Skip to Content

Thursday, March 28th, 2024
پڕم له‌ ته‌نیایی ….که‌مال چۆمانی

پڕم له‌ ته‌نیایی ….که‌مال چۆمانی

Closed
by October 16, 2008 ئەدەب

 پڕم لە تەنیایى
 كەمال چۆمانى
 chomani_85@yahoo.com

 تەنیایی…
 ساتەوەختى گەڕانە بەدواى یەقین/
 تەنیایی…
 زەمەنى پیربوونى جەهلە/
 تەنیایی…
 تروسكایی رزگاربوونى بوونى مرۆڤە لە خەڵوەت/
 تەنیایی…
 وشكبوونى خانەكانى رقە لە دڵدا/
 تەنیایی…
 هانابردنە بۆ خودا و راكردنە لە ئەهریمەن/
 تەنیایی…
 میقاتكردنى ساتەوەختێكى پێغەمبەرانەیە/
 من ئەڵێم،
 هەر شتێكى جاوید،
 مەحكومە بە تەنیایی/…
 
 هێند پڕم لە تەنیاییى،
 بە قەد عەدالەت لە وڵاتى من/
 هێند پڕم لە رق،
 بە قەد سەركردەكانى كورد لە لێبووردەیی/
 هێند تووڕەم لە خۆم،
 بە قەد رۆحم لە جەستەم/
 ئێمە ئێستا لە كەنارى بەربەریزمەوە،
 گۆرانى شادى ئەچڕین/
 ئەوە ئێمەیین پڕین لە خوێن،
 شەڵاڵین لە فرمێسكى رق/
 ئەى خودا،
  من دیلم بە دەست ئەو توڕوهاتییانەى سوڵتان/
 هەرگیز رقم نەناسیووە،
 لىَ من ئێستا مەحكومم بە رق/
 وەك عارفێكى پیر بەدەم تێفكرین لە سووتانى پەڕسێلكەیەكەوە،
 وەنەوز ئەدەم/
 وەك مناڵێكى لاسار،
 بەرد ئەگرمە پاسارى/
 وەك راوچییەكى بێڕەحم،
 بە بییانووى گەڕان بەدواى نێچیر، خەریكى تێكدانى هێلانەى كوكوختییەكانم/
 چوار دەورم پڕە لە چیلكە دار،
 كەچى وا بە چیلكە دارەكانى هێلانەكە، خەریكى لێنانى چاییەكم/
 
 هێند سەرلێشێواوین،
 خەریكین ئەڵقەى مرۆڤبوونمان ونەكەیین/
 ئەمانەوێت ببین بە دەستگیرانى،
 دیناسۆڕەكان/
 وا پەپولەكان و پاسارییەكان تەڵاق ئەدەین،
 ئەچینە باوەشى قەلەڕەشكە/
 ئەڵقەى دەستگیرانى لەگەلأ پاسارى،
 بە "با"یەكى توند توند، بۆى ئەنێرینەوە/
 
 وەك قەڵەمێكى یاخى، یاخى بە درۆ، پیسیی و جەهل،
 خۆم خۆم ئەنووسمەوە/
 من پیربووم بەدەست ئەو دونییایە فانییە،
 خوێنم بەر بوو لە رقى ئەو جییاوازییە/
 جییاوازى مێشكى پڕكردووم،
 چاوم ئەبڵەق بووە لە سەرسووڕمان/
 دەستم ترسى شكانى هەیە،
 كەچى هەر دەستى بۆ ئەبەم/
 
 منم ئینسان تۆیی جنۆكە،
 منم بەدواى حەقیقەت و تۆیی بەدوای درۆ/
 من بەدواى حوببەوەم،
 تۆیی ئەندازیارى رق/
 منم خاوەنى پەڕەسێلكە،
 تۆیی خاوەنى قەلەڕەشكە/
 منم خاوەنى قاسپە و جیوە جیو و هاژە و بریق و باقى مراوى،
 تۆى خاوەنى زەوق و رەوقى پالأ سۆزانى/
 
