Skip to Content

811 Views

چۆلەكەكانی بەهەشت بۆ ئەوەندە ناشیرینن … كارا فاتيح

چۆلەكەكانی بەهەشت بۆ ئەوەندە ناشیرینن … كارا فاتيح

Be First!
by November 1, 2016 General
image_print

دەڵێن منداڵان بەو پێیەی گوناهیان نییە، تاوانێكیان نەكردوە، ئەوان دەبنە چۆلەكەی بەهەشت و لە سەر لقی درەختەكانی فیردەوس چڵاوچڵ دەكەن، ئەم بۆچوونە لە سەر منداڵ، تا سەر ئێسك نامرۆیی و دژ بە منداڵە و ئەخلاقی مرۆڤانە دەخاتە ژێر پرسیارەوە، ئەویش بەوەی وێنەی مردنی منداڵ ناشیرین دەكات، لە لایەك شیوەنێك بەرپا دەكات، كە ئەو سەری دیار نەبێت لەبەر هەڵوێستی ڕووتی سۆزگەرا و پەرچەكرداری ڕۆمانسییانە، تا دەگاتە هەرەس و هەڵچوونی ناعەقڵانی و دەروونی، لە لایەكی تر لافاوی شین و فووغان بەوە دادەمركێنێتەوە و سەبووریی بە دڵ دا دەهێنێت، كە ئەوان دەبنە چۆلەكەی بەهەشت، لە سەر خونچەی گوڵ و گوڵزاری باخی ئیرەم دەنیشنەوە، ئەوە ناخی بەكوڵ و جەرگی داغبوو تەسكین دەدات، كە ئەوان بۆ هەمیشە لە میوەی ئەفسانەییی بەهەشت دەخۆن، لە ئاوی حەیات دەنۆشن.

نامرۆیی و ناعەقڵانیی ئەم بۆچوونە لەوە دایە، مردن وەك مەزنترین ڕووداوی ژیان دەكاتە پرۆسەیەكی هێندە پاسیف و نابەرهەمهێن، كە تەنها چەند هەڵوێستێكی عاتیفی و دەربڕینی ڕۆمانسییانەی لێ سەوز بێت. ئەكتیڤیی ڕووداوی مردن ئەوەیە، كە كاریگەرییەكانی تەنها پەرچەكرداری لە وێنەی هۆنهۆن گریان و شیعری خەمناك و گۆرانیی شیوەنئاسا و ئەدەبی ماتەمینی نەبێت، بەڵكو ئەو كاریگەرییانە لە سەر ویژدان و خەون و دونیابینی شوێنیان هەبێت. ئەوانەی مردن پاسیف دەكەن، ناڕاستەوخۆ پەیامێك دەنێرن، با ئەم مردنە بەردەوام بێت، با بۆمبەكانی كیمیایی بەربدرێنەوە، با ئەنفال دوایی نەیەت، با قوڕی مەرگەساتی كۆچ و ئاوارەیی خەستتر ببێتەوە، با ئالان بخنكێت، گرینگ ئەوەیە من مەستی شین و فووغانی خۆم، پیاوی هەڵوێستی ڕۆمانسی بم، ئیلهامی شیعرم نوێ ببێتەوە، گۆرانیم بەسۆزتر، سوێ بخەمە هەناوی ئەوانی ترەوە، ئەمەیش هیچ نییە جگە لە بەشدارییەك لەو تاوانە دا، ئەمە كۆرسێكە لە بكوژ و تاوانبار، كە لە پشت بەرپرسی یەكەمی تاوانە وەستاوە و دەیەوێت كارەكەی بۆ تەواو بكات… ئەمانیش بە شێوەیەكی تر بكوژن.

منداڵێك لە غەریبی دەمرێت، وێنەكەی جیهان دەهەژێنێت، بیر لە پێداچوونەوە بە ویژدان و ئەخلاق دا ناكرێتەوە و دەستكاریی هەستی ئیستاتیكی ناكرێت و لەم وێنەیەوە جۆرێك تر لە، بۆ نموونە (تـریفـەی مـانـگ، پرشنگی هـەتـاو، نەشئەی شەوان، نەسیمی دەریا، شەپۆلی دڵفڕێن… هتد) ناڕوانرێت، ئەوانەی لای ئێمە ئەم وێنەیە دەبینن، ناتوانن قەشەنگیی بیرەوەرییەكان تێك بدەنەوە، شاجوانی یادەوەرییەكان بهێننە خوار و فریشتەی خەیاڵەكان ئاسایی بكەینەوە. سەر لە نوێ وێنەی ئالان دەبێتە هۆی ڕەنگكردن و زیندووكردنەوە و چالاككردنەوەی هەموو ئەو وێنانە و جارێكی لە پانتاییی هونەر و ئەدەب و هەڵوێستی مرۆیی و ویژدانی دا ڕۆڵ دەبیننەوە، جارێك وێنەی ئالان كڵپە دەدا بە گڕی خامۆشی سۆز و هەڵوێستی عاتیفی توند دەكاتەوە، جارێكی تر بە بیانووی بێگووناهی و ئاوەڵاییی دەروازەی بەهەشت بۆ ئالان و ئەوانی تر، ئەم ڕووداوە و ئەم كاراكتەرە گرینگە، قورستر و تراژیدیتر لە ڕووداوی خنكان، بە مەرگ دەسپێررێت و خەون و پرسیاری ئالان، كە دەبوو لە ویژدانی هەموومان دا تا ئەبەد بژین، بەم ڕۆمانسیەتە لە هەڵوێست و غەیبانیەتە لە بیركردنەوە دەكوژرێ و هەرگیز بە جیدی دەنگی ئالان لە ناخ و گەرووی ئێمەوە بەرز نابێتەوە بڵێ (خودایە، جەنگاوەرەكانت بۆ وا دەكەن؟)

Previous
Next

Leave a Reply