Skip to Content

Friday, March 29th, 2024
شانۆگەرییەکى یەک پەردە …. نەوزاد بەندی

شانۆگەرییەکى یەک پەردە …. نەوزاد بەندی

Closed

 

 

 

 

 

 

( )

شانۆگەرییەکى یەک پەردە بوو ..

لە پێنج خولەکى سەرەتادا ،

پاڵەوانەکە کوژرا ..

بەهارێکى یەک چرکە بوو ،

لەگەڵ ئاگرى نەورۆزا ،

دەشت و دەر زەرد هەڵگەڕا ..

( ئیتر من و تۆ لێک ون بووین ..

وەک دوو زەنگیانە ..)

 

* * *

شیعر خرایە سجنەوە ..

بە کەلەپچەوە و سندمەوە ،

ڕەوانەى چاپخانە کرا ..

دەرکەوت وشە تیرۆریستە ،

بە بڕیارێکى سەرپێیى ،

پیت – پیت ، لە سێدارە درا ..

 

* * * 

جەهل بڕوانامەى دکتۆراى پێ بەخشرا ،

بە پلەى ئەوپەڕى نایاب ..

( ئیتر زانکۆ ،

کێچ و ڕشک و ئەسپێ تێى دا )

 

* * *

ئەى دڵ ،

لە نیوەى ڕێ ڕانەوەستی ،

حەیام نەبەى ..

ئەى هەناسە ،

لە ناوەڕاستى شیعرێکا ،

کورت نەهێنى ،

حەیام نەبەى ..

* * * 

هەتاکو زەوى وەستا بێ ،

لەسەر کورسى دانانیشم ..

چایخانەیەک شاعیران دیژى تیا هەڵدەن ،

چای تیا نەخۆم ..

دەستەى نوسەران ناناسم

سەرنووسەر ڕەفیقم نیە

بەڕێوبەرى نوسینیش ماڵمان نازانێ ..

( ئەوانە چ پەیوەندیەکیان ،

بە ڕێکەوت و

بە لێکەوت و

بە جێکەوتى ،

من و هۆنراوەوە هەیە ؟؟ )

* * * 

هیچ دیکتاتۆرێکى مێژوو،

ئەوەندەى سەرنووسەرەکان ،

شیعرى منیان نەکوشتووە ..

( من بێ باکم ..

خۆ شیعر موڵکى من نیە ..

موڵکى گەلێکە کە دەستى ،

لە شیعر و ئەدەب شوشتووە )

* * * 

ناوبانگ و

مەدالیا و

چاپ و

داهات و

پارە و

ڕێزلێنان ..بۆ خۆتان 

نۆشى گیانتان بێ ..

(من بەر و بوومى هۆنراوەم لا حەرامە )

شیعر نەوزاد بەندی
Previous
Next
This site is registered on wpml.org as a development site.