دار …. به‌ندی عه‌لی

ئه‌شێ وه‌ستایه‌کی نه‌جاڕ
بێشکه‌یه‌کی لێ دروستکا
که‌شتیه‌کی بێ چارۆکه‌ی ئه‌فسوناوی
له‌ئۆقیانووسه‌ ڕوونه‌که‌ی مناڵیداو
بۆ ئه‌و خه‌ونه‌ بێگه‌ردانه‌ی
لێواو لێون له‌به‌رائه‌ت
هه‌رواش ئه‌شێ ، گۆچانێ بێ
له‌پاییزی ته‌مه‌نماناو له‌و ڕۆژانه‌ی
گه‌ڵای زه‌ردی یادگاریمان
لێ ئه‌وه‌رێ
وه‌ک هاوڕێیه‌کی به‌ئه‌مه‌ک
کێوی هه‌زار به‌هه‌زاری خه‌مه‌کانمان
بۆ هه‌ڵگرێ
 هه‌رواش ئه‌شێ ، مێزو کورسی و
ته‌خته‌ی ڕه‌شی ئه‌و پۆله‌ بێ
له‌یه‌که‌مین به‌ربه‌یانی مه‌عریفه‌وه‌
له‌وڕۆژه‌وه‌ی که‌دارا دوو داره‌که‌ی دی
هاوسه‌فه‌ری گه‌شه‌ی هۆش و هزرمانه‌
تائه‌و ڕۆژه‌ی
زه‌نگی کۆتایی دوا وانه‌ی
قوتابخانه‌ی ژیان لێئه‌دا

هه‌رواش ، ئه‌شێ
هاوڕێیه‌کی له‌خۆبوردووی به‌جورئه‌ت بێ و
له‌شه‌وێکی بێپایانی زستانێکا
که‌ته‌نانه‌ت ددانی فریشته‌کانی میهره‌بانیش
له‌سه‌رمانا جێڕه‌یان دێ
ئه‌و گڕ له‌به‌ده‌نی خۆی به‌ردا
تا چه‌قه‌ڵه فرسه‌تپه‌رسته‌کانی کزه‌و
زوقم و شه‌خته
زه‌فه‌ر به‌روحی له‌رزیوی ئێمه‌ نه‌به‌ن
دار ، له‌هه‌موو ئه‌م تابلۆیانه‌یا جوانه
ته‌نیا له‌و ساته‌یا نه‌بێ
ئه‌بێ به‌تووڵی قه‌فه‌س و له‌نێویدا
مه‌لێکی مه‌ئیووسی ئه‌سیر
   چریکه‌ی جودایی ئه‌چڕێ 

.. به‌هاری 2011