Skip to Content

Tuesday, June 22nd, 2021

وڵات ….نەوزاد بەندى

Be First!

 

(1)
خۆشم ئەوێى وڵاتەکەم ،
بەڵام
بەدزى خێزانەکەمەوە ..

(2)
چەند شیرینە لام ،
دار و بەردى وەتەنم ..
بەڵام هیچیان ،
نەبوونە دەلیلى
دیژلەمەیەکم ..

(3)
ئەى نیشتمان
ئەتخەمە ژێر پێمەوە ،
بە دەست خۆم نیە ،
هێزى ڕاکێشانى زەوى ،
ئەوەم پێ ئەکا

(4)
نێوان من و خاک
پارچە لاستیکێکە ،
پێى ئەڵێن :
پێڵاو

(5)
مراویەک بکرێتە
وەزیرى ڕۆشنبیرى ،
ئەوەى لە زێرابدا مەلە نەکا ،
ناتوانێ شاکار بنوسێ ..

(6)
دواى شۆڕش ،
هەموو خۆیان بۆیاخکردەوە ،
بە ڕەنگە تازەکانى حیزب ..
تەنها چۆلەکە ،
بەردەوام بوو لە ڕیقنە کردن ،
بە هەموو ڕەنگەکاندا

(7)
بۆ ئەوەى نەتکوژن ،
پێویستە وەک مارمێلکە
بژیت

(8)
شاخى سەوز و
بەرزى گۆیژە :
بۆیە وات پێدەڵێم ،
چونکە بێجگە لە تۆ ،
نەیانهێشتوە شاخى تر ببینم ..
چونکە دیلم ..

(9)
خۆشەویستى زۆر تاوانبارە ،
چونکە ئەچێتە ئەندامێکەوە ،
کە ماندووترین و
سەرقاڵترین ئەندامە ..
خۆشەویستى زۆر تاوانبارە ،
لەبەرئەوەى ئەچێتە دڵەوە

(10)
خۆزگە نیو ئەوەندەى برنج و شلە ،
بیر و باوەڕ
بەکاربهێنرایە ..

Previous
Next

Leave a Reply