفر راڤەكردنى ژیانە بە دەنگى ئاو
 سەماى ئێوارەیە بە رۆحى ئاگر
 لە دڵى هەر كلوە بەفرێكدا
 نیشتمانێك هەیە  وەك (با) بێ شوناس
 لە هاوارى هەر تۆپەڵە بەفرێكدا
 دەنگێك هەیە وەك ئازادى بێدەنگ
 رازاندنەوەى باخچەكان بەبەرگى سپى
 هێمایە بۆ پەرستنى بەفر
 ئاوێتەبوونى بەفر لەتەك دەریا
 ماچى رەهایە بەزمانى ئاسمان
 بەفر هەمیشە بەدووى بەرزى دا دەگەڕێت
 لوتكەكان دەكاتە ماڵى خۆى
 عەشق دەبەخشێتە رۆژ و كپ كپ دەتوێتەوە
 تەماشا كردنى سەماى بەفر
 تەماشاكردنى گەمەكانى منداڵیە لە ئێوارەیەكى درەنگدا
 نووستن لەناو بەفردا
 جەنگە لەتەك ژیانێكى بێهودەدا
 باوەش كردنەوە بۆ بەفر
 باوەشكردنە بە رۆحێكى نهێنى  كەمەرگ نایناسێت
 
 
omerjelal@yahoo.com
 
 

Previous
Next
This site is registered on wpml.org as a development site.