چەند شەكرە شیعرێك هەتا سێو
بەشى دووەمى
چەند شەكرە شیعرێك هەتا سێو
زاناسامان/2008
پێنوس
لەبەردەم ئاوێنەى بەر هەیوانى روانین
خەریكى شۆردنەوەى وێنەیەكى شیعرییە
باران
بەرهەمى تەریقبوونەوەى ئاسمانە
كاتێك بەدەم پەشیمانیەوە گریان دادەكات
ئەفسانە
دەستو پێشكاندنى مەبەستێكە
لەرابردوووە بۆ ئێستاو لەئێستاوە بۆ داهاتوو
شەڕ
گوىَ هەڵخستنى شەیتانە، لەچرپەى نهێنیەكى بزێو
چاوەڕوانى
بەر بەرچدانەوەى (كات)ە ، كە خەریكە ژەنگ بە ژیان دەهێنىَ
میهرەبانى
خۆهەڵخستنى ئارامیە، لەبەردەم تیشكى چاوى رقێكدا
رۆح
راچەنینى ماسیە، لەكاتى هەڵچوونى دەریادا
پەنجەرە
دۆزینەوەى بریسكەیەكى تیژڕوە، كە ئاوێنە پەخشى دەكاتە ناو چاوى هیواوە
فڕین
هەوڵێكە بۆ لەبیر چوونەوەى ترسێك، كە عەشق دەیپەرژێنێتە ناو گەرووى بولبولێكەوە
پیاسەكردن
بۆسەى كۆمەڵێك عاشقە، كە دەیانەوێت لە گەڕاندا یەقین راوبكەن
لەیادكردن
لەبیرچوونى نامەیەكە، لەسەر سوچى كاڵى ژیان
خۆخواردنەوە
ماخۆلانگرتنى برینێكە، لەسەر دەستى كەسێكى بێزار
مناڵ
خەریكى دۆزینەوەى(هیچ)ە لەگیرفانى بەتاڵى گەورەكاندا
فڕفڕۆكە
خولانەیەكى خێرایە بەدەورى زەمەندا، بۆ دۆزینەوەى مناڵى
خەم
سەرى بچێت، جێهێشتنى لەلاى ئێمە بەسەر ناچێت
ژن
نیوەى یەكەمى بەشى ماندووێتى عەشقێكى جاویدانیە
پیاو
ئەڵقەى دووەمى سیحرێكى ئەزەلى ژیانە
تێبینى: ئەم پۆستەرانە لە ژمارە (29) ى گۆڤارى (هەنار) دا بڵاوكراوەتەوە
