Skip to Content

225 Views

لە یادی راپەڕینەوە بۆ کۆستی ٧٤ی ئێزدیی … هەندرێن

لە یادی راپەڕینەوە بۆ کۆستی ٧٤ی ئێزدیی … هەندرێن

Be First!
by March 6, 2017 General, Opinion, Slider
image_print

ئەوەی کە ئێستا لە شنگال و کۆی تەنگژەکانی تر کە روویان داوە و روودەدەن، کۆمەڵگە لێی بەرپرسیارە، چونکە کاتێک ئاکاری زۆرینەی کۆمەڵگە سەتە دوای سەتە رەجەب ئاسا (سەیری تەمسیلی رەجەبی کوردیی بکە نەک تورکیی)، واتە کەهێلی، بێئاگایی، گەلحۆیی و نەداریی، بە دەستی رەتاندنی قەدەرەوە بژیت، بۆیە شایەنی ئەوەیە، مەلای گەورە واتەنی: نەک هەر “قسمێ بەندیی تورک و هێندێ خادمی عەجەم” بێت، بەڵکە شایەنی ئەوەیشە لەسەر ئەم زەویەدا وەک بوونەوەرێکی دمۆر، گەمەپێکراو و “بێ قەدەر و قیمەت” بژیت.
لەوەش بەدتر، هێشتا برین و کۆڤانی کوردی ئێزدیی “رەسەن” بە دەستی قات و قڕکردنی داعشەوە هەتوان و ساڕێژ نەبووە، کەچی بە دەم یادی راپەڕینەوە، دەکەوێتە بەر بوغزی “کوردی ناڕەسەن”ەوە.
لەناو ئەو هەرا و هۆریای شەڕی داعش و پشتگیرییکردنی ئەمەریکا لە ماسوولکەی کوردایەتییەوە گەرەکە کوردی نەدار و بەیەک نەیار بیزانن، بەدەر لە هوشیارییەکی خۆیەکیی نەتەوەیی لە کن زۆرینەی هاووڵاتیی ناسیۆنالیزمی کوردیی، کە لەوێدا یەکێتی کولتووریی لەگەڵ یەکێتی سیاسییدا ئاوێتە و ئاوێزانی یەکتر دەبن، کە ئەمەشە وا دەکات حیزب و نوێنەرە سیاسیی و رۆشنبیرییەکانی کورد بەرژەوەندیی نەتەوە بکەوێتە سەرووی هەموو بەرژەوەندییە خێڵەکیی، حیزبیی و … تاد.

کەواتە پێویستە بە بیرکردنەوەیەک لە ئیرادە ددان بەوەدا بنێین، راپەڕینی ١٩٩١، وەک بەرهەمێک لە بێدارکردنەوەی ناسیۆنالیزمی کورد، نەک هەر نەیتوانی یەکێتی کولتووری لەگەڵ یەکێتی سیاسیی ئاوێتە و ئاوێزان بکات، بەڵکە ئەو لێکدابڕانە ناوەکییەی کوردی پەرتەوازە و پەرێشانتر کرد. ئاکامی ئەمەش، بوونی دوو ئیدارەیی لە کوردستان و ئەو تەنگژە قەبانەن کە هەر لە دوای راپەڕینەوە تا هەنووکە کۆمەڵگە و حیزبەکان تێیدا دەژین.

لەو روانگەیەوە، ئەگەر کۆمەڵگەی کوردستان و هیزەکانی لەو خەونە مێردەزمەییەی کە دوای راپەڕین تێیدا تێداماوە، بێدار نەبنەوە، نەک تشتێک بەناوی نەتەوە و نەتەوایەتیی نییە، بەڵکە هەر رەفتار و کردارێکی تر، نەک هەر لە نموونەی ئەوەی کە ئێستا لە دەڤەری خانەسۆر و کەرکووک دەگوزەرێ، بەڵکە بوونی دوو سێ ئێدارەیی زیاتر لە بیست ساڵ لە کوردستاندا، ئیفلیجکردنی حکومەتی هەڵبژێردراوی خەڵک، کە بە واتەی ژان ژاک رۆسۆیی، بەرهەمی ئیرادەی گشتیی نەتەوەیە، جڕت و فڕتی پەیوەندنی حیزبە کوردییەکان بە دەوڵەتە نەیارەکانی گەلی کورد، ئێران و تورکیا، خیانەتکردنە دەرهەق بە ئیرادەی نەتەوە. کەواتە راپەڕین یادکردنەوەی گەرەک نییە، بەڵکە بێدارکردنەوەی بیرکردنەوەی گەرکە.

لێرەوە ئەگەر کۆمەڵگەیەک تەنێ کولتووری شین و رۆ ڕۆ نەبێت، تێدەگات کە پیشهاتی خانە سۆر رووداو نییە، بەڵکە ئاکامی ئەو ناهوشیارییە قووڵ و قەبەیەی کۆمەڵگە و غیابی گوتاری نیشتمانییە لە لایەن ‌حیزبە کوردییەکانەوە، کە بەرهەمی هوشیارییەکی پۆستخێڵەکیی و پووش و پاوانن.
ئاخر ئەگەر کۆمەڵگەیەک هوشیار و هەراش بێت، دەبێت تێبگات ئەوەی کە روویدا و روودەدا، ئاکامی ئەو ململانێی و بوغزانەیە کە چەندین ساڵە لە نێوان حیزبە کوردییەکاندا لە ئارادان، بۆیە ناژیربێژیی (لۆژیک)ییە ئەگەر ئەو هەموو ناکۆکییانەی نێوان حیزب و تاقمەکانی کورد نەگەن بە تەقینەوەی جۆرا و جۆر و خۆخۆرییە. بۆیە ئەگەر ئەو خەڵکە هوشیار و هەراش بن، گەرەکە بەر لەوەی ئەو ململانێیانە بەو ئاکامە رەشانە بگەن گەرەکە پیشتر لە بری شین و واوەیلای دوای رووداوەکان، بە کردار و ئاکارە هوشیارییەکانییەوە رێگە لەو دۆخە بگرن. کەواتە ئەوەی کە پێشهات و لە داهاتووشدا پێشدێن، دەرکەوتەی دۆخی بیرکردنەوەی کۆمەڵگەن.
بەهەمە حاڵ، بەزمی قەدەری کورد لەوە و لەویتریش ئاڵۆزترە، لێ لێرەدا بۆ ئەوەی لەوەی کە ئێستا لە هەناوی هەڵمساوی کورد دەکوڵێ تێبگەین، گەرەکە بگەڕێینەوە بۆ ئەو شیعرە بڕەندە و رەوانەی مەلای گەورەی کۆیێ، کە نزیک سەتەیەک بەر لە هەنووکە دەبێژێ:
“ئێوە “أحقر الناس” ن ئیمڕۆ لە بەینی ئومــــەم
قسمێ بەندیی تورکن هێندی خادمی عەجەم
ئێوەن بێ قەدر و قیمەت و بێ عەسکەر و بێ عەلەم
بێ تاج و تەخت و دەوڵەت ژێردەستی کوللی عالــەم
چینكه‌نان خۆرى خه‌ڵكى له‌سه‌ر موڵك و ماڵى خۆت
خاكـــــت هه‌موو مه‌عده‌نه‌ خۆت فه‌قير و ڕووت و قوت
تاكه‌ى وه‌كو گاجووتى له‌بن نيــــــــــــــــرى زيللـــــــه‌تى
سه‌د حه‌يف و سه‌د مه‌خابن لاى خۆت ئه‌تۆش ميلله‌تى”

٢٠١٧.٣.٥

Previous
Next

Leave a Reply