نان و سێو و سەراب … کازم بیتوێنی
Closed
هیممەتکە
تا لە بۆنی نان و
تامی تفتی سێو و سەراب
بێبەش نەبووی
هیممەتکە
تا جریوەیەکی نارنجی
بەرلەوەی سەرێک لە تەنیایت بدات
لەناو پنجێ گیای شینی خەواڵودا بە ناوەختی نەخەوتووە
هیممەتکە و
بە سادەیی بڵێ خوایە
پێکێک شەوت بەسەر فێنکایی گوڵدا ڕشت
پێکێک شەو بە تەنها گەرووی گوڵی تەڕ نەکرد!
هیممەتکە و
بڵێ خوایە
بەسەر عاشقانەترین وەختی مندا نەهاتی
تا سەبەتەیەک چەپک چەپک گوڵەکفری ئاڵوو بۆنخۆشت پێشکەشکەم
بەسەر عاشقانەترین وەختی مندا نەهاتی
ئەو وەختانەی هێشتا
لە موتاڵای سەرابی نان و سێو نەبوومەوە!