Skip to Content

Friday, March 29th, 2024
دە فیگەر لەنێوان خۆكوشتن و ژیاندا!

دە فیگەر لەنێوان خۆكوشتن و ژیاندا!

Closed
by March 20, 2012 ئەدەب

-1-
ئیشتیهام بە ژیان ناكرێتەوە
بەبیرم نایەتەوە كەیبوو
دركم بەوە كرد
سەد هێندەی توێكڵی لیمۆ تاڵە!!

-2-
كوشندەیە ئەم وەهمە
عەزابە ئەم جورئەتە
پووچە ژیان
پووچە خۆكوشتن
عەبەسە ئومێد!

-3-
بێهوودە ئەم عەتری ئومێدە
بە جلەكانمدا دەپرژێنی
بێهوودە لەبیرت كردووە
ئەی دۆست…
بۆنی مردن لەگیرفانەكانتەوە دێ‌!

-4-
ئەم خەیاڵەم، هێواش… هێواش
بیر لە ساتەوەختی
لە زرمە زرم كەوتنت دەكاتەوە
ئەی دڵ!

-5-
خۆكوشتن سەگەكانی خۆی
بەرداوەتە قاپی و دیوارەكانم
لێ‌ من، زەهری “ئەو” كوشتن
بۆ سەگەكانی دادەنێم!!

-6-
جیاوازی چییە؟
تۆ بمكوژی یاخود گوللە
ئەی مەراقم!
جیاوازی چییە؟
تۆ بمكوژی یاخود حەرف
ئەی تەنیاییم!

-7-
تەمەنێك بەدیار نەهاتنتەوە چاوەڕێ‌
كزكز دەسوتێ‌ چرای ئومێد
هێشتاكە خەبەرێ‌ نییە لە “گۆدۆ”!

-8-
ئازارێك لە سینەمایە
كتومت دەمخاتەوە یادی خۆكوشتنی ئەو كۆترەی
لە حیكایەتێكتدا پرسەت بۆ نەگرت
ئەی شەهرەزاد!

-9-
سەرت مەنێ‌ بەسەرمەوە
ژیان هێند ڕەتاندوومی
دەترسێم رۆژێ‌ تۆش بەرببیتەوە نێو ئەم پەتایە!

-10-
مەپرسە…
شیعرم هیچ نییە،
جگە لە غافڵگیركردنی خۆكوشتن نەبێ‌!

 

هەژار عوسمان
تێبینی: لە ژمارە -٦-ی گۆڤاری -٢٣-دا بڵاوبووەتەوە.

Previous
Next
This site is registered on wpml.org as a development site.