بەرەو کۆنگرەی حزبی شوعی …بەشی دووەم

شٶڕشی ڕزگاری کوردستان  تێکۆشانی ڕادیکاڵی گەرەکە ، نەک بیرۆکراسی
ڕونە ئەمڕٶ خەباتی شوعییەکان لە دیدگای خەباتی سۆسیالیستی جیهانییەوە، پەرەپێدانە بە شۆڕشی بەردەوامی ڕزگاری نیشتمانی کورد و زیندوڕاگرتنی سەربەخۆخوازی و جوداخوازی هاوڵاتیانی کوردستان بۆ دامەزراندنی کۆماری دیموکرادی هەر چوار پارچەی کوردستان لە کۆنفیدراسیۆنێکی سۆسیالیستیدا. ئینجا  ئەم ئامانجە شٶڕشی گەرەکە، تێکۆشانی ڕادیکاڵی و خەباتی قەڵەم و چەکی هۆشیاری مارکسیستانەی گەرەکەو،  بێگومان بەوە ناکرێت لە مقەڕەکاندا دانێشن  وەک فەرمانبەر و چاوەڕوانی وەڵامی دیوانی سەرۆکایەتی باڵی ڕاستی ناسیۆنالیستی کوردی و بە کەلتوور دەرەبەگەکان بکەن ، وەک ئەمڕۆ لە هەرێم لەبەرچاوە،  ئێمە فەلسەفەکەمان جیاوازە و وا فێرمان دەکات دەبێت خومان بەدەستی خۆمان بیکەین و بەرپای کەین و بیگەینێ ئەو سەربەخۆییەی لە مارکسیزمەوە فێری دەبین، ئەمانە خۆمان دیاریمان نەکردن و نەهامەتیەکان کە یەخەی ئەم میللەتەیان گرتووە  داگیرکەرانی وڵات و دەسکلاکانی ئیمپریالیزمی جیهانی بەسەر ئەم گەلەدا سەپاندویانەو،  ئەوە  فەهدەکان و  ئاپۆکان و ئارامەکان و شەهابەکان و سەلام عادلەکان و ئازاد هەورامیەکان و سیروان تاڵەبانیەکان و بێرتان و زییلانەکان و سدیقی کەمانگەرەکان و کاک فوادەکان بوون درکیان پیکردبوون و بڕیاری تێکۆشانی بەردەومایان بۆدان ،  دەی ئەمەیە کە مارکسیزم لە هەموو ئایدۆلۆژیا و دنیابینیەکانی دیکە جیا دەکاتەوە و،  ئازادی خەڵك و هەژاران و کرێکاران بەدەستی خۆیان بە سەرکردایەتی ئەو ڕێکخراوانەی کە لەخۆیان پێکهاتوون لێوەیە مژدەی ڕزگاریان بانگەواز دەکەن. وەلێ  ناڕۆشنی سیاسی ئەم  حزبەی ئەمڕۆی خەڵکی کوردستان گەواهی کەلتوورێکی سیاسی دیکە دەدەن،  ئەوەی هەیە زۆرجاران ئەنتی – سۆسیالیستی و تەنانەت وەک ناسیۆنالیست ڕاستڕەوەکان سیاسەت ئاراستە دەکات.
