بەڵێن … هێرۆ مەولوودی

 
 لەم ڕۆژانەدا
 دنیا وەك ماڵێ بچووكە بۆم
 چركەكان چاوەرێن و
 من              
                    _تەنیا_
 دەمارەكانم خویان گرتووەبەلێدان.
 تۆ
 نازانى و
 من
 ناتوانم- بڵێم.
 خۆشەویستیت بەنهێنى دێلمەوە
 وتەنیا
 بەچاوى عشق دەدوێم
 نەمدەزانى
 ڕۆژێك دادىَ
 پێكى تاڵى جیابونەوەت
 دەنۆشم
 نەمدەزانی نارۆی و
 -لێم ون دەبى_
  بەرگى تازیەى
 بێ تۆیی
 دەپۆشم.
 رۆیشتی و وات دەزانی
 شیعرەكان كۆستیان دەكەوێت و
 پیتەكان
 گەمارۆی هەستەكان نادەن.
 رۆیشتی  و
 دوای رۆیشتنت
 ئازارەكانی جەستەی عاشق بووم
 خستە دەست دێوەزمەكان و
 نگریسەكانی وەهمەوە.
 رۆیشتی و
 دوای رۆیشتنت
 ناسنامەی كچ بوونم هەڵگرتوو
              رەدووی
 گوناهە نەكراوەكانی عەشق كەوتم.
 لە ئازارى بێ تۆیی
 لە قین قسە نەكراوەكانی دڵم
 لە گەڵ شەمشەمە كوێرەكانی بوون
 كەوتمە ئاخاوتن.
 ئێستا
 منم و دابڕان
 منم و پەنجەرەكانی  نەكراوەى
 ژوری بێ پاسەوانى عەشق.
 تەنیایی بووەتە هاورێم
 نازانم لە گەڵ كێ بدوێم.
 شەو و رۆژیش
 لە گەڵ چركەكانی كاتژمێر  درۆ دەكەن.
 نازانم تۆ بڵێ:
 بۆ كێ بدوێم؟
 ئێستا ،كە
 هەناسە لە گەرووم یاخی بووە و
 فرمێسك
 سەردانی كونجە رەشەكانی چاوم ناكات
                     و
 دڵت بوەتە گاشە بەردێك
 سەردانی ژورى دڵم ناكات
 بەڵێن ئەدەم
 بڕوا بكەم بە رۆیشتنت
 بەڵێن ئەدەم
 ئیزن نەدەم
 چیتر نیگاكانت
 خەیاڵی دڵم داگیر بكات و
 بۆی بدوێم
 بەڵێن ئەدەم
   بڕوا  بكەم بە رۆیشتنت.
 
 
    gelarezan @yahoo.com