تەواو …. نەوزاد بەندى

 

 

 

-1-

بازاڕ شتێکى تیادا نەما ، شایانى کڕین ،

پارەکان بدەنەوە بە حوکمەت ،

بە مەرجى ئەوەى بازاڕەکان داخا ..

 

-2-

شتێک نەمایەوە بە ناوى جوانیى ،

ئیجازەى بیدون ڕاتب بدەن بە گوڵەکان ..

مۆڵەتى مەفتوح بدەن بە بەهار ..

بە پاییز بڵێن با ئۆڤەر تایم ئیش بکا ..

درەختێکى ئاوس بدەن بە لیژنە ،

با سکەکەى لە بار بەرێ ..

 

-3-

وشەیەک نەماوەتەوە ، شایانى وتن ،

 ڕستەکان هەڵوەشێننەوە ،

بیانکەنەوە بە پیتە ئەبجەدیەکان و

بیاننێرنەوە بۆ فەرهەنگەکان ..

 

-4-

حاموڕابی بە دەستێکى لەرزۆکەوە ،

لەسەر دیوارێکى بەغدا نوسى :

بەغدادیەکان تەنها خەریکى میزکردنن ..

کۆڵانەکان ..

چێشتخانەکان

مزگەوتەکان

باخچەکان بۆنى میزیان لێ دێ ..

(ئیتر ئەمە نەخۆشى شەکرەیە ،

گورچیلەیان باش ئیش ئەکا ..

یان بەهۆى دیجلە و فوراتەوە ،

ئاوى زۆر ئەخۆنەوە ؟

نازانم … )

 

-5-

هیچ شیرینییەک تامى نەما ..

هەنگوین بدەنەوە بە هەنگ..

نوقوڵەکان بنێرنەوە ،

بۆ تورکیا و ئێران ..

شەکر بنێرنەوە بۆ قامیش ..

 

-6-

نەبو خوز نەسر ،

چووە خەونى مناڵێکى قەمبەر عەلى ..

پێى وت :

هەموو ڕۆژێ کە بە زیندوێتى ئەیگوزەرێنى ،

چل و چوار هەزار فریشتە لەسەرەوە ،

چەپڵەت بۆ لێ ئەدەن ..

 

-8-

جگەرە بنێرنەوە بۆ ئەمەریکا ..

با توتن بە ئیفاد بڕوا بۆ ئەستەمبوڵ ..

هەناسە ئۆکسجینى تیا نەما ،

سییەکانتان تەسلیم کەنەوە ..

مناڵیى بەرائەتى تیا نەما ،

زیندانێ دروستکەن بۆ مناڵان ..

 

-9-

عەلى وەردى ،

لە شەقامێکى بەغدا بینراوە ،

لەگەڵ کارگوزاری شارەوانى لە مشت و مڕا بووە ،

ئاخۆ کتێبەکانى بە چەند بۆ ئەسوتێنێ ؟

کارگوزارەکە پێى وتبو :

جا .. کە فەلسەفە سووتا ،

پارە بە کارى چى دێ ؟؟

پێى وتبوو : کەرە کەر ..! 

 هەزار فەیلەسوفت  بە دینارێ بۆ ئیستینساخ ئەکەن ..

دیکارتت بۆ ئەکەن بە عەدەد قازیفە ..

ئەفڵاتونت بۆ ئەکەن بە چایچى لە مەنتیقەى خەزرا ..

کارگوزارەکە هیچ تێنەگەیشتبوو  ،

وتبوى : لا حەولە وە لا قوەتە ئیلا بیلا ..

-10-

شیعر بنێرنەوە بۆ خاوەنەکەى ،

با وەکو پاراسیتۆڵ ، قوتیدا ..

زەردەپەڕ بنێرنەوە بۆ ئاسۆ ،

لە سندقێکى یاقوتیدا ..