  لە دوای ڕاپەڕینەوە درێژبۆتەوە پێموایە ئەم کەلتوورە بۆ ناو شوعییەکان ، کە لە ئاودیوکردنی سەروەت و سامانی میللەتەوە بە ناوی “بەرەی نێشتمانی”ەوە دەستی پێکرد.، مەبەستم لەو کەلتوورەیە کە حزبی دابەش کردووە  و بە ئاراستەی سیاسی لە نێوان پارتی و یەکێتیدا دابەش بوون و یاری دەکەن هەنوکە، ئەم نا ئەو ، کە  لە نێوان محەڵی سلێمانی و هەولێردا درکی پێدەکردێت،  کە گەواهی ئەو قەیرانە سیاسییە دەدەن کە کورد و ناوچەکە و تەواوی ئەحزابە کوردیەکانی دیکەش وەک خۆ بە “چەپ” زانەکانی زەحمەتکێشان و  تەنانەت سۆسیال دیموکراتەکانیش تێیکەوتن، لە ڕاستەوە بۆچەپ ئاسانە ببینیت کە ئەو کەلتوورە سیاسییەی پارتی و یەکێتی بۆ کوردیان هێناوە، بە دەستووری داگیرکەران و سەرمایە و قازانجخوازە ئیمپریالیستەکان ئاراستەی سیاسەتی ئەم میللەتە دەکەن و لە خزمەتی مەدا نییە وەک چەوساوانی کورد. هەر بەدەستووری ئەوان دابەشکردنیان کردە ناسنامەی سیاسی ئەم میللەتە نەگبەتە. تەماشاکەن، ئەوەتا شەڕیانە لەسەر سەربەخۆیی کوردستانیش لە کاتێکدا ئەمە خەونی میللەتێکە، ئینجا ئاسانە ببینیت کە لە ترادسیۆنی خۆیانەوە و لە تەجروبەی ٢٠ ساڵی ڕابردوودا پارتی و یەکێتی لە کوردستان لە گەمژەیی و دواکەوتویی و ناهۆشیاری و نەخوێندەواری سیاسی و پێکدادانی ریال مەدرید و بەرشەلۆنە و نەگبەتی بۆ ئەو خەڵکە چی دیان نەکردووە کە  لەسەر ئاستێکی بەرفراوان درکی پێبکەین و هەناگاوی نوێخوازی و پێشکەوتوخوازی جدی و بنەڕەتی و بنچینەی بن، نەک دیموکراتیش.  جا ئەمە لەکاتێکدا،  کە درووستکردنی هۆشیاری سیاسی بۆ گەلێکی هێندە بەشمەینەت مەرجی پێویستن بۆ زیندووڕاگرتنی بیری دیموکراسی و نوێخوازی لە ناو خۆیدا، چونکە هەمیشە هێرشی لەسەرە ئەم نەتەوەیە و  دەکرێت زۆر دڕندە دەرچێت گەر ئەو هۆشیاریە نەبێت، بەڵام بەداخەوە سانایە تێبگەین کە ئەو دابەشبوونە حزبی و نامۆڕالی و کەلتووریە سیاسیە تەسکبینەی پارتی و یەکێتی بۆ خەڵکی کوردستانیان درووستکردووە ئەمڕۆ وەکو  خۆیان  بردویانەتە ناو بزووتنەوە سیاسیەکانی دیکەی کوردستانیشەوە، کە هیوادارم حزبی شوعی لەمە زۆر زیاتر ئاگادار بن، چونکە  چۆن ئەمڕۆ ئەحزابەکانی هەموو لەت لەت کردووە  لە کوردستانی ئێران بۆ نموونە کە یەکێتی وپارتی باڵادەستن بەسەریانەوە بەوەی لێرە “پەنابەرن” هەرچەندە وڵاتی خۆشیانە.  ئینجا ڕوونە چونکە سەرمایەکە لای پارتی و یەکێتیە، حزبی شوعی کاتیەتی زۆر ئاگاداربێتەو و هۆشیار بێت لەو گەمە سیاسییە، گەر نەتوانێت ببێتە ئەڵتەرناتیڤی ئەو نەهامتیانەی بزووتنەوەی ناڕزگاریخوازی کوردی پارتی و یەکێتی بە کوردی دەکەن، چارەنووسی ئێمە و خۆشی لە زۆرێک لە حزبەکانی ئێران یان سۆسیالست یان زەحمەتکێشان لە هەرێم باشتر نابێت.
