Skip to Content

Friday, March 29th, 2024
كی باجا زمانێ‌ ستانده‌ر دده‌ت!

كی باجا زمانێ‌ ستانده‌ر دده‌ت!

Closed

 

 

 

 

به‌ری ئه‌ز دناڤ بابه‌تێ‌ خوه‌ دا بچمه‌ خارێ‌ و گرنگیا زمانێ‌ ستانده‌رد بو ده‌ڤه‌را مه‌، به‌حس بكه‌م، دڤێت به‌حسێ‌ وان گرفتان بكه‌ین یێن روژانه‌ ئه‌م ل به‌رامبه‌ر دراوه‌ستین و ئه‌م نه‌شیاین رێگه‌ چاره‌ییان بو ڤه‌ بینین. ئه‌گه‌ر دگه‌ل خوه‌ راستگو تر ژیبین، ئه‌ڤێن زێده‌تر باجا ڤی زمانێ‌ ستانده‌رد دده‌ن، هه‌ر ده‌ڤه‌را مه‌یه‌، ئه‌ڤ كه‌سێن ب بادینی دئاخڤن و دنڤیسن، به‌رامبه‌ر هه‌ر سێ‌ پارێزگه‌هێن دی یێن هه‌رێما كوردستانێ‌، كو زێده‌تر ئه‌وان ئه‌و ئاریشه‌ نینه‌ بقه‌ده‌ر ئاریشا مه‌.

ئه‌گه‌ر بتنێ‌ وه‌ك روژنامه‌نڤیسه‌ك ئه‌ز به‌حس بكه‌م و وه‌ك چاڤدێره‌ك بو نزمبونا ئاستێ‌ زانستی یێن خوندكارێن مه‌، به‌رامبه‌ر پارێزگه‌هێن دی یێن هه‌رێما كوردستانێ‌، دێ‌ وێ‌ جوداهیا زیق بینن و وێ‌ جوداهیا رێژه‌یا ده‌رچوونێ‌ كا ئه‌م ل چ ئاسته‌كین! ئه‌ز باوه‌رناكه‌م ژی فه‌رزكرنا زاراڤه‌كی ل سه‌ر یێدی چاره‌سه‌ری بیت و ئه‌ڤ تێكه‌لكرنا هه‌ردوو زاراڤان ژی دناڤ ئێكدا، وه‌ك ئه‌ڤا ل سه‌ر خویندكارێن قوناغا بنه‌ره‌تی دا دهێته‌ په‌یره‌وكرن، نه‌ رێگه‌ چاره‌یه‌، یان كو ئه‌م یێن ل به‌رامبه‌ر گرفته‌كێ‌ كو ئه‌م قه‌باره‌یێ‌ مه‌ترسیا وێ‌ نزانین.

ئه‌گه‌ر زێده‌تر ئه‌م ل ئاستێ‌ زانستی یێن ده‌رچوویێن خوه‌ ڤه‌گه‌رین، ل بسپوریا وان، تایبه‌تمه‌ندیا وان، داهێنانێن وان، ئه‌ڤا هه‌نێ‌ ژی دهه‌می بیاڤه‌كی دا ئه‌ز به‌حس دكه‌م، دێ‌ رێژه‌یه‌كا گه‌له‌كا لاواز بینین، كو ئه‌م هه‌ست بكه‌ین وه‌ك دناڤ دوو كه‌ڤانان دا ئه‌ز بێژم، ئه‌م (هه‌رێمه‌ك) جوداینه‌! ئه‌م لڤێ‌ هه‌رێمێ‌ د په‌راوێز كرینه‌ و فه‌ره‌ راوه‌ستیان ل سه‌ر دروست ببن و ئه‌ز هه‌بونا زمانه‌كێ‌ ستانده‌رد ژی برێگه‌ چاره‌سه‌ری نزانم، تا وی رادده‌ی ل پێنگاڤا ئێكێ‌ جوره‌ تێكه‌لیه‌ك دناڤبه‌را زاراڤان دا دهێته‌ دروستكرن. ئه‌و ژی بهزرا من دهنده‌ك پێنگاڤێن بله‌ز دا دهێته‌ كورتڤه‌كرن، وه‌ك پێنگاڤا ئێكێ‌ دروستكرنا فه‌رهه‌نگێن هه‌ڤبه‌ش دناڤبه‌را هه‌ردوو زاراڤان دا، ئه‌ڤه‌ وه‌ك بادینی كو تا نوكه‌ ئه‌م ل سه‌ر چ فه‌رهه‌نگێن بنه‌ره‌تی رێك نه‌ كه‌فتینه‌ و هه‌ر ده‌زگه‌هه‌ك و هه‌ر نڤیسه‌ره‌ك وه‌ك خوه‌ و پێدڤیا خوه‌، وان فه‌رهه‌نگوكان بكار ئینیت، ئه‌ڤه‌ ژی دهێته‌ كرن، ئه‌گه‌ر ل پێنگاڤا ئێكێ‌ بو ستانده‌ردكرنا زمانێ‌ كوردی ئه‌ڤ پێنگاڤه‌ بهێته‌ هاڤێتن، تا ئه‌و فه‌رهه‌نگوك ژ زاراڤێن دی ژی بن، ب قه‌ده‌ر نابیته‌ ئاریشه‌، ژبه‌ركو دروژان دا دێ‌ كه‌ڤنه‌ سه‌ر زمان.

پێنگاڤا دوێ‌ كو بمن وه‌ره‌ زور یا گرنگه‌، ده‌زگه‌هێن تایبه‌تمه‌ند بو وه‌رگێرانێ‌ بهێنه‌ ڤه‌كرن، دهه‌می بیاڤان دا، ئه‌و ده‌زگه‌هێن هه‌نێ‌ دكارا بن، كارابونا وان ژی دقه‌بارێ‌ گرنگیا وان دا بهێته‌ زانین و خه‌مخور تێدا كار بكه‌ن، ڤه‌كولین بو بهێته‌ كرن، پلان بو بهێنه‌ دانان، تایبه‌تمه‌ند و كه‌سێن بسپور سه‌رپه‌رشتیێ‌ لێبكه‌ن، به‌لێ‌ ب مه‌رجه‌كی رێكه‌فتن ل سه‌ر ئێك فه‌رهه‌نگ بهێته‌ كرن. هینگێ‌ دێ‌ ئه‌م به‌رهه‌ڤ بین بو دروستكرنا زمانه‌كێ‌ ستانده‌رد، د دروستبونا وی زمانێ‌ ستانده‌رد ژی دا، ئه‌گه‌ر لایه‌كێ‌ هه‌ڤكێشه‌یێ‌ ژ زاراڤێ‌ مه‌ لدویڤ كرمانجیا خارێ‌ چوو یان یێ‌ وان لدویڤ یێ‌ مه‌ هات، هینگێ‌ ئه‌و ده‌رگه‌هێ‌ گه‌نگه‌شێ‌ بخو دێ‌ هێته‌ گرتن، یا گرنگ ئه‌م پێداگیریێ‌ ل سه‌ر ئاستێ‌ خوه‌ یێ‌ زانستی نه‌كه‌ین و ئه‌م بیر ل وان رێگه‌ چاره‌ییان بگه‌رین، كو زێده‌تر زاروكێن مه‌ سه‌قه‌ت نه‌بن.

عبدالرحمن بامه‌رنی

 

Previous
Next
This site is registered on wpml.org as a development site.