میهرەبانیی ئازار … بایز مستەفا

تۆ چەند بە ڕەحمەوە ئازارم دەدەی !

چەند وەستایانە ،

خۆت لەسەر لەوحی تەمەنم هەڵدەکۆڵی و

ساڵەکانی تەمەنم،تەژی دەکەیەوە لە خوێن !

چەند بە هێمنی ،

شەوەکانم ،

بە گریانێکی ئێسک سوک قانگ دەدەی !

گریانێک..

خووم پێوە گرتوە و

هەموو ئێوارەیەک،

بە خەندەیەکی بەرینەوە

پێشوازی لێدەکەم !

چەند بە مەرحەمەتەوە ،

ڕۆژەکانم

ئاوەدان دەکەیتەوە بە برین !

برینی ئەو چەقۆیانەی ،

هەموو بەیانییەک ،بە دەم گۆرانی ووتنەوە

خۆم ،دەمە زەردییان دەکەمەوە و

شانازی بە تیژییەکەیانەوە دەکەم !

    **    **    **

ئای گوڵم ..

تۆ چەند بە ڕەحمی ،

لە ئازاردانی من !!!

( بایز مستەفا )  

ا