Skip to Content

Tuesday, March 19th, 2024

تابلۆیەك بەبۆنى سنۆبەر بەڕەنگى پایز

Closed
by March 20, 2008 ئەدەب

  دیار محەمەد(باران)…..

 ئێوارەیەك قاچى ڕاكێشا !
 من لەباوەشیا و
 ئەستێرە بۆ باخچەكانى
 هەڵفڕین.
 **************
 باران نقێمەكانى ئەوەرێت !
 ئەشكێت,وون دەبێت !
 بە یانییەك,ئەیدۆزێتەوە
 خۆر پەنجەى بۆ ڕائەكێشێت !.
 ****************
 ژنێك …
 پڕ لەڕەنگ,لەبەیانى,لەتەڕى  !
 ئەیەوێت ..
 كانیەك شیعر لەخۆى بئاڵێنێت .
 ****************
 شیعرێك دەستى گرتوم
 ئەیەوێت خۆى بناسێنێت !
 ناوى بەیانییە و
 پێڵاوەكانى پڕە لەخۆڵ.
 ***************
 كانیەك ڕژاوە !
 نەخۆى كۆدەكاتەوە و
 نە ئەیەوێت بخەوێت !.
 ***************
 تاریكى باخچەى منداڵانە و
 یارى لەسەر فەرشى ئاسمان دەكەن !,
 بە ئەستێرە ڕەنگاو ڕەگەكان .
 ****************
 پەپولە گوڵى باوەشێن كرد !
 كە دڕك لەدایك بوو!
 لەئینجانەدا فێرى فڕین بوو !.
 *****************
 ئاسمان كۆشى پڕە لەئەستێرە و
 نیوەى ڕووت,مەمكێكى دیارە
 پرچەكانى تەڕە,و شیلەى
 مانگى پیا ڕاژوە !.
 *************
 هەور سىَ مانگ عادەتى
 بەگریانەوە گرت !
 لە دواییاندا
 جادەكانى بە سەوز ڕەنگ كرد و
 منارەكانى بە سوور .
 *************
 ئاسمان  گریا
 زەوى باوەشى پیاكرد بەڕوتى
 بەیانییەكیان ژیركردەوە
 ناویان لێنا كچەگەڵا لەپایزدا
 *************
 تابلۆیەك پڕە لەرەِنگ
 ئەڕژێتە كۆڵانەكانى ئاسمانەوە !
 لەڕوناكیدا وون دەبێ و
 لەتەنهایشدا تاریك ئەدرەوشێتەوە !.
 ***************
 لەژیاندا
 هەموو دەرسێك فێر دەبین
 جگە لەمردن !
 چونكە خۆڵ (باج)ەكەى ئەیدا
 نازانین تەوەرەكانى چین !.
 **************
 دەستىَ جل لەنائومێدى مانەوەدا
 بدڕێنە ؟
 تا مانەوە لەپشت پەردەوە,
 ئومێد بڕازێنێتەوە ؟.
 
 لەسەرەتادا ئەمویست فەنتازیا لە بیرەوەریەكانم پێچم
 كەچى تۆش نەتهێشت.
 ببەخشن ئەوەى نووسیومە خەریكە لەمنداڵیم منداڵتر دەبێتەوە
 چونكە ڕەنگەكانم لە كۆكردنەوەدا دەڕژێن
 
 
 

Previous
Next
This site is registered on wpml.org as a development site.