گرنگی کۆنسێپت له هونه‌ری ئینسته‌له‌یشندا
چه‌ند ساڵێکه له دونیای هونه‌ری شێوه‌کاری له کوردستان بایه‌خ به هونه‌ری ئینسته‌له‌یشن ده‌درێت. له‌ماوه‌ی دوو ساڵی رابووردوودا کۆمه‌ڵێک به‌رهه‌می ئینسته‌له‌یشن له شاری سلێمانی پێشکه‌شکراون که هۆیه‌کی سه‌ره‌کی بوون بۆ نوسینی ئه‌م بابه‌ته. لێره‌دا من ناتوانم ده‌ستنیشانی مێژووی ئه‌م جۆره کارکردنه له کوردستان بکه‌م و ئه‌وه بخه‌مه‌ڕوو ئه‌م رێبازه که‌ی و له‌لایه‌ن کێوه، هونه‌رمه‌ندانی کورد له ده‌ره‌وه‌ی کوردستان یان هونه‌رمه‌ندانی کوردستان، هاتۆته‌کایه‌وه. ئه‌وه‌ش له‌به‌رئه‌وه‌ی بواری ئه‌وه‌م نه‌بووه بۆ ئه‌م نووسینه لێکۆڵینه‌وه‌یه‌کی مه‌یدانی بکه‌م له کوردستان. هه‌ربۆیه‌ش ته‌نها ده‌توانم ئاماژه به چه‌ند پێشانگایه‌ک بکه‌م که خۆم له سلێمانی بینیوومن و چه‌ند پێشانگایه‌کیش که له ڕێگای هه‌ندێک که‌ته‌لۆگه‌وه یان به‌شێوه‌ی تر زانیاریم ده‌رباره‌یان ده‌ستکه‌وتووه.
