Skip to Content

Thursday, March 28th, 2024
سه‌ری به‌ردم شكاندو ،ده‌ستم ناچێته‌ باڵی په‌پوله‌

سه‌ری به‌ردم شكاندو ،ده‌ستم ناچێته‌ باڵی په‌پوله‌

Closed
by December 6, 2010 ئەدەب

مارف عومه‌ر گوڵ

حه‌شاماتێكی بێ‌ سه‌رو سنوور وا به‌ڕێوه‌یه‌ ،
بۆ باخچه‌ی ته‌مه‌ن ، بۆ كانیاوی باخ ، بۆ دارستانی ئه‌م ده‌وروبه‌ره‌
له‌جێگه‌ی شووره‌ مرۆڤبه‌ندێكی دڵكێش و روحسوك
ده‌به‌مه‌ سه‌یری برژانگ و برۆی ئه‌م خۆره‌تاوه‌ .
قۆڵ و مه‌چه‌كی به‌ردم شكاندو
كه‌ڵكه‌ژنۆ و قاچی به‌ردم شكاندو
سه‌روگوێلاكی به‌ردم شكاندو ،
ده‌ستم ناچێته‌ باڵی په‌پوله‌ .
به‌ دووربینی ئاو ، ده‌ڕوانمه‌ سه‌ر لوتكه‌ی ئه‌و شاخه‌
به‌ كراسێكی ئاودامان هه‌وری ده‌مه‌و به‌هاران خۆم داده‌پۆشم
به‌ ڕێژنه‌ی هه‌ر چوار وه‌رزی ساڵانیش ئۆخه‌ی ئۆخه‌یمه‌ .
كه‌رته‌ شاخێكی خه‌مم هه‌ڵوه‌راند ،
ئاسنبه‌ندێكی ترسم شكاندو
ده‌سته‌جلێكم له‌ گه‌ڵا دووریی .
به‌هه‌ستێكی توند ،
به‌ری ڕه‌شه‌بام له‌ خۆم راگرت و
سه‌رم سپارده‌ شنه‌بایه‌كی قرچه‌ی هاوینه‌ .
تانك و فرۆكه‌ و نه‌خشه‌ و قینه‌ و رق ،
ناتوانن رێگه‌ ،
له‌ هه‌ور و ساماڵ له‌ شنه‌ و چیمه‌ن ، له‌ یاران بگرن
تیرۆر و جه‌رده‌ ، گورگ و سامناكیی
ناتوانن رێگه‌ ،
له‌ هاتوچۆی با ــ و له‌ هاژه‌ی چه‌م و له‌ باران بگرن .
…………..
ئێواره‌ به‌دوای هه‌ورێكه‌وه‌ بووم ،
ئه‌و به‌ سه‌رمه‌وه‌و من له‌سه‌ر زه‌وی
دوای خۆرئاوابوون ، روو له‌ به‌رزایی
دڵ به‌ندبوو به‌ دیار ورشه‌ی مانگه‌وه‌ ،
ئه‌و به‌سه‌رمه‌وه‌و من له‌سه‌ر زه‌وی ،
سبه‌ینێش به‌ دوای ، تیشكی هه‌تاوا
ئه‌و سه‌رانسه‌ری دونیای ته‌ی ده‌كرد ،
من له‌سه‌ر زه‌وی له‌سنوری نێو وشكانی و ئاوا
گیرۆده‌ی كێشه‌ی مه‌رگ و ژیان بووم .
چه‌م و جۆگه‌له‌م كرده‌ ماڵی خۆم ،
رێم له‌ ئه‌ستێره‌ و رێم له‌ ده‌ریا گرت
رێم له‌ شه‌پۆل و رێم له‌ هه‌ور گرت
رێم له‌ په‌پووله‌ و ، له‌ شنه‌ی با گرت
ئه‌و هه‌موو به‌رده‌م دا به‌سه‌ریه‌كدا ،
په‌پووله‌م له‌گشت گیاندار و بێ‌ گیان جیاكردۆته‌وه‌
به‌ ده‌وری چرای دڵمدا نه‌بێ‌ ناحه‌سێته‌وه‌ .
………………
له‌ ماڵی كێوه‌ كۆلاره‌یه‌كم هه‌ڵدا بۆ به‌ختی كاتی مناڵیم
خه‌ونه‌كانی من ، له‌ زه‌مینه‌وه‌ ببا بۆ ئاسمان
بۆ ئه‌ستێره‌ی دوور ، بۆ تریفه‌ی مانگ
بۆ هه‌ور و ساماڵ ، بۆ به‌فر و باران .
ده‌رگام له‌ شه‌وی بێ‌ تۆیی داخست ،
به‌ هیچ رێ یه‌كدا ناگه‌یته‌ لای من ،
ته‌نها له‌ كۆشی هه‌ورێكدا نه‌بێ‌ ،
وڵاته‌ و وڵات هه‌ڵتبگرێت و
بتكاته‌ نمه‌ی رێژنه‌یه‌ك بۆ روح !
له‌ بێ تۆییدا ، هیچ ئێواره‌یه‌ك
بێ‌ په‌پوله‌كه‌ی شه‌یدای غه‌ریبیت ، ناگه‌رێمه‌وه‌
ته‌مێكی خه‌مناك به‌سه‌ر چاومه‌وه‌ په‌رده‌ی كێشاوه‌
له‌ بێ‌ تۆییدا ، ئاوازی به‌سته‌م
زامێكی سه‌خت و ئێجگار به‌سۆییه‌
بۆته‌ گڕێكی بڵێسه‌داری سه‌راپای جه‌سته‌م .

سلێمانی
حوزه‌یرانی / 2010

Previous
Next
This site is registered on wpml.org as a development site.