Skip to Content

Friday, March 29th, 2024
ژن و دره‌خت و با … دلۆڤان عەلی

ژن و دره‌خت و با … دلۆڤان عەلی

Closed
by October 11, 2012 هۆنراوە

 

 

 

 

له‌گه‌ڵ ژندا ڕێکم

نهێنیه‌کانم له‌ باوه‌شی ئه‌و دایه‌

له‌گه‌ڵ ژندا یاریم به‌ به‌فر کردووه‌

له‌به‌ر باراندا ژوانم له‌گه‌ڵ کردووه‌

هه‌ر له‌گه‌ڵ ژندا ڕوم له‌ هه‌ور کردووه‌

پێم گوتووه‌ بگرمێنه‌ تا کاس ده‌بم

جاریکیان له‌گه‌ڵ ژنێکدا قۆخێکم خوارد

کردم به‌ چوار له‌ته‌وه‌

سێ له‌تم دا به‌ ئه‌و و له‌تێکیش بۆخۆم

ئه‌وه‌نده‌ دڵخۆس بووم پاشای که‌ون بووم

دره‌ختیشم خۆشده‌وێن

ژوانی ئێوارانم له‌بن کردوون

تا سنوری ماچ و چێژ

ڕۆژێک له‌بن دره‌ختێک خه‌یاڵم ده‌کرد

ده‌مگوت ئه‌گه‌ر من سه‌رۆکی وڵات بام

ژنم ده‌کرده‌ وه‌زیری داد

ژنم ده‌کرده‌ سه‌رۆکی حکومه‌ت

تا هه‌رگیز گه‌نده‌ڵی ڕونه‌کاته‌ وڵاتم

تا پێی بڵێم خانم

ئه‌وه‌یه‌ وڵات ، ئه‌وه‌یه‌ ساده‌یی ، ئه‌وه‌یه‌ دڵخۆشی

(با)ش جار جاره‌ دڵخۆشم ده‌کات

کاتێک بایه‌کی به‌ بارانه‌وه‌ هه‌ڵده‌کات

ده‌یدات له‌ پرچی ژنێک و په‌رش و بڵاو ده‌بێت

دڵخۆش ده‌بم تا ئه‌به‌د

له‌به‌ر باراندا هاوار ده‌ه‌که‌م

(لێم گه‌ڕێ گیانه‌ با لێت ڕابمێنم)

با هه‌موو گیانم بۆنی پرچه‌کانت بگرن

ده‌مهه‌وێ بچمه‌ بناری سیوه‌یل

له‌بن دارێکدا پاڵکه‌وم

کولێره‌یه‌کی گه‌رم و

قاپێ دۆ بخۆمه‌وه‌ و

له‌ ژنێک ڕابمێنم و پێی بڵێم:

خانم ئای چه‌نده‌ جوانیت ڕۆحم پێشکه‌شت

دوای تۆزێ بخه‌وم تا ساده‌ ئه‌بم خاو ببمه‌وه‌

به‌خیلی به‌ ژنانی سیوه‌یل ده‌به‌م

ئه‌و کولێره‌ گه‌رمانه‌ دروست ده‌که‌ن و

ده‌یبه‌خشنه‌ پیاوان

به‌خشین کارێکی خودایه‌

ئه‌وه‌ی کاری خودا دوباره‌ بکاته‌وه‌ مه‌زنه‌*

ده‌مهه‌وێ بچمه‌ بناره‌کانی قه‌ڵادزێ

باوه‌ش بۆ قۆخ بکه‌مه‌وه‌

له‌گه‌ڵ ژنێک هه‌نجیره‌کان کۆبکه‌مه‌وه‌ و

هه‌رمێیه‌کیش پڕ به‌ دڵ بخۆم

خودایه‌ ژنانی ئه‌م بناره‌ چه‌نده‌ میهره‌بانن

دڵی پاساریه‌کانیش ناشکێنن

من ئه‌و کاته‌ دڵخۆش ئه‌بم

ژن هه‌موو شتێک بێت

دره‌ختێکیش هه‌بێت بۆ من و

جار جاره‌ش بایه‌ک به‌ نمه‌یه‌ک بارانه‌وه‌ بێت

له‌گه‌ڵ ژنێک بمبات بۆ ئه‌وسه‌ری دنیا

 

 

 

دلۆڤان قه‌ڵادزه‌یی

*دێڕیکی مامۆستا ڕێبوار سیوه‌یلی یه‌

 

 

Previous
Next
This site is registered on wpml.org as a development site.