Skip to Content

Tuesday, July 23rd, 2024
ڕنوە شیعر   …    نەوزاد بەندى

ڕنوە شیعر … نەوزاد بەندى

Closed

 

 

 

 

ڕێست 

 

-1-

لە نیوەى شیعرێکا ،

ڕێستێکم دا بە ئیلهام ،

بچێ بۆ کافیتریاى سەر جادەکە ،

دو ئۆین تاوڵە و

چاییەکى ئەبو هێل بخواتەوە

ڕێستێکم دا بە دەفتەر ،

بڕواتە سەر ڕەفەى کتێبخانەکە و

گوێ لە بەسەرهاتى ئەنفالى ئەو لاپەڕانە بگرێ ،

کە کران بە لولەى پاقلە

کە کران بە ڕیکلامى حیزبیى ..

گوێ لە فیلمى دۆکیۆمێنتارى ئەو لاپەڕانە بگرێ ،

کە کرانە قوربانیى

بیرەوەرییە شاخدارەکانى

دیکتاتۆر..

لە نیوەى پیاسەیەکا ،

ڕێستێک ئەدەم بە پێڵاوەکانم ..

بۆ ئەوەى گفت و گۆیەکى کراوە ،

لەگەڵ ئەو پۆستاڵانەدا ساز بکا ،

کە بە زۆر کرانە پێى لاوەکانى ئەم وڵاتە ..

کە لە برساندا ..

کە لە ترساندا ..  لە پێیان کردن ..

لە پێیان کردن و

کوژران ..

لە نیوەى جگەرەیەکا ،

ڕێستێک ئەدەم بە دوکەڵ ..

بۆ ئەوەى داواى لێبوردن لە گەڵاکانى توتن بکا ..

بۆ ئەوەى داواى لێبوردن لەو سیە ڕەشهەڵگەڕاوانە بکات ،

کە لە گۆڕستان خەریکى ڕزینن ..

لە نیوەى تەمەنما ،

لە یادم چوو ..

ڕێستم نەدا بە چاوەکانم ،

ئاوڕێک بدەنەوە بۆ دواوە ..

مۆڵەتێ لە خوا وەرگرن و

بڕۆنەوە ..

لەگەڵ مناڵیى ،

پەرداخێ شەربەتى ترشى تەمەر هند بخۆنەوە ..

مزراحێ داکوتن ..

موشێنێ بکەن ..

شەوانى مانگە شەو ،

دەست بە دیوار و

دەست بە عەمود بکەن ..

بە وێنەکانى جۆلیانۆ جیما و ترنتى ،

ڕەسم ڕەسمێنە بکەن ..

محەلەبییەک بشکێنن و

بە سەرە سۆدە تایەى عەرەبانەیەکى تەل دروست بکەن ..

بەڵام لە یادم ناچێ ،

لە کۆتایى تەمەندا ،

ڕێستێک ئەدەم بە چاوەکانم ،

بۆ ئەوەى ئەرز و حاڵێ ،

بە فرمێسک بنوسن ..

تیایدا داوا لە هەموو دایکان و باوکانى جیهان بکەن ،

چیدى مناڵ نەخەنەوە ..

چیدى ئینسان ،

توشى موعاناتى ژیان نەکەن ..

با ئیتر 

شانۆگەریى

مرۆڤ

تەواو بێ ..

nawzadbandy@yahoo.com

 

Previous
Next
This site is registered on wpml.org as a development site.