Skip to Content

Saturday, May 28th, 2022

لە باشوری کوردستاندا ڕەوشتی سیاسی بوونی نیە!

Closed
by January 5, 2014 گشتی

 

 

 

بوونی ڕەوشتی سیاسی لە هەر کۆمەڵگایەکدا پێش مەرجە بۆ بنیات نانی کۆمەوڵگایەکی کراوە و دیموکراسخواز، چونکە ئەوە بوونی ڕەوشتی سیاسیە کارێکی وا دەکات کۆمەڵگا هەست بە بونی خۆی بکات وەک ئەوەی کۆمەڵگایە و خاوەن پێگەی تایبەتی خۆیەتی، لە کۆی بوارە سیاسی و کۆمەڵایەتی و دەرونیەکانیەوە. چونکە کاتێک ترس بوونی دەبێت، مانای ئەوەیە لەوێدا باس لەمانای ئازادی هێشتا لە ژێر ڕکێفی ترسدایە و تاک لەوێدا خاوەەن پێگە و ئاراستەی سەربەستانەی خۆی نیە. لە دوای ڕاپەڕینەوە تا ئەم چرکە ساتە، کۆمەڵگای باشوری کوردستان، لە بنەڕەتدا یەخسیرە بەدەست ئەو گەوجاندنە فرەییانەوە کە خودی دەسەڵاتدارانی کوردستان بەرهەم هێنەریەتی، دیارە ئەو گەوجاندنانە، بەمانایەک دێت، کە تاک لەوێدا لە بەرانبەر گوزەراندنی ژیانی خۆیدا، ئامادە کراوە بۆ ئەوەی بێت و لەلایەن یەکێک لە پارتە سیاسیەکانەوە تەسلیم بونی خۆی بەو پارتە ڕابگەیەنێت. کۆی پارتە سیاسیەکان لە بارودۆخ و هەلومەرجە جیاوازەکان لە مێژوی دوای ڕاپەڕینەوە،بەردەوام لە کاردا بوون بۆ دوو بارە کردنەوەی هەمان ژینگەی بە کۆیللە کردنی کۆمەڵگای پێش ڕاپەڕینی بەهاری ساڵی ١٩٩١.

بوونی ڕەوشتی سیاسی دەتوانێت کارێکی وا مەزن ئەنجام بدات، کە چیتر مرۆڤە بەڕێزەکانی وەک ، سۆران و عەبدولستار و سەردەشت و کاوە، ڕووبەڕوی تیرۆر کردنی سیاسی نەبنەوە. ئەوە نەبوونی ڕەوشتی سیاسیە لەنێو ئەو پارتانەدا کە کەسانی وەک ئەو چوار مرۆڤەی کردە قوربانی، ئەویش تەنها لەبەر ئەوەی ئەو مرۆڤانە دەیان ویست ڕەوشتی سیاسی بوونی هەبێت و چیتر مرۆڤەکانی نێو کۆمەڵگا دەست لەسەر دەست نەکەون لەبەردەم بەرپرسان و پیاوانی دەسەڵاتداردا. ئەوە نەبوونی ڕەوشتی سیاسیە لە نێو دەسەڵاتی حاکمدا، کە خودی خۆیانی پێش هەرشتێک، گەیاندۆتە قۆناغێک ،تەنها ڕیسوا بونیان بۆ ماوەتەوە، کێشە نیە لەوەی ئەوان و کۆیلەکانی ژێر دەستیان هێشتا لە دەسەڵاتدان و قوتی کۆمەڵگایان قۆرخ کردوە، ئەوانە هیچی کێشە بنەرەتیەکە نیە، چونکە ئەوانی خاوەن دەسەڵاتدار، هیند بچوک بونەتەوە، لە سێبەری خۆیشیان بە گومانن. قوڕ بەسەریەکەی ئەم دەسەڵاتە کوردیە لەوێوە سەرچاوە دەگرێت، کە کۆی بەهای بونی خۆی لە نێو عەقڵیەتی پارە خڕ کردندا دەبینێتەوە، ئاخۆ گەر مرۆڤی سیاسی بوونی هەبوایە لە نێو ئەو دوو پارتەدا دەیتوانی تا ئەم ساتە بمینێتەوە و خەریکی خۆ گێل کردنی خۆی بێت لەوەی گوایە دەتوانێت چاکسازی بکات لە نێو پارتەکەیدا؟ گەر مرۆڤی سیاسی لەنێو پارتەکانی دەسەڵاتداردا بونی هەبوایە من ئەو کات گومانم لا دروست دەبوو لەوەی ئاخۆ چۆن دەبێت هێشتا مرۆڤ گەلی مافیا ئاسا بوونی هەبێت لە نێو ئەو پارتەی، کە مرۆڤی سیاسی خاوەن ڕەوشتی سیاسی تێدایە؟ ئاخۆ کێن ئەو داڕێژەرانەی کە ناخوازن مرۆڤی وەک سۆران و سەردەشت و عەبدولستار و کاوە بوونی هەبێت لە نێو کۆمەڵگادا؟ ئاخۆ ڕژێمی بەعسیش خاوەنی هەمان ڕەفتاری سیاسی نەبوو لە سەردەمی خۆیدا؟

