هەندێک ئیعتیراف …. نەوزاد بەندى

 

 

 

 

 

-1-

بە بنکى مەنجەڵى دنیاوە نوسام ،

نە بە کارى خواردن هاتم..

نە ڕزگارم بوو لە سووتان ..

 

-2-

زۆر دەمێکە ،

هیچ وێستگەیەک لە نێوان بەیانى و نیوەڕۆکانما نەماوە ..

هیچ کافیتریایەک لە نێوان نیوەڕۆ و ئێوارەکانما نەماوە ..

هیچ جگەرەیەک ،

لە پشت پەردەى پیاڵە چاییەکانمەوە ،

خۆى مەڵاس نەداوە ..

( تێکڕا ڕۆژەکانم ماراسۆنن ..

ماراسۆنێکى کەرانە .. ! )

 

-3-

جوانترین ساتى ژیانم ،

ئەو چرکەیە بوو ،

کە

لە

بە

ردەم کوشکى بلیتى سینەما ،

بلیتەکەم ئەکڕى و ..

سیحراویترین ڕێڕەوم لە ژیانما ئەبڕى ،

هەتا ئەگەیشتمە سەر کورسیەکى

بەر

دەم

شا

شەیەکى سپى ..

(دواى ئەوەى دەرگاوانەکە ،

بلیتەکەمى ئەدڕى )

 

-4-

سیاسەتمەدارێک

ئەیویست خەڵک فێرى هەڵبژاردن بکا

لە نیشتمانێکا

تەنانەت ناتوانیت

کیلۆیەک تەماتەى

بە هەڵبژاردن

تێدا

بکڕى ..

 

-5-

هیچ شتێ

ئەوەندەى ونبوونى مناڵیى ،

زەبرى لێ نەدام ..

( هێشتا نائومێد نەبووم لە دۆزینەوەى ..

تەسەور ئەکەم ،

بەیانییەک

لەسەر عەرەبانەیەکى تریشقە ، بێتەوە .. )

 

-6-

هێشتا 

هەڵمات و

ڕەسمى عەسابەى مناڵیم ،

پاراستووە ..

( لە خۆیشم زیاتر ،

کەس نازانێ 

لە کوێدا  هەڵمگرتووە .. )

 

-7-

زۆرجار

کە بە بەردەم  نوسینگەکانى کۆچ و گەشتیاریدا ئەڕۆم ،

خەریکە بپرسم :

ڤیزەیەک

تڕانزێتێ ..

قاچاخچیەکتان ،

لەلا دەست ناکەوێ ،

بمانباتەوە بۆ مناڵیى ؟؟

 

-8-

زۆربەى کاتەکانم ، تەنیام ..

کەچى هێشتا فرسەتێکم بۆ نەڕەخساوە ،

چاو پێکەوتنێ لەگەڵ خۆم ،

ساز کەم ..