مهچكۆ :رووخسهتی لهمهرگ خواستووه!
ئهمرۆ رۆژی لهدایكبوونمه
مهچكۆ: رووخسهتی لهخودا خواستووه..!!
پری كردووم: لهمهراقه بهجێماوهكانی ژیان
بۆ ڕۆژی لهدایكبوونم…
كتێبێكی فیردهوسی هێناوه
پڕه لهئایهته شیعری خوداوهندیی مهرگدۆستی
بهخهتی باران نووسراوه: (ڕایبهێنه لهتهنیایی خوداو
بێ دهنگی خۆت,
ڕایبهێنه لهشهرابی ئاونگی بۆڵه ترێیهكانی ژیان و
ههواڵی كڵاوی بابردووی سیاسهت).
ئهمرۆ بهد مهستم..
دووپێك ئایهتی زهردهشتیم ههڵداوه
پڕم لهخۆكوژی و
ناشزانم لۆكاریتمهكانی خۆكوژیی شیكار بكهم
خۆكوژیم كردۆته ماتماتیكی زایهلهی مۆنۆلۆگێكی مهرگدۆستی
لهئیمانستانی پڕ نوورهوه..
سهیری شهمشهمهكوێرهكانی كوفرستانم نهكردووه
له فهلسهفهی سیاسهتی حزبهكانهوه..
بهدگومانم:..
لهمهملهكهتی منداڵه پیرهكان!
مهچكۆی قهڵاو مناره
لهسهر تهنافی گریانێكی سهرمهندی
بهپێكهنینهوه, لهمیوانه خهیال بڵاوهكانت دهڕوانی
گلهیی لهزۆرگوتنی بهرد دهكهی !
ڕهخنه لهحیكمهتهكانی باران دهگری !
نووسهره كۆپیهكانی حزب دهردهكهیه دهرهوه
دییسان ڕۆحت بهههولێرهوه موتوربه دهكهی
تهریق دهبیهوه..
لهبهردهم نووسهره بهههشتییهكانی نێودۆزهخی نووسین و
شاعیره دۆزهخییهكانی نێو باخهكانی بهههشت
بهنووسهرهكۆپی كراوهكانی حزب دهڵێی:
((ئێوه تازه لهفهلسهفهی فیردهوس و باخهكانی نووسین ناگهن)).
چوارلاپهرهی كتێبه فیردهوسییهكه دهخوێنییهوه
بهعهشقه بهگزادهكهی ئیرۆسی دهڵێی:
"دوورتر له وێستگهكانی سهراب و
نزیكتر له ڕۆحی مهعشوق
من دوو بهقهد گهورهیی عیشقی ئێوه
یادهوهریم لهم قاوهخانهیه خهوتووه"
ئهو ڕۆژانهی لهبهر نهوشهفهقی زێرینی خودایی
خۆم بۆعیشق پڕ نوور دهكرد
حیسابم بۆ(مهرگ) و(شهو) نهدهكرد
زهمهن ڕۆژگارهكانمی بهسهر ئهم قاوهخانهیه غلۆر دهكردهوه
جاران هۆلاكۆشكێن:
ههتا قاوهی مهچكۆ ههبا,
سوێندی بهقاوه پركوفرهكانی فالگهرهدایهعهكانی شار نهدهخوارد
جاران هۆلاكۆ بهزێن:
ههتاحاجی لهق لهقهكهی مابوو
سوێندی بهسروودهكانی كوكوختی نهدهخوارد
ههنووكه: لهدهڤهری گولهگهنمهكانی بهرخودانی
گوڵه بهڕۆژهیهك پاشایه!
لهسهنتهرو
ناوهندهكانی ڕۆشنبیریشدا..
كادیرێكی حزبی پێشهوایه!
ڕووناكبیریی: بۆته گروپكاری..!
بۆئایندهی چارهنووسسازیشمان
داوی مێژوویهكی دۆڕاو ههڵدهكهنهوه.
مهچكۆ بهدهم پهشیمانییهوه..
پیاسهی سهرقهڵام پێدهكا
قهڵابهدهم گریانهوه..
باسی سوتانی ئهنتیكهخانهكهیم بۆدهكا.
من: پیاسهی نێو باخچه بهساڵاچووهكهی گلكهند به مهچكۆ دهكهم
گلكهند گلهییهكانی لای مهچكۆ باس دهكا..!
ههتا ههنووكه ماچی عاشقهكانی ههولێرم پهرستووه
شهونمه خهمگرتووهكان,
بهپێنووسی كوڵهكانی بهر ڕهشهبا
ئیمزای وهروزبوون لهدهفتهری سكاڵا قهلهندهرهكانی نیشتیمان دهكهن
دوومشت شهبهنگی ڕۆژگارێكی قهترانی دهخهنه ڕۆحی مهچكۆوه
مهچكۆ بهدهم خهیالێكی جگهرهكێشهوه..
گهلای وشهكانی كتێبه فیردهوسییهكهی دهوهشێنێته
سهرگلكهندهوه.
سهیری درهخته ڕووتهڵهكانی بهرباران دهكا
كه بهقهد مووی سهری یادهوهری تێدا جێهێشتووه
پیره یادێك, لهتهك درهختی كچێكدا
خهریكی كاوێژی دوێنێی تهمهنێتی
كهعیشقی مهركانێكی پڕ له گوڵه
لهسهرمێزی قوماری شهوانهی باوكی
كهشهرهف دهدۆرێنێت!
كچه عیشق به ههموو جورئهتهوه…
بهتفێك كهرامهتی پیاوهتیی باوكی ههراج دهكا
لهئاسمانی بێگهردی مهعشوقهكهی
كۆلارهی عهشقهكهی ههڵده دا.
دواجار جگهرهی خهمگرتوو
لهژووره غهریبیهكهی ئهبهدیهت دهكێشێت
مهچكۆ لهخوێندنهوهی كتێبه فیردهوسییهكهدهبێتهوه
تۆزی ژیان لهخۆی دهدهوهشێنێت و
ڕۆژی لهدایكبوونم پیرۆز دهكاو
ئهم شیعرهم پێ دهسپێرێت.بهرواری-15\3\2008 -ههولێر