Skip to Content

Saturday, May 21st, 2022

كه‌پرێك بۆسێبه‌ری رۆحم …كه‌ژاڵ ئیبراهیم خدر

Closed

 

1
هه‌رجارێك تریفه‌ی مانگ
دڵداری له‌گه‌ڵ نمه‌ی
شه‌پۆله‌كانی ده‌ریا ده‌كات
ده‌بمه‌ چڵێ نێرگزی، ده‌ستی عاشقێك
ده‌بمه‌ كه‌پرێك بۆسێبه‌ری
ته‌نهایی رۆحی خۆم
2
هه‌ركاتێك له‌پشووی كه‌نارێكی ئه‌رخه‌وانی
ئاسمان وورد ده‌بمه‌وه‌
گوڵێكی دڵ شكاوی په‌نجه‌ره‌ی
رۆحی خۆم ده‌بینم
نیشتمانێك له‌ئێوارانی تاریك ده‌بینم
نیشتمانێك له‌غه‌مگینی
وه‌رزی چوارساڵه‌ی خۆی
3
كاتێك نیگه‌رانی باوه‌ش به‌خه‌یاڵی
عه‌شقما ده‌كات
تۆ هێلانه‌یه‌كی پڕیت
له‌شه‌ونمی به‌ربه‌یان و
ئاوی روباری گه‌ڵای رۆحی من
4
كاتێك نۆته‌ی ده‌نگیت
گۆرانیه‌كی پڕ له‌نمه‌ی باران ده‌چڕێت
سه‌مای خه‌یاڵی تۆم بیرده‌كه‌وێته‌وه‌
كه‌پڕن له‌سپێده‌یه‌كی جوانی
دوركه‌وتنه‌وه‌و یاده‌وه‌ری
5
من ماڵێكم هه‌یه‌ له‌ته‌رزه‌یه‌ك باران
دیده‌نیه‌كی خامۆش له‌تاریكی
له‌هه‌ركۆڵانێكی ناوه‌ختا بتبینم
نیگایه‌ك له‌ قه‌ده‌ری خۆمت بۆباس ده‌كه‌م
5
ده‌تدۆزمه‌وه‌ ئه‌گه‌ر ره‌نگت له‌لقی دارێك بچێت
له‌په‌ڵه‌ هه‌وری ره‌وه‌نده‌كانیشدا
بۆنی گوڵێكی ده‌ستی ژنێكیش بكه‌یت
سیمای سه‌رو قژت ده‌بینمه‌وه‌
وه‌ك ئه‌وه‌ی هه‌ناسه‌م به‌ڵێنم پێ بده‌ن
له‌م ماڵئاوایی و ئاوابوونه‌
په‌نجه‌ره‌ی دڵم ده‌كه‌مه‌وه‌
تاكوو جارێكی تر بزه‌و خه‌نده‌ت ببینمه‌وه‌
6
ده‌ڵێن له‌ وێنه‌یه‌كی تۆراوی شه‌ودا
له‌كۆچی هه‌ورێكی توڕه‌دا
جۆره‌ غه‌مگینیه‌ك هه‌یه‌
له‌سه‌ر باڵه‌ ته‌نكه‌كانی په‌پوله‌
هه‌ڵمان ده‌گرێ
له‌ناو باخچه‌ جوانه‌كانی گۆڕستانیش
خۆشه‌ویستی دارستانیش هه‌یه‌
پشكۆی دڵمان بۆخۆی دێنێ
7
له‌سه‌ر پشتی ئه‌سپێكی سپی و
له‌شێوه‌ی خه‌ون و خه‌یاڵێكی
باڵ هه‌ڵگرتوودا
له‌نیگاری هه‌ناسه‌ی به‌فرانباردا
دێمه‌وه‌ لای تۆ
له‌ژووری پڕ له‌باخی كتێبخانه‌كه‌تدا
مانگی غه‌ریبی ده‌بینم
له‌وه‌رزی كڕێوه‌و سه‌رمادا
پرووشه‌ی شه‌ونمی به‌فره‌و
ده‌بمه‌ میوانی روبارێك
ده‌مباته‌وه‌ بۆشه‌ڕه‌ تۆپه‌ڵی منداڵی و
كازیوه‌ی عه‌شقێك ئه‌رژێته‌
خه‌یاڵی خۆمه‌وه‌
8
له‌نێوان پرشنگی روناكی خۆردا
دڵت له‌هه‌ڵاڵه‌و گوڵاڵه‌ی
تریفه‌ی مانگه‌ شه‌و ده‌چوو
ناسك، ناسك، ته‌نیا، ته‌نیا
بوونه‌لقێكی جوانی گوڵ
تۆش به‌چه‌ند رسته‌یه‌كی شه‌رمنه‌وه‌
ملوانكه‌یه‌كی مرواریت كرده‌
گه‌ردنی شعره‌كانم
به‌هه‌ناسه‌یه‌كی غه‌مگینه‌وه‌ پێت ووتم
ژیان سه‌ره‌تاو، كۆتایی خۆشه‌ویستیه‌
9
له‌زه‌نگی كاروانی گه‌ردن ئازادیدا
ئه‌و شعری ته‌ڕی ده‌نوسی
له‌هه‌تاویش گلێنه‌ی چاو
چونكه‌ گوڵێك بوو له‌ دارسێوو
وورده‌ ئه‌ستێره‌ دایپۆشی
به‌رۆژیش له‌هه‌موو باخچه‌یه‌كدا
سوور سور ئه‌چێته‌وه‌
10
هه‌روه‌كوو چۆن
خۆشه‌ویستی باران بۆزه‌وی
پێده‌شتی سه‌وزایی بۆ گوڵاڵه‌كان
به‌رده‌وامه‌و ته‌واو نابێ
عه‌شقی نێرگز بۆبه‌هارو
هه‌ور بۆئاسمان،
هه‌ر به‌جۆره‌ش عه‌شقی من
بۆچاوی تۆ ته‌واو نابێ
11
تۆ هه‌ڵهاتنی ئه‌و خۆره‌یت
له‌ناو دیده‌و دڵی مندا
سوڕانه‌وه‌ی زه‌ویت
به‌ده‌وری سه‌ری ووشه‌دا
من ماڵئاوایی ناكه‌م
له‌خه‌یاڵێ كه‌رۆژانه‌
له‌مێشكمدا دێت و ده‌چێ
تۆئینجانه‌و گوڵدانێكی
به‌ر په‌نجه‌ره‌كه‌ی ژووره‌كه‌می
تۆ ده‌رگای كراوه‌ی هه‌تاویت و
به‌سه‌ر سینه‌مدا ده‌ڕوانی

Previous
Next