پیاوێک … نەوزاد بەندى
(تێبینیەکى پێویست )
( تکایەکى برایانە ) چەند پارچە هۆنراوەیەک بو ، لەم پەیجە بڵاوکرایەوە تا ڕادەیەک خوێنەران بەدڵیان بو ، هەمان شیعر بۆ گۆڤارێکى ئەدەبیم نارد ، دواى پێپەڕبوونى چەند سەعاتێک ، بەم جۆرە وەڵامیان دامەوە:
slaw kak Nawzad Bandy
bbora aw nosinaat ka naardowa، nashet bo blawkrdnawa.
adabi serdam
من ناڵێم شاکارم نوسیوە ، بەڵام کەسانێک هەن ئەدەبى ئەلیکترۆنى ناخوێننەوە و ئەدەبى سەر وەرەقەى کاغەز ئەخوێننەوە ،بۆیە حەزم کرد لەسەر گۆڤارى وەرەقە بڵاوبێتەوە ، بەداخەوە هەندێک سەرنوسەر پەیدا بوون ناهێڵن ئەدەبى سەر وەرەقە بگات بە دەستى خەڵک ، خۆیان پێش وەخت بڕیار ئەدەن ..بە ڕاستى لە ڤیستڤاڵى حەوتى گەلاوێژ ، بیریارێکى عەرەب بە ناوى دکتۆر حامد الراوى بە ڕێزەوە لە هۆنراوەیەکى روانیم و لێکۆڵینەوەى بۆ کرد .. دواى ئەو ماکۆکى شێخ محەمەد و شیرین ک و گۆڤارى ئایندە و ڕۆژنامەى ئاسۆ و ئەم سایتەى دەنگدان یەک لە دواى یەک ڕێزیان لە نوسینەکانم گرتووە و بڵاویانکردونەوتەوە .. هەرچەندە لە حاڵەتى بڵاونەکردنەوەیاندا، من هیچ زیانێکم پێ ناگات ، ئەوە خوێنەرانن کە بێبەش ئەبن لە بەر و بومى فیکرى نەتەوەکەیان .. من تەنها بۆ خوێنەران بابەت ئەنوسم ، هەر کاتێک بزانم نامخوێننەوە ، ئەوکاتە بێ دەنگ ئەبم ، نەک سەرنوسەرێکى ناعیلاجى هەستێت بە نرخاندنم )
-1-
سوارى ئوتومبیلێک بوون ،
بۆ ئەوەى بچن بۆ بازاڕ ..
بەڵام بردنى بۆ گۆڕستان
-2-
جانتایەکم بە دەستەوە بوو
دەستەسرٍێکى فرمێسکاویش لە گیرفانما بوو ..
ئەو ڕۆژە لە بازاڕ ،
یەک گرام پێکەنین نەمابوو ..
نەمئەزانى چۆن هەموو وشەکانیش لەگەڵ خۆم ببەم ،
لە جیاتى ئەوان بار بکەم ،
ئەوان منیان بار کرد ..
دەرگا – دەرگا
گەڕاین و
ماڵئاواییمان لە شار کرد
-3-
بە یانییەکى جەژن ..
گەڕەکە قوڕاویەکەمان ،
بۆنى شلەى گۆشت و چکلێت و گوڵاوى لێ ئەهات ..
من نەمئەوێرا هەناسە بەم ،
لە ترسى ئەوەى نەبادا جەژن لە خەو هەستێت و
بڕوا …
نەمئەوێرا جلى جەژن لەبەرکەم ،
نەبادا لەسەرم ببێ بە ماڵ و
جەژن بڕوا ..
زاتم نەئەکرد بەخێرهاتنى میوانەکان بکەم ..
ئەمویست هەر لەناو پێخەف بمێنمەوە ..
بۆ ئەوەى کات ڕاوەستێ و
شێرەبەفرینەى جەژن ،
هەتاکو عەیامێ ،
لە کۆڵانەکەى ئێمە بیبەستێ ..
-4-
کە هاوڕێکانى مناڵیم ئەبینم ،
هەردوو چاوم پڕ ئەبن لە فرمێسک ..
بە ڕوخسار و گیرفانەکانیانا ئەگەڕێم ،
بەڵکو پارچەیەک لە تابلۆ شکاوەکانى مناڵیم بدۆزمەوە ..
بۆنیان ئەکەم ..
تەماشاى چاویان ئەکەم ..
بەڵکو سەرنجێکى مناڵیى ..
تامێکى حەلاوە تەیب و
عەمبەر وەرێت ،
بێتە ناو هەست و سۆزمەوە ..