تیرۆر کردنی کاوە گەرمیانی لە ژێر سایەی دەسەڵاتی یەکێتی نیشتمانیدا، نیشانەی ئەوەیە ئەو پارتە بۆ یەکجاری کۆی ڕەوشتی سیاسی خۆی لە دەست داوە، دیارە مێژوی ئەو پارتە مێژویەکی پاک و بێگەرد نیە، بەڵام کۆمەڵگا زۆرجار وای دەزانی ئەو ئازادیەی لەژێر نفوسی سیاسی یەکێتیدایە، بەرهەمی ئەو پارتەیە، دیارە لە ڕاستیدا وا نیە، ئەو بوونە ئازادیەی لەو ناوچانەدا بوونی هەیە، پەیوەستە بەو دەستە بژێرەوە کە هەمیشە لە خەباتدایە دژی کۆی ئەو جومگە سیاسیانەی کە خەریکن کۆمەڵگا بەرەو یەخسیر بوون دەبەن. مرۆڤ کوشتن دەکرێت لە نێو کۆمەڵگایەکدا کە ڕەوشتی سیاسی بوونی تێدا نەبێت لەلایەن ئەو دەسەڵاتەی حاکمیەتی کۆڵەگای خستۆتە ژێر چەپۆکی خۆیەوە، بەکارێکی ئاسان ببینرێت، بەڵام ئەوەی پڕ منایە لە گەیاندنی بنەڕەتی ژیانێکی ئازادانەدا، ئەوە ئەو پنتەیە، کە ئەو سیاسیانە، خاوەن هیچ ڕەوشتێکی سیاسی نین و ئەوەی هەبونیان دیاری دەکات، تەنها جوڵە نهێنیە مافیا ئاساکانیانە.

 بەڕاستی جێگای شەرم و و بێز لێبونەوەیە مرۆڤێک خاوەن ڕەوشتی سیاسی بێت، بێت و ئامادەیی تێدا بێت بەرگری لە هەقانیەت بوونی ئەو پارتە دەسەڵاتدارانە بکات. کوشتنی ئەو چوار مرۆڤە ،کوشتنی سەرجەم کۆمەڵگایە، گەر ئێمە کۆمەڵگامان هەبێت. چونکە ئەو مرۆڤانە، خواست و دواکاری و بیرکردنەوەکانیان، پڕاوپڕ بووە لە بیرکردنەوە بۆ دورخستەوەی کۆمەڵگا لە بەجەنگەڵ بوونی، ئومێدی ئەو مرۆڤە پاکانە، ئومێدی خود پەرستی نەبوو، هێندەی خواستی دورخستنەوەی ئایدۆلۆژیایی خودپەرستی بووە لە نێو زهنیەت و پەروەردەی سیاسیانە بۆ کۆمەڵگا، بەپێچەوانەی ئەو ئومێدو خواستانە، دەسەڵاتدارانی باشوری کوردستان، زۆر  لە مێژە ئەو ڕەوشتە سیاسیانەیان لە نێو پەروەردەی سیاسیانەی خۆیاندا فڕێ داوە و کاری نامرۆڤانەی خود پەرستیان کردۆتە تەنها پیشەی سیاسیان.