 ئەڕیستۆكراتییەت بارى كرد،
 هات لە وڵاتى من دایكوتا/
 "سەرپۆش گەڕا،
 مەنجەڵى خۆى دۆزییەوە"/
 ئێمە تینووین بە خوێن،
 برسین بە خیانەت/
 خییانەت تا دێت،
 دونییامان پڕتر ئەكات/
 ئێمەى مروارى و سەدەف و ماسی،
 بە قولاپى ئەوان، ئۆخەى مردن ئەچێژین/
 بە توڕەیى ئەوان،
 خەون بە چاخە بەردینەكانەوە ئەبینین/
 
 سوڵتانەكان،
 بەر لە هانا هاتنى خودا،
 وەك دیناسۆڕ، قووتمان ئەدەن/
 ئەوان هێند تینوون بە خوێن،
 وەك حوشترێكى بیابان، پاش تێربوونیشییان،
 خوێنى زییاتر، لە جەستەى تر ئەستێنن/
 هەر خۆیان،
 خاوەنى، عەمبارى نەوت و دۆلار و درۆ و خییانەت و خوێنیشن/
 
 ئەم دونییایە پاكە،
 بۆنى كووشتن و خوێن كاسی كردووە/
 وەك موعتاد و سەرخۆشێكى مەیی،
 تا دآ كز و كزتر ئەبێت/
 ئیتر بەسە،
 با تیفكرین لە جوانى دونییا و پیسییەتى نەفس/
 
 وەرن با لە شێوەى رێحان بین،
 هەرچەندە لێبدەییت بۆنى خۆشترت ئەداتآ/
 رێحان چەندە رەش و بێگوڵە،
 كەچى چەندە بۆنخۆش و بەسۆزە/
 رەشى رێحان،
 دونییاى پڕكرد لە بۆن/
 رەشى بیلال،
 دونییاى پڕكرد لە زیكر و تەهلیلە و عەدالەت/
 رەشى مارتن لۆتەر كینگ،
 دونییاى پڕكرد لە یەكسانى/
 رەشى چاو،
 دونییاى پڕكرد لە عەشق/
 رەشى رووى سەركردەیەكى خائین،
 دونییاى پڕكرد لە قا قا/
 من سەرم لێشێواوە،
 چیمان داوە لە سپی و سپی و سپی؟/
 
 لە كەنار دەرییاى نائومێدى خۆمانەوە،
 بەدەم ژماردنى دەنكە وردەكانى لمەوە،
 خەریكى نووسینەوەى نائومێدییەكانى ئینسانین/
 نا ئومێدى بۆ ئێمە بەشێكە لە،
 ئینسانیبوون و كوردبوونمان/
 
 ئێمە هەر خەریكى نووسینەوەى نائومێدیین،
 كەچى شەپۆل هەر دێت رایدەماڵێت و پێماندەڵێت:
 بەسە نائومێدى لەبیركەن، ئێستا تیبفكرە و بیربكەوە و دەستپێبكەوە/
 دەنكە وردە لمەكان، هێند زۆرن،
 لێ ناتوانن نائومێدییەكانى من بنووسنەوە/
 لەوێوە ئەكەومە شەڕێكى سەرمەدى لەگەلأ شەپۆل،
 من نووسەرى نائومێدى و ئەو موجاهیدى دژ/
 من خودانى دڵشكان،
 ئەو دڵشكێنەر/
 من بە هەموو تەنیاییەكەى خۆمەوە،
 ئەمەوێت نائومێدى بنووسمەوە/
 نائومێدى بەو هەموو دۆستەى خۆیەوە،
 هێشتا لە خەڵوەتە/
 نائومێدى و تەنیایی،
 زار و مارن/
 هەر كە نائومێدى هەبوو،
 تەنیایی هەیە/
 تەنیایی…
 ساتەوەختى گەڕانە بەدواى یەقین/
 تەنیایی…
 زەمەنى پیربوونى جەهلە/
 تەنیایی…
 تروسكایی رزگاربوونى بوونى مرۆڤە لە خەڵوەت/
 تەنیایی…
 وشكبوونى خانەكانى رقە لە دڵدا/
 تەنیایی…
 هانابردنە بۆ خودا و راكردنە لە ئەهریمەن/
 تەنیایی…
 میقاتكردنى ساتەوەختێكى پێغەمبەرانەیە/
 من ئەڵێم…
 هەر شتێكى جاوید،
 مەحكومە بە تەنیایی/…
 
 

Previous
Next
This site is registered on wpml.org as a development site.