لەبەر خۆمەوە ئەڵێم … نەوزاد بەندى

 

 

 

 

 

-1-

کە مەوسیمى هەڵبژاردن نزیک ئەبێتەوە ،

لە جیاتى بیر بکەنەوە ،

مۆڵەتى بیر ئەکەنەوە ..!

( بیرى یەکەم : بیرکردنەوەیە و

بیرى دووەم : بیرى ئاوە ..)

 

-2-

ژیان گیرفانێکى قوڵە ،

لە ساتێک لە ساتەکاندا ،

کە فشەکەرەکان ناویان لێناوە سەعاتى سفر ،

گیرفانەکە کون ئەبێ و

پارە و ناسنامەکەمان لێ ون ئەبێ ..

 

-3-

مرۆڤ و جرج لە یەک سیفەتا هاوبەشن ،

کۆکردنەوەى کانزا ڕەق و تەقەکان ،

نایشزانن بۆچى و

بەکارى چى دێ ؟

 

-4-

تۆم لە کوێ بینى یەکەمجار ؟ نازانم ..

تۆم لە کوێ ون کرد دواجار ؟ نازانم ..

کەى جارێکى تر ئەتدۆزمەوە ؟ نازانم ..

 

-5-

کەى لەگەڵ کرمێکدا بڕۆین ،

بۆ داگیر کردنى عەرشى سێو ؟

کەى لەگەڵ ماچدا بڕۆین ،

بۆ کەلەپچە کردنى دوو لێو ؟؟

 

-6-

تەنیایى بە گیانمدا دابەش بوو ..

بەیاننامە یاساغەکانى بە دیوارەکانى ناخما هەڵواسى ..

لە ڕووبارى سوێرى فرمێسکما ،

جلەکانى دا بە ڕەشەبا و

بوو بە ماسى ..

 

-7-

موعاناتم هەیە ، لێمگەڕێ بە لێوارى ئەم شەقامەدا بڕۆم ،

بزانم ئەڕوا بۆ کوێ ..

( ڕێگا : چیرۆکى پەیوەندى نێوانمانە ،

زەوى ئەینوسێتەوە ..

بۆمان هەیە لە کتێبخانەکەیدا ،

داواى ژمارەى مۆبایلى شوێن پێکانمان بکەین ..

بۆمان هەیە لە ئەرشیفەکەیدا ،

داواى بەشى پیاسەیەک ، هەنگاو بکەین..)

 

-8-

ڕقم لێتە بە قوربان ،

ئیتر پێویست ناکا شەڕ هەڵگیرسێنى ..

نامەوێ بتبینم .. نا ..

ئیتر پێویست ناکا خۆت بسوتێنى ..

 

-9-

بۆ دەنکە خورمایەک ،

تەیرێکى خورما خۆرەى زەلیل کرد ،

(چەند بەد ڕەوشتە ، ئینسان ! )

 

-10-

ئێرەیى بە زوحەل و موشتەرى ئەبا ، زەوى ..

چونکە ئەوان بە مرۆڤ پیس نەبوون  ..

چونکە ئەوان تاوانیان لێ ناتکێ ..

پێى وتن : چیم لێ ئەکەن ، سووتام ..

ئەوان وەڵامیان نەدایەوە ..

(ئاخر وەڵامى چى بدەنەوە ؟! )

 

-11-

هەست بە تینوێتى ئەو سێبەرە ئەکەم ،

کە لە نیوەڕۆى تەموزدا ،

لە تەنیشت دیوارێکەوە هەڵکورماوە ..

( لە تەحەمولى خوا ، بە خوا،

من سەرم سوڕماوە ! )

 

-12-

هەرچەند ئاوڕت بۆ ئەدەمەوە ، دیار نیت ،

لە چ مزگەوتێ جاڕت بۆ بدەم ،

م ن د ا ڵ ی ی ؟

 

-13-

بەردەوام ،

لە سەرەتاى هەمو شەقامێکدا ،

مەسکەت و لەبزینە و کونجى فرۆشێ هەیە ..

( ئەمە یەکێک لەم دوو واتایە ئەگەیەنێ :

یان ئەوەتا ئەو خەڵکە لە کونجى و لەبزینە تێر نابن ..

یان ئەوەتا حوکمەت، کونجى فرۆشێکى پێ تێر ناکرێ )

 

-14-

دوو شەقام ،

بە بێ سڵاو ،

یەکتریان بڕى و

یەکتریان جێهێشت و 

ئاوڕیان نەدایەوە ..

چەند خەمگینن مرۆڤەکان ،

بە هەڵەداوان ،

بە دواى نان و دەرمان و دیناردا ئەگەڕێن ..

چەند زیاتریش کۆبکەنەوە ،

دوو ئەوەندە زیاتر تامەزرۆ ئەبن ..

( هەر لەو شەقامەیش پۆلیسێک هەیە ،

بە دەمانچە ئەو خەڵکە ئەکوژێ ،

پێى ئەڵێن :

م ر د ن )