 تیرۆر کردنی کاوە، هەمان ئەو دەستەیە کە تیرۆرکردنی ئەو سێ کەسەی تریشی پێ ئاسایی بوو، چونکە ئەوەی بەرپرسی سەرەکیە لە نێو خودی تیرۆرەکەدا، خودی دەسەڵاتی حاکمە، گەر ئەو دەسەڵاتە بەرپرسی سەرەکی نەبێت لە ئەنجام دانی ئەو کارە نامرۆڤانەیەدا، ئەوا ئەو پیاوە بچوکانەش ناتوانن دەست ببەن بۆ کاری وا دزێوو دوور لە ڕەوشتی سیاسیانە. مێژوی ئەم بیست و دوو ساڵەی دەسەڵاتی یەکێتی نیشتمانی و پارتی دیموکراتی کوردستان، تەنها پەیوەست نیە بە تیرۆر کردنی ئەو چوار مرۆڤە بەڕێزەوە، بەڵکو تیرۆر کردنی کۆمۆنیستەکان و ئەو مرۆڤانەی کرانە قوربانی نێو جەنگی ناوخۆییان و کوشتنی هەزاران ژن لە ژێر پەردەی ناموس پەرستیدا، پەیوەستە بە خودی عەقڵیەتی سەرەکی ئەو دەسەڵاتە خۆماڵیە کوردیەوە. ئەوان بەرەیەکی ناسیۆنال  دەرەبەگی تازە پێگەیشتون بە عەقڵیەتی بۆرژوازیەوە، بۆیە پاراستنی خۆیان و چینە خوێن مژەکەیان گرنگترە بۆ ئەوان، لە کۆی ئەو کۆمەڵگایەی کە خواستی ئازادی و یەکسانی لەلا مەبەست بوو لە سەرەتای سەرهەڵدانی ڕاپەڕینی ساڵی ١٩٩١ وە. 

کۆمەڵگای باشوری کوردستان، بە ئەندازەیەک خراوەتە نێو گێژاوی سیاسیەوە، ئەوەی بەرهەمهێنراوە، تەنها ڕق و تۆڵەسەندنەوەیە، نەک کار کردن بۆ بنایت نانی کۆمەڵگای سیاسی، لەوێدا، خودی بەرەی ئۆپۆزیسیۆنی دوێنێش، بەرپرسیارێتی تەواوی دەکەوێتە ئەستۆ لە نێو ئەو گێژاوە سیاسیەدا، چونکە ئەوانیش تەنها کاریان بۆ بردنە پێشەوەی بەرهەمهێنانی کۆمەڵگایە بە ماناکانی ڕق، ڕقێک نەک بۆ بنات نان، بەڵکو ڕقێک تەنها بۆ کوشتنی ئەویتر لە پێناو ئەمی ئایندەدا. ئەم جۆرە  پەروەردانەش، ناتوانێت کۆمەڵگا ڕزگار بکات لەوەی لە داهاتودا کاوەکانی دیکە نەکرێنە قوربانی نێو بەرژەوەندیە چینایەتی و خود پەرستیەکان، پەروەردەکردنی کۆمەڵگا لەسەر ئەو بنیاتەی کە دەخوازێت هەردەم  کۆمەڵگا وەک ئەو پەروەردەیە بێت کە شوان بۆ مێگەلەکەی دەکات، دواجار ،ئەوە هەر شوانەکەیە کە مێگەلەکەی قەڵە و دەکات و بەرە و کوشتارگا دەیان نێرێت، پەروەردە کردنی کۆمەڵگا لەسەر ئەو شێوە چەمکە ناتوانێت ئایندە لەمەی ئێستا باشتر لێ بکات و کۆمەڵگایەکی لەسەر پێی خۆ ڕەوەستاو دروست بکات. بۆیە من گومانم هەیە لەوەی بزوتنەوەی  گوۆڕانیش خاوەن هەمان پەروەردەی وەک ئەوانی دەسەڵاتدار نەبێ! چونکە لە نێو پەروەردەی کۆمەڵگادا، ئاڵوگۆڕێکی وا نابینرێت کە خواستە دوور لە ڕقەکان بەڕێوەی ببەن.

کۆمەڵگای کوردستان توشی پەتای زۆر جۆراوجۆر کراوە، پەتایەک تەنها هێزێکی مەزنی سیاسی دەتوانێت کۆتایی پێبێنێت کە هەڵگری چەمکی یەکسانیخوازی و دیموکراسیەتی ڕاستەقینە بێت. یەکسانیخوازی ئەو چەمکە مەزنەیە کە دەتوانێت سەرجەم کایە گرنگەکان لەنێو کۆمەڵگادا بخاتەوە سەر پێی خۆی و کۆمەڵگای خاوەن ئیرادەی سیاسی بەرهەم بهێنێت، ئەوەی تا ئێستا دەگوزەرێت تەنها خنکاندنی کۆمەڵگایە لە نێو لیخاوی لێڵدا، لیخاوێک کە هەمیشە بەری چاو و هزر دادەگرێت و کۆمەڵگای دەستە مۆ بەرهەم دەهێنێت، بۆیە تا ئەو جۆرە پەروەردەیە بوونی هەبێت، دەکرێت هەر ساتە چاوەڕێی لە ناو چونی کەسانی بەرزی وەک  کاوە گەرمیانی و دوعای ڕەمزی ئازادی و خۆشەویستیش، بین!!!!!!

 

 

تاهیر حاجی حەسەن

٤/١/٢٠١٤

 

Previous
Next