Skip to Content

Tuesday, January 26th, 2021

ڕۆژانە … نەوزاد بەندى

Be First!

 

 

 

 

-1-

میکرۆفۆن

کامێرا ..

کاوبۆیەکى کاڵ ..

شەقامێکى قەڵەباڵغ ..

–    ( کاکە ! بە ڕاى تۆ برنج خۆشترە یان قەرەخەرمان ؟ 

–    (ببورە ! من نەخۆشى شەکرەمە ، هیچیان ناخۆم ! )

ئینجا ئەچێتە بەردەم پیرەمێردێک و

ئەپرسێ :

-( بەڕاى تۆ سێبەر ڕاومان ئەنێ ،

یان ئێمە ئەو ڕاو دەنێیین ؟ )

-( لە ساحەى تۆپێن ، ئێمە ئەوى ڕاو دەنێیین 

بەڵام لە ساحەى شەڕ ، ئەو ، ئێمەى ڕاو دەنێ ..

ئەرێوەڵڵا .. ! )

 ئەچێتە بەردەم کچۆڵەیەک و

پێى ئەڵێ :

( بە ڕاى تۆ بە پشتا و پشت بڕۆینەوە بۆ ماڵەوە

یان هەر بە شێوە ڕۆتینیەکە : ڕوو بە ڕوو ؟ )

کچەکەیش قۆشمەچى دەردەچێ و

پێى ئەڵێ :

( ئەگەر دوو ئاوێنەى ڕاست و چەپ

لە خوار گوێچکەکانتەوە داکوتی ،

بە پشتا و پشت بڕۆیتەوە باشترە .. ! )

 

-2-

پیاوێکى بۆینباخ لە مل ،

مدیر عامێ ئەهێنێتە سەر مێزێک و

ئەیداتە بەر قرچە – قرچى کامێرا و

دواى بە خێرهاتنێکى گەرم ،

جا دەست ئەکات بە جنێو پێدانى ،

بەڵام بە جۆرێکى شارستانى ..

لە کۆتاییدا برادەرێک ،

بە سکایپ ،

هەزار جنێوى سوک ،

ئەداتە دایک و

خوشکى بەڕێوەبەرى گشتى ،

لەگەڵ داواى لێبوردنێکى زۆر لە بەڕێوەبەرەکە و

پێیشى ئەڵێ : زۆر بەڕێز …

 

-3-

بێژەرێ ،

کە زۆر خۆى ماندوو کردووە لە ڕێکخستنى

ڕەنگى بۆینباخ و

کراس و

چاکەتەکەى ..

دوو کەسى ئامادە کردووە ،

یەکێکیان لاى ڕاست و

ئەوەى تریان لاى چەپ ..

ماوەى پەنجا خولەک ، 

هەر سێکیان پێکەوە جنێو بەیەکتر ئەدەن ،

زیاتر لە کۆڕاڵی گۆرانى ئەچن ..

لە کۆتاییدا ،

زۆر بە ڕێزەوە 

تەوقە لەگەڵ یەکتریدا ئەکەن  و

ئەگەڕێنەوە بۆ ماڵەوە 

بۆ برنج و فاسۆلیا خواردن ..

 

-4-

پیاوێ ورگى تەنگى بە مایکرۆفۆنەکە هەڵچنیوە و

بەو حاڵە هەناسە ئەدات ،

باسى هونەرى یۆگا ئەکا ..

 

-5-

بە پیتى گەورە 

نوسرا بوو :

شۆفێرى بەڕێز !

ئەگەر ئوتومبیلەکەت بەنزینى تیا نەما ،

لە نزیکترین بەنزینخانە پڕى بکەرەوە لە بەنزین ..

 

-6-

دواى لێکۆڵینەوەیەکى زۆر

بڕیاریان دا ،

بە هاووڵاتیان ڕابگەیەنن :

پێویستە لە دواى نانخواردن دەست و دەمیان بە سابون بشۆن

 

-7-

بە جۆرەها شێوە ،

سوێندیان خوارد دەستیان نەبردووە بۆ گیرفانەکانى نیشتمان و

جانتاکەیان نەفڕاندووە ..

دینارەکانیان نەخواردووە و

ناسنامەکانیان نەدڕاندووە ..

دەسنوسەکانیان نەدزیوە و

ناویان لاى خەڵک نەزڕاندووە ..

( ئیتر کەوتنە دابەشکردنى ئەو پارەیەى 

کە بۆ لیژنەى سوێندخواردن و

نەزاهە و

شەفافیەت 

بە کۆى دەنگ و ڕەنگ ،

پەسەند کرابوو ..)

 

-8-

ئەى نیشتمان ..

ئەزانى کەى کەسێ نییە دوو شوخت شیرت بداتێ و

دایبیەکەت بۆ بگۆڕێ ؟؟

(ئەو کاتەى نەوتت تیا نەما .. )

 

-9-

لەو کاتەوەى واقیع پڕ بووە لە دز و

درۆزن و

جەردە و

پیاو کوژ ..

ئاڵودەى خەو بووم ..

حەز ئەکەم زۆرترینى کاتەکانم بدەم بە خەو ،

با ئەو بۆ خۆى کاسبیەکیان پێوە بکا ..

 

-10-

بەیانیان ،

بە ترسەوە ئەڕۆمە دەرەوە ..

ئەترسم لەسەر سوچى کۆڵانەکە : مردن وەستا بێ ..

یان لە گیرفانما پەپکەى خواردبێ و

کە دەست ئەبەم بۆ کلیلەکانم ،

پەنجەم بگەزێ ..

بە تەنیشت گردى سەیواندا ئەڕۆم ،

چ ئیزدیحامێکى دروستکردووە مردن !

 

    -11-

کەسمان بیر لەوە ناکەینەوە ،

 جوجەڵەکان ، هەتیون ..

 گوێرەکەکان ، هەتیون ..

کار و بەرخەکان ، هەتیون ..

هیچ رۆژنامەنوسێ بە دوادا چونێ بۆ ئەو

کۆمەڵکوژییە ناکا ..چونکە ئەوانیش

شانازى بەوەوە ئەکەن کە ساڵەهاى ساڵە ،

شلەى بێ گۆشتیان نەخواردووە !

 

-12-

ئەى  نیشتمان،

کە مەمکەکانت نەوتیان تیا نەما ،

ملیاردێرەکان تەڵاقت ئەدەن ..

 

 

-13-

کۆڵانەکانت کەسیان تیا نەماو

کران بە زەوى تیجاریى..

کۆترەکانت تەجمیلى دەنوکیان کرد و بون بە هەڵۆ  ..

خاڵخاڵۆکەکانت خاڵەکانیان کوژانەوە و

بون بە کەپرى گەشتیاریى..

ئەى نیشتمان !

ملیاردێرەکان کە جاران شەڕە بەڕوویان ئەکرد ،

ئێستا شەڕە تاوەر و

شەرە شارى مۆدێرن ئەکەن ..

 

-14-

ئەى نیشتمانە قەیرەکەم،

کێ بەم ئاخرى عومرەوە 

سکى پڕ کردى .. ؟

 

–15-

ئەم ئێوارەیە ،

لە هەموو کاتێ زیاتر ،

هەست بە بۆنى دەمى مردن ئەکەم

 

Previous
Next

Leave a Reply