Skip to Content

Tuesday, July 5th, 2022

کورتیله‌ شیعر ….. فه‌رهاد که‌ریم

Closed
by August 24, 2010 ئەدەب

 

_ئه‌وانه‌ی دوێنێ شه‌هید کران

بۆ ئه‌مرۆ کوژران

_ئه‌وانه‌ی ئه‌م به‌یانیه‌ مردن

بۆ رابردوو ژیان

-ده‌چمه‌وه‌ تا له‌ پرسه‌ی ناشتنی نیوه‌ی ته‌مه‌نم ئاماده‌بم

_ژیان لێره‌ جێدێلم و

زیندوێتم ده‌به‌مه‌وه‌

_قاچه‌کانم ته‌رناکه‌م له‌و رووباره‌ی مردن لێیپه‌ریه‌وه‌

_سلاو له‌وبایه‌ ناکه‌م ،زه‌مه‌نێک به‌ خواری لێیدام

_پرسیار له‌ ره‌شه‌با مه‌که‌ن

پایز جارێکیتر له‌نیشتمان بێ پالتۆ پیاسه‌ ناکا

_کوێره‌کان گۆچان ده‌ناسن ویه‌کتر ده‌بینن

_ئه‌و ولاته‌ی منالی لێ وون کردم،پر له‌ خودا بوو

_کات نه‌ماوه‌ بۆ گه‌رانه‌وه‌ی ناخ

هه‌موومان وه‌ک یه‌ک مردن ده‌بینین

_به‌ زۆر ئاو ته‌ربووم تا گه‌یشتمه‌ ئێره‌

ئاو ترسی بردم

_با ئاشنای کردم به‌ ره‌شه‌با

شنه‌ش وه‌ک زه‌رده‌خه‌نه‌ له‌ لێوم تۆرا

_له‌ کوێم به‌و به‌یانیه‌ جوانه‌؟

_شوێنێک نیه‌ به‌ ئارامی لێی بمرم

_دره‌ختم خۆشده‌وێ و پایزیشم

 

_دۆزه‌خ بوو ئه‌وێ

بینینم رێی گه‌رانه‌وه‌می وون کرد

_هه‌موو فرینێک ده‌ناسم

ترسم نیه‌ له‌ با

له‌ نیشتمان بێ بالترم

ته‌ربووم پێش باران_

باران به‌ به‌زه‌یی تره‌ له‌ پێکه‌نینی هه‌نار

ژماره‌یه‌کم بۆ خوێندنه‌وه‌_

قاوه‌گره‌وه‌کان سێویان نیشاندام_

_باو باران خوشک وبران

ئه‌و ئارامیه‌ی ئێره‌ ته‌نیایی پێناساندم_

خوا له‌ هه‌موومان ته‌نیاتره‌_

ئاین له‌ قالبی داین

له‌ شنه‌بایه‌ک ده‌گه‌رێم بمکا به‌ مرۆڤ_

خه‌ون به‌ ره‌شه‌بایک ده‌بینم_

ئاین بباته‌وه‌ مال………….  

   فه‌رهاد که‌ریم                                                  

 

Previous
Next