( خۆزگە سۆپەر مارکێتێک ئەکرایەوە ،
تایبەت بە تام و بۆن و خەونەکانى مناڵى ..)
-5-
باوکم بە مەرجى دۆندرمە و سینەما و
فیلمى هیندى ،
بردمى بۆ سەرتاشین..
فیلمەکە ناوى :
(خۆشەویستى نابینا بوو )
نازانم کەى خەوم لێکەوت ،
بەڵام لەناو پێخەفەکەم ،
هوشیار بومەوە ..
-6-
پیاوێک
دیوارى لە نێوان وشە و
چاودا دروست ئەکرد ..
بۆ ئەوەى وشە قوتوکراوەکانى خۆى،
بازاڕیان نەشکێ ..
پزیشکێک ،
بۆ ئەوەى کلینیکەکەى چۆڵ نەبێ ،
هەوڵیئەدا ،
نەخۆشەکان ئازاریان نەشکێ ..
-7-
پیاوێ ،
ڕیشێکى چەناگەى دانا و
خۆى ناو نا : بیریار ..
پێش میللەت کەوت و
دەستى کرد
بە نمایش و
پاککردنى بەڵاڵوکى
شیعر و وتار ..
کە ئاوڕى دایەوە ،
کەس لە دوایەوە نەمابوو ،
هەمویان گەڕابوونەوە ،
بۆ چوار دەورى
شیعرە سەرما بردەڵە و
دەر ئەژنۆ دڕاو و
کواشیکۆر و
لوت چڵمنەکانى ناو شار ..
-8-
سەرنوسەرێ ،
بە بێ ئەوەى ئاگاى لە خۆى بێ ،
بەرگێکى سەربازى و
کۆمەڵێ داڵ و نەجمەى پۆشیبو ..
بە بێ ئەوەى ئاگاى لە خۆى بێ ،
شەڕە نیتاق و
شەڕە پۆستاڵى ئەکرد ..
ئەوەى بهاتایەتە لاى ،
ئەگەر پەپولەیش بوایە ،
ناڵى ئەکرد ..
پیاوێ بوو ..
بۆنى وردە شوشەى لێ ئەهات ..
بۆنى پاشماوەى بارووتى لێ ئەهات ..
بۆنى فلیمى ڕووتى لێ ئەهات ..
-9-
دوو ئینزیبات ،
لە شارى ڕومادى ،
دەست بەسەریان کردبووم ،
بە تاوانى لەسەر نەکردنى بێرى ..
دوو عەگاڵ بەسەر ،
پەیدا بوون و
ئینزیباتەکانیان ڕاونا ..
وتیان بە نەعلەت بن !
هێشتا وازى لێ ناهێنن کابرا بوە بە جوندى ..
بیرَى و
س ە ر ى ک ێ ر ى ..
ههههههههههههههههههههههه
ئەوە ساڵى هەزار و نۆسەد و هەشتا و نۆ بوو ..
-10-
پیاوێ ،
کاوبۆى بەلاشى یەک -دوو کەنیسەى
وڵاتێکى سکەندەنافى دەست کەوتبو..
یەک – دوو ژەم شەربەتى سێو و
پسکیتى وشکى خواردبوو ..
کە هاتەوە ،
چاویلکەیەکى خڕ و
فەردەیەک ئاردە دارى هێنایەوە و
بوو بە دەمڕاستى ئەدەبیات ..
ئیتر شیعر بو بە تلیک و
چیرۆک بو بە قومار و
ڕۆمان بو بە یانەسیب ..
-11-
– دیجلە –
کە زانکۆم تەواو کرد ،
چومە سەر دیجلە ،
تێر – تێر پێکەوە گریاین ..
مراویە کێویەکان سەرسام بون ،
کوردێکى عوسات و
دیجلەیەکى عەگاڵ بەسەر ئەوەندە هاوسۆز بن ..
بۆ بەیانى کە گەڕامەوە بۆ سلێمانى ،
دیجلە هەتاکو ئاسکى کەڵەک ،
لەگەڵما هات ..
-12-
– هاتمەوە –
هاتمەوە و
باسى دیجلەم بۆکردن ،
کە تاکو ئاسکى کەڵەک بەڕێى کردووم ..
باوکم وتى : کەرە .. کەر ..
دایکم وتى : ڕۆڵە ! باشى ؟
هاوڕێکانم وتیان : چیە ؟ خۆ بەتەما نیت
بەم زووانە ڕەقەم ببەستى ..
تەنها شیعر بڕواى پێکردم ..
وتى : ئەى بۆچى وێنەیەکتان بۆ یادگارى نەگرت ؟