ئیتر هه‌ر هی منبه ….. کاردینا
ده‌ستێك بخه سه‌ر سنگی ئاسمان…..
له باوه‌شی مۆسیقایه‌كی سپیت ده‌گرم
لێره‌وه من له‌سه‌ر ئه‌و دیوه‌ی ناخت بنوسه‌وه
كه بۆنی ڕابڕدووی نه‌گرتووه…..
مه‌ترسه كاتژمێر پڕده‌كه‌م له سه‌وزاییه ئه‌به‌دییه‌كانی به‌هه‌شت و
دره‌ختی پیاوه‌تیت دڵنیابوون ئه‌گرێته‌وه
(ئیتر هه‌ر هی منبه)……..
به‌قسه‌ی دوێنێی ڕقێ مه‌كه كه خه‌مۆكی له كراسه جێماوه‌كانیشی ئه‌چۆڕێ
چیتر حوكمی سپێده‌یه‌كی سپی مه‌سپێره به ڕاڕایی
پڕم له هه‌نگاوی زیندووبونه‌وه ……..
حه‌قیقه‌ته گوێ گرتن له ئێسته
حه‌قیقه‌ته باوه‌شكردن به نارنجیترین داواما
كه وا له‌ودیو په‌نجه‌ره تامه‌زرۆكانی ئه‌م شه‌وه‌وه چاوه‌ڕێته
دڵنیابوونت له دان پێدانانی گه‌ڵا ئه‌چێت
له‌به‌رده‌م نزای ته‌رزه تامه‌زرۆكانی شه‌ودا
له تێكه‌ڵبونی قاقاكانی به‌هه‌شت ئه‌چێت به كاتژمێری دۆزه‌خ
پاڵكه‌وتنم له باوه‌شی بڕیارێكتا كه ته‌مه‌نناكانم ئه‌داته به‌ر بارانی دڵنیابوون و
ده‌ستی ڕوبار ئه‌گرێت به‌ره‌و ئاسوده‌یی…….
(ئیتر هه‌ر هی منبه)……
ئه‌مشه‌و له باوه‌شی ئه‌وشه‌وه‌دا ڕاكشاوم كه ته‌نانه‌ت نزاكانی_ با_ش ئه‌گاته خودا
(ئیتر هه‌ر هی منبه)…..
فرمێسكه ترساوه‌كانت هه‌ڵواسه به‌ته‌ناف و ده‌رگا ژه‌نگاویه‌كانی ناو ماڵه چۆڵه‌كه‌ی دوێنێیا و جێی بهێڵه و
ده‌ستی نارنجیترین نزام بگره……..كاردینا
