ماڵى مردن …. ماڵێك میهرەبان…..داستان بەرزان
ماڵى مردن …. ماڵێك میهرەبان
داستان بەرزانلەوىَ كەس وەك ئێرە
ڕۆژانە نامرىَ و زیندوو ببێتەوە !!
چونكە لەوڵاتى مردن بە یەك زمان دەدوێین و
بە یەك زمانیش حەشر دەكرێین و
نیشتیمانێك دەبێتە دوامەنزڵگەمان
لەوىَ دیوارەكان لێرە ناچن و
لوتمان ناشكێنن
ئەو دەمەى دەمانەوە بدوێین و
پڕ بەگەروو هاوابكەین:
خودایە لە عەشقمان خۆشبە
لەوىَ تیرەكان دڵ و جەستە لەت ناكەن و
دەتوانین گریان وەك خۆى تەفسیر بكەین و
عەشق بكەینە خەونێكى دى بۆ گەیشتن بە _ئەو_
بارانى ئەوىَ هەموو جەستە تەڕ دەكات و
بە قوڵایى ڕۆحماندا ڕۆدەچىَ و
لێوڕێژمان دەكات لە كریستاڵى سەوزى ئەوین
لەوىَ لە وڵاتى مردن
هەموو شتێ زمانى هەیە
تابلۆى سەر دیوار …
پەیكەرى نێو مۆزەخانە و شەقام
شیعرى نەگوتراوەكان
ڕۆمان و چیرۆكى بەر قاچ و پێڵاو
ڕۆژنامە و گۆڤارى نێو چەگمەجە و دۆڵاب
مۆسیقاى نەبیستراو گۆرانى كوژراو
هەموو بەیەكەوە دێنە قسە و
باس لە خۆیان دەكەن و
ئەوىَ پڕ دەكەن لە ڕەنگ و چریكە و خەیاڵ
ئەوىَ ماڵێكى ئێجگار ئاوەدانە و
شەو تا درەنگ كۆڕ و دانیشتمان گەرمە و
دەتوانین تا سپێدان مەست بین و گۆرانى بڵێن
ماڵێكى گەلێك میهرەبانە و
لێدەگەڕىَ شێت شێت یارى بە خۆمان بكەین و
توڕە نابێت و تەریقمان ناكاتەوە
ئەوىَ وەك ئێرە نیە …..
لەوىَ خودا خۆى دێتە قسە و
گشت فێڵەكانى ژیان بە درۆ دەخاتەوە و
ئیدى ئێمەش تێدەگەین چ نوكتەیەكە ئێرە
هیچ….هیچە….ئێرە
Dastan.barzan@gmail.com