با بنواڕین،  ئەم حزبە  بە چ میتۆدێک دوای پارتی و یەکێتی کەوتووە و سەرمایەکەیان  لەوانەوە بۆچێ بۆ بێت؟  پاشان لۆژیکێکی زۆر سادەی مارکسیستی هەیە کە ئەم حزبە چونکە هەر سۆڤەیەتی جارانی دۆشیوە لە ڕووی مادییەوە،   پێدەچێت لەبیری کردبێت کە گەر لایەنێک ئابووریت کۆنترٶل بکات، سیاسەتیشت کۆنترۆل دەکات و ئاراستەکانت بۆ دیاری دەکات، دەی بۆ لەگەڵ یەکێتی و پارتیدا و لەو حکومەتە و دیموکراسییە کارتۆنییە ئەمریکیە نوێ – لیبڕالەدا کە داردەستی ئیمپریالیستە لە ناوچەکەو دەیانەوێت پەکەکە و مارکسیەکانی دیکەش چەک دابنێن و ملشۆڕ بن و پاشەکشە بە بەرگری مرۆڤەکان بۆ ماف و ئازادیەکان و سۆسیالیزم بکەن، ئەم حزبە چی دەکات لەگەڵیاندا و بۆ بە ڕەحمی ئەم ئەحزابە ڕاستڕەوانە ئاراستە دەکرێت سیاسەتەکانی ؟،لە کاتێکدا لە ڕووی فکری و ئابووری و کۆمەڵایەتی و کەلتوورییەوە، دەکرێت بڵێین هیچی ئەوتۆی لەگەڵیاندا نایاتەوە ؟  ناڵێم بیرۆکراتەکان و ئەندامانی سەرکردایەتی ئەم حزبە بە ڕەفتار و جلوبەرگ و کەلتووری سیاسیان لەوان  ناچن، چونکە زۆرێکیان وەک وان هەر دەڵێی کۆپی یەکن، بەڵام  لە پرەنسیب و لە دنیابینی و لەوەی ئێمە وەک مارکسیەکان گەرەکمانە و ئەم میللەتە ببێتە خاوەنی خۆی و چارەنووسی خۆی، لەگەڵ ئەوەی ئەواندا زۆر جیاوازە، دە کەواتە لە ناویاندا چی دەکەن؟
 لە کاتێکدا هەموو مارکسیستەکانی دنیا داوای خۆماڵیکردنی بازاڕ و ئابووری و پلاندانانی سۆسیالیستی و خوێدننی بێبەرامبەر و تەندروستی کوالیتی بێبەرامبەر و کار بۆ هەمووان و نوێخوازی دەکەن، کەچی لە کوردستاندا بەداخەوە کە ئەم حزبە ئێستاش دوای ئەو هەموو شکستە سیاسی و پاشەکشەیەی کە ئەمڕٶ بەرجەستەدەکرێن و پیوەی دەناڵێنیت، سەرکردایەتیەکەی ئامادە نییە بێت لە بەیاننامەکاندا بە عەلەنی بڵێت ” نا بۆ تایبەتیکردنی مافەکانمان، خوێندن و تەندروستی مافە و ناشێت بکرێنە کاڵای بازاڕ ئەمە بێمۆراڵیە بەدەستی خۆمان بە خۆمانی دەکەین”
 بەداخەوە، وەک باسم کرد لەبەر هەندێک ئیمتیازات و پێگەی حکومی و حزبی و ماددی سەرکردایەتی ئەم حزبە ئەمڕٶ وای لێهاتووە لەبۆ زۆر شتی کەم نەک سازش بکات، بەڵکو خەریکە بەدەستی خۆی خۆی کاڵدەکاتەوە لە گۆرەپانی سیاسی لە باشووری وڵات و لە کۆمەڵگەی کوردیدا، ئینجا ناشزانین گەر رێککەوتن لە پشتی ئەم سازشکردنانەوە هەبێت یان نا؟  چونکە وەک باسمان کرد، لە کۆبونەوەکاندا، کۆمەڵگە و ئەندامنی حزبیش هیچ زانیاریەکیان لەبارەی باسەکانیانەوە نییە. بۆ نموونە لەسەر کەرتە تایبەتیەکانیش کە دەنگۆ هەیە سازش کرابێت ، ئەمانە دواتر دەردەکەون گەر وابن، تەنها هیوام ئەوەیە کار و کرداری بیرۆکراتەکانیان ئەمڕٶ لەوە زیاتر نەبنە بار بەسەر کۆمۆنیزم و مێژووی خودی حزبەوە، چونکە زۆر نا- شوعیانە سیاسەت دەکەن و  دواجار هەر شوعیەتیش باجەکەی دەدات، ئەوەتا ئەمڕٶ فزەی لێوە نایەت باس  لە خۆماڵیکردنی ئابووری و دیموکراسی خۆیی بکات کە نەک داوای شۆرشگێڕی نین، بەڵکو زۆر زۆر ڕیفۆرمیستن و سۆسیالیست دیموکراتەکان لە ئەوروپا بەتایبەتی لە سکاندنافیا داوای ئەوانە دەکەن کە حزب لە هەرێم هەر شەرمی لێدەکات ، بەڵام هیواخوازم ئەمە نیشانمان بدات، لە دیدگای منەوە لەدەرەوەی حزب، کە حزب چٶنە و ئیشکالاتەکانی چین و بۆچ پێویستە گۆڕانکاری ئەنجامدەن لەحزبدا لەو کۆنگرەیەی کە بەڕێوەیە.
ئابووری خاڵێکی زێدە گرنگە کە گەر لە حکومەتیشدا بیت دەتوانیت بانگەوازی بۆ بکەیت، بەڵام بەیاننامەکەی پار سالێ حزب، زۆر گاڵتەجاڕانە بوو لەسەر ئابووری بازاڕ، چونکە بانگەوازی دەکرد : ” جاودێری کەرتی تایبەت بکرێت”، ئینجا خۆ سەرمایەدارنیش ئەمە دەکەن ؟ ئێکسۆن  مۆبیلو  شێل و سێلتیک پێترۆلیۆمیش ئەمە دەکەن؟  پێویستە جەربەزانە، سیاسیانە، بە ترادسیۆنی شۆڕشگێری مارکسیستانە بێنە مەیدان و بڵێن نا بۆ کەرتی تایبەت، نا بۆ ئابووری بەئەجێندەی ئیمپریالیست، نا بۆ ئەوەی کە بازاڕ چارەنووسمان دیاری بکات نا، دەبێت  خەڵكی ئازادبن کە خۆیان  چۆن بەدەستی خۆیان پلان بۆ ئابووریان دادەنێن و خۆیان خاوەنی ئابووری و ئەو بەرهەمانە بن کە خۆیان درووستی دەکەن لەبۆ خۆیان و لەبۆ مرۆڤایەتی، نەک بازاڕ چارەنووسمان دیاری بکات ، کە کۆمەڵێک بەڕێوەی دەبن و یان کۆمپانیاکانی داگیرکەرانن  و هەموو سەرمایەکانیان  بۆخۆیان قۆرغکردووە و خەڵکی وەک مێگەل لێوە پێ بەڕێوە دەبەن، ئەمە ئەلف و بێی زێدە سەرەتایی ئابووری مارکسیسزمە ، بەڵام حزب بەداخەوە بەیاننامەکانی زۆر لەمانە خاڵین و ، ئەوەندەی لە بەیاننامەی پارتی و یەکێتی دەچن بەیاننامەکان هێندە ئەوەندە بەلای نەک شۆعیەت، هەندێک جار بەلای پرەنسیبەکانی سۆسیال – دیموکراسی ئەوروپای ڕۆژئاواشفا ناچن.  بۆیە ئەم حزبە ئەمەندە بەرەو ڕاست چووە خەریکە  مێژووی خۆی و خەباتی سیاسی و حزبی و کۆمەڵایەتی و سایکۆلۆژیە مارکسیستەکانی نەک هەر وەلا دەنێت، بەڵکو لێی بەئاگا نییە و خۆی لێ گێل کردوون. 
ئەەم ئیشکالاتەکانن گەر لیی بەئاگا نین، یان راستییەکەی ئەوەیە  “کە کاکە ئیتر حکومەتی هەرێم  پارەکەی لایە و ژیانی هەندێک هاوڕێیانی خۆش کردووە زۆرێکمان ئیشەکانمان ماشیە و  ملکەچی پلانە سیاسی و ئابوورییەکانی ئەوانە دەبین کە لە دەسەڵاتدان.” دەی ئەمە جیاوازییە جەوهەریەکە نییە لە نێوان سۆسیالیزم و سەرمایەداریدا؟ لە نێوان کەلتوور و نرخە کۆمەڵایەتیەکانی کەرتی تایبەت و کەرتی گشتیدا؟ لە نێوان ئەوانی خواداپێداوان و ئێمەی نەدیدکەدا؟ سامانی خەڵك بۆ خەڵك نەک بۆ کۆمپانیاکان، سیاسەتی کۆمۆنیستەکانیش لەم دیدگایەوەیە  دێت بازاڕی بەناو “ئازاد” بە تەواوی و مۆرالی سیاسی و کۆمەڵایەتی و سایکۆلۆژیەتی نوێ -لیبڕاڵی  ڕەت دەکاتەوە کە لە نەوەدەکانەوە سەرچاوەی نەهامەتیەکانن بۆ مۆرڤایەتی، چونکە ئەو بەناو “دیموکراسی بازاڕە” پلانی نییە و کەمینەیەکی سەرمایەدار و دەرەبگ و نوێ – لیبڕاڵی  قەڵەمفرۆش و خۆفرۆش کۆنتڕۆلی دەکەن و لە هەموو دەرفەتێکیشدا دوا هەوڵیان دەخەنە گەڕ بۆ ئەوەی دیموکراسی ئێمە و  تێکۆشانی سۆسیالیستانە و خەباتی کۆمۆنیستانەی ئێمە و گەلانی ژێر دەستەو کرێکارانی دنیا زیاتر پاشەکشە پێبکەن بە سیاسەت و ئابووری و هێز و باڵادەستی سەربازیی و دەزگا پۆلیسی و ئیستخباراتیەکانیان، بەڵام کاتیەتی چەپ، مەبەستم لە چەپ فەقەد کۆمۆنیستەکانە لێرەدا بێگومان ، نەک سۆسیالیست – دیموکراتە خۆفرۆشەکان کە کۆمۆنیستەکانیان لە سلێمانی لە هەزارەی سێهەمدا شەهید کردن، ئەم چەپەی خۆمان ئیدی کاتیەتی بێتەوە مەیدان  و دیسانەوە بە ترادسیۆنی ڕاستەقینەی خۆی پێناسەی شۆڕش و بەرەنگاریەکانمان بۆ بکاتەوە و، لەو خەبات و تێکۆشانانەی لە پێشمانن ئاگادارمان کاتەوە و  ڕیکماخات و ئامادەکاری جدی بکات، چونکە سەرمایەداری وا تازە خەریکە لەم ناوچانەدا گەشە دەسەنێت بەڵام سەرمایەداریەکەی زۆر توندڕەوترە لەوەی تەنانەت لە حەفتاکان لە ئەوروپا هەبوو، چونکە ئەمە هەرخۆی لە بنەچەیەوە تێکشکاوە و لە نویۆرک و بۆستۆن و لەندەن و ئەسیناو دوبلین و مەدریدەوە  ئەمڕۆ پرۆتێست دەکرێت و شەرمەزار دەکرێت ئەم سیستەمە بە خەباتی مارکسیستی سەندیکایی و شۆڕشگێری ڕۆژانە ڕیسوا دەکرێت. ئەوەی ەهسە و پۆزەتیڤە بەو خەباتانە بەدەست هاتوون لە ئەوروپا و ئەمریکا .
 پێویستە ئەم حزبەش  خۆی باش ئامادە بکات بۆ هێڕشەکانی ئەم سیستەمە و نوێنەر ناسیۆنالیست ڕاستەکانی لە هەرێم ، نەک دوایان کەوێت وەک ئەمڕۆ دەبینرێت. ئەوەتا لە هەرێم خەریکە تێکۆشانی شۆرشی دیالێکتیکی سەربەخۆخوازی و ڕزگاریخوازی و جوداخوازی کورد لەنێوان خۆیاندا دابەش دەکەن پارتی و یەکێتی، کاتیەتی بەرەنگاریان ببنەوە بە سیاسەت و هەڵوێستی ڕادیکاڵانە، ئەمەش تەنیا بە ڕادیکاڵبوونی خۆمان دەکرێت، بەدەستی خۆمان دەکرێت.  دواتر ئەوانێش وەک ئێمە خۆیان با ڕادیکاڵ بکەن گەر دەکرێت، تا رزگار بن لەتەواوی و بەربەستە سەپێنراوەکان بەسەریاندا  کە شکاونەتەوە نەیهێلن و بینە ڕیزی خەباتی رزگاریخوازی جوداخوازی کوردییەوە،  بۆئەوەی  بەدەستی خۆیان خۆیان و نیشتمان ڕزگار بکەن لە دەستی ئەو سەرکوتگەرییەی ڕۆژانە بە خۆمان و هاوڕییان و براو خوشکانی هەژار و چینی زەحمەتکێشی ئەم میللەتە دەکرێت لەسەردەستی شا و شێخ و ئاسمانەکانی ناوچەکەو جیهان. کاتیەتی بڵێێن، ئیتر بەسە، بۆ پێشەوە بۆ دنیایەکی باشتر و خاڵی لە چەوساندنەوە و  لێوان لێو لە” کۆمۆنزیم” ، بە کوردیەکەی واتە کۆمۆنە،  کۆمەڵە ، یان پێکەوەبوون ، کە بۆ ئێمەی کورد لە سەربەخۆخوازی کورد و کۆمارێکی دیموکراتیکدا خۆی مانیفێست دەکات.

ڕۆژ ئەحمەد